وقۋ باستاۋعا ساقاداي سايلانىپ بولدىق

　　2 - ايدىڭ 9 - كۇنى ءۇرىمجى قالالىق 132 - باستاۋىش مەكتەپتىڭ وقىتۋشىلارى وقۋشى ەرىكتىلەرگە جاڭا مەكتەپ كيىمىن تاراتۋدا. ءۇرىمجى قالاسىنداعى ءارقايسى باستاۋىش مەكتەپتەر 2 - ايدىڭ 13 - كۇنى رەسمي وقۋ باستايدى.

□سۋرەتتى انار بۇلت \ شينجياڭ گازەتىنىڭ ءتىلشىسى زوۋ ي تۇسىرگەن

　　قۇتتى قويان جىلىنىڭ كوكتەمىن قارسى الدىق، قاۋىشار ءسات تاياپ قالدى. وسى اپتادان باستاپ، رايونىمىزدىڭ جەر - جەرىندەگى ورتا، باستاۋىش مەكتەپتەر ىركەس - تىركەس جاڭا وقۋ ماۋسىمىن باستادى، نەشە اي بويى تىم - تىرىس جاتقان مەكتەپ اۋلاسى قايتادان ساڭعىرلاي كىتاپ وقىعان ءۇن مەن قۋانىشتى كۇلكىگە شومدى. جاڭا وقۋ ماۋسىمى، جاڭا جورىق، وقىتۋشىلار، وقۋشىلار جانە اتا - انالار وقۋ باستاۋدىڭ دايىندىعىن جاساپ بولدى.

　　پارتا - ورىندىقتار رەتتى ءتىزىلىپ، تەرەزەلەر تاپ - تازا بولىپ جارقىراپ تۇر. الدىن الا قىزمەت ورىندارىنا ورالعان بايىنعولين موڭعۇل اۆتونوميالى وبلىستىق 2 - ورتا مەكتەپتىڭ ورتالاۋ جىلدىقتار بولىمىندەگى وقىتۋشىلار مەكتەپ ءىشىن جالپى بەتتىك تازالاپ شىقتى، مەكتەپ اۋلاسى مەن ساباقحانالار شىت جاڭا تۇسكە ەنىپ، وقۋشىلاردىڭ قايتىپ كەلۋىن ءۇنسىز عانا كۇتىپ تۇر.

　　”وقۋ باستاۋدىڭ ءتۇرلى قىزمەتتەرى ىستەلىپ بولدى، وقۋ باستاعان ماۋسىمنىڭ كەرمە تۋى، جاڭا وقۋ ماۋسىمىندا جولداناتىن تىلەك كارتچكالارى سياقتىلار، مەكتەپتىڭ وقۋشىلارعا دەن قويا دايىنداعان جاڭا وقۋ ماۋسىمىن قارسى الۋ قيمىلى ءاربىر وقۋشىنىڭ’ ۇيگە قايتۋىن‘ كۇتۋدە“. وسى مەكتەپتىڭ ورىنباسار باستىعى ليۋ گوشياڭ: وقىتۋشىلاردىڭ الدىن الا قىزمەت ورىندارىنا كەلىپ مۇقيات دايىندىق كورۋى وقۋشىلارعا جايلى ورتا ازىرلەپ، ولاردىڭ جاڭا وقۋ ماۋسىمىنداعى وقۋلارىن ەڭ تاماشا كوڭىل كۇيمەن باستاۋىن ءۇمىت ەتكەندىگى عوي، - دەدى.

　　الدىن الا قىزمەت ورنىنا ورالىپ، توپتىق ”قۋات تولىقتادى“. رايونىمىزدىڭ جەر - جەرىندەگى ورتا، باستاۋىش مەكتەپتەر وقىتۋشىلاردى وقىتۋدى زەرتتەۋ توپتىق ۇيرەنۋىنە ۇيىمداستىردى، وقىتۋشىلار الدىن الا ساباق دايىنداپ، وقىتۋ جوسپارىن جاساپ، جاڭا وقۋ ماۋسىمىنداعى وقىتۋ جوباسىن ورنالاستىرىپ، وقۋ باستاعاننان كەيىنگى وقىتۋ قىزمەتىنىڭ ءساتتى ورىستەتىلۋىنە شىنايى كەپىلدىك ەتتى.

　　وقۋ باستالاردا بۇراتالا قالالىق جينشيۋ باستاۋىش مەكتەبى وقۋ - اعارتۋ توبى 5 كۇندىك مەرزىممەن مەكتەپتى نەگىز ەتكەن ءبىلىم جەتىلدىرۋ قيمىلىن ورىستەتتى، وقىتۋشىلار وقىتۋ نىساناسى، وقىتۋ وي جەلىسى، وقىتۋداعى ماڭىزدى تۇيىندەر مەن قيىن تۇيىندەر سياقتى جاقتاردان تالقى ورىستەتتى، كەيبىر ساقا وقىتۋشىلار تاماشا تاجىريبەلەرىن، وقىتۋ بارىسىندا جولىققان ماسەلەلەردى جانە ونى شەشۋدىڭ ادىستەرىن كوپشىلىكپەن ءبولىستى.

　　”مەكتەپتىڭ وسى رەتكى وقۋ باستالاردا مەكتەپتى نەگىز ەتىپ ءبىلىم جەتىلدىرۋ قيمىلىن ورىستەتۋى ءبىزدىڭ بۇدان كەيىنگى وقىتۋ قىزمەتىمىزگە وي جەلىسىن اشىپ بەردى“، - دەدى بۇراتالا قالالىق جينشيۋ باستاۋىش مەكتەبىنىڭ وقىتۋشىسى ۋاڭ لينا.

　　جاڭا وقۋ ماۋسىمىندا دەنە تاربيە ساباعى قالاي وتىلەدى؟ مىنە بۇل اتا - انالار ءبىرشاما كوڭىل ءبولىپ وتىرعان ماسەلە. مەكتەپتەر دەنە تاربيە وقىتۋى ”حاۋىپسىزدىك ءبىرىنشى“، ”بىرتىندەي ىلگەرىلەۋ“، ”دارالىق بولۋ“، ”جىككە ءبولىپ وقىتۋ“ پرينسيبى بويىنشا جۇرگىزىلەتىندىگىن ايقىندادى.

　　2 - ايدىڭ 7 - كۇنى ءۇرىمجى قالالىق 10 - ورتا مەكتەپتىڭ دەنە تاربيە وقىتۋىن زەرتتەۋ گرۋپپاسىنداعى 9 دەنە تاربيە وقىتۋشىسى دەنە تاربيە ساباعىن وقىتۋ جوسپارىن بىرگە تالقىلاپ، وقۋ باستالعان باستاپقى ايداعى دەنە تاربيە ساباعىندا كۇشەمەلىلىگى تومەن ارەكەتتەردى نەگىز ەتۋ كەرەكتىگىن ايقىندادى.

　　”بىرنەشە ايدان بەرى وقۋشىلاردىڭ ارەكەتى از بولعاندىقتان، كەيبىر وقۋشىلاردىڭ دەنساۋلىعى ءالى دە قالپىنا كەلۋ مەزگىلىندە بولعاندىقتان، وقۋ باستالعاننان كەيىن مەكتەپ كۇشەمەلىلىگى جوعارى، قاتتى ارەكەتتەردى ورنالاستىرمايدى“. وسى مەكتەپتىڭ دەنە تاربيە وقىتۋىن زەرتتەۋ گرۋپپاسىنىڭ باستىعى يۋان شينجياڭ بىلاي دەدى: ورتالاۋ 3 - جىلدىق وقۋشىلارىنىڭ تولىق ورتا مەكتەپكە شىعارداعى دەنە تاربيە ەمتيحانىن ەسكەرىپ، جاتتىعۋ كەزىندەگى 1000 مەترگە جۇگىرۋدى 500 مەترگە جۇگىرۋگە قىسقارتتىق ءارى باياۋ جۇگىرۋدى نەگىز ەتىپ، ءبىر اي مولشەرىندە ۇيلەستىرۋ ارقىلى دەنە تاربيە ساباعىنىڭ مازمۇندارىن بىرتىندەپ كوبەيتەمىز.

　　وتباسىلار مەن مەكتەپ قوسىلا ارەكەتتەنىپ، بالالاردىڭ زەيىنىن وقۋعا اۋداردى. ۇزاق ۋاقىت مەكتەپكە كەلىپ ساباق وقىماعان سوڭ، كوپتەگەن وقۋشى كوڭىل كۇي جاقتان بوساڭسىپ كەتكەندىكتەن، جەر - جەردەگى مەكتەپتەر وقۋشىلاردىڭ ۇيرەنۋ، تۇرمىس ريتىمىن تەزىرەك قالىپقا تۇسىرۋىنە باعىتتامالى تۇردە جەتەكشىلىك ەتىپ، ولاردىڭ وقۋ باستالعاننان كەيىن مەكتەپ تۇرمىسىنا جىلدام ۇيلەسۋىنە جاعداي جاسادى.

　　”مەكتەپ كاسىپتىك تۇرعىدان جەتەكشىلىك ەتتى، ناقتى قولدانۋعا بولاتىن، ەگجەي - تەگجەيلى ەكەن، بالالاردىڭ زەيىندى وقۋعا اۋدارۋىنا ايتارلىقتاي كومەگى تيەدى“. ءۇرىمجى قالالىق 127 - ورتا مەكتەپتە وقيتىن وقۋشىنىڭ اتا - اناسى جاۋ حىيىڭ وقۋ باستالاردا كلاس جەتەكشىسىنىڭ ىركەس - تىركەس جولداعان وقۋ باستاۋ نۇسقاۋلىعىن تاپسىرىپ العاندىعىن ايتتى.

　　وقۋ باستالاردا ءۇرىمجى قالالىق 127 - ورتا مەكتەپ مەيپيان، ديڭديڭ، تەلەفون، ۋيشين سياقتى فورمالار ارقىلى اتا - انالارعا، وقۋشىلارعا وقۋ باستاۋعا ويداعىداي دايىندالۋدى، وقۋ جانە دەمالىس ۋاقىتىن الدىن الا رەتكە ءتۇسىرۋدى، زەيىندى وقۋعا ويداعىداي اۋدارىپ، ەڭ تاماشا كۇيمەن جاڭا وقۋ ماۋسىمىنداعى وقۋعا بار ىقىلاسپەن كىرىسۋدى ەسكەرتتى.

　　جاۋ حىيىڭنىڭ ايتۋىنشا، ونىڭ بالاسى 2 - ايدىڭ 1 - كۇنىنەن باستاپ وقۋ جانە دەمالىس ۋاقىتىن رەتكە سالىپ، ءار كۇنى تاڭەرتەڭ ساعات ءدال 8دەن 10 مينۋت وتكەندە ورنىنان تۇرىپ، جاڭا ءبىر كۇنگى ۇيرەنۋ تۇرمىسىن باستايتىن بولىپتى. ”قازىر بالام وقۋدىڭ ەرتەرەك باستالۋىن، ەرتەرەك مەكتەپكە بارىپ وقۋدى اسىعا كۇتۋدە“، - دەدى ول.

　　وسى كۇندەردە وقۋشىلار مەن اتا - انالار كىتاپ قابى، ەستەلىك داپتەر سياقتى وقۋ قۇرالدارىن ساتىپ الۋمەن قاربالاس بولىپ، جاڭا وقۋ ماۋسىمىنىڭ باستالۋىنا دايىندالۋدا.

　　ءتىلشى ءۇرىمجى قالاسىنداعى ءىشىنارا وقۋ قۇرالدارىن ساتاتىن دۇكەندەردە، كىتاپ دۇكەندەرىندە تىلشىلىك ىستەگەن كەزدە وقۋ باستالۋعا تاياپ قالعاندىقتان، ءار ءتۇرلى وقۋلىق - پىسىقتاۋ كىتاپتارى، وقۋ قۇرالدارى سياقتى وقۋعا قاجەتتى بۇيىمداردىڭ ساتىلىمى قاۋىرت كوبەيە باستاعاندىعىن بايقادى.

　　”2 - ايدىڭ باسىنان باستاپ، وقۋ قۇرالدارى مەن وقۋلىق - پىسىقتاۋ كىتاپتارىن ساتىپ الۋعا كەلەتىن وقۋشىلار مەن اتا - انالار نەداۋىر كوبەيدى، دۇكەنىمىزگە كۇنىنە كەلەتىن ادام سانى 200 ادام - رەتتەن استى، وسى اپتانىڭ اياعىندا مۇنان دا كوپ اتا - انالار مەن وقۋشىلاردى قابىلداۋىمىز مۇمكىن“، - دەيدى ءۇرىمجى قالالىق 1 - ورتا مەكتەپ بەيمىن وقىتۋ اۋماعىنىڭ ماڭىنداعى بەلگىلى كىتاپ دۇكەنىنىڭ جاۋاپتىسى فان دۇڭليڭ.

　　وقۋ باستاۋدان بۇرىن وقۋلىقتىڭ اكەلىنىپ بولۋىنا، ادام باسىنا بىردەن تۋرا كەلۋىنە شىنايى كەپىلدىك ەتۋ ءۇشىن، رايونىمىزدىڭ جەر - جەرىندەگى شينحۋا كىتاپ دۇكەندەرى بەلسەندىلىكپەن ”كىتاپ دايىنداپ“ وقۋ باستاۋعا دايىندالدى. وتكەن جىلى 12 - ايدىڭ اياعىندا، ءۇرىمجى قالاسىنىڭ ميدۇڭ رايونىندا ءتۇرلى وقۋلىق، پىسىقتاۋ ماتەريالدارى تولاسسىز اكەلىندى، نەشە كۇننەن بەرى ميدۇڭ رايونىنداعى شينحۋا كىتاپ دۇكەنى قىزمەتكەرلەردى كوكتەم ماۋسىمىنداعى وقۋلىق، پىسىقتاۋ ماتەريالدارىن تاراتۋدىڭ دايىندىق قىزمەتتەرىن بەلسەنە ويداعىداي ىستەۋگە ۇيىمداستىرىپ، قاراستى وڭىردەگى 31 ورتا، باستاۋىش مەكتەپتەگى وقۋشىلاردىڭ دەر كەزىندە وقۋلىق الۋىنا شىنايى كەپىلدىك ەتتى.

　　قۇمىل شينحۋا كىتاپ دۇكەنىنىڭ وقۋ ماتەريالدارى قامباسىندا قىزمەتكەرلەر وقۋ ماتەريالدارىن ساناپ، بولەكتەپ، قوراپتاپ، اۆتوكولىكتەرگە تيەپ، مەكتەپتەرگە ۇلەستىرىلەتىن وقۋلىقتاردىڭ دالمە - ءدال، دۇرىس بولۋىنا شىنايى كەپىلدىك ەتتى.

　　قۇمىل شينحۋا كىتاپ دۇكەنى شەكتى جاۋاپكەرشىلىك سەرىكتەستىگى وقۋ ماتەريالدارى ءبولىمىنىڭ باستىعى تيان حۇڭگاڭ تانىستىرىپ بىلاي دەدى: 1 - ايدىڭ باسىندا شينحۋا كىتاپ دۇكەنى 2023 - جىلعى كوكتەم ماۋسىمىنداعى وقۋ ماتەريالدارىن ىركەس - تىركەس تاپسىرىپ الدى، قىزمەتكەرلەر مۇقيات سالىستىرىپ تەكسەرىپ، ءبولىپ تاراتىپ، قوراپتاپ، نومىرلەگەن سوڭ، الدىمەن تولىق ورتا مەكتەپتەر، ونان كەيىن ورتالاۋ مەكتەپتەر، ونان كەيىن باستاۋىش مەكتەپتەر سىندى وقۋ باستاۋ ءتارتىبى بويىنشا، كەلىپ بولعان بارلىق وقۋ ماتەريالدارىن ءار مەكتەپكە جەتكىزىپ بەردى.