انار بۇلت \ شينجياڭ گازەتىنىڭ ءتىلشىسى ۋاڭ شيڭرۇي 2 - ايدىڭ 22 - كۇنى ۇرىمجىدەن حابارلايدى. اۆتونوميالى رايوندىق پارتكومنىڭ شۋجيى ما شيڭرۇي، اۆتونوميالى رايوننىڭ ءتوراعاسى ەركىن تۇنياز 2 - ايدىڭ 22 - كۇنى تۇستەن كەيىن ۇرىمجىدە تاجىكستاننىڭ جۇڭگوداعى باس ەلشىسى سايىدزودامەن جانە ونىڭ ساپارلاستارىمەن كەزدەستى.
ما شيڭرۇي اۆتونوميالى رايوندىق پارتكوم مەن ۇكىمەت اتىنان سايىدزودانىڭ جانە ونىڭ ساپارلاستارىنىڭ شينجياڭدا تەكسەرۋدە، ساپاردا بولىپ، سەلبەستىكتى ىلگەرىلەتكەندىگىن قارسى الدى. ول بىلاي دەدى: ەكى ەلدىڭ مەملەكەت باسشىلارىنىڭ ستراتەگيالىق جەتەكشىلىگىندە، جۇڭگو مەن تاجىكستان باستان - اياق ءبىر - بىرىنە سەنىپ، شىنايى دوس بولىپ، قيىندىقتى بىلەك بىرىكتىرە جەڭىپ، ساياسيدا ءوزارا سەنىم ارتۋدى ۇزدىكسىز تەرەڭدەتتى، ”ءبىر بەلدەۋ، ءبىر جولدى“ بىرگە قۇرۋ جەتىستىگى كۇن سايىن مولايىپ، جان - جاقتى سەلبەستىگى ۇزدىكسىز ىلگەرىلەدى. جۇڭگونىڭ شينجياڭى مەن تاجىكستان جاعراپيالىق جاقتان كورشى، ۇلتتار ءوزارا تاتۋ، گۋمانيتارلىق جاقتان توعىسقان، ەكى جاقتىڭ ەكونوميكا - ساۋدا، قارجى قوسۋ، عىلىم - تەحنيكا، وقۋ - اعارتۋ سياقتى سالالارداعى سەلبەستىگى تىعىز، ءار سالاداعى ءوزارا پايدا جەتكىزىپ سەلبەستىك جاساسۋ دەڭگەيىن ونان ارى جوعارىلاتۋ ەكى جاق حالقىنىڭ دامۋ تىلەگىنە ۇيلەسەدى. كەزەكتە شينجياڭ جۇڭگو كوممۋنيستىك پارتياسى 20 - قۇرىلتايىنىڭ ءتۇرلى كەلەلى شەشىمدەرىن، ورنالاستىرۋلارىن جاپپاي تياناقتاندىرىپ، جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىندا شينجياڭ امالياتىن تىڭعىلىقتى ىلگەرىلەتىپ، شينجياڭ تاراۋىن قۇلشىنا جازۋدا. ءبىز ەكى ەل باسشىلارى كەلىسكەن ماڭىزدى ورتاق تانىمدى اناعۇرلىم ويداعىداي تياناقتاندىرىپ، ”ءبىر بەلدەۋ، ءبىر جولدى“ جوعارى ساپالى بىرگە قۇرۋدى توڭىرەكتەي وتىرىپ، جۇڭگو − تاجىكستان ۇكىمەت ارالىق ەكونوميكا - ساۋدا سەلبەستىك كوميتەتى شينجياڭ − تاجىكستان ەكونوميكا - ساۋدا سەلبەستىگى بولىمشە كوميتەتىنىڭ بەلسەندى رولىن ويداعىداي ساۋلەلەندىرىپ، سەلبەستىك مەحانيزمىن ويداعىداي قۇرىپ، ونان ۇتىمدى پايدالانىپ، ەكى جاقتىڭ سەلبەستىك جەتىستىگىن ويداعىداي بەكەمدەپ، تاجىكستاننىڭ جەرگىلىكتى ورىندارىمەن تىلدەسۋدى، پىكىرلەسۋدى جانە ءتۇيىلىسۋدى، سەلبەستىكتى ونان ارى كۇشەيتىپ، نەگىزدىك قۇرىلعى قۇرىلىسى، شەكارا وتكەلى قۇرىلىسى، اۋىل شارۋاشىلىعى، سۋ يگىلىگى، قاتىناس - تاسىمال سياقتى سالالارداعى ناقتى سەلبەستىكتى تىنباي كەڭەيتىپ، گۋمانيتارلىق سالادا ىشكەرىلەي پىكىرلەسۋدى كۇشەيتىپ، ەكى جاقتى ساۋدا - ساتتىق كولەمىن جانە دەڭگەيىن جوعارىلاتىپ، جۇڭگو مەن تاجىكستاننىڭ جان - جاقتى ستراتەگيالىق سەرىكتەستىك قارىم - قاتىناسىنىڭ تىڭ بەلەسكە قادام تاستاۋىن ىلگەرىلەتۋگە بەلسەندى ۇلەس قوسامىز.
سايىدزودا شينجياڭ جاقتىڭ ىستىق ىقىلاسپەن قارسى العاندىعىنا العىس ايتتى. ول مىنالاردى ءبىلدىردى: وسى جولعى ساپارىمىزدا تاجىكستان مەن جۇڭگو شينجياڭىنىڭ ءداستۇرلى دوستىق سەلبەستىگىن ىلگەرىلەتۋ نەگىزىندە، سەلبەستىك سالاسىن اناعۇرلىم كەڭەيتىپ، سەلبەستىك دەڭگەيىن جوعارىلاتۋ ماقسات ەتىلدى. تاجىكستان جۇڭگومەن، وتە - موتە، جۇڭگونىڭ شينجياڭىمەن سەلبەستىك جاساسۋدى باستان - اياق ماڭداي الدى ورىنعا قويىپ كەلەدى، ەكى جاقتىڭ سەلبەستىكتى كەڭەيتۋ ءورىسى كەڭ. مەحانيزم تۇعىرىنان اناعۇرلىم ۇتىمدى پايدالانىپ، ەكى جاقتىڭ سەلبەستىك نىساندارىنىڭ تياناقتانىپ ونىمدىلىك كورسەتۋىن ىلگەرىلەتىپ، شەكارا وتكەلىندە كەدەننەن وتكىزۋ قابىلەتىن جوعارىلاتىپ، نەگىزدىك قۇرىلعى شارت - جاعدايىن جاقسارتىپ، حالىقارالىق زات اينالىمى ارناسىن ىركىلىسسىزدەندىرىپ، ەكى جاقتىڭ اۋىل شارۋاشىلىعى ونىمدەرىن وڭدەۋ، ەلەكتروندى ساۋدا، فوتوۆولتتىق ەلەكتر ستانسياسى قۇرىلىسى، كەن بايلىعىن اشۋ، مادەنيەت - اعارتۋ سياقتى سالالارداعى ءوزارا پايدا جەتكىزەتىن سەلبەستىكتى ۇزدىكسىز كەڭەيتۋدى ءۇمىت ەتەمىن.
چىن ۋيجۇن قاتارلىلار كەزدەسۋگە قاتىناستى.
