شينجياڭ مەديتسينا داشۋەسىنە قاراستى 4 - شيپاحانا (اۆتونوميالى رايوندىق جۇڭي شيپاحاناسى) سالماقتى اۋرۋلار مەديتسينا ورتالىعى
” ناۋقاستار ادەتتەگى ناۋقاستار بولمەسىنە اۋىستىرىلدى، بۇل ءبىزدىڭ كوڭىلىمىز ەڭ جايلاناتىن ءىس“
□انار بۇلت \ شينجياڭ گازەتىنىڭ ءتىلشىسى سۋ لۋپيڭ
13 - توسەكتەگى ناۋقاس قايتالامالى سىنىق وپەراتسياسىنان كەيىن باسقا بولىمگە اۋىستىرىلدى، 1 - ايدىڭ 20 - كۇنى تۇسكى كەزەكتە تىنىس جولىنا وتكىزىلگەن تۇتىكشە ءساتتى الىندى؛
4 - توسەكتەگى ناۋقاسقا 1 - ايدىڭ 21 - كۇنى ساعات 21دە توسەگىنىڭ قاسىندا قان ءسۇزۋ ەمدەۋى جاسالدى، ارادا تۇتىكشە بىتەلىپ قالعاندىقتان، سۇزگى اۋىستىرىلدى؛
7 - توسەكتەگى ناۋقاس 1 - ايدىڭ 21 - كۇنى كەشتە قاتتى بەيمازالانعاننان كەيىن، تىنىشتاندىرۋ ۋكولىن قۇيعان سوڭ جاقساردى...
1 - ايدىڭ 22 - كۇنى ساعات 10دا شينجياڭ مەديتسينا داشۋەسىنە قاراستى 4 - شيپاحانا (اۆتونوميالى رايوندىق جۇڭي شيپاحاناسى) سالماقتى ناۋقاستاردى باقىلاۋ بولمەسىنىڭ كەزەك وتكىزىپ بەرۋ - وتكىزىپ الۋ بارىسىندا كەزەكشى شيپاگەرلەر لياۋ گۋاڭچۇڭ مەن يۋان گوشياڭنىڭ ناۋقاستار جاعدايىنان بەرگەن مالىمەتىن زەر سالا تىڭداعاننان كەيىن، وسى شيپاحانانىڭ سالماقتى ناۋقاستار مەديتسينا ورتالىعىنىڭ مەڭگەرۋشىسى چىن جيان ەمدەۋ - كۇتىمدەۋ ۇجىمىن باستاپ بولمەلەردى تەكسەردى.
”قورەكتىكپەن قامداۋ جەتكىلىكتى مە“؟ ”ساۋىقتىرۋ بولىمىنە حابارلاسىپ، وعان جۇتىنۋ قىزمەتى جاتتىعۋىن جاساتساڭدار بولادى“. ”ەلەكتروكارديوگراممالىق تەكسەرۋ جۇرگىزىلدى مە؟ مي قان تامىرى توسىلعان، ءبىراق جۇرەك قان تامىرى دا توسىلعان بولۋى مۇمكىن“. ءاربىر توسەكتەگى ناۋقاستى تەكسەرگەندە، چىن جيان ناۋقاستاردىڭ ءتۇرلى تىرشىلىك بەلگىلەرىن جانە ءدارى تۇتىنۋ مولشەرىن قاداعالاي تەكسەردى، ناۋقاستاردى تەكسەرۋ ارقىلى ولاردىڭ ساۋىعۋ جاعدايىن تۇجىرىمدادى.
”چىن مەڭگەرۋشى سالەمەتسىز بە“! - دەدى توسەگىنىڭ قاسىنا كەلگەن چىن جياندى كورگەن ناۋقاس عيني (جاناما ەسىم) قولىن بەرىپ. قول الىسۋ − چىن جيان مەن ناۋقاس اراسىنداعى ىشتەي ءتۇسىنىسۋ ەدى. وزدىگىنەن قول الىسۋ ناۋقاستىڭ وي - ساناسىنىڭ سەرگەك، قالپىنا كەلۋىنىڭ جاقسى ەكەندىگىن كورسەتەدى. ەندى 2 كۇننەن سوڭ ادەتتەگى ناۋقاستار اۋماعىنا اۋىساتىندىعىن بىلگەن عيني ”راقىمەت“ دەي بەردى.
ناۋقاس گو مەيلان (جاناما ەسىم) كوكتەم مەرەكەسىنە قاراعان تۇنگى اس كەزىندە مي قان تامىرى توسىلۋ كەسىرىنەن جىعىلىپ، شۇعىل ەمدەۋ بولىمىندە قان ۇيىعىن الۋ وپەراتسياسىن جاساتقاننان كەيىن، جۇرەك قان تامىرىنىڭ توسىلۋى دا بار ەكەندىگى بايقالادى. ”جۇرەك ىشكى اۋرۋلار بولىمىمەن بىرىگىپ تەكسەرۋدى ءوتىنىش ەتىپ، جۇرەككە تۇتىكشە كىرگىزىپ ەمدەۋ وپەراتسياسىن جاساۋعا بولاتىن - بولمايتىندىعىن كورىڭدەر“، - دەدى چىن جيان گو مەيلاننىڭ جاۋاپتى شيپاگەرىنە قاداعالاي تاپسىرىپ.
سالماقتى ناۋقاستاردى باقىلاۋ بولمەسى − جاسى ەگدەلەگەن، قاتەرلى، سالماقتى ناۋقاستاردىڭ ءومىرىن ساقتايتىن جەر، ىسىلعان قۇتقارۋ - ەمدەۋ قابىلەتى بولۋمەن بىرگە، ەمدەۋ - كۇتىمدەۋ قىزمەتكەرلەرىنەن ناۋقاستى ءار كۇنى تاپجىلماي قاراۋدى تالاپ ەتەدى. ىندەتتەن ساقتانۋ - تىزگىندەۋ شارالارىن ساپالىلاندىرعاننان كەيىن، ەمدەۋ - دەنساۋلىق ساقتاۋ قۇرىلىمدارىنىڭ ەمدەۋگە قابىلداۋ قىسىمى ارتا ءتۇستى، 2022 - جىلى 12 - ايدىڭ ورتاسىنان 2023 - جىلى 1 - ايدىڭ باسىنا دەيىن رايونىمىزداعى ۇلكەن شيپاحانالاردىڭ سالماقتى ناۋقاستاردى باقىلاۋ بولمەسىندە توسەك ورنىن ىستەتۋ مولشەرى ۇزدىكسىز جوعارىلاپ، ەمدەۋ - كۇتىمدەۋ قىزمەتكەرلەرىنىڭ قىزمەت سالماعى قالىپتان تىس ارتىپ كەتتى.
سالماقتى ناۋقاستار مەديتسينا ورتالىعىنىڭ مەڭگەرۋشىسى رەتىندە، چىن جيان ءار كۇنى ساعات 8 جارىمدا ءبىرىنشى بولىپ ناۋقاستار اۋماعىنا كەلەدى، كەي كەزدەرى ءتىپتى ناۋقاستار اۋماعىنا تۇنەپ تە قالادى، ول، ءسوزسىز، الدا ءجۇرىپ، كوپشىلىكتى اركەز كۇرەسكە دايىن تۇرۋعا باستادى.
اتالعان شيپاحانانىڭ سالماقتى ناۋقاستار مەديتسينا ورتالىعىنداعى شيپاگەرلەردىڭ جارتىسىنا جۋىعى جۇڭي شيپاگەرى، باتىسشا ەمدەۋدىڭ ءتۇرلى ادام ءومىرىن ساقتاپ قالۋ شارالارىن قولدانۋمەن بىرگە، چىن جيان ۇجىمدى باستاپ جۇڭي دارىلەرىن بارلىق قاتەرلى، سالماقتى ناۋقاستاردى ەمدەپ جازۋعا پايدالانىپ، اۋرۋىنا قاراي ديالەكتيكالىق ەمدەپ، ناۋقاستاردىڭ تەز جازىلۋىنا كومەك قولىن سوزدى.
ناۋقاس بولمەلەرىن ارالاپ 11 - توسەككە كەلگەندە، ءتاتتى ۇيقىدا جاتقان كارياعا قاراپ، جاۋاپتى شيپاگەر لياۋ گۋاڭچۇڭ چىن جيانعا ”شاعىمدانا“: ”بۇل اجەي ەس - اقىلىنان قاتتى اداسىپتى، تەلەفون قابىلدادىم، كيىم الماستىرىپ كوشە ارالايمىن دەپ ءبىر ءتۇن قيعىلىق سالدى، ءبىز قاپتاپ ءجۇرىپ ارەڭ باستىق، مەڭگەرۋشى قاراڭىزشى، ول مەنىڭ قولىمدى دا تىرناپ الدى“، - دەدى.
لياۋ گۋاڭچۇڭنىڭ سوزىنە كوپشىلىك دۋ كۇلدى، جۇڭي شيپاگەرلىگى مەن باتىسشا شيپاگەرلىكتى ۇشتاستىرا ەمدەۋ ارقىلى كاريانىڭ دەنساۋلىعى جاقسى قالپىنا كەلىپتى، ادەتتەگى ناۋقاستار بولمەسىنە اۋىستىرىلسا بولادى ەكەن.
سول كۇنى جالپىلىق ساراپتاۋ ارقىلى 3 ناۋقاس ادەتتەگى ناۋقاستار بولمەسىنە اۋىستىرىلدى. سەسترا باستىعى شى ۋىنتيڭ ەرىكسىز اسەرلەنىپ: ”كوپشىلىكتىڭ ورتاق قۇلشىنىسىنىڭ ارقاسىندا، ناۋقاستار ادەتتەگى ناۋقاستار بولمەسىنە اۋىستىرىلدى، قوسىلعان توسەكتىڭ ءبارى جينالدى، بۇل ءبىزدىڭ كوڭىلىمىز ەڭ جايلاناتىن ءىس“، - دەدى. كوكتەم مەرەكەسى كەزىندە ەمدەۋ - كۇتىمدەۋ قىزمەتكەرلەرىنىڭ ناقتى جاعدايلارىنا قاراي، ءبولىم كەزەكشى ورنالاستىرىپ، كوپشىلىكتىڭ كەزەكپەن دەمالۋىنا كەپىلدىك ەتتى. كوپشىلىكتىڭ الاڭسىز كوكتەم مەرەكەسىن وتكىزۋى ءۇشىن، شيپاحانا اسحاناسى دا كەزەكشىلىك ىستەگەن ەمدەۋ - كۇتىمدەۋ قىزمەتكەرلەرىنە مول اس ءمازىرىن ازىرلەدى.
سالماقتى ناۋقاستاردى باقىلاۋ بولمەسىندە اۋەلگىدەي باقىلاۋ، ەمدەۋ اسپاپتارىندا اۋىق - اۋىق ەسكەرتۋ دىبىسى شىعادى، ەمدەۋ - كۇتىمدەۋ قىزمەتكەرلەرى قاربالاس زىر جۇگىرۋدە. ۇقسامايتىنى، ىندەت سىناعىنان ءوتىپ، كوپشىلىك قاتەرلى، اۋىر ناۋقاستاردى ەمدەۋ - كۇتىمدەۋ، ساۋىقتىرۋ قىزمەتىن جاقسى ىستەۋدە اناعۇرلىم بايسالدى بولا تۇسكەن.
كوكتەم مەرەكەسى قارساڭىندا، باس شۋجي شي جينپيڭنىڭ بەينە ەكراندا بايلانىس جاساۋ ارقىلى حيلۇڭجياڭ ولكەسى حاربين مەديتسينا داشۋەسىنە قاراستى 1 - شيپاحاناداعى ەمدەۋ - كۇتىمدەۋ قىزمەتكەرلەرىنە جانە اۋرۋحانادا جاتقان ناۋقاستارعا امانداسقان جانە ولاردان حال سۇراعان كەسكىنى شينجياڭ مەديتسينا داشۋەسىنە قاراستى 4 - شيپاحانانىڭ (اۆتونوميالى رايوندىق جۇڭي شيپاحاناسى) سالماقتى اۋرۋلار مەديتسينا ورتالىعىنداعى ەمدەۋ - كۇتىمدەۋ قىزمەتكەرلەرىن توتەنشە اسەرلەندىردى، قاباعات جەلپىندىردى. ”باس شۋجي مىنانى باسا دارىپتەدى: قازىر ىندەتتەن ساقتانۋ - تىزگىندەۋ جاڭا كەزەڭگە ءوتتى، ءالى دە جاپا - ماشاقاتتى كەزدە تۇرمىز، الايدا شۋاقتى كۇندەر الدىمىزدا، تاباندىلىق كورسەتسەك جەڭىسكە جەتەمىز“. چىن جيان بىلاي دەدى: ”ءبىز باس شۋجيدىڭ ىقىلاستى تاپسىرماسىن ەستە بەرىك ساقتاپ، ءىس جۇزىندىك ارەكەتىمىز ارقىلى ’حالىقتى بارىنەن جوعارى قويۋ، ءومىردى بارىنەن جوعارى قويۋ‘ ۇستانىمىن امالياتتا ايگىلەپ، حالىقتىڭ ءومىرىنىڭ حاۋىپسىزدىگىن جانە دەنساۋلىعىن باستان - اياق ءبىرىنشى ورىنعا قويىپ، ەڭ زور قۇلشىنىسىمىز ارقىلى قاتەرلى، سالماقتى ناۋقاستاردى قۇتقارۋ - ەمدەۋ قىزمەتىن جاقسى ىستەيمىز“.
