شينحۋا اگەنتتىگىنىڭ 3 - ايدىڭ 16 - كۇنى بەيجيڭنەن بەرگەن حابارى. تاعى ءبىر ءبولىم ەلدەردىڭ باسشىلارى ىركەس - تىركەس تەلەگرامما جولداۋ، حات جولداۋ سياقتى تاسىلدەر ارقىلى شي جينپيڭنىڭ جۇڭحۋا حالىق رەسپۋبليكاسىنىڭ ءتوراعالىعىنا سايلانعاندىعىن قىزۋ قۇتتىقتادى.
وڭتۇستىك افريكانىڭ زۇڭتۇڭى رامافوسا مىنالاردى ءبىلدىردى: ءسىزدىڭ تاعى سايلانعاندىعىڭىز جۇڭگو حالقىنىڭ ءسىزدىڭ باسشىلىق قابىلەتىڭىزگە تولىق سەنىم ارتاتىندىعىن كورسەتەدى، مۇنىڭ حالىقارالىق قوعامعا ماڭىزدى ىقپال جاسايتىندىعى دا داۋسىز. وڭتۇستىك افريكا مەن جۇڭگونىڭ ۇقساس دامۋ نىساناسى جانە كەڭ كولەمدە ورتاق مۇددەسى بار، ەكى ەل تىعىز ىنتىماقتاسىپ، جان - جاقتى ستراتەگيالىق سەرىكتەستىك قارىم - قاتىناسى ۇزدىكسىز قارىشتاپ دامىدى. وڭتۇستىك افريكا جۇڭگو جاقپەن بىرگە ءداستۇرلى دوستىق جانە جولداستىق قارىم - قاتىناس نەگىزىندە ىستەستىكتى ۇزدىكسىز كۇشەيتىپ، وڭىرلىك جانە كوپ جاقتى سەلبەستىكتى قول ۇستاسا ىلگەرىلەتۋدى قالايدى.
گەرمانيانىڭ زۇڭتۇڭى شتاينمەير مىنالاردى ءبىلدىردى: ءسىزدىڭ وسى ماڭىزدى قىزمەت ورنىڭىزدا ىستەرىڭىزدىڭ ءساتتى بولۋىن شىن جۇرەكتەن تىلەيمىن. قازىرگى دۇنيە ءجۇزى قاتاڭ سىن - سايىستارعا ءدوپ كەلىپ وتىر، ءار جاق ىنتىماقتاسا توتەپ بەرۋى كەرەك. مەن گەرمانيا − جۇڭگو قارىم - قاتىناسىنىڭ بولاشاق دامۋىنا تولىق سەنىم ارتامىن. ىندەت جاعدايىنىڭ جاقسارۋىنا بايلانىستى، ەكى ەل اراسىنداعى كەڭ كولەمدى گۋمانيتارلىق اۋىس - كۇيىستىڭ جاپپاي قايتا باستالۋىن ءارى ۇزدىكسىز تەرەڭدەۋىن ءۇمىت ەتەمىن.
نيدەرلاندتىڭ باس ءۋازىرى ريۋت مىنالاردى ءبىلدىردى: ءسىزدىڭ جۇڭگونىڭ مەملەكەت ءتوراعاسى بولىپ تاعى سايلانعاندىعىڭىزدى شىنايى قۇتتىقتايمىن. وزىڭىزبەن تەرەڭ اۋىس - كۇيىستى ۇزدىكسىز ساقتاپ، سىندارلى سەلبەستىكتى ورىستەتىپ، نيدەرلاند پەن جۇڭگونىڭ اشىق، ناقتى جان - جاقتى سەلبەستىك سەرىكتەستىك قارىم - قاتىناسىن تەرەڭدەتۋدى قالايمىن.
مالايزيانىڭ زۇڭليى ءانۋار مىنالاردى ءبىلدىردى: ءبىر ميلليارد 400 ميلليون جۇڭگو حالقىنىڭ رول ۇستاۋشىسى رەتىندە، ءسىزدىڭ ارقالاعان جاۋاپكەرشىلىگىڭىز شەكسىز اۋىر. ءسىزدىڭ ەل باسقارۋ ۇستانىمىڭىز كوپتەگەن ادامعا وي سالدى. ءسىزدىڭ جۇڭگونى باستاپ، باي، قۇدىرەتتى، دەموكراتيالى، وركەنيەتتى، جاراسىمدى، كورىكتى سوتسياليستىك وسىزاماندانعان قۇدىرەتتى ەل قۇرىپ شىعۋ ۇلى نىساناسىن جۇزەگە اسىراتىندىعىڭىزعا كامىل سەنەمىن. مالايزيا مەن جۇڭگو باستان - اياق ءوزارا قۇرمەت ەتىپ، ءوزارا تيىمدىلىك جاساپ، تەڭ يگىلىككە كەنەلىپ، تاعدىرلاس بولدى. مالايزيا جۇڭگومەن قارىم - قاتىناسىن بەلسەنە دامىتۋدىڭ الدىڭعى لەگىندە باستان - اياق تۇرادى.
كونگونىڭ (براززاۆيل) زۇڭتۇڭى ساسوۋ مىنالاردى ءبىلدىردى: كونگو مەن جۇڭگونىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ دامۋ جەتىستىكتەرى كىسىنى جىگەرلەندىرەدى، سىزبەن بىرگە قۇلشىنىپ، كونگو − جۇڭگو دوستىق سەلبەستىك قارىم - قاتىناسىن كۇشەيتىپ، ەكى ەل حالقىن باقىتقا كەنەلتۋدى قالايمىن.
بوتسۆانانىڭ زۇڭتۇڭى ماسيسي مىنالاردى ءبىلدىردى: شي جينپيڭ جاڭا ءداۋىر جۇڭگوشا سوتسياليزم يدەياسىنىڭ جەتەكشىلىگىندە، ءسىز جۇڭگونى جۇڭگو ۇلگىسىندەگى وسىزامانداندىرۋ ۇلى نىساناسىمەن ەرلىكپەن ىلگەرىلەۋگە باستادىڭىز. ءسىزدىڭ تولىق داۋىسپەن سايلانعاندىعىڭىز جۇڭگو حالقىنىڭ ءسىزدىڭ ەرەن باسشىلىق قابىلەتىڭىزگە بۇكىلدەي سەنەتىندىگىن تولىق دالەلدەدى. بوتسۆانا مەن جۇڭگونىڭ ورتاق وزەكتى قۇن ۇستانىمى بار، بوتسۆانا جاق ەكى ەلدىڭ دوستىق قارىم - قاتىناسىنىڭ ۇزدىكسىز دامۋىن جالعاستى ىلگەرىلەتەدى.
سۋرينامنىڭ زۇڭتۇڭى سانتوقي مىنالاردى ءبىلدىردى: سۋرينام جاق سۋرينام − جۇڭگو قارىم - قاتىناسى مەن دوستىعىن ۇزدىكسىز تەرەڭدەتۋگە باستان - اياق كۇش سالادى، ءبىر جۇڭگو پرينسيبىن اتقارادى، جۇڭگو جاقتىڭ ءتۇرلى ماڭىزدى باستاماسىن قولدايدى، جۇڭگونىڭ كوپ جاقتىلىقتى قورعاۋدا، الەمدىك دامۋدى ىلگەرىلەتۋدە، ادامزاتتىڭ تاعدىرلاس ورتاق تۇلعاسىن قۇرۋدا ساۋلەلەندىرگەن سىندارلى رولىن القايدى.
ءتوراعا شي جينپيڭدى قۇتتىقتاعانداردان تاعى بولعاريانىڭ زۇڭتۇڭى رادوف، سلوۆەنيانىڭ زۇڭتۇڭى مۇسار، مولدوۆانىڭ زۇڭتۇڭى ساندۋ، يامايكانىڭ گۋبەرناتورى اللەن، كاتاردىڭ باس ءۋازىرى، قوسىمشا سىرتقى ىستەر ءۋازىرى مۇحاممەد، رەسەي ەركىن دەموكراتيالىق پارتياسىنىڭ ءتوراعاسى سلۋسكي، قىرعىزستان كوممۋنيستەر پارتياسىنىڭ ءتوراعاسى ماساليەۆ بار.
