14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى بەيجيڭدە اشىلدى

شي جينپيڭ، لي جانشۋ، ۋاڭ ياڭ، لي چياڭ، ۋاڭ حۋنيڭ، حان جىڭ، ساي چي، ديڭ شۋەشياڭ، لي شي، ۋاڭ چيشان قاتارلىلار ءتوراعالار مىنبەسىنەن ورىن الدى

لي كىچياڭ ۇكىمەت قىزمەتىنەن بايانداما جاسادى، جاۋ لىجي ءماجىلىستى باسقاردى

زاڭ شىعارۋ زاڭىنا وزگەرىس ەنگىزۋ جوباسى جونىندەگى تۇسىنىك سياقتىلاردى تىڭدادى

　　3 - ايدىڭ 5 - كۇنى 14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى بەيجيڭ حالىق سارايىندا اشىلدى. پارتيا مەن مەملەكەت باسشىلارىنان شي جينپيڭ، لي كىچياڭ، لي جانشۋ، ۋاڭ ياڭ، لي چياڭ، ۋاڭ حۋنيڭ، حان جىڭ، ساي چي، ديڭ شۋەشياڭ، لي شي، ۋاڭ چيشان قاتارلىلار ماجىلىسكە قاتىناستى.

□ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

　　3 - ايدىڭ 5 - كۇنى 14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى بەيجيڭ حالىق سارايىندا اشىلدى. مەملەكەتتىك كەڭەستىڭ زۇڭليى لي كىچياڭ ۇكىمەت قىزمەتىنەن بايانداما جاسادى.

□ سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن

　　3 - ايدىڭ 5 - كۇنى 14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى بەيجيڭ حالىق سارايىندا اشىلدى. جاۋ لىجي اشىلۋ ءماجىلىسىن باسقاردى.

□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

　　شينحۋا اگەنتتىگىنىڭ 3 - ايدىڭ 5 - كۇنى بەيجيڭنەن بەرگەن حابارى. 14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى 3 - ايدىڭ 5 - كۇنى تۇستەن بۇرىن بەيجيڭ حالىق سارايىندا اشىلدى. جاڭا كەزەكتى مەملەكەتتىك حالىق قۇرىلتايىنىڭ 3000عا جۋىق ۋاكىلى حالىقتىڭ ماڭىزدى تاپسىرماسىن ارقالاپ، سالتاناتتى جينالىسقا قاتىناسىپ، نەگىزگى زاڭ مەن زاڭداردا بەرىلگەن قاسيەتتى قىزمەت جاۋاپكەرشىلىكتەرىن مۇقيات وتەدى.

　　بەيجيڭدە العاشقى كوكتەم، تىرشىلىك تىنىسى جالىن اتىپ، بار الاپ جاڭا تۇسكە ەندى. حالىق سارايىنىڭ ۇلكەن زالى سالتاناتتى دا دۋماندى مەرەيگە شومدى، ءتوراعالار مىنبەسىندەگى شىمىلدىقتىڭ ءدال ورتاسىنداعى مەملەكەت گەربى نارت قىزىل تۋمەن جايناي ءتۇستى.

　　ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى جاۋ لىجي ءماجىلىستى باسقاردى. ءماجىلىس ءتوراعالار القاسىنىڭ تۇراقتى ءتوراعالارى، اتقارۋشى ءتوراعالارى لي گانجيە، لي حۇڭجۇڭ، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، حاۋ ميڭجين، ساي دافىڭ، حى ۋي، ۋ ۋيحۋا ءتوراعالار مىنبەسىندەگى اتقارۋشى ءتوراعالار ورنىنا جايعاستى.

　　شي جينپيڭ، لي كىچياڭ، لي جانشۋ، ۋاڭ ياڭ، لي چياڭ، ۋاڭ حۋنيڭ، حان جىڭ، ساي چي، ديڭ شۋەشياڭ، لي شي، ۋاڭ چيشان قاتارلىلار ءتوراعالار مىنبەسىنەن ورىن الدى.

　　14 - كەزەكتى مەملەكەتتىك حالىق قۇرىلتايىنىڭ 1 - ماجىلىسىنە قاتىناسۋعا ءتيىستى ۋاكىل 2977 ادام. 3 - ايدىڭ 5 - كۇنى تۇستەن بۇرىنعى ماجىلىسكە 2948 ادام قاتىناستى، 29 ادام قاتىناسا المادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.

　　تۇستەن بۇرىن ساعات 9دا جاۋ لىجي جۇڭحۋا حالىق رەسپۋبليكاسى 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ اشىلعاندىعىن جاريالادى. بارلىق ادام ورىندارىنان تۇرىپ، اسكەري وركەستردىڭ سۇيەمەلدەۋىمەن مەملەكەت ءانىن اسقاقتاتا شىرقادى.

　　ءماجىلىستىڭ كەڭەس ءتارتىبى بويىنشا، مەملەكەتتىك كەڭەستىڭ زۇڭليى لي كىچياڭ مەملەكەتتىك كەڭەس اتىنان ماجىلىسكە ۇكىمەت قىزمەتىنەن بايانداما جاسادى. بايانداما جالپى ەكى بولىمنەن قۇرالعان: ءبىرىنشى، وتكەن ءبىر جىلداعى جانە 5 جىلداعى قىزمەتتەرگە شولۋ؛ ەكىنشى، ۇكىمەتتىڭ بيىلعى قىزمەتتەرى تۋرالى ۇسىنىستار.

　　لي كىچياڭ باياندامادا بىلاي دەپ اتاپ كورسەتتى: 2022 - جىل − پارتيا مەن مەملەكەت تاريحىندا اسا ماڭىزدى ءبىر جىل بولدى. پارتيا 20 - قۇرىلتايى جەڭىسپەن اشىلىپ، جاپپاي سوتسياليستىك وسىزاماندانعان مەملەكەت قۇرۋدىڭ ايبىندى جوباسى جاسالدى. اساۋ تولقىندى حالىقارالىق ورتا مەن ەل ىشىندەگى رەفورمانىڭ، دامۋدىڭ، ورنىقتىلىقتىڭ جاپالى دا اۋىر مىندەتى الدىندا، شي جينپيڭ جولداستى ۇيتقى ەتكەن پارتيا ورتالىق كوميتەتى بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، قيىنشىلىقتاردان تايسالماي، ىندەتكە توسقاۋىل قويۋ، ەكونوميكانى ورنىقتىرۋ، دامۋ حاۋىپسىز بولۋ تالابىن جاپپاي تياناقتاندىرىپ، ماكرولىق رەتتەۋ - مەڭگەرۋ تەبىنىن ارتتىرىپ، ەكونوميكانىڭ ورنىقتى اينالىمىن، دامۋ ساپاسىنىڭ ورنىقتى جوعارىلاۋىن، قوعامدىق كەلەلى جاعدايدىڭ ورنىقتىلىعىن ساقتاۋدى جۇزەگە اسىردى، ەلىمىزدىڭ دامۋىندا تىم وڭاي - وسپاق قولعا كەلمەگەن تىڭ تابىستارعا قول جەتتى.

　　لي كىچياڭ باياندامادا بىلاي دەپ اتاپ كورسەتتى: وتكەن 5 جىل اسا وزگەشە ءارى ايرىقشا 5 جىل بولدى. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ءبىز دۇنيە ءجۇزى جاعدايىنىڭ جەدەل وزگەرۋى، جاڭا تيپتى ايدارشا ۆيرۋس ىندەتىنىڭ سوققىسى، ەل ءىشى ەكونوميكاسىنىڭ قۇلدىراۋى سياقتى قات - قابات سىناقتاردان سۇرىنبەي ءوتىپ، كەدەيلىكتەن ارىلتۋدان قامال الۋ شايقاسىنىڭ جەڭىسىنە ۋاعىندا قول جەتكىزىپ، جاپپاي دوڭگەلەك داۋلەتتى قوعامدى ۋاعىندا ورناتىپ، ءبىرىنشى 100 جىلدىق كۇرەس نىساناسىن جۇزەگە اسىرىپ، ەكىنشى 100 جىلدىق كۇرەس نىساناسىنىڭ جاڭا جورىعىنا اتتاندىق.

　　لي كىچياڭ باياندامادا بىلاي دەپ اتاپ كورسەتتى: 5 جىلدان بەرى، ءبىز شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ شەشىمدەرى مەن ورنالاستىرۋلارىن ىشكەرىلەي دايەكتىلەندىرىپ، ماكرولىق رەتتەۋ - مەڭگەرۋدە جاڭالىق اشىپ، ەكونوميكالىق اينالىمدى ۇيلەسىمدى ارالىقتا ساقتادىق؛ كەدەيلىكتەن ارىلتۋدان قامال الۋ شايقاسىنىڭ جەڭىسىنە ۋاعىندا قول جەتكىزىپ، كەدەيلىكتەن ارىلتۋدان قامال الۋدىڭ جەتىستىكتەرىن بەكەمدەدىك، كەڭەيتتىك؛ نازاردى ءتۇيىندى سالالار مەن شەشۋشى بۋىنداردا رەفورمانى تەرەڭدەتۋگە شوعىرلاندىرىپ، بازاردىڭ ومىرشەڭدىك قۋاتى مەن قوعامنىڭ جاسامپازدىق قۋاتىن اناعۇرلىم جالىنداتتىق؛ جاڭالىق اشۋ ارقىلى دامۋعا دەم بەرۋ ستراتەگياسىن ىشكەرىلەي اتقارىپ، شارۋاشىلىق قۇرىلىمىنىڭ ساپالىلانۋىن، دارەجەسىنىڭ جوعارىلاۋىن ىلگەرىلەتتىك؛ ىشكى ۇتىمدى سۇرانىمدى كەڭەيتىپ، وڭىرلىك سايكەسە دامۋدى جانە جاڭاشا قالا - قالاشىقتاندىرۋدى ىلگەرىلەتتىك؛ مەملەكەتتىڭ استىق حاۋىپسىزدىگىن قامتاماسىز ەتىپ، اۋىل - قىستاقتى گۇلدەندىرۋ ستراتەگياسىن كۇش سالا اتقاردىق؛ سىرتقا ەسىك اشۋدى تاباندىلىقپەن كەڭەيتىپ، ءوزارا تيىمدىلىك جاساۋ، تەڭ يگىلىكتەنۋ سىندى حالىقارالىق ەكونوميكا - ساۋدا سەلبەستىگىن تەرەڭدەتتىك؛ ەكولوگيالىق ورتانى قورعاۋدى كۇشەيتىپ، جاسىل، تومەن كومىر قىشقىل گازدى دامۋدى جەبەدىك؛ حالىق تۇرمىسىن شىنايى قامتاماسىز ەتىپ جانە جاقسارتىپ، قوعامدىق ىستەردىڭ دامۋىن جەدەلدەتتىك؛ ۇكىمەتتىڭ زاڭ بويىنشا مىندەت وتەۋىن جانە باسقارۋدا جاڭالىق اشۋىن ىلگەرىلەتىپ، قوعامدىق كەلەلى جاعدايدىڭ ورنىقتىلىعىن ساقتادىق.

　　لي كىچياڭ باياندامادا بىلاي دەپ اتاپ كورسەتتى: سوڭعى جىلدارى ەلىمىزدىڭ دامۋدا قول جەتكىزگەن تابىستارى شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىنىڭ ناتيجەسى، شي جينپيڭ جاڭا ءداۋىر جۇڭگوشا سوتسياليزم يدەياسىنىڭ عىلمي جەتەكشىلىگىنىڭ ناتيجەسى، بۇكىل پارتيانىڭ، بۇكىل ارميانىڭ، بۇكىل ەلدەگى ءار ۇلت حالقىنىڭ ىنتىماقتاسا كۇرەس جۇرگىزۋىنىڭ ناتيجەسى.

　　لي كىچياڭ باياندامادا بىلاي دەپ اتاپ كورسەتتى: ءبىز مىنانى دا سەرگەكتىكپەن تانۋىمىز كەرەك: ەلىمىز − دامۋ جولىنداعى ءىرى ەل، ءالى دە سوتسياليزمنىڭ العاشقى كەزەڭىندە تۇر، دامۋدىڭ بىركەلكى، تولىق بولماۋى ماسەلەسى ءالى دە كورنەكتى. ماسەلە مەن سىن - سايىستارعا بەتپە - بەت كەلىپ، ۇكىمەت قىزمەتىن بار زەيىن - كۇشتى جۇمساي وتىرىپ جاقسارتىپ، حالىقتىڭ كەلەلى تاپسىرماسىن ورىنداۋىمىز كەرەك.

　　لي كىچياڭ باياندامادا بىلاي دەپ اتاپ كورسەتتى: بيىل پارتيا 20 - قۇرىلتايىنىڭ رۋحىن جاپپاي دايەكتىلەندىرۋدىڭ باستاما جىلى. دامۋدىڭ باستى مەجەلى نىسانالارى مىنالار: ىشكى ءوندىرىستىڭ جالپى قۇنىن ％5 شاماسىندا ارتتىرۋ؛ قالا - قالاشىقتاردا تىڭنان جۇمىستانعانداردى 12 ميلليون ادام شاماسىندا ارتتىرىپ، قالا - قالاشىقتاردا انىقتالعان جۇمىسسىزدىق مولشەرى ％5. 5 شاماسىندا بولۋ؛ تۇرعىنداردىڭ تۇتىنۋ باعاسىنىڭ قىمباتتاۋ مولشەرى ％3 شاماسىندا بولۋ؛ تۇرعىندار كىرىسىنىڭ ارتۋى ەكونوميكانىڭ ارتۋىمەن نەگىزىنەن قادامداس بولۋ؛ يمپورت - ەكسپورتتىڭ ورنىقتىلىعىن جەبەپ، ساپاسىن جوعارىلاتىپ، حالىقارالىق كىرىس - شىعىستى نەگىزىنەن تەڭەستىرۋ؛ استىق ءونىم مولشەرىن ءبىر تريلليون 300 ميلليارد جىڭنان جوعارى دەڭگەيدە ساقتاۋ؛ ىشكى ءوندىرىستىڭ جالپى قۇنىنداعى ەنەرگيانىڭ بىرلىكتىك جۇمسالىمى مەن باستى لاس زاتتاردىڭ شىعارىلۋ مولشەرىن ۇزدىكسىز تومەندەتىپ، تۇنبا ەنەرگيا تۇتىنىمىن ءتۇيىندى تۇردە تىزگىندەپ، ەكولوگيالىق ورتا ساپاسىن ورنىقتى جاقسارتۋ.

　　ۇكىمەتتىڭ بيىلعى قىزمەتتەرى تۋرالى ۇسىنىسىندا لي كىچياڭ بىرنەشە ءتۇيىندى العا قويدى: ءبىرىنشى، ىشكى سۇرانىمدى كۇش سالا كەڭەيتۋ؛ ەكىنشى، وسىزاماندانعان شارۋاشىلىق جۇيەسىن قۇرۋدى جەدەلدەتۋ؛ ءۇشىنشى، ”ەكىدەن تيتتەي دە اۋىتقىماۋدى“ شىنايى تياناقتاندىرۋ؛ ءتورتىنشى، شەتەل قارجىسىن بارىنشا باۋراۋ جانە ودان اناعۇرلىم زور تەبىنمەن پايدالانۋ؛ بەسىنشى، كەلەلى ەكونوميكالىق، فينانستىق حاۋىپ - قاتەردەن ۇتىمدى ساقتانۋ جانە ونى جويۋ؛ التىنشى، استىق ءوندىرىسىن ورنىقتىرۋ جانە اۋىل - قىستاقتى گۇلدەندىرۋدى ىلگەرىلەتۋ؛ جەتىنشى، دامۋ تاسىلىندە جاسىل بولۋعا ويىسۋدى ىلگەرىلەتۋ؛ سەگىزىنشى، حالىقتىڭ نەگىزگى تۇرمىسىن قامتاماسىز ەتۋ جانە قوعامدىق ىستەردى دامىتۋ.

　　باياندامادا لي كىچياڭ تاعى ۇلت، ءدىن جانە چياۋمين ىستەرى قىزمەتى، مەملەكەت قورعانىسى جانە ارميا قۇرىلىسى، شياڭگاڭنىڭ، اۋمىننىڭ دامۋى جانە ەكى جاعالاۋ قاتىناسى، سونداي - اق ەلىمىزدىڭ ديپلوماتيالىق ساياساتى جونىندە دە بايىمداۋ جاسادى.

　　لي كىچياڭنىڭ بايانداماسى قىزۋ القاۋعا بولەندى.

　　ءماجىلىستىڭ كەڭەس ءتارتىبى بويىنشا، ءماجىلىس مەملەكەتتىك كەڭەستىڭ 2022 - جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ جاعدايى جانە 2023 - جىلعى حالىق شارۋاشىلىعى مەن قوعامدىق دامۋ جوسپارى جوباسى جونىندەگى بايانداماسىن، سونداي - اق 2023 - جىلعى حالىق شارۋاشىلىعى مەن قوعامدىق دامۋ جوسپارى جوباسىن، مەملەكەتتىك كەڭەستىڭ ورتالىق پەن جەرگىلىكتى ورىنداردىڭ 2022 - جىلعى مەجە ەسەبىنىڭ اتقارىلۋ جاعدايى جانە ورتالىق پەن جەرگىلىكتى ورىنداردىڭ 2023 - جىلعى مەجە ەسەپ جوباسى جونىندەگى بايانداماسىن جانە ورتالىق پەن جەرگىلىكتى ورىنداردىڭ 2023 - جىلعى مەجە ەسەپ جوباسىن تەكسەردى.

　　13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ تاپسىرۋىمەن 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىعى ۋاڭ چىن زاڭ شىعارۋ زاڭىنا وزگەرىس ەنگىزۋ جوباسى جونىندە تۇسىنىك جاسادى.

　　زاڭ شىعارۋ زاڭىنا وزگەرىس ەنگىزۋ جوباسى جونىندەگى تۇسىنىكتە بىلاي دەپ اتاپ كورسەتىلدى: زاڭ شىعارۋ − مەملەكەتتىڭ ماڭىزدى ساياسي ارەكەتى، پارتيانىڭ دارىپتەمەسى مەن حالىقتىڭ ەركىن زاڭدا بەلگىلەنگەن تارتىپپەن مەملەكەت ەركىنە اينالدىرۋ بارىسى، پارتيا مەن مەملەكەت ىستەرىنىڭ دامۋ جالپى جاعدايىنا سايادى. زاڭ شىعارۋ زاڭى − مەملەكەتتىڭ زاڭ شىعارۋ ءتۇزىمىن جانە زاڭ شىعارۋ ارەكەتىن جۇيەلىلەندىرەتىن، سوتسياليستىك زاڭمەن باسقارۋدىڭ بىرلىگىن قورعايتىن نەگىزدىك زاڭ. پارتيا 18 - قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى جۇڭگوشا سوتسياليزمگە تاباندى بولۋ جانە ونى دامىتۋ جالپى جاعدايى مەن ستراتەگياسى بيىگىنەن مەملەكەتتى جاپپاي زاڭمەن باسقارۋ جونىندە ءبىر قىدىرۋ كەلەلى ورنالاستىرۋلاردى جاساپ، ءبىر قىدىرۋ كەلەلى قىزمەتتەردى ىلگەرىلەتىپ، تاريحي تابىسقا قول جەتكىزدى. باس شۋجي شي جينپيڭ مەملەكەتتى جاپپاي زاڭمەن باسقارۋدىڭ ءبىر قىدىرۋ كەلەلى نازارياسىن جانە امالياتتىق ماسەلەلەرىن تەرەڭدەي بايىمدادى، شي جينپيڭنىڭ زاڭمەن باسقارۋ يدەياسى جاڭا داۋىردە مەملەكەتتى جاپپاي زاڭمەن باسقارۋعا، زاڭ شىعارۋ قىزمەتىن كۇشەيتۋگە جانە جاقسارتۋعا ءتۇبىرلى بويسۇنۋ ولشەمىن ازىرلەدى.

　　تۇسىنىكتە مىنالار اتاپ كورسەتىلدى: زاڭ شىعارۋ زاڭىنا وزگەرىس ەنگىزۋ − جاڭا داۋىردە پارتيانىڭ زاڭ شىعارۋ قىزمەتىنە بولعان جاپپاي باسشىلىعىن كۇشەيتىپ، پارتيانىڭ لۋشيان، باعىت، ساياساتتارىنىڭ جانە شەشىمدەرى، ورنالاستىرۋلارىنىڭ دايەكتىلەنۋىنە، اتقارىلۋىنا زاڭمەن باسقارۋ ارقىلى كەپىلدىك ەتۋدىڭ قاجەتتى تالابى؛ جاڭا داۋىردە جالپى بارىستىق حالىق دەموكراتياسىنا تاباندى بولىپ جانە ونى دامىتىپ، حالىقتىڭ وزىنە - ءوزى قوجايىن بولۋىن زاڭمەن باسقارۋ ارقىلى قامتاماسىز ەتۋدىڭ وبيەكتيۆ تالابى؛ جاڭا داۋىردە مەملەكەتتى جاپپاي زاڭمەن باسقارۋدى، مەملەكەتتى نەگىزگى زاڭمەن باسقارۋدى ىلگەرىلەتۋدىڭ، سوتسياليستىك زاڭمەن باسقارىلاتىن مەملەكەت قۇرۋدىڭ ماڭىزدى شاراسى؛ جاڭا داۋىردە رەفورما مەن زاڭمەن باسقارۋدىڭ قاتىناسىن دۇرىس ءبىر جاقتى ەتۋدىڭ امالياتتىق تاجىريبەلەرىن قورىتىندىلاپ، زاڭمەن باسقارۋ اياسىندا رەفورمانى ىلگەرىلەتۋ مەن رەفورما بارىسىندا زاڭمەن باسقارۋدى كەمەلدەندىرۋدىڭ ءوزارا بىرلىگىنە اناعۇرلىم ويداعىداي تاباندى بولۋدىڭ رەال قاجەتى. زاڭ شىعارۋ زاڭىنا وزگەرىس ەنگىزۋ جوباسى جالپى 37 تارماقتان تۇرادى. ءبىرىنشى، زاڭ شىعارۋدىڭ جەتەكشى يدەياسى مەن پرينسيبىن كەمەلدەندىرۋ؛ ەكىنشى، نەگىزگى زاڭعا سيىمدىلىعىن تەكسەرۋدىڭ قاتىستى تالاپتارىن ايقىنداۋ؛ ءۇشىنشى، زاڭ شىعارۋ شەشىمدەرى مەن رەفورما شەشىمدەرىن ءوزارا ۇشتاستىرعان، ءوزارا بىرلىككە كەلتىرگەن ءتۇزىم - مەحانيزمدەردى كەمەلدەندىرۋ؛ ءتورتىنشى، مەملەكەتتىك حالىق قۇرىلتايى مەن ونىڭ تۇراقتى كوميتەتىنىڭ زاڭ شىعارۋ ۇقىق شەگىن، زاڭ شىعارۋ ءتارتىبىن جانە قىزمەت مەحانيزمىن كەمەلدەندىرۋ؛ بەسىنشى، باقىلاۋ - تەكسەرۋ ءتۇزىلىسى رەفورماسىنىڭ قاجەتىنە سايكەسۋ ماقساتىندا قاتىستى مازمۇنداردى تولىقتاۋ؛ التىنشى، جەرگىلىكتى زاڭ ەرەجەلەردىڭ، ەرەجەلەردىڭ ۇقىق شەگى مەن ءتارتىبىن كەمەلدەندىرۋ؛ جەتىنشى، ەستەلىككە الۋ، تەكسەرۋ ءتۇزىمىن كەمەلدەندىرۋ.

　　ءماجىلىس داۋىسقا سالۋ ارقىلى 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ 14 - كەزەكتى مەملەكەتتىك حالىق قۇرىلتايى ارناۋلى كوميتەتتەرىن قۇرۋ جونىندەگى قاۋلىسىن ماقۇلدادى، 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ 14 - كەزەكتى مەملەكەتتىك حالىق قۇرىلتايى ارناۋلى كوميتەتتەرىنىڭ مەڭگەرۋشى مۇشە، ورىنباسار مەڭگەرۋشى مۇشە، مۇشە كانديداتتارىن داۋىسقا سالۋ ءادىسىن ماقۇلدادى، 14 - كەزەكتى مەملەكەتتىك حالىق قۇرىلتايى نەگىزگى زاڭ جانە زاڭدار كوميتەتى مەڭگەرۋشى مۇشەسىنىڭ، ورىنباسار مەڭگەرۋشى مۇشەلەرىنىڭ، مۇشەلەرىنىڭ ەسىمدىگىن ماقۇلدادى، 14 - كەزەكتى مەملەكەتتىك حالىق قۇرىلتايى قازىنا - ەكونوميكا كوميتەتى مەڭگەرۋشى مۇشەسىنىڭ، ورىنباسار مەڭگەرۋشى مۇشەلەرىنىڭ، مۇشەلەرىنىڭ ەسىمدىگىن ماقۇلدادى.

　　ما شيڭرۇي، ۋاڭ ي، يىن لي، شى تايفىڭ، ليۋ حى، ليۋ گوجۇڭ، شۇي چيلياڭ، سۇن چۇنلان، لي شۋلەي، ياڭ شياۋدۋ، حى ۋيدۇڭ، حى ليفىڭ، جاڭ يوۋشيا، جاڭ گوچيڭ، چىن ۋىنچيڭ، چىن جي - نيڭ، چىن مين - ىر، حۋ چۇنحۋا، يۋان جياجۇن، حۋاڭ كۇنميڭ، ليۋ جينگو، ۋاڭ شياۋحۇڭ، ساۋ جيانميڭ، جاڭ چۇنشيان، شىن يۋەيۋە، جي بيڭشۋان، ەركىن يمىرباقى، ۋان ىشياڭ، چىن جۋ، بايماچىلين، ۋي فىڭحى، ۋاڭ يۇڭ، جاۋ كىجى، جوۋ چياڭ، جاڭ جۇن، ليۋ چيباۋ، پابالا گىلەلاڭجيە، ۋان گاڭ، حى حوۋحۋا، لۋ جانگۇڭ، ما بياۋ، چىن شياۋگۋاڭ، لياڭ جىنيىڭ، شيا باۋلۇڭ، ياڭ چۋانتاڭ، لي بين، باتىر، ۋاڭ يۇڭچيڭ، سۋ حۇي، گۋ شىڭزۋ، ليۋ شينچىڭ، شاۋ حۇڭ، گاۋ يۇنلۇڭ، سونداي - اق ورتالىق اسكەري ىستەر كوميتەتىنىڭ مۇشەلەرى لي شاڭفۋ، ليۋ جىنلي، مياۋ حۋا، جاڭ شىڭمين قاتارلىلار دا ءتوراعالار مىنبەسىنەن ورىن الدى.

　　شياڭگاڭ ەرەكشە اكىمشىلىك رايونىنىڭ اكىمى لي جياچاۋ، اۋمىن ەرەكشە اكىمشىلىك رايونىنىڭ اكىمى حى يچىڭ ماجىلىسكە سىرتتاي قاتىناستى ءارى ءتوراعالار مىنبەسىنەن ورىن الدى.

　　13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ مۇشەلەرى ماجىلىسكە سىرتتاي قاتىناستى. مەملەكەتتىك ساياسي كەڭەس 14 - كەزەكتى كوميتەتىنىڭ 1 - ماجىلىسىنە قاتىناسىپ جاتقان ساياسي كەڭەس مۇشەلەرى ماجىلىسكە سىرتتاي قاتىناستى.

　　 ورتالىق پەن مەملەكەت ورگاندارىنىڭ قاتىستى تاراۋلارىنىڭ، ازاتتىق ارميانىڭ قاتىستى ورىندارىنىڭ جانە قارۋلى ساقشى اسكەري بولىمدەرىنىڭ، حالىقتىق ۇيىمداردىڭ قاتىستى جاۋاپتىلارى ماجىلىسكە سىرتتاي قاتىناستى نەمەسە سىرتتاي تىڭدادى.

　　 شەتەلدەردىڭ جۇڭگودا تۇراتىن ەلشىلەرى ءماجىلىستى سىرتتاي تىڭدادى.