ءۇرىمجى قالالىق 4 - حالىق شيپاحاناسى (شينجياڭ رۋحاني گيگيەنا ورتالىعى) بالالار پسيحيكاسى ءبولىمىنىڭ مەڭگەرۋشىسى، اعا شيپاگەر ياڭ چاۋ مىنا ءتورت ءادىستى پايدالانۋدى ۇسىنادى.
بالا نەمەنەدەن قوبالجىپ وتىر؟
ۇيرەنۋ مىندەتىنەن الاڭداۋ
تاپسىرما، ەمتيحان جانە باسەكە دەگەندەر بالانى ابىرجىتىپ، قىسىم تۇسىرەدى. وقۋى قاربالاس، اتا - انانىڭ ارتقان ءۇمىتى زور بولسا، وقۋ باستالعاندا بالا ۇلكەن سىن - سايىسقا ءدوپ كەلەدى دە كوڭىلدە وڭاي قوبالجۋ پايدا بولادى.
مەكتەپتە باسقالارمەن قارىم - قاتىناستى ويداعىداي ءبىر جاقتى ەتە الماۋدان الاڭداۋ
وقۋ باستالعان سوڭ بالا ۇستازدارمەن، ساباقتاستارمەن بولعان قارىم - قاتىناستى ءبىر جاقتى ەتۋى كەرەك، ساباقتاستارمەن تۇسىنبەستىك تۋىلۋىنان، وقىتۋشىلارعا جاقپاي قالۋدان الاڭداۋدىڭ ءوزى بالالاردى مازاسىزدىق اكەلىپ، قوبالجىتاتىن بولادى.
قوبالجۋدىڭ ءوزى دە جۇقپالى بولادى
”وقۋ باستالعانداعى قوبالجۋ“ بالاعا عانا ءتان ەمەس
وقۋ باستالعانداعى ەمتيحان، كلاسقا ءبولۋ، ۇستازداردىڭ الماسۋى، ورىننىڭ الماسۋى... بالانىڭ مەكتەپتەگى بولماشى وزگەرىستەرى اتا - انانىڭ كوڭىل-كۇيىن مازالايدى.
مەكتەپتەگى ۇستازداردىڭ اۋىر وقىتۋ مىندەتى، قاتاڭ باعالاۋ كورسەتكىشى... اتا - انالار مەن وقىتۋشىلار ءوزىنىڭ قوبالجۋ سەزىمىن ءجىتى قاداعالاپ، ءبىر جاقتى ەتىپ وتىرماسا، قوبالجۋ سەزىمىن بالاعا جەتكىزىپ، بالانىڭ كوڭىل - كۇيىنە ىقپال جاساعانىن ءوزى دە سەزبەي قالادى.
ءتورت ءادىس ارقىلى ”وقۋ باستالعانداعى قوبالجۋدان“ ارىلۋ
قوبالجۋدىڭ قالىپتى قۇبىلىس ەكەنىن تانىپ جەتۋ
وقۋشىلار مەن اتا - انالار ىرىقتى تۇردە جاقىنداعى كوڭىل - كۇيىنىڭ وزگەرىسىن قابىلداۋى كەرەك، مەيلى جەلپىنۋ، قۋانۋ ياكي قوبالجۋ، مازاسىزدانۋ بولسىن، ءبارى ناقتى سەزىم، تۇرمىستىڭ ءبىر بولىگى دەپ قاراۋعا تۋرا كەلەدى، ونى تەرىستەۋدىڭ ياكي ودان قاشقالاقتاۋدىڭ قاجەتى جوق.
اتا - انالار بالانىڭ كوڭىل - كۇيىنە، سونداي - اق تولعانىستارىنا ءجيى قۇلاق سالىپ، كوبىرەك پىكىر الماستىرۋى ءتيىس، اتا - انالارى تاجىريبەلەرىن ورتاعا سالىپ، كەزىندەگى ءوزىنىڭ وقۋ باستالعانداعى تۇيگەندەرىن اڭگىمەلەۋ ارقىلى بالانىڭ ماسەلەگە ۇقساماعان تۇرعىدان كوز سالۋىنا مۇمكىندىك جاراتۋىنا بولادى.
قوبالجۋدىڭ استارىنداعى ارمان - تىلەكتى مۇعدارلاي ءبىلۋ
وقۋ باستالعان ماۋسىمدا بالادا قوبالجۋ سەزىمى تۋىلعانى ونىڭ جاڭا وقۋ ماۋسىمىنا پسيحيكالىق جاقتان دايىندالىپ جاتقانىنىڭ نىشانى، ول الدىنا نىسانا قويىپ، تالابىن قامشىلاپ، مەكتەپ اۋلاسىندا كوزگە ءتۇسۋدىڭ قامىن جاساپ وتىر، سوندىقتان قوبالجۋ، ابىرجۋدىڭ كوك تيىن قۇنى جوق دەۋگە دە بولمايدى، ول بالالاردىڭ دەمالىستاعى سامارقاۋلىقتان ارىلىپ، وقۋعا تۇسۋگە دايىندالۋىنا پايدالى.
اتا - انالار بالالاردىڭ قوبالجۋدىڭ استارىنداعى بەلسەندى ارمان - تىلەكتى تۇسىنۋىنە كومەكتەسۋى ءتيىس، بالا ”تەرىس ازۋ“ مىنەز كورسەتكەندە اتا - انا بولعان ادام ونىڭ كوڭىل - كۇيىن تۇسىنە ءبىلۋى، بۇرىق - سارىق مىنەزىنە سابىرلىلىق تانىتۋى، بالاعا ونەگە بولۋى ءتيىس.
شابىتتاندىرا دا، كوڭىلىن اۋلاي دا ءبىلۋ
اتا - انالار بالانىڭ قىلىقتارىنداعى وزگەرىستەردى ءجىتى قاداعالاپ، ونىڭ سەزىمى مەن جان دۇنيەسىندەگى سۇرانىسىن ىرىقتى تۇردە شامالاپ، جايسىز كوڭىل - كۇيىنە كەشىرىممەن قاراۋى ءتيىس؛ بالانىڭ تالعامىنا تۇسىنىستىكپەن، قۇرمەتپەن قاراۋ قاجەت؛ بالانى كوبىرەك سپورتپەن اينالىسۋعا جەتەكتەۋ جانە شابىتتاندىرۋ، ۇيرەنۋ مەن دەمالىستى لايىقتى ورنالاستىرۋ قاجەت؛ بالانى كومەك قابىلداي بىلۋگە باۋلۋ ءتيىس، قيىنشىلىققا ۇشىراعاندا وتباسىنداعىلارىنىڭ، ۇستازدارىنىڭ، دوستارىنىڭ، پسيحيكا ماماندارىنىڭ كومەگىنە جۇگىنۋگە بولاتىنىن ۇعىندىرۋ قاجەت.
اتا - انالار بالالارىنىڭ كۇيزەلىسى مەن قيىنشىلىعىن بايانداعانىن تاعات قىلا تىڭداۋى كەرەك، بالانىڭ سەزىمىنە قامقورلىق ءبىلدىرىپ، تۇسىنىستىكپەن قاراۋى ءتيىس، كوبىرەك جول نۇسقاپ، شابىتتاندىرۋ كەرەك، وكتەم، ءزابىرلى ءسوز سويلەۋگە، قىلىق كورسەتۋگە استە بولمايدى.
كوڭىل كۇيىڭىزدى ساباسىنا تۇسىرە ءبىلىڭىز
بالانىڭ ”وقۋ باستاعانداعى قوبالجۋى“ اتا - انالارعا دا اۋىر سىن، اتا - اناسىنىڭ مازاسىزدىعى بالاعا تىپتەن اۋىر تيەدى، وسىدان ۇيرەنۋدەگى ابىرجۋ، قوبالجۋ، ءتىپتى وقۋدان قاجۋ سەزىمى تۋىلادى، اتا - انا بولعان ادام ءوزىن تەجەي ءبىلۋى، كوڭىل كۇيىن ساباسىنا تۇسىرە ءبىلۋى ءتيىس، بالانىڭ ۇيرەنۋىنە عانا تەسىلىپ الماي، جايلى، ەركىن وتباسى ورتاسىن جاراتقانى ءجون.
بالا الدەقانداي تۇيتكىلگە ۇشىراعاندا ماسەلەنى ونىمەن بىرگە شەشۋ قاجەت، پسيحيكا ماماندارىنىڭ كومەگىنە جۇگىنۋگە دە بولادى، ماسەلەنىڭ تۋىلۋ سەبەبىن قاراستىرۋ، ابىرجىماۋ، بالامەن بولعان قاتىناسقا سالقىنىن تيگىزبەۋ كەرەك.
