تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ ماسكەۋگە جەتىپ رەسەيدەگى مەملەكەتتىك ساپارىن باستادى

  شينحۋا اگەنتتىگىنىڭ 3 - ايدىڭ 20 - كۇنى ماسكەۋدەن بەرگەن حابارى (تىلشىلەر ليۋ حۋا، ليۋ كاي). جەرگىلىكتى ۋاقىت 3 - ايدىڭ 20 - كۇنى تۇستەن كەيىن مەملەكەت ءتوراعاسى شي جينپيڭ ارناۋلى ۇشاقپەن ماسكەۋگە جەتىپ، رەسەيدىڭ زۇڭتۇڭى پۋتيننىڭ ۇسىنىسىمەن رەسەيدە مەملەكەتتىك ساپاردا بولدى.

  جەرگىلىكتى ۋاقىت تۇستەن كەيىن ساعات ءبىر مولشەرىندە، شي جينپيڭ وتىرعان ارناۋلى ۇشاق ماسكەۋ ۆنۋكوۆو ارناۋلى ۇشاق اۋەجايىنا كەلىپ قوندى. شي جينپيڭ ۇشاق ەسىگىنەن شىققاندا، رەسەيدىڭ ورىنباسار زۇڭليى چەرنيشەنكو قاتارلى ۇكىمەتتىڭ جوعارى دارەجەلى ءمانساپتىلارى ساتىنىڭ جانىندا تۇرىپ، قىزۋ قارسى الدى.

  رەسەي جاق اۋەجايدا سالتاناتتى قارسى الۋ سالتىن وتكىزدى. اسكەري وركەستر جۇڭگو − رەسەي ەكى ەلدىڭ مەملەكەت ءانىن ورىندادى. شي جينپيڭ رەسەي ءۇش ارمياسىنىڭ قۇرمەت قاراۋىلى اترەتىن كوزدەن كەشىردى ءارى قاتارعا ءبولىنىپ پاراتتان ءوتۋدى تاماشالادى.

  شي جينپيڭ جازباشا ءسوز سويلەپ، جۇڭگو ۇكىمەتى مەن جۇڭگو حالقى اتىنان رەسەي ۇكىمەتى مەن حالقىنا ىقىلاستى سالەم جولدادى ءارى ىزگى تىلەك تىلەدى. شي جينپيڭ بىلاي دەپ باسا دارىپتەدى: جۇڭگو − رەسەي ەكى ەل تاۋ - سۋى جالعاسىپ جاتقان دوس كورشىلەر. ەكى جاق وداق جاساسپاۋ، قارسىلاسپاۋ، ءۇشىنشى جاققا باعىتتاماۋ پرينسيبىنە تاباندى بولۋ نەگىزىندە ەكى جاقتى قارىم - قاتىناستى بەكەمدەپ جانە دامىتىپ، جاڭاشا ءىرى ەل قارىم - قاتىناسىنىڭ ۇلگىسىن ورناتتى. جۇڭگو − رەسەي قارىم - قاتىناسىنىڭ دامۋ جەتىستىگى ەكى ەل حالقىنا ناقتى پايدا جەتكىزىپ، دۇنيە ءجۇزىنىڭ دامۋىنا، العا باسۋىنا ماڭىزدى ۇلەس قوستى.

  شي جينپيڭ بىلاي دەپ اتاپ كورسەتتى: جۇڭگو − رەسەي دۇنيە جۇزىندەگى نەگىزگى ءىرى ەلدەر جانە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلدەرى رەتىندە، حالىقارالىق ىستەردە ماڭىزدى رول ساۋلەلەندىرۋدە. الماعايىپ وزگەرىس ۇستىندەگى دۇنيە ءجۇزى الدىندا، جۇڭگو جاق رەسەي جاقپەن بىرگە بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى، حالىقارالىق زاڭدى نەگىز ەتكەن حالىقارالىق ءتارتىپتى، بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىن نەگىز ەتكەن حالىقارالىق قارىم - قاتىناستىڭ نەگىزگى ولشەمىن ۇزدىكسىز باتىل قورعاپ، ناعىز كوپ جاقتىلىققا تاباندى بولىپ، دۇنيە ءجۇزىنىڭ كوپ ۇيەكتەنۋىن جانە حالىقارالىق قارىم - قاتىناستىڭ دەموكراتيالانۋىن ىلگەرىلەتىپ، الەمدىك باسقارۋدىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتۋدى قالايدى. وسى جولعى ساپاردىڭ، ءسوز جوق، مول تابىسقا جەتىپ، جۇڭگو مەن رەسەيدىڭ جاڭا داۋىردەگى جان - جاقتى ستراتەگيالىق ىستەستىك سەرىكتەستىك قارىم - قاتىناسىنىڭ اقاۋسىز، ورنىقتى دامۋىنا جاڭا قوزعاۋشى كۇش ۇستەيتىندىگىنە سەنەمىن.

  جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق سىرتقى ىستەر قىزمەتى كوميتەتى كەڭسەسىنىڭ مەڭگەرۋشىسى ۋاڭ ي، مەملەكەتتىك كەڭەستىڭ مۇشەسى، قوسىمشا سىرتقى ىستەر مينيسترلىگىنىڭ مينيسترى چين گاڭ قاتارلى ساپارلاستارى سول ۇشاقپەن بىرگە باردى.

  جۇڭگونىڭ رەسەيدە تۇراتىن باس ەلشىسى جاڭ حانحۇي دا اۋەجايعا بارىپ قارسى الدى.

جاۋاپتى رەداكتور : ريزا حاميت

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.