□ انار بۇلت \ شينجياڭ گازەتىنىڭ ءتىلشىسى دۇڭ لياڭ
بەيجيڭ قىسقى وليمپيادا سپورت جارىسىنىڭ اياقتاعانىنا ءبىر جىل بولۋ قارساڭىندا، اۆتونوميالى رايوندىق 1 - كەزەكتى قىسقى سپورت جارىسى دا ءۇرىمجى قالاسىندا تولىق تابىسپەن شىمىلدىعىن جاپتى.
”وسى كەزەكتى قىسقى سپورت جارىسىنىڭ ءساتتى وتكىزىلۋى رايونىمىزداعى قار - مۇز سپورتىنىڭ ’قىسقى وليمپيادادان كەيىنگى داۋىردە‘ تىڭ دامۋ كەزەڭىن قارسى العاندىعىن اڭعارتادى. ءبىز بۇرىنعى كەيبىر باسىمدىققا يە تۇرلەر بويىنشا ’جالاڭ بەلدەسۋدەن‘ ءارقايسى تۇرلەردى جاپپاي جان - جاقتىلى دامىتۋعا ويىستىق، شينجياڭنىڭ قار - مۇز سپورتى ’داڭعىل جولعا ءتۇسىپ بارادى‘“، - دەدى اۆتونوميالى رايوندىق دەنە تاربيە مەكەمەسى قىسقى سپورتتى باسقارۋ ورتالىعىنىڭ مەڭگەرۋشىسى كاڭ يۇڭشين.
باسەكەلىك تۇرلەردىڭ زاپاس كۇشتەرى مولىنان شىقتى
بەيجيڭ قىسقى وليمپيادا سپورت جارىسى وتكىزىلۋدەن بۇرىن، رايونىمىزدىڭ قار - مۇز سپورت تۇرلەرى نەگىزىنەن كونكيمەن جىلدام سىرعاناۋ، تاۋ شاڭعى، دالالىق شاڭعى سىندى 3 تۇرگە شوعىرلانعان ەدى.
2006 - جىلدان باستاپ، رايونىمىز ”تيانشان قىسى“ اتىنداعى ميلليون جاس ۇلاننىڭ قار - مۇز سپورتىن ورىستەتىپ، ”مۇزداعى سپورتتان ۇلگى كورسەتەتىن 100 مەكتەپتى“ ورنالاستىردى ءارى كونكيمەن جىلدام سىرعاناۋ جارىسىن ءۇرتىس وتكىزىپ، رايونىمىز ءۇشىن كونكيمەن جىلدام سىرعاناۋ سپورتىنىڭ قىرۋار زاپاس كۇشىن باۋلىدى. 13 - كەزەكتى مەملەكەتتىك قىسقى سپورت جارىسىنان كەيىن كونكيمەن جىلدام سىرعاناۋ رايونىمىزداعى قار - مۇز سپورتىنىڭ باسىم تۇرىنە اينالدى.
ىلە - شالا، بەيجيڭ قىسقى وليمپيادا سپورت جارىسىنا دايىندالۋ، قاتىناسۋ ءۇشىن رايونىمىز سالا اتتاعان، ءتۇر اتتاعان دارىندى تاڭداۋ قىزمەتى ارقىلى اناعۇرلىم كوپ جاس ۇلاندى قارداعى سپورت تۇرلەرى بويىنشا جاتتىعۋعا قاتىناستىرا باستادى دا، تاۋ شاڭعى جانە دالالىق شاڭعى سپورتىنىڭ ءبىر توپ زاپاس كۇشىن باۋلىدى. دىلنيگار رايىمجان، بايان جالىن، ۋاڭ زىياڭ، لۇي يشين قاتارلىلار مەملەكەتتىك قۇراماعا تاڭدالىپ، بەيجيڭ قىسقى وليمپيادا سپورت جارىسىنداعى جارىستارعا قاتىناستى.
بەيجيڭ قىسقى وليمپيادا سپورت جارىسىنان كەيىن، رايونىمىزداعى ءار ۇلت بۇقاراسى جالعاپ تاراتىلعان تەلە باعدارلاماسى ارقىلى اناعۇرلىم كوپ قار - مۇز سپورت تۇرىمەن تانىستى ءارى ولارعا قانىق بولدى، بايقاپ كورۋ ارقىلى بىرتىندەپ ارالاسىپ كەتتى.
رايونىمىزداعى قار - مۇز سپورتىنىڭ دامۋىن ونان ارى ىلگەرىلەتىپ، رايونىمىزدىڭ قار - مۇز سپورت تۇرلەرىن مولايتۋ ءۇشىن، اۆتونوميالى رايوندىق تۇڭعىش كەزەكتى قىسقى سپورت جارىسىندا كونكيمەن جىلدام سىرعاناۋ، تاۋ شاڭعى، سىڭار شاڭعى، دالالىق شاڭعى، دالالىق دوڭگەلەكتى كونكي، دوڭگەلەكتى كونكيمەن جىلدام سىرعاناۋ، كونكيمەن مانەرلەپ سىرعاناۋ، شاڭعىمەن تاۋعا شىعۋ، مۇز دوپ جانە قىسقا ارالىقتا جىلدام سىرعاناۋ سياقتى 10 ۇلكەن باسەكەلىك جارىس ءتۇرى، 104 كىشى جارىس ءتۇرى ورنالاستىرىلىپ، بۇكىل شينجياڭداعى 14 ايماق، وبلىس، قالانىڭ ۋاكىلدەر ۇيىرمەلەرىندەگى 92 ۋاكىلدەر قۇراماسىن، قار - مۇز سپورت ساڭلاعى بولعان 1029 جاس ۇلاندى جارىسقا قاتىناسۋعا باۋرادى.
التاي ايماعى رايونىمىزدىڭ قار - مۇز سپورتىنداعى ءداستۇرلى ايماق رەتىندە، دوڭگەلەكتى كونكيمەن جىلدام سىرعاناۋدان باسقا 9 ۇلكەن باسەكەلىك جارىس تۇرىنەن جيىنى 44 التىن مەدالعا، 33 كۇمىس مەدالعا، 25 قولا مەدالعا قول جەتكىزىپ، قۋاتتى كۇشى مەن تولىق زاپاس كۇشىن ايگىلەدى. ءۇرىمجى قالاسى، سانجى حۇيزۋ اۆتونوميالى وبلىسى، تارباعاتاي ايماعى جەكە - جەكە تاۋ شاڭعى، كونكيمەن جىلدام سىرعاناۋ، قىسقا ارالىقتا جىلدام سىرعاناۋ سياقتى تۇرلەردە بەلگىلى باسەكەلىك قۋاتتارىن ايگىلەدى.
قۋانارلىعى، قار - مۇز سپورتىنىڭ دامۋى ءبىرشاما كەش بولعان بۇراتالا موڭعۇل اۆتونوميالى وبلىسىندا سوڭعى جىلداردا قار - مۇز الاڭدارى قۇرىلىسىنىڭ سەرپىنى وتە زور بولىپ، جەرگىلىكتى ورىنداعى قار - مۇز سپورتىنىڭ دامۋىنا تۇرتكى بولدى، ولار دالالىق شاڭعى، دالالىق دوڭگەلەكتى كونكي، كونكيمەن مانەرلەپ سىرعاناۋ تۇرلەرىنەن 3 التىن مەدال، 5 كۇمىس مەدال، 4 قولا مەدال الدى. ال قار - مۇز بايلىعى ەداۋىر تاپشى وڭتۇستىك شينجياڭ وڭىرىنەن كوپتەگەن قۇراما جارىسقا قاتىناسىپ قانا قويماي، ايتارلىقتاي ناتيجەگە دە قول جەتكىزدى. اقسۋ ايماعى تاۋ شاڭعى، سىڭار شاڭعى، دالالىق شاڭعى جانە شاڭعىمەن تاۋعا شىعۋ تۇرلەرىندە جيىنى 6 التىن مەدال، 8 كۇمىس مەدال، 4 قولا مەدال الدى. قاشقار ايماعى، حوتان ايماعى، بايىنعولين موڭعۇل اۆتونوميالى وبلىسى دا قار - مۇز سپورت تۇرلەرىندە التىن مەدال بولماۋ جاعدايىن اياقتاتتى.
”وسى كەزەكتى قىسقى سپورت جارىسى كەزىندە ءارقايسى تۇرلەردەن جارىسقا قاتىناساتىن قۇرامالار سانى، جارىسقا قاتىناساتىن سپورتشىلار سانى بۇدان بۇرىن ءبىز وتكىزگەن ءارقايسى جەكە تۇرلەر جارىسىنداعىدان الدەقايدا اسىپ كەتتى. اۆتونوميالى رايوننىڭ 1 - كەزەكتى قىسقى سپورت جارىسى رەتىندە، جارىس تۇرلەرىنىڭ بەلگىلەنۋى دە ايماق، وبلىس، قالالاردىڭ نازارىن قاتىستى سپورت تۇرلەرىنە اۋدارىپ، رايونىمىزدىڭ بۇدان بىلايعى قار - مۇز سپورتىنىڭ جالپىلاسۋىنا جانە دامۋىنا جاقسى باستاما اشتى“، - دەدى كاڭ يۇڭشين.
بۇقارانىڭ دەنە تاربيەگە ارالاسۋ ىنتاسى كۇشەيە ءتۇستى
اۆتونوميالى رايوندىق تۇڭعىش كەزەكتى قىسقى سپورت جارىسىنىڭ باسەكەلىك جارىستارى وتكىزىلۋمەن بىرگە، رايونىمىزدىڭ جەر - جەرى ”9 - كەزەكتى مەملەكەتتىك بۇقارالىق قار - مۇز ماۋسىمى“ جەلىلەس قيمىلى، الەۋمەتتىك اۋماقتاردىڭ قىسقى سىپورت جارىستارى سياقتىلارمەن ۇشتاستىرىپ، قارداعى فۋتبول جارىسى، قارلى دالاداعى ات بايگەسى، قار - مۇز مارافونى، قىسقى قىزىقتى سپورت جارىسى سياقتى مول مازمۇندى، الۋان ءتۇرلى بۇقارالىق دەنە تاربيە قيمىلدارىن ورىستەتتى.
2 - ايدىڭ 18 - كۇنى ”9 - كەزەكتى مەملەكەتتىك بۇقارالىق قار - مۇز ماۋسىمى · قاردا كوز تارتقان شينجياڭ“ اتىنداعى اۆتونوميالى رايوندىق 1 - كەزەكتى قىسقى سپورت جارىسىنداعى قار - مۇز مارافونى اينالما جارىسى (سانجى بەكەتى) سانجى قالاسى تيڭجوۋ ەكولوگيالىق جاسىل اڭعارىندا باستالىپ، بۇكىل ەلدىڭ جەر - جەرىنەن كەلگەن 700دەن استام جۇگىرىس اۋەسكەرىن قاتىناسۋعا باۋرادى. جارىس ىستەرى كاسىپتىك جارتىلاي مارافون جارىسىن قامتۋمەن بىرگە، ۇلتتار ىنتىماعىنىڭ بەرەكەلى شاڭىراعى بويىنشا 5 كيلومەترلىك شاتتىق جۇگىرىسى دە وتكىزىلدى، بۇكىل ەلدىڭ جەر - جەرىنەن كەلگەن جۇگىرىس اۋەسكەرلەرى كورىكتى سانجىنىڭ قىس كۇندەرىندەگى قار - مۇزىنىڭ كەرەمەتىن سەزىنۋمەن بىرگە، جەرگىلىكتى ورىنداعى ءار ۇلت بۇقاراسى دا قار - مۇز سپورتى الا كەلگەن قىزىق دۋمانعا بىرگە بولەندى.
سانجى قالاسىنداعى جۇگىرىس اۋەسكەرى جاڭ حۇي تۇڭعىش رەت ءوز اۋىلىندا وتكىزىلگەن مارافون جارىسىنا قاتىناسىپ، جارتىلاي مارافوندى ءساتتى اياقتاتتى، بۇكىل ەلدىڭ جەر - جەرىندەگى جۇگىرىس اۋەسكەرلەرىنىڭ اۋىلىنا دەگەن ماقتاۋىن ەستىگەندە، شىن كوڭىلدەن شاتتاندى جانە ماقتانىش ەتتى.
اۆتونوميالى رايوندىق دەنە تاربيە مەكەمەسى بۇقارالىق دەنە تاربيە باسقارماسىنىڭ باستىعى جاي حۇڭفي بىلاي دەپ قارادى: ”مارافون اينالمالى جارىسى بۇكىل شينجياڭنىڭ جەر - جەرىندە جۇيەلى، قاراپايىم وتكىزىلگەن بۇقارالىق مارافون جارىسى ىستەرىنە ۇلگىلىك رول اتقاردى، ونان دا ماڭىزدىسى، ’قىسقى وليمپيادادان كەيىنگى داۋىردە‘ رايونىمىزدىڭ قار - مۇز سپورتىنىڭ دامۋىن، سونداي - اق ’دەنە - تاربيە + مادەنيەت + ساياحات + سالاماتتىق‘ سياقتىلاردىڭ تەرەڭدەي توعىسۋىن ۇزدىكسىز ىلگەرىلەتىپ، دەمەگىشىن ىسكە قوستى. ەكونوميكانى جوعارى ساپالى دامىتۋعا كۇش ۇستەۋمەن بىرگە، ءار ۇلت بۇقاراسىنىڭ كەڭ كولەمدە ارالاسۋىن، جاپپاي ىشتەسۋىن، ىشكەرىلەي توعىسۋىن دا جەبەدى“.
1 - ايدىڭ ورتا شەنىندە ونسۋ اۋداندىق 6 - ورتا مەكتەپتىڭ وقىتۋشىسى ەركىن روزى مارالباسى اۋدانىندا اقىسىز شاڭعى تەبۋ كۋرسىنا قاتىناستى. سول كۇنى ”9 - كەزەكتى مەملەكەتتىك بۇقارالىق قار - مۇز ماۋسىمى · قاردا كوز تارتقان شينجياڭ“ اتىنداعى وڭتۇستىك شينجياڭ اۋماعىنىڭ 3 - دارەجەلى قوعامدىق دەنە تاربيە جەتەكشىلەرى (شاڭعى ءتۇرى) كۋرسى مارالباسى اۋدانىندا وتكىزىلدى.
اۆتونوميالى رايوندىق قوعامدىق دەنە تاربيە جەتەكشىلەرى قوعامىنان كەلگەن شاڭعى جاتتىقتىرۋشىلارى نازاريا مەن امالياتتى ۇشتاستىرا ساباق ءوتۋ ءتاسىلى ارقىلى وڭتۇستىك شينجياڭداعى ايماق، وبلىستاردان كەلگەن 60 نەشە شاڭعى اۋەسكەرىنە شاڭعى تەبۋ حاۋىپسىزدىك بىلىمدەرىن، تەگىس جەردە ۇيلەسۋ، سىرعاناۋدىڭ نەگىزگى بەينەسى سياقتى ساباقتاردى ءوتتى. ساباق اياقتالعاننان كەيىن، ولاردان جابىق ەمتيحان جانە امالياتتىق ەمتيحان الدى ءارى ناتيجەسى تولىمدى بولعاندارعا قوعامدىق دەنە تاربيە جەتەكشىسى كۋالىگىن بەردى.
ۇعىسۋعا قاراعاندا، اۆتونوميالى رايوندىق تۇڭعىش كەزەكتى قىسقى سپورت جارىسى كەزىندە شينجياڭنىڭ جەر - جەرىندە جيىنى 428 ءتۇرلى بۇقارالىق قار - مۇز دەنە تاربيە جەلىلەس قيمىلى وتكىزىلىپ، قاتىناسقاندار 600 مىڭ ادام - رەتتەن اسىپ، تۇتاس شينجياڭداعى ءار ۇلت بۇقاراسىنىڭ قار - مۇز سپورتىنا قاتىناسۋ ىنتاسىن قاۋلاتا تۇسكەن.
ورايدى مىقتى يگەرىپ، قار - مۇز سپورتىن دامىتتى
”اۆتونوميالى رايوندىق تۇڭعىش كەزەكتى قىسقى سپورت جارىسىنىڭ وتكىزىلۋى رايونىمىزعا قار - مۇز سپورتى جاعىندا اناعۇرلىم كوپ ۇزدىك زاپاس دارىندىلاردى دايىنداپ قانا قويماي، ودان دا ماڭىزدىسى، بىزگە شينجياڭنىڭ قار - مۇز سپورتى دامۋىنىڭ كومەسكى كۇشىن كورسەتتى“. كاڭ يۇڭشين تىلشىگە بىلاي دەدى: كەلەسى قادامدا اۆتونوميالى رايوندىق دەنە تاربيە مەكەمەسىنىڭ قىسقى سپورتتى باسقارۋ ورتالىعى تۇتاس شينجياڭداعى ءار تۇردەگى قار - مۇز سپورتى تورەشىلەرىن، جاتتىقتىرۋشىلارىن باۋلۋ قىزمەتىن باستاۋ ارقىلى رايونىمىزدىڭ قار - مۇز سپورتىن جالپىلاستىرۋعا جانە دامىتۋعا اناعۇرلىم جاقسى نەگىز قالاۋدى جوسپارلادى.
سونىمەن قاتار قىسقى سپورتتى باسقارۋ ورتالىعى قار - مۇز سپورتى ەرەكشەلىگىنە يە مەكتەپتەردى ورنالاستىرۋدى جانە ولارمەن سەلبەستىكتى كەڭەيتىپ، الاڭ - ساراي، دارىندى جاقتارىنداعى باسىمدىقتان پايدالانىپ، كونكيمەن جىلدام سىرعاناۋ، مۇز دوپ، كونكيمەن مانەرلەپ سىرعاناۋ سياقتى قار - مۇز سپورتى جەلىلەس ۇسىنىس جارىسىن، اۋىس - كۇيىس جارىسىن وتكىزىپ، قار - مۇز سپورتىنا اۋەس قالىڭ جاس ۇلانداردىڭ اۋىس - كۇيىس جاساسۋىنا، دەڭگەيىن جوعارىلاتۋىنا اناعۇرلىم كوپ تۇعىر ازىرلەپ بەرەدى.
”بۇرىن ءۇرىمجى قالاسىنىڭ قار - مۇز سپورتىندا تەك كونكيمەن جىلدام سىرعاناۋ عانا بەتكە باسار ءتۇر بولاتىن. جۋىرداعى جىلداردا ’قار - مۇز سپورتىن مەكتەپتەرگە ەنگىزۋ‘ ورنالاستىرۋىنىڭ ارقاسىندا، قار - مۇز سپورت تۇرلەرى ۇزدىكسىز كوبەيىپ، مۇز دوپ، كونكيمەن مانەرلەپ سىرعاناپ، تاۋ شاڭعى، دالالىق شاڭعى سياقتى تۇرلەردەن ءبىرتالاي سپورتشى جارىققا شىقتى“. ءۇرىمجى قالالىق دەنە تاربيە مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى ليۋ ييۇڭ مىنانى ءبىلدىردى: كەلەسى قارلى ماۋسىمدا ءۇرىمجى قالاسى قار - مۇز سپورتىن ۇزدىكسىز كەڭ كولەمدە ورىستەتىپ، الەۋمەتتىك اۋماق پەن قالا تۇرعىندارىنىڭ قىسقى سپورت جارىسى، بۇقارالىق شاڭعى جارىسى، قار - مۇز مارافونى سياقتىلاردى وتكىزۋ ارقىلى جارىستى كوبىرەك وتكىزىپ، قيمىلدى كوبىرەك ۇيىمداستىرىپ، قار - مۇز دەنە تاربيە قيمىلدارىن مولايتىپ، ءۇرىمجى قالاسىنداعى قار - مۇز سپورتىنىڭ ارشىندى دامۋىن ونان ارى جەبەيدى.
”وسى كەزەكتى قىسقى سپورت جارىسىندا ءبىز مۇزداعى سپورت تۇرىندە تاماشا ناتيجەگە قول جەتكىزدىك، سونىمەن بىرگە قارداعى سپورت تۇرلەرىن دامىتۋداعى جەتەرسىزدىكتەرىمىزدى دە بايقادىق“. سانجى حۇيزۋ اۆتونوميالى وبلىستىق مادەنيەت - دەنە تاربيە، راديو - تەلەۆيزيا جانە ساياحات مەكەمەسى دەنە تاربيە ءبولىمىنىڭ باستىعى ليۋ چۋانچي تانىستىرىپ بىلاي دەدى: ەندى تيانشان تاۋى بوعدا حالىقارالىق شاڭعى الاڭى، نورجا شاڭعى الاڭى سياقتى الاڭ ورىندارىنان پايدالانىپ، مەكتەپتەردە قارداعى سپورت تۇرلەرىن جالپىلاستىرۋ تەبىنىن ارتتىرامىز، سونداي - اق سانجى قالاسىندا، فۋكاڭ قالاسىندا، ماناس اۋدانىندا، جەمسارى اۋدانىندا ءۇي ىشىندەگى كەمەلدى كونكي سارايلارىن سالىپ، كونكيمەن جىلدام سىرعاناۋ، قىسقا ارالىقتا جىلدام سىرعاناۋ تۇرلەرى بويىنشا جوعارى دەڭگەيدەگى جاتتىعۋ قاجەتىن قاناعاتتاندىرۋ، سونىمەن قاتار كونكيمەن مانەرلەپ سىرعاناۋ، مۇز دوپ سياقتى سپورت تۇرلەرىن جالپىلاستىرىپ، سانجى وبلىسىنداعى قار - مۇز سپورت تۇرلەرىنىڭ دامۋىن ونان ارى بايىتۋ جانە تەڭگەرۋ جوسپارلاندى.
”تۇڭعىش كەزەكتى قىسقى سپورت جارىسىندا ءبىز ءبىر التىن مەدال عانا العانىمىزبەن، التىن مەدال الا الماۋ جاعدايىن اياقتاتتىق“. حوتان ايماقتىق مادەنيەت - دەنە تاربيە، راديو - تەلەۆيزيا جانە ساياحات مەكەمەسىنىڭ كادرى ادىلجان قيۇم بىلاي دەدى: ءبىز وقۋ - اعارتۋ تاراۋلارىمەن بىرلەسىپ دوڭگەلەكتى كونكيمەن سىرعاناۋ، كونكيمەن جىلدام سىرعاناۋ سياقتى تۇرلەردى نەگىز ەتكەن ”قار - مۇز سپورتىن مەكتەپتەرگە ەنگىزۋ“ قيمىلىن ورىستەتىپ، قار - مۇز سپورتى ەرەكشەلىگىنە يە مەكتەپتەردى بىرگە قۇرىپ، تاڭداۋلى بالالاردى كاسىپتىك جاتتىعۋعا تاڭداپ قاتىناستىرامىز. كەلەسى كەزەكتى اۆتونوميالى رايوندىق قىسقى سپورت جارىسىندا بىزدەن بۇدان دا كوپ بالالار جارىسقا قاتىناساتىندىعىنا ءارى اناعۇرلىم جاقسى ناتيجەگە قول جەتكىزەتىندىگىنە سەنەمىن.
