شاباندوزدار 60 مەترلىك جارىسقا جۇگىرۋ الدىندا. سۋرەتتى انار بۇلت \ شينجياڭ گازەتىنىڭ ٴتىلشىسى حۋاڭ شيڭ تۇسىرگەن
انار بۇلت \ شينجياڭ گازەتىنىڭ حابارى (ءتىلشى حۋاڭ شيڭ حابارلايدى) 1 - ايدىڭ 30 - كۇنى ”زىمىرا جاس ۇلان“ 2023 - جىلعى شينجياڭ ”دوۋي ساۋىتى“ جاستار مەن ورەندەردىڭ بولمە ٴىشى جەڭىل اتلەتيكا جۇلدەلى جارىسى شينجياڭ دەنە تاربيە ورتالىعىنىڭ كەشەندى جاتتىعۋ سارايىندا وتكىزىلدى. جارىس بۇكىل شينجياڭنىڭ 9 ايماق، وبلىس، قالاسىنداعى 350 دەن استام سپورتشىنى باۋرادى، جارىس ۋاقىتى 2 كۇن، 4 ۇلكەن ٴتۇر بويىنشا 43 شاعىن ٴتۇر ورنالاستىرىلدى.
بۇل رەتكى جارىستى اۆتونوميالى رايوندىق دەنە تاربيە مەكەمەسى باس بولىپ ۇيىمداستىرعان، اۆتونوميالى رايوندىق دەنە تاربيە مەكەمەسىنىڭ دەنە تاربيە جاتتىقتىرۋ 1 - ۇلكەن اترەتى سەلبەسىپ وتكىزگەن، اۆتونوميالى رايوندىق جەڭىل اتلەتيكا قوعامى ۇستىنە الىپ وتكىزگەن.
ارادا 4 جىل وتكەن سوڭ قايتا وتكىزىلگەن بۇل جارىستىڭ بۇرىنعىمەن ۇقساماستىعى، جارىسقا قاتىناسۋداعى سالاۋاتتىق قامال الىندى. شينجياڭ جەڭىل اتلەتيكا كومانداسىنىڭ كاسىپتىك سپورتشىلارى مەن شينجياڭداعى ورتا مەكتەپتەردىڭ، جوعارى مەكتەپتەر مەن ورتا تەحنيكۋمداردىڭ، جەڭىل اتلەتيكا كلۋبىنىڭ ساڭلاقتارىنىڭ، سونداي - اق شينجياڭدىق جەكە شەبەرلەردىڭ جارىسقا قاتىناسۋعا تىزىمدەلۋىنە بولادى، بۇل اۆتونوميالى رايونىمىزدىڭ دەنە تاربيە مەن وقۋ - اعارتۋدى توعىستىرۋدى كۇش سالا ىلگەرىلەتۋدەگى شارالارىنىڭ ٴبىرى.
”جارىسقا قاتىناسۋشىلاردىڭ اۋقىمى كەڭ، كولەمى ۇلكەن بولۋى جارىستىڭ كوزگە تۇسەر ەرەكشەلىگى، ٴبىز دارىندىلاردى تاڭداۋ، جاتتىقتىرۋ جانە جارىس سىندى 3 جاقتان توعىسىتىرىپ، مەكتەپ دەنە تاربيەسى مەن باسەكەلىك دەنە تاربيەنىڭ سايكەستى دامۋىن ىلگەرىلەتىپ، جەڭىل اتلەتيكا جاستارى مەن ورەن دارىندىلارىن بايقاۋ، باۋلۋ، جوعارى ورەگە كوتەرۋ سىندى شىت جاڭا ارنا قالىپتاستىردىق. وسى رەتكى جارىستى تىڭ باستاما ەتىپ، شينجياڭنىڭ تاعى ٴبىر ايگىلى جەڭىل اتلەتيكا جارىسىن سومداۋىن، بۇدان كەيىن ٴار جىلى ٴبىر رەت جارىس وتكىزىپ تۇرۋدان جازباۋىن ٴۇمىت ەتەمىن“، - دەدى اۆتونوميالى رايوندىق دەنە تاربيە مەكەمەسى دەنە تاربيە جاتتىقتىرۋ 1 - ۇلكەن اترەتىنىڭ ورىنباسار باستىعى، اۆتونوميالى رايوندىق جەڭىل اتلەتيكا قوعامىنىڭ باس حاتشىسى شياۋ يۋەگۇي.
سپورتشىلار الىسقا سەكىرۋ جارىسىندا. سۋرەتتى انار بۇلت \ شينجياڭ گازەتىنىڭ ٴتىلشىسى حۋاڭ شيڭ تۇسىرگەن
العاشقى كۇنگى جارىستا ەرەكشە ۇزدىك سپورتشىلار جارىققا شىقتى. ايەلدەر A گرۋپپاسىنىڭ 400 مەترلىك شەشۋشى جارىسىندا اۆتونوميالى رايوندىق دەنە تاربيە مەكەمەسى دەنە تاربيە جاتتىعۋ 1 ـ ۇلكەن اترەتىنەن كەلگەن ٴدىلحۇمار يمام ارت جاعىنداعى كوماندا مۇشەلەرىنەن 60 مەتردەن استام وزىپ، ەڭ سوڭىندا 56 سەكۋند 64 تاقىلدىق ناتيجەمەن اعا جۇلدەگەر بولدى. جارىستان كەيىن، ياركەن اۋدانىنان كەلگەن وسى بويجەتكەن ناتيجەسىنە ونشا رازى ەمەس ەكەنىن ءبىلدىردى، ”مەنىڭ ەڭ جاقسى ناتيجەم 55 سەكۋندتان اسادى، بۇگىن ويداعىداي جۇگىرە المادىم، مەن شينجياڭ قۇراماسى اتىنان مەملەكەتتىك جەڭىل اتلەتيكا جارىسىنا قاتىناسىپ، اۋىلىما داڭق اپەرۋدى ارماندايمىن“.
