سايكەس مەزگىلدەگىدەن ％79. 32 ارتتى
انار بۇلت \ شينجياڭ گازەتىنىڭ ءتىلشىسى ياۋ گاڭ 1 - ايدىڭ 27 - كۇنى ۇرىمجىدەن حابارلايدى. اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋىمىزشا، ءۇشىنشى جاقتىڭ ساياحات ساناعى ۇلكەن ساندى مالىمەت تۇعىرى مەن ۇلگى الىپ تەكسەرۋ ارقىلى جالپىلىق ەسەپتەۋ جۇرگىزۋىنە قاراعاندا، كوكتەم مەرەكەسى دەمالىسىندا بۇكىل رايون جالپى 4 ميلليون 781 مىڭ 900 ادام - رەت ساياحاتشى قابىلداپ، سايكەس مەزگىلدەگىدەن ％79. 32 ارتقان، بۇل 2019 - جىلداعىدان ％78. 58 ارتقان؛ ساياحات كىرىسى 3 ميلليارد 551 ميلليون يۋانعا جەتىپ، سايكەس مەزگىلدەگىدەن ％11. 35 ارتىپ، 2019 - جىلعى سول تۇستاعىنىڭ ％19. 98ىنە جەتكەن.
مۇزدان ءلاززاتتانىپ، قاردا سايران سالىپ كوكتەم مەرەكەسىن وتكىزۋ سالتقا اينالدى. بۇكىل رايونداعى 5S دارەجەلى شاڭعى الاڭدارى كوكتەم مەرەكەسىندە جالپى جاقتان 121 مىڭ 800 ادام - رەت ساياحاتشى قابىلداپ، سايكەس مەزگىلدەگىدەن ％94. 4 ارتقان؛ ساياحات كىرىسى 19 ميلليون 956 مىڭ 500 يۋانعا جەتىپ، سايكەس مەزگىلدەگىدەن ％80.16 ارتقان. 1 - ايدىڭ 25 - كۇنى التاي ايماعى جياڭجۇن تاۋى حالىقارالىق شاڭعى دەمالىس ءوڭىرى، كوكتوعاي حالىقارالىق شاڭعى دەمالىس ءوڭىرى، قوم (جىكبەلەڭ) حالىقارالىق شاڭعى دەمالىس ءوڭىرى سىندى 3 ۇلكەن شاڭعى الاڭى تاماشالاۋعا، شاڭعى تەبۋگە كەلگەن ساياحاتشىلاردان جالپى 15 مىڭ 400 ادام )رەت( قابىلداعان، شاڭعى تەبۋگە كەلگەن ساياحاتشىلاردىڭ جەكە ءبىر كۇنگى سانى تاريحتاعى ەڭ جاڭا ورەنى جاراتقان.
كوكتەم مەرەكەسى دەمالىسىندا بۇكىل شينجياڭنىڭ جەر - جەرى قاتىناسۋ سيپاتى كۇشتى، سەزىنۋ سيپاتى جوعارى، ءماندى دە ءساندى ساياحات مەرەكەسىن قۇتتىقتاۋ قيمىلدارىن وتكىزدى. ”ءبىز ات بايگەسى، كوكبار تارتۋ، اتەش تالاستىرۋ، قوشقار ءسۇزىستىرۋ، دولان ءماشىرابى، جوعارى كەڭىستىكتە شىر اينالۋ سياقتى سالت - سانا ويىنى قيمىلدارىن وتكىزىپ، كوپتەگەن ساياحاتشىنى كورىنىس وڭىرىنە كەلۋگە باۋرادىق“، - دەدى دولان تايپاسى كورىنىس ءوڭىرىنىڭ جاۋاپتىسى ۋاڭ شياۋپيڭ. ءۇرىمجى قالاسى تيانشان رايونىنداعى ۇلكەن بازار ساياحات سەيىل - سەرۋەن كوشەسىندە سالت - سانا ءان - ءبيى، سەرىك ويىنى كوپتەگەن ساياحاتشىنى ايالداۋعا باۋراپ، كوكتەم مەرەكەسى دەمالىسىندا كۇنىنە 10 مىڭ ادام - رەتتەن استام ساياحاتشى قابىلدادى. موري قازاق اۆتونوميالى اۋدانى 2 - كەزەكتى تازى جۇگىرتۋ جارىسىن وتكىزدى، بۇكىل شينجياڭنىڭ جەر - جەرىنەن كەلگەن تازى باپكەرلەرى تازىلارىن جارىسقا قاتىناستىردى. جەر - جەر مەرەكەلىك زات فەستيۆالى، مەرەكە ساۋىعى كونسەرتى، سالت - سانا مادەنيەتى كورمەلىك قويىلىمى سياقتىلاردى دا وتكىزىپ، ادامداردى جاپا - تارماعاي تاماشالاۋعا، سەزىنۋگە باۋرادى.
”2022 − 2023 - جىلعى قار - مۇز ماۋسىمى ءدال ’قىسقى وليمپيادان كەيىنگى شاق‘ پەن ىندەتتەن ساقتانۋ ساياساتىن ساپالىلاندىرۋدىڭ تيىمدىلىگى قاباتتاسقان كەزگە تۋرا كەلدى، سىرتتاعىلار اۋىلعا ورالىپ، وڭتۇستىك پەن سولتۇستىك ارالاسا كوكتەم مەرەكەسىن وتكىزدى، قار - مۇزدىڭ قىزىعى كوبەيدى، ءۇي ىشىمەن ساياحاتقا شىققان مەرەكەلىك كورىنىس جارىققا شىقتى، رايونىمىزدىڭ كوكتەم مەرەكەسى كەزىندەگى ساياحات تاپسىرىسى ۇزدىكسىز ارتتى، ساياحاتشىلار كوبەيدى، قويۋ مەرەكەلىك لەپ ەستى“، - دەپ تانىستىردى اۆتونوميالى رايوندىق مادەنيەت جانە ساياحات مەڭگەرمەسى بازار باسقارماسىنىڭ ورىنباسار باستىعى ساۋ جىحۇي.
