”شينجياڭنىڭ ساياحاتى بيىل، ءسوز جوق، جاندانادى“
□ انار بۇلت \ شينجياڭ گازەتىنىڭ ءتىلشىسى ءابيبا
3 - ايدىڭ 26 - كۇنى اۆتونوميالى رايوندىق مادەنيەت جانە ساياحات مەڭگەرمەسى ۇيىمداستىرىپ وتكىزگەن ”شينجياڭ جاقسى جەر“ مادەنيەت جانە ساياحات تانىستىرۋ قيمىلى جاسىل جەلەك جامىلعان نانجيڭدە وتكىزىلدى، شينجياڭ مادەنيەت جانە ساياحات مەڭگەرمەسى جياڭسۋ ولكەسىندەگى ءارقايسى ءىرى ساياحات كووپەراتيۆتەرىن جانە مادەنيەت - ساياحات كاسىپورىندارىن شاقىردى. ىلە قازاق اۆتونوميالى وبلىسى، اقسۋ ايماعى، حوتان ايماعى، التاي ايماعى، قارامايلى قالاسى، بايىنعولين موڭعۇل اۆتونوميالى وبلىسى، قىزىلسۋ قىرعىز اۆتونوميالى وبلىسى، قۇمىل قالاسى سىندى 8 ايماق، وبلىس، قالادان كەلگەن مادەنيەت - ساياحات تاراۋلارىنىڭ تانىستىرۋشىلارى ۇجىم بولىپ كورىكتى شينجياڭدى تانىستىرىپ، سەلبەستىك ساپارىن باستادى.
اۆتونوميالى رايوندىق مادەنيەت جانە ساياحات مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى يۇي جيە مىنانى ءبىلدىردى: قازىر شينجياڭدا كورىكتى كوكتەم كەلىپ، ورىك گۇلى قۇلپىرا اشىلىپ، القىزىل شابدال گۇلى سامال جەلمەن تەربەلىپ، اپپاق المۇرت گۇلىنىڭ حوش ءيىسى شار تاراپقا تارالىپ، ۇستىرتتەگى ورىك گۇلى قيالداعى ”جەر ۇيىقتى“ ەلەستەتەدى. شينجياڭ ەجەلدەن مۇزدى شىڭدار مەن وتتى القاپ ۇلاسىپ، قۇمدى ءشول مەن ءشۇرات قۇپ جاراسقان، مادەنيەتى قوردالانعان، ۇلتتىق ادەت - عۇرپى قويۋ، جۇرتتىڭ ءبارى ارمانداعان قۇتتى مەكەن.
شينجياڭ مەن جياڭسۋدىڭ بارىس - كەلىسى ۇزاق تاريحتان باستاۋ العان، شينجياڭعا كومەكتەسۋدە تەرەڭ سۇيىسپەنشىلىك قالىپتاستىرعان. ەكى جەر باعىتتامالى كومەكتەسۋ، ەكونوميكا - ساۋدا بارىس - كەلىسى جانە مادەنيەت اۋىس - كۇيىسى ارقىلى ەرتە كەزدىڭ وزىندە - اق ەكونوميكاسى ءوزارا بايلانىسقان، مادەنيەتى توعىسقان، تاعدىرى جالعاسقان دوستىق جولىن قالىپتاستىرعان. سوڭعى جىلدارى شينجياڭ كورىنىس وڭىرلەرىنە، كورىنىس تۇيىندەرىنە ۇسىنىلىمدى ۇزدىكسىز ارتتىرىپ، ”جايدارى شينجياڭ“ سياقتى قيمىلدار ورىستەتۋ ارقىلى ساياحاتقا قىزمەت وتەۋ ساپاسىن جاپپاي جوعارىلاتىپ، ساياحاتشىلار الاڭسىز، قامسىز، جايلى سەزىنەتىن تۇتىنۋ ورتاسىن قالىپتاستىردى. ”بۇگىنگى شينجياڭ − قاتىناسى شار تاراپقا ۇلاسقان، سايكەستى قىزمەت وتەۋ قۇرىلعىلارى اناعۇرلىم ىڭعايلى. بۇل جولى ءبىز دە ناقتى ءتيىمدى ساياساتتاردى الا كەلدىك، توڭىرەكتىڭ ءتورت بۇرىشىنان كەلگەن ساياحاتشىلاردىڭ شينجياڭعا بارىپ تاماشا ساپاردا بولۋىن ءۇمىت ەتەمىز“، - دەدى يۇي جيە.
”ءبىز تاڭداۋلى مادەنيەت - ساياحات بايلىعى جانە ءتيىمدى ساياسات ارقىلى ’ساياحاتشىلاردى قىزىلسۋعا كەلۋگە‘ باۋرادىق“. اتۇش قالالىق مادەنيەت، دەنە تاربيە، راديو - تەلەۆيزيا جانە ساياحات مەكەمەسىنىڭ مادەنيەت - ساياحات تانىستىرۋشىسى ءسۇلپىنۇر ءانۋار بىلاي دەدى: وسى رەتكى تانىستىرۋ جينالىسىنا جىبەك جولىنداعى بايىرعى جۇرت، سالت - سانا، عۇرىپ - ادەتتەردى سەزىنۋ ساياحاتى، پامير ءۇستىرتىنىڭ كورىنىس ساياحاتى، شەكاراعا ىشكەرىلەي ساياحات، «ماناس» ەپوسى سالت - سانا مادەنيەت ساياحاتى سىندى 4 سارا جەلىنى الا كەلدىك، ”ءبىزدىڭ شينجياڭنىڭ كورىنىسى كوركەم بولىپ قانا قويماي، ءار ۇلت بۇقاراسى دا توتەنشە باۋىرمال، ءبىز كوپشىلىككە ابدەن تانىس ’پارتيا مۇشەسى زناگىن كورسەتكەن اعاي‘ ابدۇجاپپار مەڭدىمەن بىرگە سىزدەردى قىزىلسۋ وبلىسىندا كۇتەمىز“.
”شينجياڭنىڭ ساياحاتى، بيىل، ءسوز جوق، جاندانادى“. جياڭسۋ ولكەسى نانجيڭ ساياحات جيناۋ - تاراتۋ ورتالىعىنىڭ جاۋاپتىسى مياۋ پۋ بىلاي دەدى: وسى رەتكى تانىستىرۋ جينالىسىندا شينجياڭنىڭ جەر - جەرى اكەلگەن سارا ساياحات جەلىسى شينجياڭعا 10 نەشە رەت بارعان مەندەي ءبىر جاننىڭ كوڭىلىنە بۇكىلدەي تىڭ مازمۇن سيلادى. ول مىنانى ءبىلدىردى: شينجياڭ ەجەلدەن ساياحاتشىلار اڭسايتىن نىسانالى جەرلەردىڭ ءبىرى، وسى رەتكى ساياحاتتى تانىستىرۋ جينالىسىنىڭ مازمۇنى توتەنشە تولىق، جاڭادان اشىلعان ساياحات جەلىسىنىڭ باعىتتامالىلىعى مەن قىزمەت وتەۋ سيپاتى توتەنشە كۇشتى، ”مەن وسى جەردەگى مادەنيەت جانە ساياحات مەكەمەسىنىڭ باستىقتارىمەن كەلىسىپ قويدىم، كەلەر ايدا شينجياڭعا بارىپ، 5 - ايدا ۇيىرمە ۇيىمداستىرىپ، اناعۇرلىم كوپ جياڭسۋلىقتاردىڭ شينجياڭعا ەرتەرەك بارىپ، وزگەشە سالت - سانانى سەزىنۋىنە مۇمكىندىك جاسايمىن“.
جۇڭگو گولۇي (جياڭسۋ) حالىقارالىق ساياحات كووپەراتيۆى شەكتى سەرىكتەستىگىنىڭ جوعارى دارەجەلى كاسىپتىك ديرەكتورى جوۋ مين ”تاماشا“ دەگەن ءسوزدى ءۇش رەت ايتىپ اسەرلى سەزىمىن ءبىلدىردى. ”تاماشا مادەنيەت، ساياحات بايلىعى، تاماشا ءتيىمدى ساياسات، تاماشا سالت - سانا“. ول مىنانى ءبىلدىردى: ساياحات كووپەراتيۆى رەتىندە، كوپشىلىك جەرگىلىكتى ورىن ازىرلەگەن ءتيىمدى ساياساتتارعا، سونداي - اق ازىق - تۇلىك، ساتىپ الۋ، ساياحات، قونالقى سياقتى جاقتارداعى ينفورماتسيا بايلىعىنا اناعۇرلىم نازار اۋدارادى، وسى رەتكى تانىستىرۋ جينالىسىندا دەرلىك قامتىلدى، بۇل ءبىزدىڭ ساياحات كووپەراتيۆىمىزدىڭ بۇدان كەيىن شينجياڭدى تانىستىرۋىنا مىعىم تەبىن سيلادى.
ىلە باتىس بولىك حالىقارالىق ساياحات كووپەراتيۆى شەكتى جاۋاپكەرشىلىك سەرىكتەستىگى مەن جياڭسۋ چۋانجيڭ حالىقارالىق ساياحات كووپەراتيۆى شەكتى سەرىكتەستىگى سول جەردىڭ وزىندە ساياحات سەلبەستىك كەلىسىمىنە قول قويدى؛ قورعاس ازيا − ەۆروپا حالىقارالىق ساياحات كووپەراتيۆى شيۇڭلى گولۇي نانجيڭ بولىمشە سەرىكتەستىگى قاتارلىلارمەن ساياحاتشىلاردى ءوزارا جەتكىزۋ كەلىسىمىنە قول قويدى. وسىدان كەيىن وتكىزىلگەن شينجياڭ − جياڭسۋ ەكى جەردەگى ساياحات كووپەراتيۆتەرىنىڭ كاسىپ سالاسى كەڭەسىندە ساياحات كاسىپورىندارىنىڭ ۋاكىلدەرى اقتارىلا اڭگىمەلەسىپ، پىكىر بەرىپ، سەلبەستىكتى جەبەپ، دامۋعا ۇمتىلىپ، ”ساياحاتشىلاردىڭ شينجياڭعا بارۋىنا“ بىرگە دەم بەردى.
تانىستىرۋ جينالىسى الاڭىنىڭ سىرتىندا ”شينجياڭ تارتۋى“ نەگىزگى تاقىرىپتىق كورمەسى نانجيڭ قالا تۇرعىندارىنىڭ قارسى الۋىنا بولەندى. كوپشىلىك جابال مىنالاردى ءبىلدىردى: شينجياڭنىڭ مادەنيەت جاسامپازدىعى ونىمدەرى وزىندىك ەرەكشەلىككە يە، كەپتىرىلگەن جەمىسىنىڭ ءدامى ءتىل ۇيىرەدى، الداعى جەردە، ءسوز جوق، شينجياڭعا بارىپ، شينجياڭنىڭ تابيعي ءدامىن تاتامىز.
