شينحۋا اگەنتتىگىنىڭ 3 - ايدىڭ 16 - كۇنى بەيجيڭنەن بەرگەن حابارى. جۋىقتا جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس «پارتيا مەن مەملەكەت قۇرىلىمدارىنىڭ رەفورما جوباسىن» باسىپ تاراتتى ءارى حابارلاندىرۋ شىعارىپ، وڭىرلەردىڭ، تاراۋلاردىڭ ءىس جۇزىندىكپەن ۇشتاستىرا وتىرىپ مۇقيات دايەكتىلەندىرۋىن، تياناقتاندىرۋىن تالاپ ەتتى.
«جوبادا» مىنالار اتاپ كورسەتىلدى: پارتيا مەن مەملەكەت قۇرىلىمدارى رەفورماسىن تەرەڭدەتۋدىڭ نىساناسى − جۇيەسى كەمەلدى، عىلمي ارناعا تۇسكەن، اينالىمى جوعارى ءونىمدى پارتيا مەن مەملەكەت قۇرىلىمدارىنىڭ فۋنكتسيالىق جۇيەسىن ورناتۋ. پارتيا ورتالىق كوميتەتى قۇرىلىمدارىن، مەملەكەتتىك حالىق قۇرىلتايى قۇرىلىمدارىن، مەملەكەتتىك كەڭەس قۇرىلىمدارىن، مەملەكەتتىك ساياسي كەڭەس قۇرىلىمدارىن ءبىر تۇتاس جوسپارلاپ، ورتالىق پەن جەرگىلىكتى ورىنداردى ءبىر تۇتاس جوسپارلاپ، ءتۇيىندى سالالارداعى قۇرىلىم رەفورماسىن تەرەڭدەتىپ، پارتيانىڭ سوتسياليستىك وسىزامانداندىرۋ قۇرىلىسىنا باسشىلىعىنىڭ قۇرىلىمدىق ورنالاسۋ جاعىندا اناعۇرلىم عىلميلانۋىن، فۋنكتسيالىق جايعاستىرۋ جاعىندا اناعۇرلىم ساپالىلانۋىن، ءتۇزىلىس مەحانيزم جاعىندا اناعۇرلىم كەمەلدەنۋىن، اينالىم - باسقارۋ جاعىندا اناعۇرلىم جوعارى ءونىمدى بولۋىن ىلگەرىلەتۋ كەرەك.
پارتيا ورتالىق كوميتەتىنىڭ قۇرىلىم رەفورماسىن تەرەڭدەتۋ نەگىزىنەن مىنالاردى قامتيدى: ورتالىق فينانس كوميتەتىن قۇرۋ. ورتالىق فينانس كوميتەتى كەڭسەسىن قۇرىپ، ونى ورتالىق فينانس كوميتەتىنىڭ ءىس ءبىتىرۋ قۇرىلىمى ەتىپ، پارتيا ورتالىق كوميتەتىنىڭ قۇرىلىمدارى قاتارىنا ەنگىزۋ. ورتالىق فينانس قىزمەتى كوميتەتىن قۇرۋ. ورتالىق عىلىم - تەحنيكا كوميتەتىن قۇرۋ. ورتالىق قوعامدىق قىزمەت ءبولىمىن قۇرىپ، ورتالىق قوعامدىق قىزمەت ءبولىمى مەملەكەتتىك ارىز - ارمان مەكەمەسىنە ءبىر تۇتاس باسشىلىق ەتۋ، مەملەكەتتىك ارىز - ارمان مەكەمەسىن مەملەكەتتىك كەڭەس كەڭسەسىنىڭ باسقارۋىنداعى مەملەكەتتىك مەكەمەدەن مەملەكەتتىك كەڭەسكە توتە قاراستى قۇرىلىمعا وزگەرتۋ. ورتالىق شياڭگاڭ، اۋمىن قىزمەتى كەڭسەسىن قۇرىپ، مەملەكەتتىك كەڭەستىڭ شياڭگاڭ، اۋمىن ىستەرى كەڭسەسىنىڭ اتىن ساقتاپ قالۋ. ايىرىم قۇرىلعان مەملەكەتتىك كەڭەس شياڭگاڭ، اۋمىن ىستەرى كەڭسەسى ەندىگارى ساقتاپ قالىنبايدى.
مەملەكەتتىك حالىق قۇرىلتايىنىڭ قۇرىلىم رەفورماسىن تەرەڭدەتۋ نەگىزىنەن مىنانى قامتيدى: مەملەكەتتىك حالىق قۇرىلتايى تۇراقتى كوميتەتىنىڭ ۋاكىلدەر قىزمەت كوميتەتىن قۇرۋ.
مەملەكەتتىك كەڭەستىڭ قۇرىلىم رەفورماسىن تەرەڭدەتۋ نەگىزىنەن مىنالاردى قامتيدى: عىلىم - تەحنيكا مينيسترلىگىن قايتادان قۇرۋ. مەملەكەتتىك جاراتىلىستىق عىلىمدار قورى كوميتەتىن اۋەلگىدەي عىلىم - تەحنيكا مينيسترلىگى باسقارادى. عىلىم - تەحنيكا مينيسترلىگىندە مەملەكەتتىك شەتەل ماماندارى مەكەمەسىنىڭ اتى ەندىگارى ساقتاپ قالىنبايدى. مەملەكەتتىك فينانستى باقىلاۋ - باسقارۋ باس مەكەمەسىن قۇرۋ، جۇڭگو بانكە قامسىزداندىرۋ ىستەرىن باقىلاۋ - باسقارۋ كوميتەتى ەندىگارى ساقتاپ قالىنبايدى. جەرگىلىكتى فينانستى باقىلاۋ - باسقارۋ ءتۇزىلىسى رەفورماسىن تەرەڭدەتۋ. جەرگىلىكتى ۇكىمەتتەر قۇرعان فينانس باقىلاۋ - باسقارۋ قۇرىلىمدارى باقىلاۋ - باسقارۋ قىزمەت جاۋاپكەرشىلىگىن ارناۋلى يگەرەدى، فينانس قىزمەتى مەكەمەسى، فينانس كەڭسەسى سياقتى ماڭدايشالىقتار ەندىگارى قوسىپ اسىلمايدى. جۇڭگو قۇندى قاعاز باقىلاۋ - باسقارۋ كوميتەتىن مەملەكەتتىك كەڭەسكە توتە قاراستى قۇرىلىمعا وزگەرتۋ. جۇڭگو حالىق بانكەسىنىڭ بولىمشە، تارماق قۇرىلىمدارى رەفورماسىن ءبىر تۇتاس جوسپارلاپ ىلگەرىلەتۋ. مەملەكەت مەنشىگىندەگى فينانس كاپيتالىن باسقارۋ ءتۇزىلىسىن كەمەلدەندىرۋ. فينانس باسقارۋ تاراۋلارىنداعى قىزمەتكەرلەردى ءبىر تۇتاس ارناعا ءتۇسىرىپ باسقارۋدى كۇشەيتۋ. مەملەكەتتىك ساندى مالىمەت مەكەمەسىن قۇرۋ. اۋىل شارۋاشىلىعى، اۋىل - قىستاق مينيسترلىگىنىڭ قىزمەت جاۋاپكەرشىلىگىن ساپالىلاندىرىپ، اۋىل شارۋاشىلىعى، اۋىل - قىستاق مينيسترلىگىنە مەملەكەتتىك اۋىل - قىستاقتى گۇلدەندىرۋ مەكەمەسى ماڭدايشالىعىن قوسۋ. ايىرىم قۇرىلعان مەملەكەتتىك اۋىل - قىستاقتى گۇلدەندىرۋ مەكەمەسى ەندىگارى ساقتاپ قالىنبايدى. قارتتار قىزمەتى ءتۇزىلىسىن كەمەلدەندىرۋ. ءبىلىم مەنشىك ۇقىعىن باسقارۋ ءتۇزىلىسىن كەمەلدەندىرۋ.
مەملەكەتتىك ساياسي كەڭەستىڭ قۇرىلىم رەفورماسىن تەرەڭدەتۋ نەگىزىنەن مىنالاردى قامتيدى: مەملەكەتتىك ساياسي كەڭەستىڭ سالالار قۇرىلىمىن ساپالىلاندىرۋ. مەملەكەتتىك ساياسي كەڭەستىڭ سالالارىنا ”قورشاعان ورتا - بايلىق سالاسىن“ قوسۋ. ”جۇڭگو كوممۋنيستىك جاستار وداعى“ مەن ”جۇڭحۋا مەملەكەتتىك جاستار بىرلەستىگى“ سالالارىن بىرىكتىرىپ، ”جۇڭگو كوممۋنيستىك جاستار وداعى جانە جۇڭحۋا مەملەكەتتىك جاستار بىرلەستىگى“ سالاسىن قۇرۋ. ”ەرەكشە ۇسىنىس ەتىلگەن قايراتكەرلەر“ سالاسىنداعى مۇشەلەر قۇرامىن ساپالىلاندىرۋ.
قۇرىلىم شتاتى بايلىق ورنالاستىرىلىمىن ساپالىلاندىرۋ نەگىزىنەن مىنالاردى قامتيدى: ورتالىق پەن مەملەكەت ورگاندارىنداعى قىزمەتكەرلەردىڭ شتاتىن ىقشامداۋ. ورتالىق پەن مەملەكەت ورگاندارىنىڭ ءارقايسى تاراۋلارىنداعى قىزمەتكەرلەردىڭ شتاتىن ءبىر تۇتاس ％5تىك سالىستىرما بويىنشا ىقشامداپ، قايتارىپ الىنعان شتاتتى نەگىزىنەن ءتۇيىندى سالالار مەن ماڭىزدى قىزمەتتەردى كۇشەيتۋگە جۇمساۋ.
«جوبادا» مىنالار باسا دارىپتەلدى: ورتالىق كوميتەت ساياسي بيۋروسى تۇراقتى كوميتەتىنىڭ باسشىلىعىندا، ورتالىق رەفورمانى جاپپاي تەرەڭدەتۋ كوميتەتى پارتيا مەن مەملەكەتتىڭ قۇرىلىم رەفورماسىن ۇيىمداستىرىپ اتقارۋ قىزمەتىن ءبىر تۇتاس جوسپارلايدى. جەرگىلىكتى ورىنداردىڭ قۇرىلىم رەفورماسىنا ولكە دارەجەلى پارتكومدار ءبىر تۇتاس باسشىلىق ەتەدى، رەفورما جوباسى پارتيا ورتالىق كوميتەتىنە مالىمدەلىپ ەستەلىككە الىنادى. ورتالىق دەڭگەيىندەگى رەفورما مىندەتتەرىن 2023 - جىلدىڭ سوڭىنان بۇرىن ورىنداۋعا كۇش سالىنادى، جەرگىلىكتى ورىندار دەڭگەيىندەگى رەفورما مىندەتتەرىن 2024 - جىلدىڭ سوڭىنان بۇرىن ورىنداۋعا كۇش سالىنادى.
