تيانشان تورى - شينجياڭ گازەتىنىڭ ٴتىلشىسى دۋ جيانحۇي
1 - ايدىڭ 17 - كۇنى بايىنعولين موڭعۇل اۆتونوميالى وبلىسى حىبەي (بايىنعولين وبلىسى) عىلىم - تەحنيكا كاسىپ سالاسى باقشاسى بايىنعولين وبلىسى دوسىتايكى سۋلياۋ كاسىبى شەكتى سەرىكتەستىگىنىڭ ٴوندىرىس سەحىنا بارعاندا، ٴتىلشى ادەمى سۋلياۋ قالتالاردىڭ، سۋسىندىق قۇمىرالارىنىڭ ٴوندىرىس جەلىسىنەن شىعىپ، قوراپتالعاننان كەيىن كۇتىپ تۇرعان جۇك اۆتوكولىكتەرىنە تيەلىپ، شينجياڭنىڭ جەر - جەرىنە جونەلتىلگەنىن كوردى.
بايىنعولين وبلىسى دوسىتايكى سۋلياۋ كاسىبى شەكتى سەرىكتەستىگى − حىبەي ولكەسىنىڭ شينجياڭعا باعىتتامالى كومەكتەسۋ قىزمەتى الدىڭعى شەپ قولباسشىلىق شتابى 2021 - جىلى ەنگىزگەن كاسىپورىن. 2022 ـ جىلى بۇل سەرىكتەستىكتىڭ ورىنداعان ٴونىم قۇنى 30 ميلليون يۋاننان استى. ”وسى ايدا سەرىكتەستىك قۇنى 8 ميلليون يۋاننان استام تاپسىرىس قابىلدادى، ٴبىز كوكتەم مەرەكەسىندە دەمالماي، زاتتى ۋاعىندا تاپسىرۋعا شىنايى كەپىلدىك ەتەمىز“، ـ دەدى بايىنعولين وبلىسى دوسىتايكى سۋلياۋ كاسىبى شەكتى سەرىكتەستىگىنىڭ باس ديرەكتورى پىڭ تاۋ.
تاياۋ جىلداردان بەرى حىبەي ولكەسىنىڭ شينجياڭعا باعىتتامالى كومەكتەسۋ قىزمەتى الدىڭعى شەپ قولباسشىلىق شتابى نازاردى بايىنعولين وبلىسىنىڭ، بيڭتۋان 2 ـ شىسىنىڭ دامۋداعى ورنىن تۇراقتاندىرۋىنا شوعىرلاندىرىپ، ساۋداگەر شاقىرىپ، قارجى ەنگىزۋدى، باقشا رايونىن بىرگە قۇرۋدى ۇزدىكسىز تەرەڭدەتىپ، ىلگەرىندى ـ كەيىندى ”حىبەي (بايىنعولين وبلىسى) عىلىم ـ تەحنيكا كاسىپ سالاسى باقشاسىن“، ”حىبەي (بايىنعولين وبلىسى) ەكولوگيالىق كاسىپ سالاسى باقشاسىن“، ”بيڭتۋان 2 ـ شىسى جوعارى ساپالى دامۋ كاسىپ سالاسى باقشاسىن“ قۇردى. كوپتەگەن كاسىپورىندار ىرگە تەۋىپ، وندىرىسكە قوسىلىپ، كاسىپ سالاسى شوعىرىنىڭ ونىمدىلىگى كۇن سايىن كورنەكتىلەندى.
2022 - جىلى 7 - ايدىڭ 29 - كۇنى حىبەي (بايىنعولين وبلىسى) عىلىم - تەحنيكا كاسىپ سالاسى باقشاسى بايىنعولين وبلىسى گۋاڭرۇي اينەك بۇيىمدار شەكتى سەرىكتەستىگىنىڭ ٴوندىرىس سەحىندا جۇمىسشىلار اينەكتى كەسىپ، قوراپتاۋدا (ماتەريال سۋرەت). سۋرەتتى تيانشان تورى - شينجياڭ گازەتىنىڭ ٴتىلشىسى دۋ جيانحۇي تۇسىرگەن
يانچي ويپاتى بايىنعولين وبلىسىنىڭ قىزاناق، قىزىل بۇرىش سياقتى اۋىل شارۋاشىلىق ونىمدەرىنىڭ باستى ەگىمشىلىك بازاسى. شينجياڭ چىنفان جەمىس - جيدەك، كوكونىس ونىمدەرى شەكتى سەرىكتەستىگى 150 ميلليون يۋان قارجى قوسىپ، يانچي حۇيزۋ اۆتونوميالى اۋدانى حىبەي (بايىنعولين وبلىسى) ەكولوگيالىق كاسىپ سالاسى باقشاسىندا اۋىل شارۋاشىلىق ونىمدەرىن مانەرلەۋ زاۆودىن قۇردى. قازىر 1 - مەرزىمى سالىنىپ بولىپ وندىرىسكە قوسىلىپ، كۇنىنە جاس قىزاناق مانەرلەۋ قۋاتى 3500 تونناعا جەتىپ، جەرگىلىكتى ورىنداعى ديقانداردىڭ كىرىسىن ارتتىرۋدى ٴونىمدى تۇردە جەبەدى.
”بۇل نىسان 3 مەرزىمگە ٴبولىپ سالىنادى، 2 – مەرزىمىنىڭ قۇرىلىسى بيىل كوكتەم مەرەكەسىنەن كەيىن باستالادى، سالىنىپ بولعان سوڭ كۇنىنە جاس قىزىل بۇرىشتىڭ، جاس پيازدىڭ ٴار قايسىسىنان 1000 توننا مانەرلەنەدى. نىسان تۇگەلدەي سالىنىپ بولعاننان كەيىن، مەجەمەن جىلدىق ٴونىم قۇنى 450 ميلليون يۋان بولىپ، جوعارىعا 20 ميلليون يۋان سالىق تاپسىرىپ، 200دەن استام ادامدى جۇمىستانۋعا جەتەكتەيدى“، - دەدى حىبەي ولكەسىنەن شينجياڭعا كومەككە كەلگەن كادر، يانچي اۋدانى ونەركاسىپ باقشا رايونى پارتيا قىزمەتى كوميتەتىنىڭ ورىنباسار شۋجيى، باسقارۋ كوميتەتىنىڭ مەڭگەرۋشىسى اي جىڭ.
كاسىپ سالاسى ارقىلى شينجياڭعا كومەكتەسۋ قىزمەتىن ويداعىداي ىستەۋ ٴۇشىن، حىبەي ولكەسىنىڭ شينجياڭعا باعىتتامالى كومەكتەسۋ قىزمەتى الدىڭعى شەپ قولباسشىلىق شتابى ”اماناتتاپ باسقارۋ ۇلگىسىندە“ باقشا رايونىن بىرگە قۇرۋ جانە اتتامالى جەر ساياساتىن قولدانىپ، حىبەي ولكەسىنىڭ شينجياڭعا باعىتتامالى كومەكتەسۋ قىزمەتى الدىڭعى شەپ قولباسشىلىق شتابى ساۋداگەر شاقىرۋ ورتالىعىن قۇرىپ، شينجياڭعا كومەككە كەلگەن كادرلاردى، دارىندىلاردى دالمە ـ ٴدال تاڭداپ جىبەرىپ، كاسىپتىك ساۋداگەر شاقىرۋ ۇيىمدارىن بەلسەنە ەنگىزىپ، بارلىق قىزمەتكەرلەردىڭ ساۋداگەر شاقىرىپ، قارجى ەنگىزۋىن كۇشەيتىپ، كاسىپ سالاسى شوعىرىنىڭ دامۋىن جەبەدى.
”2020 ـ جىلدان بەرى، ٴبىز بايىنعولين وبلىسىنا، بيڭتۋان 2 ـ شىسىنا 191 ساۋداگەر شاقىرىپ قارجى ەنگىزۋ نىسانىن ەنگىزىپ، جيىنى 65 ميلليارد 19 ميلليون يۋان قارجى قوسۋدى جوسپارلادىق، 5 ميلليارد يۋانعا تاياۋ قارجى قوسىلىپ، 56 كاسىپورىن وندىرىسكە قوسىلدى“، ـ دەدى بايىنعولين وبلىستىق حالىق ۇكىمەتى كەڭسەسىنىڭ ورىنباسار مەڭگەرۋشىسى، حىبەي ولكەسىنىڭ شينجياڭعا كومەكتەسۋ قىزمەتى الدىڭعى شەپ قولباسشىلىق شتابى كاسىپ سالاسى ارقىلى شينجياڭعا كومەكتەسۋ باسقارماسىنىڭ باستىعى دۇڭ ۋي.
بيڭتۋان 2 - شىسى 37 - تۋانىنا ورنالاسقان شينجياڭ زىتيان سۋ ۇنەمدەۋ عىلىم - تەحنيكا شەكتى سەرىكتەستىگى جاسىل قۇبىر جولى، ەگىس اتىزى سۋ ۇنەمدەۋ جابدىقتارى، اۆتوماتتى سۋارۋدى مەڭگەرۋ جۇيەسىن زەرتتەۋ - اشۋ جانە ٴوندىرۋ، ساتۋدى ٴبىر تۇلعالاندىرىپ ماماندانعان سەرىكتەستىك. اتالعان سەرىكتەستىكتىڭ باس سەرىكتەستىگى حىبەي زىتيان سۋ ۇنەمدەۋ عىلىم - تەحنيكا شەكتى سەرىكتەستىگى ”حىبەي ولكەسىنىڭ ارنايىلاندىرىلعان، كەمەلدەندىرىلگەن، ەرەكشەلەندىرىلگەن، جاڭاشالاندىرىلعان ۇلگى كورسەتۋ كاسىپورنى“، ”حىبەي ولكەسىنىڭ جوعارى، جاڭا تەحنيكا كاسىپورنى“. 2022 ـ جىلى شينجياڭعا كومەككە كەلگەن كادرلاردىڭ تانىستىرۋىمەن ەنگىزىلگەننەن كەيىن، 8 ـ ايدا زاۆود سالۋ جۇمىسى باستالعاننان 10 ـ ايدا رەسمي وندىرىسكە قوسىلعانعا دەيىن نەبارى 2 اي ۋاقىت جۇمسالىپ، سول جىلى 23 ميلليون يۋاننان استام ٴونىم قۇنىن جۇزەگە اسىردى.
”سەرىكتەستىكتىڭ تەز ارادا وندىرىسكە قوسىلۋى شينجياڭعا كومەككە كەلگەن كادرلار مەن جەرگىلىكتى ۇكىمەت تاراۋلارىنىڭ جوعارى ٴونىمدى قىزمەت وتەۋىنىڭ جانە كاسىپ سالاسى تىزبەگىنىڭ بىرتىندەپ كەمەلدەنۋىنىڭ ارقاسى“. وسى سەرىكتەستىكتىڭ باس ديرەكتورى شاڭ لەي بىلاي دەدى: قازىر شينجياڭنىڭ وسى زامانعى اۋىل شارۋاشىلىعى دامۋ ساتىسىندا تۇر، بازاردىڭ كومەسكى كۇشى زور. سەرىكتەستىك بيىل 100 ميلليون يۋان قارجى قوسىپ، چەرچەن اۋدانىندا جاڭادان ٴبىر زاۆودتى سالۋدى جوسپارلاپ وتىر، باستىسى ٴوندىرىستى اۆتوماتتاندىرىپ سۋارۋدى مەڭگەرۋ جۇيەسى جابدىقتارىن زەرتتەپ وندىرەدى، وندىرىسكە قوسىلعاننان كەيىنگى جىلدىق ٴونىم قۇنى 100 ميلليون يۋاننان اساتىندىعى مەجەلەنۋدە.
حىبەي ولكەسىنىڭ شينجياڭعا باعىتتامالى كومەكتەسۋ قىزمەتى الدىڭعى شەپ قولباسشىلىق شتابىنىڭ قارجىلاي قولداۋ، كاسىپ سالاسى ارقىلى جەتەكتەۋىندە حىبەي ولكەسىندە شينجياڭنىڭ ەرەكشە اۋىل شارۋاشىلىق ونىمدەرى دۇكەنىنەن 40ى، ساتۋ ارناۋلى سورەسىنەن 191ى قۇرىلدى. 2022 ـ جىلى حىبەي ولكەسى شينجياڭنىڭ 189 مىڭ 700 توننا اۋىل شارۋاشىلىق قوسىمشا ونىمدەرىن ساتۋىنا كومەكتەسىپ، ساتۋ سوماسى 2 ميلليارد 860 ميلليون يۋانعا جەتتى.
2022 ـ جىلى حىبەي ولكەسى حىبەي شينفادي اۋىل شارۋاشىلىق قوسىمشا ونىمدەرى شەكتى سەرىكتەستىگىن بايىنعولين وبلىسىمەن، بيڭتۋان 2 ـ شىسىمەن سەلبەستىك كەلىسىمىنە قول قويىسۋعا قۋزاپ، اتالعان سەرىكتەستىكتىڭ بايلىق باسىمدىعىنا سۇيەنىپ، بەيجيڭ − تيانجين − حىبەيگە باعىتتالعان، ەل ٴىشى ـ سىرتىن شارپيتىن ساۋدالاۋ جەتەكشىسى − شينجياڭ بايىنعولين وبلىسى اۋىل شارۋاشىلىق ەرەكشە ونىمدەرىن كورمەلەۋ، ساۋدالاۋ ورتالىعىن كۇش سالا قالىپتاستىردى. ”كەزەكتە وسى اۋىل شارۋاشىلىعى ەرەكشە ونىمدەرىن كورمەلەۋ، ساۋدالاۋ ورتالىعى سالىنىپ بولىپ پايدالانۋعا بەرىلىپ، كورلا المۇرتى سياقتى 70 نەشە ٴتۇرلى شينجياڭ اۋىل شارۋاشىلىعى ەرەكشە ونىمدەرىن جەلىدە جانە جەلىدەن تىس كورمەلەۋدى، ساتۋدى جۇزەگە اسىردى“. دۇڭ ۋي بىلاي دەدى: كەلەسى قادامدا كاسىپتىك دارىندىلاردى ەنگىزىپ، ورتالىقتىڭ تيجارات جوباسىن كەمەلدەندىرىپ، ورتالىقتىڭ قامتۋ، جەتەكتەۋ رولىن ساۋلەلەندىرىپ، شينجياڭنىڭ اۋىل شارۋاشىلىق قوسىمشا ونىمدەرىنىڭ ساتىلۋىنا جوعارى ونىمدىلىكپەن دەم بەرەمىز.
بايىنعولين وبلىستىق پارتكومنىڭ ورىنباسار شۋجيى، حىبەي ولكەسىنىڭ شينجياڭعا باعىتتامالى كومەكتەسۋ قىزمەتى الدىڭعى شەپ قولباسشىلىق شتابىنىڭ قولباسشىسى شۇي فۋجۇن بىلاي دەدى: بيىل شينجياڭعا كومەككە كەلگەن بارلىق كادر، دارىندىلار پارتيا 20 - قۇرىلتايىنىڭ رۋحىن ىشكەرىلەي ۇيرەنۋدى، ۇگىتتەۋدى، دايەكتىلەندىرۋدى نەگىزگى جەلى ەتىپ، كاسىپ سالاسى ارقىلى شينجياڭعا كومەكتەسۋ سەرپىنىن ۇزدىكسىز ارتتىرىپ، شينجياڭعا كومەكتەسۋ نىسان قارجىلارىنىڭ تياناقتانىپ ونىمدىلىك كورسەتۋىن تىڭعىلىقتى ىلگەرىلەتىپ، حىبەي ولكەسىنىڭ كاسىپ سالاسى ارقىلى شينجياڭعا كومەكتەسۋىنىڭ ”دارەجەسى وسىرىلگەن ۇلگىسىن“ قالىپتاستىرۋعا كۇش سالىپ، كورىكتى شينجياڭ قۇرۋعا حىبەيدىڭ كۇش - قۋاتىن بەلسەنە ارنايدى.
اۋدارعان: قادىر ماقان
