3 - ايدىڭ 27 - كۇنى ساياحاتشىلار وتىرعان تاكلاماكاندى اينالىپ وتەتىن تۇڭعىش ساياحات ارناۋلى پويەزى ءۇرىمجى ۆوگزالىنان اتتاندى.
□ سۋرەتتى انار بۇلت \ شينجياڭ گازەتىنىڭ ءتىلشىسى زوۋ ي تۇسىرگەن
انار بۇلت \ شينجياڭ گازەتىنىڭ ءتىلشىسى كاڭ حاۋيان 3 - ايدىڭ 27 - كۇنى ۇرىمجىدەن حابارلايدى. 3 - ايدىڭ 27 - كۇنى ساعات 22دەن 25 مينۋت وتكەندە 523 ساياحاتشى وتىرعان Y936 - كەزەكشى ”تاكلاماكاندى اينالۋ ساياحاتى · ەرەكشە ەستەمە“ ساياحات ارناۋلى پويەزى ءۇرىمجى ۆوگزالىنان گۋدوك شالىپ اتتانىپ، 11 كۇندىك تاكلاماكان ءشولىن اينالۋ ساياحاتىن باستادى. بۇل − حوتان − چارقىلىق تەمىر جولى اشىلىپ ىسكە قوسىلعاننان، دۇنيە جۇزىندەگى تۇڭعىش ءشولدى اينالىپ وتەتىن تەمىر جول اينالما جەلىسى قالىپتاسقاننان كەيىن قاتىناعان تۇڭعىش ساياحات ارناۋلى پويەزى.
”شينجياڭنىڭ كورىنىس تۇيىندەرىنىڭ ارالىعى شالعاي، ساياحات ارناۋلى پويەزىنە وتىرساڭىز، كەشتە جولعا شىعىپ، تاڭەرتەڭ جەتەسىز، جول ءجۇرۋ ۋاقىتى ۇنەمدەلەدى، شينجياڭنىڭ اناعۇرلىم كوپ كوركەم كورىنىستەرىنەن ءلاززات الاسىز، بۇل ءبىزدىڭ كوپتەن كۇتكەن ارمانىمىز“، گۋاڭشيلىق ساياحاتشى ما شياۋگى وسىنىڭ الدىندا ءوز اۆتوكولىگىمەن شينجياڭعا كوپ رەت كەلىپ ساياحاتتاعاندىعىن، بۇل جولى تۇڭعىش تاكلاماكاندى اينالۋ ساياحات ارناۋلى پويەزىنە وتىرۋ ءۇشىن بىرنەشە اپەكە - ءسىڭلىسىن ەرتىپ كەلگەندىگىن ايتتى.
شينجياڭ تەمىر جول ساياحاتىن دامىتۋ توبى شەكتى سەرىكتەستىگى ساياحات ىستەرى ءبولىمىنىڭ ديرەكتورى لين ۋىن بىلاي دەدى: تاكلاماكاندى اينالۋ ساياحات ارناۋلى پويەزى كۇشار، قاشقار، حوتان، چارقىلىق، كورلا سياقتى جەرلەردى باسىپ وتەدى ءارى تۇرلىشە مەزگىلگە ساي، جول بويىنداعى كورىنىس تۇيىندەرى قوندىرعىلارىنا رەتتەۋ جۇرگىزەدى. كەزەكشى پويەزگە تۇگەل توسەك ورناتىلعان، تۇندە قاتىناپ، كۇندىز ساياحاتتاۋ ۇلگىسى قولدانىلعان، بيىلعى جوسپار بويىنشا 18 كەزەكشى پويەز قاتىنايدى، ءاربىر كەزەكشى پويەزگە 500 نەشە ساياحاتشى وتىرادى، ساياحاتشىلاردىڭ ۇيىرمە ۇيىمداستىرۋ، جەكەلەي بۇيىرتۋ، ەركىن ساياحاتتاۋ سياقتى الۋان ءتۇرلى قاجەتىن قاناعاتتاندىرادى.
بايىرعى ءتىلسىم تاكلاماكان ءشولى وڭتۇستىك شينجياڭنىڭ تارىم ويپاتىنىڭ ورتاسىنا ورنالاسقان، جۇڭگوداعى ەڭ ۇلكەن قۇمدى ءشول ءارى دۇنيە جۇزىندەگى 2 - ۇلكەن كوشپەلى قۇم، اۋدانى 330 مىڭ شارشى كيلومەترگە جەتەدى. ۇشى - قيىرسىز قۇم تەڭىزى، ماڭگىلىك توراڭعى، جايقالعان شۇرات سياقتى وزىندىك ەرەكشەلىككە يە تابيعي كورىنىستەردەن سىرت، بايىرعى جىبەك جولى بويىنداعى قۇمنىڭ وڭتۇستىك جەلىسى تىپتەن باي تاريحي جۇرتتار مەن گۋمانيتارلىق كورىنىستەرگە يە.
”بىلتىر حوتان − چارقىلىق تەمىر جولى اشىلىپ، ىسكە قوسىلىپ، ’اجال تەڭىزى‘ اتانعان تاكلاماكان ءشولىن وراعىتقان ’ءۇمىت شەڭبەرىن‘ قالىپتاستىردى“. شينجياڭ اي - ۋانكى حالىقارالىق ساياحات كووپەراتيۆىنىڭ باس ديرەكتورى لي حۇي بىلاي دەپ تانىستىردى: تاكلاماكاندى اينالۋ ساياحات ارناۋلى پويەزى جەلىسىندە ورنالاستىرىلعان مول كورىنىس تۇيىندەرى ساياحاتشىلاردىڭ چارقىلىق اۋدانى كروران ەسكى جۇرتىنىڭ سىرىنا بويلاپ، قاشقار بايىرعى قالاسىن ارالاپ، جۇڭگوداعى ەڭ ۇزىن ىشكى قۇرلىقتىق وزەن تارىم وزەنىنە، دۇنيە جۇزىندەگى ءبىرىنشى قۇمدىق جاسىل دالىزگە بارىپ، ءبىر رەتكى ساپاردا تارتىمدى دا ايشىقتى، بايتاق تا كورىكتى شينجياڭدى سەزىنۋىنە مۇمكىندىك جاسايدى.
2017 - جىلدان باستاپ، شينجياڭ تەمىر جول تاراۋلارى ىلگەرىندى - كەيىندى ”سولتۇستىك شينجياڭدى اينالىپ ساياحاتتاۋ“، ”وڭتۇستىك شينجياڭدى ىركىلىسسىز ارالاۋ“ سياقتى ساياحات ارناۋلى پويەزىن ىسكە قوسىپ، سولتۇستىك شينجياڭدا ءۇرىمجى، ىلە، التاي جانە وڭتۇستىك شينجياڭدا قاشقار ساياحات شەڭبەرىن تۇتاستىرىپ، ءار جىلى جەر - جەردەن سان مىڭداعان ساياحاتشىنى قابىلداپ، ”پويەزگە وتىرىپ، شينجياڭدى ساياحاتتاۋ“ ماركاسىن ايشىقتاپ، ”ساياحات كورىنىس وڭىرلەرىن جاپپاي تۇتاستىرۋ، ساياحاتشىلار جاپپاي الەۋمەتتىك قاتىناسپەن قاتىناۋ، ساياحات كەزەكشى پويەزى ۇلكەن اينالىمى“ سىندى ”تەمىر جول + ساياحات“ توعىسقان بىرلەسىپ ارەكەتتەنە دامۋدىڭ جاڭا ۇلگىسىن ورناتتى.
