”شينجياڭ جاقسى جەر“ اتىنداعى مادەنيەت - ساياحات تانىستىرۋ قيمىلى ناقتى قۋاتىمەن جان كۇيەر جينادى
كوكتەمگى، جازعى ساياحات ماۋسىمىندا ”ساياحاتشىلاردى شينجياڭعا كەلۋگە باۋراۋ“ بويىنشا 30 ميلليون ساياحاتشى (رەت) قابىلدايدى
انار بۇلت \ شينجياڭ گازەتىنىڭ ءتىلشىسى ءابيبا 3 - ايدىڭ 30 - كۇنى شاڭحايدان حابارلايدى. 3 - ايدىڭ 29 - كۇنى ”شينجياڭ جاقسى جەر“ اتىنداعى 4 ولكە، ءبىر قالاعا بارىپ مادەنيەت - ساياحات تانىستىرۋ قيمىلى شاڭحايدا اياقتادى. قيمىل كەزىندە 14 ايماق، وبلىس، قالانىڭ مادەنيەت - ساياحات مەكەمەسى ۇيىرمە ۇيىمداستىرىپ قيمىلعا قاتىناستى، 30 نەشە مادەنيەت - ساياحات كاسىپورنى ساياحاتشىلاردى ءوزارا جەتكىزۋ كەلىسىمىنە قول قويدى. بۇدان سىرت، 14 ايماق، وبلىس، قالا بەيجيڭ سياقتى 38 قالادا تانىستىرۋ جاساپ، بيىل كوكتەمگى، جازعى ساياحات ماۋسىمدارىندا ”ساياحاتشىلاردى شينجياڭعا كەلۋگە باۋراۋ“ بويىنشا جيىنى 30 نەشە ميلليون ساياحاتشى (رەت ) قابىلدايدى، جالپى كەلىسىم سوماسى 100 ميلليون يۋاننان اسادى.
”شينجياڭ جاقسى جەر“ اتىنداعى مادەنيەت - ساياحات تانىستىرۋ قيمىلى 3 - ايدىڭ 17 - كۇنى باستالعاننان بەرى، ىلگەرىندى - كەيىندى گۋاڭجوۋ قالاسىنا، شيامىن قالاسىنا، حاڭجوۋ قالاسىنا، نانجيڭ قالاسىنا، شاڭحاي قالاسىنا بارىپ تانىستىرۋ جينالىسى، ساۋدا كەڭەسى، سۋرەت كورمەسى، ”شينجياڭ ءبيىن بىرگە بيلەۋ“ اتىنداعى الاڭعا كىرۋ بىرلەسكەن دوستىق قيمىلى سياقتى فورمالارمەن شينجياڭنىڭ ەرەكشە مادەنيەت - ساياحات بايلىعىنىڭ ”سىرتقا شىعۋىن“ جاپپاي ىلگەرىلەتىپ، شينجياڭنىڭ ساپالى مادەنيەت جانە ساياحات نىسانىن ”ىسكە قوسىپ“، شينجياڭنىڭ سارا ساياحات تاۋارلارىن ”سىرتقا شىعارىپ“، شينجياڭنىڭ ويىن - ساۋىق الاڭى ءبيىن بيلەدى.
سونىمەن بىرگە ايماق، وبلىس، قالالاردىڭ مادەنيەت جانە ساياحات تاراۋلارى، ساياحات كاسىپورىندارى، كاسىپتىك قوعامدار دا سىرتقا شىعىپ، بەيجيڭ، ي - ۋ، شىنجىن، چىڭدۋ سياقتى ساياحاتشى قاينارى مول 38 قالاعا بارىپ تانىستىرىپ، شينجياڭنىڭ كوكتەم، جاز ماۋسىمىنداعى ساياحات ونىمدەرىن شوعىرلى ۇگىتتەدى؛ ساياحاتشى قاينارى مول جەرلەردەگى ساۋداگەرلەردى شينجياڭعا كەلىپ تەكسەرۋ جۇرگىزۋگە ۇسىنىس ەتىپ، شينجياڭنىڭ كوكتەمگى، جازعى ساياحاتىنا اۋقىم تۋدىردى.
”نانجيڭ، شاڭحاي ەكى جەرمەن ساياحاتشىلاردى ءوزارا جەتكىزۋ كەلىسىمىنە قول قويىستىق، كەلىسىلگەن جالپى سوما 15 ميلليون يۋاننان استى“. قۇلجا قالالىق مادەنيەت - ساياحات توبى باتىس بولىك حالىقارالىق ساياحات كووپەراتيۆىنىڭ باس ديرەكتورى، قوسىمشا ىلە حالىقارالىق ساياحات جيناۋ - تاراتۋ ورتالىعىنىڭ القا باستىعى ني جيڭنىڭ بۇل جولعى تابىسى مول بولدى، ”ءبىز تياناقتانعان مادەنيەت - ساياحات نىسانىنا قول قويۋمەن بىرگە، ساياحاتشىلاردى ءوزارا جەتكىزۋ كەلىسىمى ارقىلى جەرگىلىكتى ورىننىڭ ساياحاتشى قاينارى بازارىن يگەردىك. بولاشاقتا ءبىز جياڭسۋداعى 100 مىڭ ادامنىڭ ىلەگە ساياحاتتاۋى سياقتى قيمىلدار ارقىلى شينجياڭعا ۇزدىكسىز ساياحاتشى جىبەرەمىز“، - دەدى ول.
جىجياڭ ولكەلىك مادەنيەت جانە ساياحات مەڭگەرمەسىنىڭ ورىنباسار باستىعى شۇي پىڭ مىنالاردى ءبىلدىردى: شينجياڭ ەجەلدەن بەرى جىجياڭدىق ساياحاتشىلار ۇناتاتىن ساياحات كوزەۋلى جەرى، شينجياڭنىڭ مادەنيەت - ساياحات كاسىپ سالاسىنىڭ جەدەل دامۋىنا، شينجياڭعا باعىتتامالى كومەكتەسەتىن ولكە، قالالاردىڭ دەمەۋىنە ساي، ەكى جەر تاماشا ءوزارا كومەكتەسۋ قارىم - قاتىناسىن ورناتتى. ”تانىستىرۋ جينالىسى ەكى جەردەگى مادەنيەت - ساياحات كاسىپورىندارى مەن ساياحات كووپەراتيۆتەرىنە سەلبەستىك تۇعىرىن ورناتتى، ەكى جەر كوپ ءتۇرلى ارنالارمەن ساياحاتشى قاينارى بازارىن بىرگە اشىپ، مادەنيەتتىڭ توعىسۋى، ساياحاتتىڭ ءوزارا ىقپالداستىعى سياقتىلاردى ىلگەرىلەتسە، ءسوز جوق، تەڭ يگىلىككە كەنەلە الادى“.
”وسى رەتكى تانىستىرۋ جينالىسى شينجياڭنىڭ كوكتەمگى، جازعى ساياحاتىنىڭ شىمىلدىعىن اشتى. بۇدان بىلاي اۆتونوميالى رايون مادەنيەت - ساياحات بايلىعىن بىرىكتىرۋ ارقىلى اناعۇرلىم كوپ سارا ساياحات لەنياسىن جانە ساياحاتتا تيىمدىلىك جاساۋ ساياساتتارىن جاريالاپ، كوپ ءتۇرلى شارا ارقىلى شينجياڭنىڭ جەر - جەرمەن ساياحات ستراتەگيالىق سەلبەستىگىن، مادەنيەت - ساياحات كاسىپ سالاسىنىڭ بىرلەسىپ دامۋىن ىلگەرىلەتىپ، ساياحات ۇلكەن ساندى مالىمەت تۇعىرىنىڭ دەڭگەيىن ءوسىرىپ، دارەجەسىن جوعارىلاتۋدى ىلگەرىلەتىپ، ساياحاتتى ۇگىتتەۋدى، تانىستىرۋدى كۇشەيتىپ، تۇتاس جىلدا قابىلداعان ساياحاتشى سانىن 200 ميلليون ادامعا (رەت) جەتكىزىپ، ’شينجياڭ − جاقسى جەر‘ اتتى التىن ءارىپتى ماڭدايشالىقتى ۇزدىكسىز جارقىراتۋعا كۇش سالامىز“، - دەدى اۆتونوميالى رايوندىق مادەنيەت جانە ساياحات مەڭگەرمەسىنىڭ ورىنباسار باستىعى يۇي جيە.
تانىستىرۋ جينالىسى كەزىندە اۆتونوميالى رايوندىق مادەنيەت جانە ساياحات مەڭگەرمەسى دوۋيىن، ميكروبلوگ سياقتى تۇعىرلاردا ”شينجياڭ ءبيىن بىرگە بيلەۋ“، ”شينجياڭ سىزبەن ءتورت ماۋسىم اۋىستىرادى“ سياقتى تاقىرىپتاردى اشىپ، قويىلىمى (وقىلىمى) جالپى ءبىر ميلليارد 600 ميلليون رەتكە جەتتى.
