جۇڭگو شينجياڭ دوستىق اۋىس - كۇيىس ساپارلاۋ ۇيىرمەسى وزبەكستاندا ساپارلاۋ قيمىلىن ورىستەتتى
ما شيڭرۇي وزبەكستاننىڭ زۇڭتۇڭى ميرزيويەۆپەن كەزدەستى
گازەتىمىزدىڭ 3 - ايدىڭ 29 - كۇنى تاشكەنتتەن بەرگەن حابارى. جۇڭگو شينجياڭ دوستىق اۋىس - كۇيىس ساپارلاۋ ۇيىرمەسى 3 - ايدىڭ 29 - كۇنى وزبەكستاندا ساپارلاۋ قيمىلىن ورىستەتتى. اۆتونوميالى رايوندىق پارتكومنىڭ شۋجيى ما شيڭرۇي سول كۇنى تاشكەنتتە وزبەكستاننىڭ زۇڭتۇڭى ميرزيويەۆپەن كەزدەستى.
ما شيڭرۇي ەڭ الدىمەن ميرزيويەۆكە ءتوراعا شي جينپيڭنىڭ سالەمىن جانە تىلەگىن جەتكىزدى. ول بىلاي دەدى: ءتوراعا شي جينپيڭ مەن مارتەبەلى زۇڭتۇڭنىڭ ستراتەگيالىق باستاۋىندا، جۇڭگو مەن وزبەكستاننىڭ جان - جاقتى ستراتەگيالىق سەرىكتەستىك قارىم - قاتىناسى ۇزدىكسىز بەكەمدەلىپ، ءوزارا قارايلاسۋدىڭ، تاتۋ كورشىلىكتىڭ، دوستىقتىڭ ۇلگىسىنە اينالدى. شي جينپيڭ جولداستى ۇيتقى ەتكەن جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، جۇڭگونىڭ شينجياڭى بۇكىل ەلدەگى ءار ۇلت حالقىمەن بىرگە، مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ جاڭا جورىعىندا جىگەرلەنە ەكپىندەي ىلگەرىلەپ، تيانشان الابىندا تىنىش تا بەرەكەلى، قارىشتاپ دامىعان جاڭا بەينە جارىققا شىقتى. جۇڭگو شينجياڭىنىڭ وزبەكستانمەن ءداستۇرلى دوستىق سەلبەستىگى ۇزدىكسىز تەرەڭدەپ، سوڭعى جىلدارى ءارقايسى سالالارداعى اۋىس - كۇيىسى، سەلبەستىگى ۇزدىكسىز ىشكەرىلەپ، ەكى جاقتىڭ ءوزارا تيىمدىلىك جەتكىزىپ، بىرگە يگىلىككە كەنەلىپ دامۋ بولاشاعى ۇمىتكە تولدى. مەنىڭ وسى رەت ساپارلاي كەلۋىم ەكى ەل باسشىلارىنىڭ ماڭىزدى ورتاق تانىمىن تياناقتاندىرىپ، ”ءبىر بەلدەۋ، ءبىر جولدى“ بىرگە قۇرۋدى توڭىرەكتەي وتىرىپ، ەكى جاقتىڭ ءارقايسى سالاداعى سەلبەستىگىن ۇلاستىرۋدى ونان ارى تەرەڭدەتىپ، جۇڭگونىڭ شينجياڭىنىڭ وزبەكستاننىڭ جەرگىلىكتى ورىندارىمەن دوستىق بارىس - كەلىسىن جانە جاسىل ەنەرگيا، ۇلاستىرۋ - تۇتاستىرۋ، وسى زامانعى اۋىل شارۋاشىلىعى، گۋمانيتارلىق ىستەر سياقتى سالالارداعى سەلبەستىگىن ۇزدىكسىز كەڭەيتىپ، جۇڭگو − وزبەكستان دوستىعىنىڭ جاڭا تاماشا تاراۋىن جازۋعا شينجياڭنىڭ ۇلەسىن قوسۋ ءۇشىن بولىپ تابىلادى.
چىن ۋيجۇن، جۇڭگونىڭ وزبەكستاندا تۇراتىن ەلشىلىگىندەگى قاتىستى جاۋاپتىلار قيمىلعا قاتىناستى.
