2023 - جىلعى كوكتەم مەرەكەسىن توپتىق قۇتتىقتاۋ ماجىلىسىندە سويلەنگەن ءسوز
(2023 - جىلى 1 - ايدىڭ 20 - كۇنى)
شي جينپيڭ
جولداستار، دوستار:
ەگىنشىلىك كالەندارى بويىنشا گۇيماۋ قويان جىلعى كوكتەم مەرەكەسى كەلۋ الدىندا تۇر. بۇگىن ءبىز وسى ارادا شاتتىقپەن باس قوسىپ، كونە جىلدى اتتاندىرىپ، جاڭا جىلدى قارسى الىپ، كوكتەم مەرەكەسى قۋانىشتى كۇنىن بىرگە قۇتتىقتاپ وتىرمىز.
ەڭ الدىمەن، مەن پارتيا ورتالىق كوميتەتى مەن مەملەكەتتىك كەڭەس اتىنان كوپشىلىككە مەرەكەلىك ىزگى تىلەك جولدايمىن! بۇكىل ەلدەگى ءار ۇلت حالقىنىڭ، شياڭگاڭ ەرەكشە اكىمشىلىك رايونىنداعى باۋىرلاستاردىڭ، اۋمىن ەرەكشە اكىمشىلىك رايونىنداعى باۋىرلاستاردىڭ، تايۋاندىق باۋىرلاستاردىڭ جانە شەتەلدەگى چياۋمين باۋىرلاستاردىڭ مەرەكەسىن قۇتتىقتايمىن! كوپشىلىكتىڭ كوكتەم مەرەكەلەرىنىڭ كوڭىلدى بولۋىن تىلەيمىن!
ءوتۋ الدىندا تۇرعان ەگىنشىلىك كالەندارى بويىنشا رىنيىن بارىس جىلى − پارتيا مەن مەملەكەتتىڭ دامۋ تاريحىنداعى اسا ماڭىزدى ءبىر جىل بولدى. اساۋ تولقىندى حالىقارالىق ورتا مەن ەل ءىشىنىڭ جاپالى دا ماشاقاتتى رەفورما، دامۋ، ورنىقتىلىق مىندەتى الدىندا بۇكىل پارتيا، بۇكىل ارميا، بۇكىل ەلدەگى ءار ۇلت حالقى قيىندىققا قارسى اتتانىپ، ىنتىماقتاسا كۇرەس جاساپ، ايداعارداي سامعاپ، جولبارىستاي ۇمتىلاتىن ارىنعا، جولبارىس اپانىنا باتىلدىقپەن كىرەتىن جىگەرگە، مىزعىماس قايسارلىققا سۇيەنىپ، سوتسياليستىك وسىزامانداندىرۋ قۇرىلىسىنىڭ جاڭا تاراۋىن جازدى.
ءبىز پارتيا 20 - قۇرىلتايىن جەڭىسپەن اشتىق، جاپپاي سوتسياليستىك وسىزاماندانعان مەملەكەت قۇرۋدىڭ ايبىندى جوباسىن تۇراقتاندىردىق. بۇكىل پارتيا، بۇكىل ارميا، بۇكىل ەلدەگى ءار ۇلت حالقى تاسقىنداعان جىگەرمەن جاڭا جورىققا قادام تاستاپ، جاڭا نىسانانى بەتكە الىپ، قايراتتانا تاعى اتتاندى!
ءبىر جىلدان بەرى، ءبىز جاڭا دامۋ ۇستانىمىن جاپپاي دايەكتىلەندىرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، ىندەتكە توسقاۋىل قويۋ، ەكونوميكانى ورنىقتىرۋ، دامۋ حاۋىپسىز بولۋ تالابىن جاپپاي تياناقتاندىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى كۇش سالا ىلگەرىلەتتىك، ەكونوميكا ارتۋدى ساقتاپ، استىقتان قۋانىشتى تۇردە مول ءونىم الىنىپ، جۇمىستاندىرۋ، زات باعاسى نەگىزىنەن ورنىقتى بولىپ، حالىق تۇرمىسىن قامتاماسىز ەتۋ تىڭعىلىقتى ىستەلىپ، كەدەيلىكتەن ارىلتۋدان قامال الۋ جەتىستىگى ۇزدىكسىز بەكەمدەلىپ، عىلىم - تەحنيكا جەتىستىگىندە قۋانىشتى حابار تولاسسىز تارالىپ، ەكولوگيالىق ورتا ءۇرتىس جاقسارىپ، مەملەكەت قورعانىسى مەن ارميانى وسىزامانداندىرۋدا نىق قادام تاستالىپ، پارتيانى جاپپاي قاتاڭ باسقارۋ ىشكەرىلەي ىلگەرىلەتىلىپ، قوعامدىق كەلەلى جاعداي ورنىقتىلىقتى ساقتادى.
ءبىز حالىقتى بارىنەن جوعارى قويۋعا، ءومىردى بارىنەن جوعارى قويۋعا تاباندى بولىپ، ۆيرۋس وزگەرىسى مەن ىندەتتەن ساقتانۋ جاعدايىنا نەگىزدەلىپ، ىندەتتەن ساقتانۋ - تىزگىندەۋ شارالارىن ۇزدىكسىز ساپالىلاندىرىپ، حالىقتىڭ ءومىرىنىڭ حاۋىپسىزدىگى مەن دەنساۋلىعىن ەڭ جوعارى دەڭگەيدە قورعادىق، ەكونوميكالىق، قوعامدىق تۇرمىسقا جەتكىزەتىن ىقپالىن ەڭ جوعارى شەكتە ازايتتىق. قازىر ىندەتتەن ساقتانۋ ءالى دە قيىن كەزەڭدە تۇرعانىمەن شۋاقتى كۇندەر الدىمىزدا، ءبىز جوعارىدان تومەنگە دەيىن ءبىر نيەتتە بولىپ، تاباندىلىق كورسەتسەك عانا، ىندەتتەن ساقتانۋدىڭ ەڭ سوڭعى جەڭىسىنە، ءسوز جوق، قول جەتكىزە الامىز.
ءبىز بەيجيڭ قىسقى وليمپيادا سپورت جارىسىن، قىسقى مۇگەدەكتەر وليمپيادا سپورت جارىسىن ءساتتى وتكىزدىك، دۇنيە جۇزىنە قاراپايىم، ۇنەمشىل، حاۋىپسىز، تارتىمدى وليمپيادا سپورت جارىسىنىڭ سالتاناتتى جينالىسىن ۇسىنىپ، جارىس وتكىزۋ جانە جارىس ناتيجەسى سىندى ەكى جاقتان قوماقتى تابىسقا قول جەتكىزدىك، بەيجيڭ الەمدەگى تۇڭعىش ”قوس وليمپيادا قالاسىنا“ اينالدى.
ءبىز شياڭگاڭنىڭ وتان قۇشاعىنا ورالعاندىعىنىڭ 25 جىلدىعىن سالتاناتپەن قۇتتىقتادىق، شياڭگاڭ، اۋمىن گۇلدەنىپ - كوركەيۋدى، ورنىقتىلىقتى ۇزدىكسىز ساقتادى. ءبىز بولشەكتەۋشىلىككە قارسى تۇرۋ، كيلىگۋگە قارسى تۇرۋ كەلەلى كۇرەسىن باتىل ورىستەتىپ، ەكى جاعالاۋ قاتىناسىنىڭ ىرىقتىلىق ۇقىعىن مىقتاپ يگەردىك. ءبىز جۇڭگوشا ءىرى ەل ديپلوماتياسىن كۇش سالا ىلگەرىلەتىپ، دوستارمەن كوپ تانىسىپ، اۋمالى - توكپەلى حالىقارالىق ورتاعا ورنىقتىلىق ۇستەدىك.
وسى ءبىر جىلداعى ناتيجەلەر وڭاي - وسپاق قولعا كەلمەدى، پارتيا مەن حالىقتىڭ بىرگە قۇلشىنۋىنان كەلدى، ەڭبەك ەتۋىنەن كەلدى، كۇرەس جۇرگىزۋىنەن كەلدى. اماليات پارتيا مەن حالىق باستان - اياق بىرگە تۇرعاندا، بىرگە ويلاعاندا، بىرگە ىستەگەندە عانا، ءارقانداي داۋىلدىڭ ءبىزدىڭ قۇرىش ەرىك - جىگەرىمىزدى مۇقالتا المايتىندىعىن، ءارقانداي قيىندىقتىڭ ءبىزدىڭ ەكپىندى اياق الىسىمىزدى بوگەي المايتىندىعىن كورسەتتى.
جولداستار، دوستار!
2023 - جىل − پارتيا 20 - قۇرىلتايىنىڭ رۋحىن جاپپاي دايەكتىلەندىرۋدەگى باستاما جىل، ءۇمىت پەن سىن - سايىس قاتار ءومىر سۇرەدى. ءبىز ورنىقتىلىقتى ماڭداي الدى ورىنعا قويۋعا، ورنىقتىلىق بارىسىندا ىلگەرىلەۋگە تاباندى بولىپ، ەل ءىشى، حالىقارا سىندى ەكى كەلەلى جاعدايدى اناعۇرلىم ويداعىداي ءبىر تۇتاس جوسپارلاپ، ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋدى اناعۇرلىم ويداعىداي ءبىر تۇتاس جوسپارلاپ، دامۋ مەن حاۋىپسىزدىكتى اناعۇرلىم ويداعىداي ءبىر تۇتاس جوسپارلاپ، رەفورما جاساۋدى، ەسىك اشۋدى جاپپاي تەرەڭدەتىپ، ەكونوميكالىق اينالىمنىڭ تۇتاس تۇلعالىق جاقسارۋىن قۇلشىنا جۇزەگە اسىرىپ، حالىق تۇرمىسىنىڭ ءۇرتىس جاقسارۋىن ىلگەرىلەتۋىمىز كەرەك. ءبىز سەنىمدى بەكەمدەپ، قايسارلىقپەن سايىساتىن بولساق عانا، جاڭا جورىقتىڭ تاماشا باستاماسىن، ءسوزسىز، جۇزەگە اسىرا الامىز.
اقيقات توتەنشە قاراپايىم بولادى، ناقتى ىستەۋ ماڭىزدى ورىندا تۇرادى. جاڭا جورىق − داڭق پەن ارمانعا تولى ۇزاق جورىق، توتە جول جوق، تەك ىسكەرلىك عانا كەرەك. تاباندىلىق كورسەتىپ، باس الماي قاجىرلىلىقپەن ىستەپ، بوس قيالعا سالىنباۋ، قۇر اتاق قۋماۋ كەرەك؛ شىنشىل، ۇيرەنۋگە بەيىم بولىپ، ءىس جۇزىندىككە قۇرمەت ەتىپ، زاڭدىلىققا قايشى كەلمەۋ، كوزسىزدىككە، الاڭعاسارلىققا سالىنباۋ كەرەك؛ شىندىققا جۇگىنىپ، ناقتى ءىس ىستەپ، ناقتى ونىمدىلىككە ءمان بەرىپ، نەمقۇرايدىلىق ىستەمەۋ، جىلپوستىق ىستەمەۋ كەرەك. قۇلشىنا ىستەگەن ادام قاشاندا تابىسقا جەتەدى، ارىماي - تالماي ىلگەرىلەگەن ادام قاشاندا ماقساتىنا جەتەدى، تاريح ىسكەر جانداردىڭ ءۇمىتىن جەردە قالدىرمايدى. ءبىز ناقتى ىستەۋگە سۇيەنىپ، شۇعىلالى وتكەندى جاراتتىق، سونداي - اق ناقتى ىستەۋگە سۇيەنىپ، اناعۇرلىم كوركەم بولاشاقتى جاراتۋىمىز كەرەك.
جولداستار، دوستار!
جۇڭحۋانىڭ ءداستۇرلى مادەنيەتىندە قويان − باق قويان، اق قويان دەپ اتالادى، زەرەكتىك پەن قاعىلەزدىككە، كىرشىكسىزدىك پەن مەيىرىمدىلىككە، تىنىشتىق پەن ىزگىلىككە ۋاكىلدىك ەتەدى. قۇت قويان − جاقسىلىق بەلگىسى، ول جۇڭحۋانىڭ بايتاق دالاسىنىڭ بارعان سايىن تىنىش تا بەرەكەلى بولاتىندىعىنىڭ، تىرشىلىك تىنىسى قاۋلايتىندىعىنىڭ، جاندى دا جالىندى بەينەگە شوماتىندىعىنىڭ سيمۆولى. ەگىنشىلىك كالەندارى بويىنشا، قويان جىلىندا بۇكىل ەل حالقىنىڭ، اسىرەسە، قالىڭ جاستاردىڭ قويانداي شيراقىلىقپەن قايراتتانا العا ىلگەرىلەپ، جىلدام ۇمتىلىپ، ءار سالا، ءار كاسىپتە سالاۋاتىن بارىنشا ايگىلەۋىن، كەلبەتىن نەعۇرلىم كورسەتۋىن ءۇمىت ەتەمىن.
جالپى قاۋىم باس قوساتىن وسى كەزدە تاعى دا كوپتەگەن ادامدار قىزمەت ورىندارىنان تاپجىلماي، جۇڭگو ارمانىن بىر نيەتپەن بىرگە سومداۋ ۇلى جورىعىندا وزدەرىنىڭ ايشىقتى ىزدەرىن قالدىرىپ وتىر. ءبىز وسى قالتقىسىز ۇلەس قوسۋشىلارعا قۇرمەت بىلدىرەمىز!
سوڭىندا كوپشىلىكتىڭ وتباسىنداعىلارمەن باس قوسۋىن، دەندەرىنىڭ ساۋ، قويان جىلدارىنىڭ قۇتتى، ىستەرىنىڭ ءساتتى بولۋىن تىلەيمىن!
كوپشىلىككە راقىمەت!
(شينحۋا اگەنتتىگىنىڭ 1 - ايدىڭ 20 - كۇنى بەيجيڭنەن بەرگەن حابارى)
