انار بۇلت \ شينجياڭ گازەتىنىڭ حابارى (ءتىلشى يە شياۋمين، ەرىكتى ءتىلشى سۇڭ نيڭ حابارلايدى) 2 - ايدىڭ 2 - كۇنى ءۇرىمجى قالالىق اۋرۋدان ساقتانۋ - تىزگىندەۋ ورتالىعى 2 - ايداعى اۋرۋدان ساقتانۋ سالاماتتىق ەسكەرتپەسىن جاريالادى: كۇن سۋىتقان شاقتا تىنىس جولى تۇرىندەگى جانە ىشەك جولى تۇرىندەگى ۆيرۋستىق جۇقپالى اۋرۋلاردىڭ پايدا بولۋ جانە تارالۋ مۇمكىندىگى ٴبىرشاما جوعارى بولادى.
وسى ورتالىقتىڭ جۇقپالى اۋرۋلاردان ساقتانۋ - تىزگىندەۋ ءبولىمىنىڭ اعا شيپاگەرى چىن ۋيدىڭ ەسكەرتپەسى بويىنشا، ءۇرىمجىنىڭ 2 - ايداعى اۋرۋدان ساقتانۋداعى ماڭىزدى تۇيىندەرى مىنالار بولىپ بەلگىلەندى:
جاڭا تيپتى ايدارشا ۆيرۋسپەن جۇعىمدالۋدان ساقتانۋ. تۇرعىندار تاماشا جەكەلىك ساقتانۋ - قورعانۋ داعدىسىن ساقتاپ، قوناعاسى، باسقوسۋدى ازايتۋ، سالاماتتىقتى قاداعالاۋدى ويداعىداي ىستەپ، كۇندەلىكتى تۇرمىستى رەتكە سالۋعا كوڭىل ءبولىپ، ۆاكسينانى بەلسەنە سالدىرۋ.
سۋ شەشەكتەن ساقتانۋ. تۇرعىندار سۋ شەشەك ۆاكسيناسىن سالدىرىپ، وڭاي جۇعىمدالاتىن بالالاردى قورعاۋى ءتيىس. بولمە ءىشىنىڭ اۋاسىن ۇنەمى جاڭالاپ، بولمەنىڭ اۋاسىن الماستىرىپ تۇرۋ. جەكەلىك تازالىققا كوڭىل ءبولىپ، قولدى ءجيى جۋۋ، سۋ شەشەگى شۇعىل قوزعالۋ مەزگىلىندەگى ناۋقاستارمەن جۇعىسۋدان ساقتانۋ، ادام شوعىرلى جينالعان، اۋا الماسۋى ناشار ورىندارعا بارىپ قيمىلداۋدان ساقتانۋ.
وكپە تۋبەركۋلەزدەن ساقتانۋ. تۇرعىنداردىڭ جوتەلۋ، قاقىرىق ءتۇسۋ سياقتى جايتى ەكى اپتادان اسسا نەمەسە قاقىرىققا قان ارالاسۋ سياقتى بەلگىلەر بايقالسا، دەر كەزىندە وكپە تۋبەركۋلەز اۋرۋى بويىنشا بەلگىلەنگەن شيپاحاناعا بارىپ تەكسەرىلگەنى ءجون.
نورو ۆيرۋسىنان بولاتىن ىشەك قابىنۋىنان ساقتاۋ. تۇرعىندار قولدى ۇنەمى جۋۋعا كوڭىل ءبولۋى ءتيىس، اسىرەسە تاماقتانۋدان ىلگەرى، دارەتتەن سوڭ، تاعام دايىنداۋدان بۇرىن قاداعالاۋ كەرەك. ازىق - تۇلىك، اۋىز سۋ تازالىعىنا كوڭىل ءبولۋ، مۇمكىندىك بار تاعامدى ابدەن پىسىرىپ بارىپ تۇتىنۋ، شيكى نەمەسە شالا پىسقان ەت، تەڭىز ونىمدەرى، كوكونىستەردى تۇتىنباۋ، جەمىستى تازالاپ جۋىپ، قابىعىن ارشىپ تۇتىنۋ، قايناعان سۋ نەمەسە اشىلماعان الدىن - الا قوراپتالعان سۋ، سۋسىنداردى پايدالانۋ.
تارالمالى شىقشىت بەزىنىڭ قابىنۋىنان ساقتانۋ. بۇرىن جۇعىمدالماعان نەمەسە سايكەستى ۆاكسينالاردى سالدىرماعان بالالار ساقتانۋى ءتيىس. قاتىستى ۆاكسينالاردى سالدىرۋ باستى ساقتانۋ شاراسى سانالادى. تۇرعىندار سالاماتتىق قاداعالاۋدى ويداعىداي ىستەۋى، قىزۋ، جۇتقىنشاق اۋىرۋ، ءبىر جاق نەمەسە ەكى جاق شىقشىت ءىسۋ بەلگىلەرى بايقالسا دەر كەزىندە شيپاگەرگە قارالۋ ءتيىس.
تارالمالى مەنينگيتتەن (مي قابىنىڭ قابىنۋى) ساقتانۋ. ءتۇيىندى قاداعالاۋعا ءتيىستى ادامدار توبى 15 جاستان تومەنگىلەر. كەزەكتە تارالمالى مەنينگيت ۆاكسيناسى ودان ساقتانۋدىڭ ەڭ ءونىمدى ءارى ۇنەمدى شاراسى سانالادى.
كاسىپتىك اۋرۋعا جاتپايتىن كومىرتەگى توتىعىنان ۋلانۋدان ساقتانۋ. وتباسىندا كومىر جاعىپ تاعام دايىنداپ، جىلىنعاندا مورجا جانە اۋا تارتقىش ارقىلى ءتۇتىندى سىرتقا شىعارۋعا تۋرا كەلەدى، جەلدىڭ كەرى تەبۋى نەمەسە كومىر گازىنىڭ قاشۋىنان ساقتانۋعا كوڭىل ءبولۋ ءتيىس. كومىرمەن جىلىناتىن وتباسىلارى بولمە ءىشىنىڭ اۋاسىن الماستىرۋعا تىپتەن نازار سالۋى ءتيىس. گازبەن جىلىتاتىن مونشانى پايدالانعاندا اۋانىڭ الماسۋىن ساقتاۋمەن قاتار پايدالانۋ ۋاقىتىن 15 - 30 مينۋت شاماسىندا مەڭگەرۋ ءتيىس. قىس ماۋسىمىندا ۇزاق ۋاقىت كولىك جۇرگىزگەندە ۋاقتىلى تەرەزەنى اشىپ اۋا الماستىرۋ؛ تەرەزەسى بەكتىلىپ، اۋا رەتتەگىشى اشىلعان اۆتوكولىكتىڭ ىشىندە ۇيىقتاۋعا بولمايدى، توقتاپ تۇرعان كولىكتىڭ اۋا رەتتەگىشىن اشقاندا تەرەزەلەرىن تۇگەل جاۋىپ تاستاۋعا استە بولمايدى. بالالاردى كولىكتىك ىشىنە جالعىز تاستاپ كەتۋگە بولمايدى.
