باركول قازاق اۆتونوميالى اۋدانى حۋايۋان اۋىلى حۋاجۋاڭزى قىستاعى
ءمولدىردىڭ وتباسىنداعىلار بەيجيڭدەگى جاقىندارىنا كوكتەم مەرەكەسى بايلانىسىمەن ىزگى تىلەك جولدادى
□ انار بۇلت \ شينجياڭ گازەتىنىڭ ءتىلشىسى ۋي يۇڭگۇي، ەرىكتى ءتىلشى جاڭ شينلۇڭ
”اعاي سالەمەتسىز بە! مەن ابدەن ساۋىقتىم، بيىل 6 - جىلدىقتا وقىپ جاتىرمىن. مەرەكە جاقىنداپ قالدى، وتباسىمىزداعىلار ءسىزدى شينجياڭعا قوناققا كەلۋگە شاقىرادى“...
1 - ايدىڭ 15 - كۇنى ءمولدىر ەلىسقان بەيجيڭدەگى جاقىنى جياۋ جيانچياڭنىڭ بەينەتەلەفونىن جالعادى. سويلەسكەندە ءمولدىر اسەرلەنگەنىنەن كوزىنە جاس الدى.
ءمولدىر بيىل 14 جاستا، قۇمىل قالاسى باركول قازاق اۆتونوميالى اۋدانى حۋايۋان اۋىلى حۋاجۋاڭزى قىستاعىنان، تۋىلعاننان كەيىن تۋما حاراكتەرلى ومىرتقا سۇيەگىنىڭ ءبىر جاعىنا قيسايۋ ناۋقاسىنا شالدىققاندىعى تۋرالى دياگنوز قويىلادى. 10 جاستان بۇرىن ۇيىندەگىلەر ونى تالاي رەت قۇمىل قالاسىنداعى، باركول اۋدانىنداعى شيپاحانالارعا اپارىپ كورسەتكەنىمەن، وپەراتسيانىڭ قيىندىعى زور بولعاندىقتان، ەمدەۋدى توقتاتۋعا ءماجبۇر بولادى.
2018 - جىلى 7 - ايدا ورتالىق راديو - تەلەۆيزيا باس ستانسياسىنىڭ رەجيسسەرى جياۋ جيانچياڭ باركول ساحاراسىنا كەلىپ كورىنىس الادى. ول ساحارانىڭ كوركەم كورىنىسىنە ەلىتىپ جۇرگەندە، ءمولدىردىڭ اتاسى ءمولدىردى ەرتىپ قوي ايداپ ءجۇرىپ، اپپاراتقا ءتۇسىپ قالادى. جياۋ جيانچياڭ بەلى بۇكىرەيىپ، ارەڭ كەتىپ بارا جاتقان وسى ءبۇلدىرشىندى كورەدى. ساحارادا ءمولدىر فيليمگە ءتۇسىرۋ - جاساۋ گرۋپپاسىنداعىلارعا بىرنەشە قازاق حالىق اندەرىن ايتىپ بەرەدى. اسەم اۋەن، كىرشىكسىز جانار كوپشىلىكتى قاتتى اسەرلەندىرەدى.
باركولدە ايالداعان كەزدە جياۋ جيانچياڭ ءمولدىردىڭ اۋرۋ جاعدايىن تاپتەشتەي ۇعىسىپ، ونىڭ اۋرۋ ازابىنان قۇتىلۋىنا كومەكتەسۋگە بەكيدى.
جياۋ جيانچياڭ بەيجيڭ قالالىق جىشان الەۋمەتتىك يگىلىك قورىنىڭ باس حاتشىسى مياۋ چياڭعا حابارلاسىپ، ءمولدىردىڭ اۋرۋ جاعدايىن ەگجەي - تەگجەيلى بايانداپ بەرەدى. بەيجيڭ قالالىق جىشان الەۋمەتتىك يگىلىك قورى مولدىرگە كومەك كورسەتۋدى ۇيعارىپ، دەرەۋ بەيجيڭ داشۋەسىنە قاراستى 1 - شيپاحانا جۇرەك قان تامىر ىشكى اۋرۋلار ءبولىمىنىڭ شيپاگەرى ۋ لينگە حابارلاسىپ، سولار ارقىلى وسى شيپاحانانىڭ سۇيەك ءبولىمىنىڭ مەڭگەرۋشىسى، دوكتورانت جەتەكشىسى لي چۇندى پروفەسسور باستاعان ومىرتقا سۇيەگىنىڭ ءبىر جاعىنا قيسايۋ اۋرۋىن ەمدەۋ ۇجىمىنا حابارلاسادى. لي چۇندى پروفەسسور ءمولدىردىڭ اۋرۋ جاعدايىن ەگجەي - تەگجەيلى ۇعىسقاننان كەيىن، وعان تۇزەتۋ وپەراتسياسىن جاساۋدى ۇيعارادى.
2018 - جىلى 10 - ايدا ءمولدىردىڭ وتباسىنداعىلار بەيجيڭگە كەلىپ، بەيجيڭ داشۋەسىنە قاراستى 1 - شيپاحاناعا جايعاسادى. لي چۇندى پروفەسسوردىڭ باستاۋىندا، شيپاحانانىڭ سۇيەك بولىمىندەگى ماماندار مولدىرگە بىرلەسىپ دياگنوز قويىپ ءارى ەمدەۋ جوباسىن تالقىلاپ، دەرەۋ ءمولدىردىڭ كەۋدە ومىرتقاسى سىندى قيسايۋى ەڭ اۋىر بولىكتەرىن تۇزەپ تۇراقتاندىرىپ، ماسەلەنى تۇبەگەيلى شەشىپ، بۇدان كەيىن ۇنەمى بەيجيڭگە كەلىپ تەكسەرتۋ قيىنشىلىعىن ازايتۋدى ۇيعارادى. سول جىلى 10 - ايدىڭ 19 - كۇنى ءمولدىر وپەراتسيا بولمەسىنە كىرەدى. وپەراتسيا بولمەسىنە كىرۋدەن بۇرىن، ءمولدىردىڭ اكەسى باس وپەراتسياشى ۋاڭ يۇي شيپاگەردى قۇشاقتاپ، كوز جاسىن كولدەتەدى.
ومىرتقا سۇيەگىنىڭ ءبىر جاعىنا قيسايۋ وپەراتسياسىنىڭ حاۋىپ - قاتەرى وتە زور، قۋىس ومىرتقانىڭ ءىشى ىرىمشىكتەي جۇمساق جۇلىن، قۋىسىندا شىم - شىتىرىق ورنالاسقان، بۇكىل دەنەنىڭ ءاربىر جەرىنە تۇتاساتىن نەرۆ تامىرلارى بار، ءارقانداي ءبىر نەرۆ زاقىمدالسا دا اۋىر زارداپ قالادى. وپەراتسيا ۇجىمى لي چۇندى پروفەسسور تۇراقتاندىرعان جوبا بويىنشا، دەن قويا ىستەپ، ەشقانداي اعاتتىق تۋدىرمايدى. وپەراتسيا ءساتتى بولادى.
2018 - جىلى 10 - ايدىڭ 30 - كۇنى وپەراتسيادان كەيىن اۋرۋدان ايىققان ءمولدىر ۇيگە قايتاتىن پويەزعا وتىرادى. ۆاگزالدا ءمولدىردىڭ وتباسىنداعىلار ەمدەۋ - كۇتىمدەۋ قىزمەتكەرلەرىنىڭ قولىنان قىسا ۇستايدى.
بەيجيڭنەن قايتىپ كەلگەننەن كەيىن، ءمولدىر جايراڭداي تۇسەدى. كلاسىندا ول باسقالارعا پەيىلدى كومەكتەسەدى، ناتيجەسى وزاتتار قاتارىنان ورىن الىپ، ساباقتاستارى مەن مۇعالىمدارىنىڭ ماداقتاۋىنا يە بولادى.
”بەيجيڭدەگى اعايلار مەن اتايلار مەنىڭ جاقىندارىم، مەن سولار سياقتى باسقالارعا كومەكتەسەمىن. مەن ەرجەتكەننەن كەيىن شيپاگەر بولىپ، اناعۇرلىم كوپ ادامدى اۋرۋ ازابىنان قۇتقارامىن“، - دەيدى ءمولدىر.
”ءبىزدىڭ ۇيدەگىلەر بەيجيڭدەگى جاقىندارىمىزدىڭ مەيىرىمىن ۇمىتپايمىز. كوكتەم مەرەكەسى تاياپ قالدى، ءبىز جاقىندارىمىزعا كوكتەم مەرەكەسى بايلانىسىمەن ىزگى تىلەك جولدادىق، ولاردىڭ شينجياڭعا كەلىپ قوناق بولۋىن ءۇمىت ەتەمىز“، - دەيدى ءمولدىردىڭ اجەسى شولپان ايانقان.
”بەيجيڭدەگى جاقىندارى ءمولدىردىڭ جۇرەگىنە سۇيىسپەنشىلىكتىڭ تۇقىمىن سەپتى، ءبىز ونىڭ تامىر تارتىپ، بۇرشىك جارۋىنا مۇمكىندىك جاساۋىمىز كەرەك“. حۋاجۋاڭزى قىستاق تۇرعىندار كوميتەتىنىڭ مۇشەسى جۋ يانجۇي بىلاي دەدى: قىستاق تۇرعىندار كوميتەتى سۇيىسپەنشىلىك ۇتىلامالى تاياقشاسىن تاپسىرىپ الدى، 4 جىلدان بەرى ءمولدىردىڭ تۇرمىسى مەن ۇيرەنۋىنە ۇنەمى كوڭىل ءبولىپ كەلەدى. الداعى جەردە ءبىز تاعى دا مولدىرگە كومەك كورسەتىپ، ءمولدىردىڭ ساۋ - سالامات بوي جەتۋىنە مۇمكىندىك جاسايمىز.
