شينجياڭ جيڭحۇڭ كومانداسىنىڭ بارلىق مۇشەلەرى جارىستىڭ الدىندا بىرگە سۋرەتكە ٴتۇستى. سۋرەتتى انار بۇلت \ شينجياڭ گازەتىنىڭ ٴتىلشىسى حۋاڭ شيڭ تۇسىرگەن
انار بۇلت \ شينجياڭ گازەتىنىڭ حابارى (ٴتىلشى حۋاڭ شيڭ حابارلايدى) 2 - ايدىڭ 5 - كۇنى 2023 – جىلعى مەملەكەتتىك 5 ادامدىق فۋتبول جۇلدەلى جارىسىنىڭ العاشقى اينالىمدا كەزەك اتتاعان شينجياڭ جيڭحۇڭ كومانداسى 1گە قارسى 3 ۇپايمەن شىنجىن بيبوليان كومانداسىن جەڭدى، قازىر ناتيجەسى ٴبىر جەڭىس، ٴنول جەڭىلىسپەن ۋاقىتشا D گرۋپپا بويىنشا 1 - ورىندا تۇر.
وسى رەتكى جۇلدەلى جارىسقا جيىنى 14 بەس ەرەن، بەس A دارەجەلى كوماندا قاتىناستى. جارىستىڭ 3 - ٴنومىرلى ۇمىتكەر كومانداسى رەتىندە، شينجياڭ جيڭحۇڭ كومانداسى مەن جانجياڭ رۇيحۋ كومانداسى، شىنجىن بيبوليان كومانداسى D گرۋپپاعا ٴبولىندى. العاشقى كەزەك جارىستا شىنجىن 1گە قارسى 4 ۇپايمەن بەس ەرەن كوماندا جانجياڭدى جەڭدى.
”كوماندامىزدىڭ كوپتەگەن دوپشىلارى رەسمي جارىسقا تۇڭعىش رەت بىرگە قاتىناسىپ وتىر، سايكەسۋ جەتكىلىكتى بولماعاندىقتان كەيبىر ماسەلەلەر تۋىلۋى مۇمكىن. ٴبىراق جارىستاعى ٴبىر كەزەڭدە كوپشىلىكتىڭ شابۋىلداۋ - قورعانۋى جاقسى بولدى، سوڭىنداعى جارىستا ، ٴسوز جوق، ٴتىپتى دە جاقسى تەبەتىندىگىنە سەنەمىن“، ـ دەدى شينجياڭ جيڭحۇڭ فۋتبول كلۋبىنىڭ دوپشىسى، بۇرىنعى مەملەكەتتىك كوماندانىڭ دوپشىسى 31 جاستاعى حان ي تىلشىگە.
جارىس الدىندا بۇكىل كومانداداعىلار ٴبىر - بىرىنە شابىت بەردى. سۋرەتتى انار بۇلت \ شينجياڭ گازەتىنىڭ ٴتىلشىسى حۋاڭ شيڭ تۇسىرگەن
شينجياڭ مەن شىنجىننىڭ وسى رەتكى جارىسى دا شاعىن گرۋپپانىڭ شەشۋشى جارىسقا كىرۋىندەگى ماڭىزدى شايقاس. الدىڭعى جارتى مايداندا، شىت جاڭا شينجياڭ جيڭحۇڭ كومانداسى قورعانىسقا كۇشتى شوعىرلاندىرعان شىنجىن بيبوليان كومانداسىمەن بەلدەسىپ، العاشقى كەزەڭدە جاڭا جاعداي جاراتاتىن تاماشا ٴادىس تابا المادى. كوپ وتپەي، ەردانا مەللاتقان الىستان دوپ ەنگىزىپ، تۇڭعىش ۇپايدى الىپ، تەكە تىرەس جاعدايدى اياقتاتتى؛ ىلە - شالا ەلداني تاعى دا الىستان دوپ كىرگىزدى.
مىرزات جارىستىڭ الدىندا سوزىلۋ ارەكەتىن جاساۋدا. سۋرەتتى انار بۇلت \ شينجياڭ گازەتىنىڭ ٴتىلشىسى حۋاڭ شيڭ تۇسىرگەن
الدىڭعى جارتى مايداندا 2 دوپ سالىپ الدا تۇرعان شينجياڭ جيڭحۇڭ كومانداسى مايداندا كوسىلە ويىن كورسەتتى، تاجىريبەسى مول بۇرىنعى مەملەكەتتىك كوماندانىڭ دوپشىسى حان ي جانە مىرزات عايرات، پايزولا اسەن، چىن يۇڭيان سىندى 3 مەملەكەت كومانداسى دوپشىلارىنىڭ باستاۋىندا الما - كەزەك شابۋىلعا ءوتتى. قارسىلاسى ٴبىر رەتكى شينجياڭ دوپشىلارىنىڭ سايكەسپەۋىنەن تۋىلعان ورىننان ايىرىلۋدى مىقتى يگەرىپ، ٴبىر رەت شەبەرلىكپەن سايكەسىپ ٴبىر دوپتى قايتارىپ الدى. الايدا، سابىرعا كەلگەن شينجياڭ جيڭحۇڭ كومانداسى تاعاتتىلىقپەن تاعى دا دوپتى جەتكىزىپ، سوڭىندا چىن يۇڭيان قاقپا الدىندا وراي تاۋىپ، تاعى ٴبىر دوپ كىرگىزىپ جەڭىسكە قول جەتكىزدى.
”قازىرگى كەزەڭدە ٴبىزدىڭ نىسانامىز − گرۋپپاداعى سارالاۋدان توپ جارىپ شىعۋ. وسى نەگىزدە، ساپتاستارمەن مۇمكىندىگىنشە تانىس بولۋ. مەن كوپشىلىكتىڭ ٴبىر - ٴبىرىن كوبىرەك شابىتتاندىرىپ، مايداندا جانە مايدان سىرتىندا كوبىرەك ارالاسىپ، ىشتەي ٴتۇسىنىسۋدىڭ جەتكىلىكسىزدىگىن تولىقتاۋىن ٴۇمىت ەتەمىن، ۇيىسۋ قۋاتى عانا ٴبىزدىڭ كوماندانىڭ ەڭ ماڭىزدى جاۋىنگەرلىك قۋاتى بولماق“، - دەدى شينجياڭ جيڭحۇڭ كومانداسىنىڭ باستىعى مىرزات عايرات تىلشىگە.
2022 – جىلعى مەملەكەتتىك بەس ادامدىق ەرەكشە بىرلەسپە جارىستا شينجياڭنىڭ وسى قۇراماسى 7 - ورىندى يەلەدى. جاڭا جارىس ماۋسىمىندا، شينجياڭ جيڭحۇڭ فۋتبول كلۋبى تايلاند مەملەكەت كومانداسىنىڭ ەكى دوپشىسى پانيا، ناۆىنمەن كەلىسىمگە قول قويدى، سونداي ـ اق ەل ىشىندەگى دوپشىلار چىن يۇڭيان، شۇي ماۋشي، حان ي، لي ۋىنحاۋدى ەنگىزدى، قازىر جيىنى 2 شەتەل دوپشىسى، 4 مەملەكەتتىك كوماندانىڭ دوپشىسى، 2 بۇرىنعى مەملەكەتتىك كوماندانىڭ دوپشىسى بار.
”العاشقى جارىستا مەن كومانداعا 7 ۇپاي الىپ بەردىم. قازىر شەتەلدىك دوپشىلار ٴالى كەلمەدى، بۇل دا كوماندانىڭ سايكەستىك جاساپ، تولىقتانعان دوپشىلاردىڭ كۇش - قۋاتىن جوعارىلاتۋداعى ەڭ تاماشا ورايى“، - دەدى شينجياڭ جيڭحۇڭ فۋتبول كلۋبىنىڭ باس ديرەكتورى شياۋ شياۋ تىلشىگە.
اۋدارعان: قادىر ماقان
