□ انار بۇلت \ شينجياڭ گازەتىنىڭ ءتىلشىسى يە شياۋمين، ەرىكتى ءتىلشى سۇڭ نيڭ
2023 - جىلعى كوكتەمگى وقۋ باستالعالى تۇر، 2 - ايدىڭ 9 - كۇنى ءۇرىمجى قالالىق اۋرۋدان ساقتانۋ - تىزگىندەۋ ورتالىعى جۇقپالى اۋرۋلاردان ساقتانۋ - تىزگىندەۋ ءبولىمىنىڭ اعا شيپاگەرى چىن ۋي وقۋشى - وقىتۋشىلار مەن اتا - انالارعا جەكەلىك قورعانۋدى ويداعىداي ىستەۋگە كوڭىل ءبولىپ، تاماشا تازالىق ادەتىن ساقتاپ، جۇقپالى اۋرۋدىڭ تۋىلۋىنان ساقتانۋدى ەسكەرتتى.
چىن ۋي مىناداي ۇسىنىس بەردى: جاڭا تيپتى ايدارشا ۆيرۋسپەن جۇعىمدالۋدان ساقتانۋدان تىس، ماۋسىمدىق تارالعىش تۇماۋ، ۇشپا شەشەك، نورو ۆيرۋسى، تارالعىش شىقشىت بەزى قابىنۋى، تارالعىش مەنينگيت سياقتى اۋرۋلاردىڭ تۋىلۋىنان ساقتانۋعا دا كوڭىل بولگەن ءجون. كۇندەلىكتى تۇرمىستا تومەندەگى 6 ءتۇيىندى ويداعىداي ىستەۋ كەرەك:
1. ماسكانى تاعۋدان جازباۋ. وقۋعا بارعاندا، وقۋدان قايتقاندا، الەۋمەتتىك قاتىناس قۇرالدارىنا وتىرعاندا، ماسكانى جۇيەلى تاعىپ ءجۇرۋ كەرەك. ساباقحانا ىشىندە دە ماسكانى عىلمي تاعۋدان جازباۋ كەرەك، زاپاس ماسكانى الا ءجۇرىپ، ماسكا بىلعانىپ نەمەسە جىرتىلىپ قالعاندا، دەر كەزىندە اۋىستىرعان ءجون.
2. ساباقحانادا اۋا الماستىرىپ تۇرۋ. اۋا الماستىرعاندا الدىمەن تەرەزەنى اشىپ، تابيعي اۋا الماستىرۋ، ساباقحانا ىشىندە اۋا الماستىرعاندا اۋا رايىنىڭ وزگەرىسىنە كوڭىل ءبولۋ، ءبىر كۇن ىشىندەگى اۋا تەمپەراتۋراسى ءبىرشاما جوعارى بولاتىن كەزدە تەرەزە اشىپ، اۋا الماستىرۋ، وقىتۋشى - وقۋشىلاردىڭ سۋىق ءتيىپ، تۇماۋراتىپ قالۋىنان ساقتانۋ كەرەك.
3. جەكە تازالىقتى ساقتاپ، قولدى ءجيى جۋۋ. كورىنگەن جەرگە قاقىرىپ - تۇكىرمەۋ، جوتەلگەندە نەمەسە تۇشكىرگەندە اۋىز بەن مۇرىندى ورامال قاعازبەن باسىپ الۋ كەرەك. مەكتەپكە بارعاننان كەيىن جەتى باسقىشتى قول جۋۋ ادىسىمەن قول جۋۋ كەرەك. جۋىلماعان قولمەن اۋىزدى، كوزدى، مۇرىندى ۇستاماۋ كەرەك. جۋمايتىن مەديتسينالىق زارارسىزداندىرۋ سۇيىقتىعىن الا ءجۇرىپ، قولدى تازالاپ تۇرۋ كەرەك.
4. ورتا تازالىعىن ساقتاۋ. ساباقحانا ورتاسىنىڭ تازالىعىن ساقتاۋ. قوقىر - قوقسىقتى دەر كەزىندە تازالاۋ كەرەك. باسپالداق جاقتاۋى، پارتا، ەسىك تۇتقاسى سياقتى الەۋمەتتىك بۇيىمداردى نەمەسە ورىنداردى تازالاۋدى جانە زارارسىزداندىرۋدى كۇشەيتۋ كەرەك.
5. تاماقتانۋ حاۋىپسىزدىگى. وقۋشىلار تاماقتانعاندا مۇمكىندىگىنشە توپتاسپاۋ، ىدىستى ءبىر ادام ءبىر رەت پايدالانعاندا ءبىر رەت زارارسىزداندىرۋ كەرەك. قول تازالىعىنا كوڭىل ءبولىپ، حاۋىپسىز قوعامدىق قاتىناس ارالىعىن ساقتاۋ كەرەك. تاماقتانعاندا بىتىراپ وتىرۋ، توپتاسىپ الماۋ، اڭگىمەلەسپەۋ، بەتپە - بەت وتىرىپ تاماقتانۋدان ساقتانۋ كەرەك.
6. لايىقتى ارەكەت جاساۋ، قاعيدالى تۇردە ۇيرەنۋ جانە دەمالۋ. مەكتەپتە وقىتۋشى - وقۋشىلارعا ساباق ارالىعىنداعى گيمناستيكا ورنالاستىرۋ، لايىقتى ۋاقىتتا دەنە ارەكەتىمەن شىنىعىپ، يممۋنيتەت قۋاتى مەن قارسىلىق قۋاتىن جوعارىلاتۋ كەرەك. ءىشىنارا جاڭا تيپتى ايدارشا ۆيرۋسپەن جۇعىمدالۋشىلار ساۋىققاننان كەيىن لايىقتى شىنىعۋعا كوڭىل ءبولۋى، قاتتى ارەكەت جاساۋدان ساقتانۋى كەرەك.
