14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ ءتوراعالار القاسى 1 - جيىنىن وتكىزدى
جاۋ لىجي قاتارلى 11 ادام تۇراقتى ءتوراعا بولىپ سايلاندى
شينحۋا اگەنتتىگىنىڭ 3 - ايدىڭ 4 - كۇنى بەيجيڭنەن بەرگەن حابارى. مەملەكەتتىك حالىق قۇرىلتايىنىڭ ۋاكىلى، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى جاۋ لىجي 3 - ايدىڭ 4 - كۇنى وتكىزىلگەن 14 - كەزەكتى مەملەكەتتىك حالىق قۇرىلتايى 1 - ءماجىلىسى ءتوراعالار القاسىنىڭ 1 - جيىنىندا ءتوراعالار القاسىنىڭ تۇراقتى ءتوراعاسى بولىپ سايلاندى. سونىمەن بىرگە لي گانجيە، لي حۇڭجۇڭ، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، حاۋ ميڭجين، ساي دافىڭ، حى ۋي، ۋ ۋيحۋا ءتوراعالار القاسىنىڭ تۇراقتى ءتوراعاسى بولىپ سايلاندى.
14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ دايىندىق جيىنىندا سايلانعان ءماجىلىس ءتوراعالار القاسى 3 - ايدىڭ 4 - كۇنى تۇستەن بۇرىن حالىق سارايىندا 1 -جيىنىن وتكىزدى. جيىنعا قاتىناسۋعا ءتيىستى 192 ادامنىڭ 192سى قاتىناستى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
مەملەكەتتىك حالىق قۇرىلتايىنىڭ ءىس قاراۋ ەرەجەسى بويىنشا، جيىندا ەڭ الدىمەن 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باستىعى لي جانشۋدىڭ باسقارۋىندا، ءماجىلىس ءتوراعالار القاسىنىڭ تۇراقتى ءتوراعالارى سايلاندى.
ءتوراعالار القاسى تۇراقتى ءتوراعالارىنىڭ بورىشى: ءتوراعالار القاسىنىڭ جيىنىن شاقىرۋ ءارى باسقارۋ؛ ءتوراعالار القاسىنىڭ قاراۋىنا تاپسىرىلاتىن ىستەر جونىندە حاتشىلار باسقارماسىنىڭ جانە قاتىستى ارناۋلى كوميتەتتەردىڭ بايانداماسىن تىڭداپ، ءتوراعالار القاسىنا ۇسىنىستار قويۋ؛ ءماجىلىستىڭ كۇن تارتىبىنە قاجەتتى رەتتەۋ جۇرگىزۋىنە بولادى؛ ۋاكىلدەر ۇيىرمەلەرى باستىقتارىنىڭ جيىنىن اشىپ، كەڭەستىك جوبا جانە قاتىستى باياندامالاردىڭ كەلەلى ماسەلەلەرى جونىندە ۋاكىلدەر ۇيىرمەلەرىنىڭ قاراۋ پىكىرىن تىڭداپ، تالقى جۇرگىزۋىنە ءارى تالقى جاعدايى مەن پىكىردى ءتوراعالار القاسىنا مالىمدەۋىنە بولادى؛ كەلەلى ارناۋلى ماسەلەلەر جونىندە ۋاكىلدەر ۇيىرمەسى سايلاعان قاتىستى ۋاكىلدەردى تالقى جۇرگىزۋگە شاقىرىپ، جيىننىڭ تالقى جاعدايىن جانە پىكىردى ءتوراعالار القاسىنا مالىمدەۋىنە بولادى.
ءتوراعالار القاسىنىڭ تۇراقتى ءتوراعالارى سايلانىپ تۇراقتانعاننان كەيىن، لي جانشۋ ءتوراعالار القاسىنىڭ تۇراقتى ءتوراعالارىن ءتوراعالار مىنبەسىنە شىعىپ، جيىندى باسقارۋعا ۇسىنىس ەتتى. ءتوراعالار القاسىنىڭ تۇراقتى ءتوراعالارى ءتوراعالار مىنبەسىنە شىقتى، لي جانشۋ ولارمەن ءبىر - بىرلەپ قول الىسىپ، قۇرمەت بىلدىرگەننەن كەيىن جيىن زالىنان شىقتى. بۇكىل زالدى دۋ قول شاپالاق ءۇنى كەرنەدى.
وسىدان كەيىن ءتوراعالار القاسىنىڭ جيىنى جاۋ لىجيدىڭ باسقارۋىندا 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ كۇن ءتارتىبىن داۋىسقا سالىپ ماقۇلدادى. ءماجىلىستىڭ كۇن تارتىبىنە ساي، بۇل رەتكى ءماجىلىس 3 - ايدىڭ 5 - كۇنى تۇستەن بۇرىن اشىلىپ، 3 - ايدىڭ 13 - كۇنى تۇستەن بۇرىن جابىلادى، ءماجىلىس ۋاقىتى 8 جارىم كۇن بولادى.
مەملەكەتتىك حالىق قۇرىلتايىنىڭ ءىس قاراۋ ەرەجەسىندەگى بەلگىلەمە بويىنشا، ءتوراعالار القاسىنىڭ 1 - جيىنى سايلاعان ءتوراعالار القاسىنا مۇشە بىرنەشە ادام ءماجىلىستىڭ ءار رەتكى جالپى جيىنىنىڭ اتقارۋشى ءتوراعاسى مىندەتىن جەكە - جەكە وتەيدى. داۋىسقا سالۋ ارقىلى جيىن ءماجىلىستىڭ جالپى جيىندارىنىڭ اتقارۋشى ءتوراعالارىن سايلادى.
جيىن داۋىسقا سالۋ ارقىلى ليۋ جۇنچىن، مىڭ شياڭفىڭ، جياڭ شينجى، ليۋ جيانبو، ۋاڭ چاۋلاردىڭ ءماجىلىستىڭ ورىنباسار باس حاتشىلارى بولۋىن ۇيعاردى. جيىن ۋاڭ چاۋدىڭ ءماجىلىستىڭ مالىمدەمەشىسى مىندەتىن قوسىمشا اتقارۋىن ۇيعاردى.
جيىن داۋىسقا سالۋ ارقىلى ءماجىلىستىڭ 14 - كەزەكتى مەملەكەتتىك حالىق قۇرىلتايىنىڭ ارناۋلى كوميتەتتەرىن قۇرۋ جونىندەگى قاۋلى جوباسىن، ءماجىلىستىڭ 14 - كەزەكتى مەملەكەتتىك حالىق قۇرىلتايىنىڭ ارناۋلى كوميتەتتەرىنىڭ مەڭگەرۋشى مۇشەلەرى، ورىنباسار مەڭگەرۋشى مۇشەلەرى، مۇشەلەرى كانديداتتارىن داۋىسقا سالۋ ءادىسى جوباسىن ءارقايسى ۋاكىلدەر ۇيىرمەسىنىڭ قاراۋىنا ۇسىنىپ، ءماجىلىستىڭ جالپى جيىنىندا داۋىسقا سالۋعا ۇسىنۋدى ۇيعاردى.
مەملەكەتتىك حالىق قۇرىلتايىنىڭ ءىس قاراۋ ەرەجەسىندەگى بەلگىلەمەگە ساي، ءماجىلىس كەزىندە مەملەكەتتىك حالىق قۇرىلتايىنىڭ نەگىزگى زاڭ جانە زاڭدار كوميتەتى زاڭ شىعارۋ زاڭىنا وزگەرىس ەنگىزۋ جوباسىن قاراۋى قاجەت، ءماجىلىس كەزىندە مەملەكەتتىك حالىق قۇرىلتايىنىڭ قازىنا - ەكونوميكا كوميتەتى حالىق شارۋاشىلىعى جانە قوعامدىق دامۋ جوسپارىن تەكسەرۋى، ورتالىق پەن جەرگىلىكتى ورىنداردىڭ مەجە ەسەبىن تەكسەرۋى قاجەت، سوندىقتان بۇل كوميتەتتەر 3 - ايدىڭ 5 - كۇنى تۇستەن بۇرىنعى ءبىرىنشى جالپى جيىندا جارىققا شىعۋى كەرەك. جيىن 14 - كەزەكتى مەملەكەتتىك حالىق قۇرىلتايى نەگىزگى زاڭ جانە زاڭدار كوميتەتىنىڭ، قازىنا - ەكونوميكا كوميتەتىنىڭ مەڭگەرۋشى مۇشەلەرىنىڭ، ورىنباسار مەڭگەرۋشى مۇشەلەرىنىڭ، مۇشەلەرىنىڭ ۇسىنىستىق كانديداتتارىنىڭ ەسىمدىگىن قارادى. جيىن داۋىسقا سالۋ ارقىلى قاتىستى كانديداتتاردى ۋاكىلدەر ۇيىرمەلەرىنىڭ اقىلداسۋىنا ۇسىنعاننان كەيىن، ءماجىلىستىڭ جالپى جيىنىندا داۋىسقا سالۋعا ۇسىنۋدى ۇيعاردى.
جيىن داۋىسقا سالۋ ارقىلى مىنانى ۇيعاردى: ءماجىلىس كەزىندە ۋاكىلدەردىڭ كەڭەستىك جوبا ۇسىنۋ ۋاقىتى 3 - ايدىڭ 7 - كۇنى ساعات 12گە دەيىن بولادى. ءماجىلىس كەزىندە ءماجىلىستىڭ حاتشىلار باسقارماسى ۋاكىلدەر ۇيىرمەسىنىڭ جانە ۋاكىلدەردىڭ ءماجىلىس كەزىندە العا قويعان كەڭەستىك جوبالارىنا زەرتتەۋ جۇرگىزىپ، ءبىر جاقتى ەتۋ پىكىرىن ورتاعا قويىپ، ءتوراعالار القاسىنىڭ ۇيعارىم جاساۋىنا مالىمدەيدى.
