انار بۇلت \ شينجياڭ گازەتىنىڭ ٴتىلشىسى بارشا تەگىس، ەرىكتى ٴتىلشى لي جىشۋە
3 ـ ايدىڭ 25 ـ كۇنى تۇستەن بۇرىن، ٴان اۋەنى ىلە قازاق اۆتونوميالى وبلىسى كۇنەس اۋدانى تۇرگەن اۋىلىنىڭ ورىك گۇلى اڭعارىن جاڭعىرتتى، نارات وركەسترىنىڭ ويناقى ٴان اۋەنىنە ىلەسە 2023 جۇڭگو · نارات ساحارا مادەنيەت مەرەكەسى مەن ورىك گۇلى مەرەكەسى باستالدى.
3 ـ ايدىڭ 25 ـ كۇنى 2023 جۇڭگو · نارات ساحارا مادەنيەت مەرەكەسى جانە ورىك گۇلى مەرەكەسى باستالدى. سۋرەتتى انار بۇلت \ شينجياڭ گازەتىنىڭ ٴتىلشىسى بارشا تەگىس تۇسىرگەن
جەر ـ جەردەن كەلگەن ساياحاتشىلار ساحناداعى تارتىمدى ٴان ـ بيلەردى كورىپ، اۋىق ـ اۋىق الاقايلادى؛ ساحنانىڭ ارتقى جاعىنداعى 30 مىڭ مۋدان استام جابايى ورىك ورمانى تۇتاس تاۋ بەتكەيىن كومكەرىپ، رومانتيكالى كورىنىس ارقىلى ساياحاتشىلارعا الۋان گۇل شەشەك اتقان كورىكتى كوكتەمدى كورسەتتى.
”ءىشىنارا ورىك اعاشى گۇل اشتى، وسى اراداعى كوركەم گۇلدەردى كورۋدىڭ ءوزى ءبىر عانيبەت“ ، ـ دەدى شاڭحايدان كەلگەن فوتوگراف جۋ جيانحاي. ول ٴوزىنىڭ ورىك گۇلى اڭعارىندا جارىم اي ۋاقىتپەن تاماشا فوتو سۋرەت جينايتىنىن ايتتى.
گۋاڭدۇڭدىق ساياحاتشى ليۋ جىن ورىك گۇلى اڭعارىنا ەرتە كەلدى، ”مەن اتقا ءمىنۋدى جاقسى كورەمىن، اسىرەسە، ورىك گۇلى اڭعارىندا اتقا ٴمىنىپ، كوركەم كورىنىستى ارالاپ كورۋدى ۇناتامىن“،- دەدى ليۋ جىن.
3 ـ ايدىڭ 25 ـ كۇنى 2023 جۇڭگو · نارات ساحارا مادەنيەت مەرەكەسى جانە ورىك گۇلى مەرەكەسىنىڭ اشىلۋ سالتىنداعى كونسەرت نومىرلەرى. سۋرەتتى انار بۇلت \ شينجياڭ گازەتىنىڭ ٴتىلشىسى بارشا تەگىس تۇسىرگەن
تۇرگەن اۋىلىنىڭ ورىنباسار باستىعى سۇڭقار قاپار بىلاي دەپ تانىستىردى، مەرەكە ـ مەيرامداردىڭ ٴتۇرلى دايىندىعىن ويداعىداي ىستەۋ ٴۇشىن، اۋىلدىق ۇكىمەت قاتىستى تاراۋلاردى ۇيىمداستىرىپ، قاراستى رايونداعى اس ـ سۋ رايونى، شارۋالار شاتتىعى ساياجايى سياقتى ورىنداردا ازىق ـ تۇلىك حاۋىپسىزدىگىن تەكسەرۋ جانە باۋلۋ قىزمەتىن ورىستەتىپ، كورىنىس رايونىنىڭ نەگىزدىك قۇرىلعىلارىنىڭ حاۋىپسىزدىك كومەسكى قاتەرىن ٴبىر ـ بىرلەپ تەكسەردى.
”ٴبىز بايلىق باسىمدىعىن تياناق ەتىپ، مادەنيەت پەن ساياحاتتى توعىستىرۋدى وراي ەتىپ، الەۋمەتتىك قىزمەت وتەۋ جۇيەسىن ۇزدىكسىز اقاۋسىزداندىرىپ، ساياحات كاسىبىنىڭ دامۋ دەڭگەيىن جوعارىلاتامىز“ ، ـ دەدى كۇنەس اۋداندىق پارتكومنىڭ ورىنباسار شۋجيى، اۋدان اكىمى راقىم امىرە.
ۇعىسۋعا قاراعاندا، وسى رەتكى ورىك گۇلى مەرەكەسىندە تاعى live ٴان كونسەرتى، ورىك گۇلى توپتىق ءبي قيمىلى، ”جۇڭگو كيىم ـ كەشەگىمەن كوكتەمدى قارسى الۋ“ كورمەسى، ەرەكشە ونىمدەردى كورمەلەپ ساتۋ سياقتى كوپ ٴتۇرلى تاقىرىپتىق قيمىلدار بار ەكەن. ورىك گۇلى مەرەكەسى 4 - ايدىڭ ورتا شەنىنە دەيىن جالعاسادى.
3 ـ ايدىڭ 25 ـ كۇنى 2023 جۇڭگو · نارات ساحارا مادەنيەت مەرەكەسى جانە ورىك گۇلى مەرەكەسى باستالدى، ورىك گۇلى اڭعارى اشىلىپ، ساياحاتشىلار اتقا ٴمىنىپ سەيىلدەدى. سۋرەتتى لي جىشۋە تۇسىرگەن
