كوپ جەرلەر جازدىق ءبيداي ەگۋ مىندەتىن اسىرا ورىندادى
انار بۇلت \ شينجياڭ گازەتىنىڭ ءتىلشىسى ليۋ ي 4 - ايدىڭ 5 - كۇنى ۇرىمجىدەن حابارلايدى. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنەن ۇعىسۋىمىزشا، كەزەكتە شينجياڭدا 2 ميلليون 500 نەشە مىڭ مۋ جەرگە كوكتەمگى ەگىس داقىلدارى ەگىلگەن، مۇنىڭ ىشىندە استىق داقىلدارى 930 مىڭ مۋدان اسىپ، تۇتاس تۇلعالىق اياق الىسى بىلتىرعى سول تۇستاعىدان تەز بولعان.
اۋىل شارۋاشىلىعى ءوندىرىس جۇمىستارىن جايعاستىرۋدان قاراعاندا، بيىل بۇكىل رايوننىڭ جەر - جەرى ەگىس ۋاقىتىن مىقتى يگەرىپ، كوكتەمدە اتىز باسقارۋدىڭ، كوكتەمگى ەگىستىڭ، ەگىس دايىندىعىنىڭ ءتۇرلى قىزمەتتەرىن تىڭعىلىقتى ىلگەرىلەتكەن. قازىرگە دەيىن وڭتۇستىك شينجياڭنىڭ جازىق وڭىرلەرىندەگى جازدىق ءبيداي ەگۋ جۇمىسى اياقتايىن دەپ قالدى، بايىنعولين موڭعۇل اۆتونوميالى وبلىسى، حوتان ايماعى، اقسۋ ايماعى، قاشقار ايماعى تۇگەلدەي جازدىق ءبيداي ءوندىرىسىنىڭ نىسانا - مىندەتتەرىن اسىرا ورىندادى. سولتۇستىك شينجياڭنىڭ، شىعىس شينجياڭنىڭ ءارقايسى ءوندىرىس اۋماعىندا جازدىق ءبيداي ەگۋ ىركەس - تىركەس باستالدى. بۇكىل رايوننىڭ جازدىق ءبيداي، بۇرشاق تەكتەستەر، تۇينەك جەمىستىلەر سياقتى استىق داقىلدارى تۇقىمىن ءسىڭىرۋ اياق الىسى بىلتىرعى سول تۇستاعىدان تەز بولىپ، جەر اۋدانى بىلتىرعى سول تۇستاعىدان 120 مىڭ مۋ اينالاسىندا مولايدى.
بيىل شينجياڭ استىق ءوندىرىس قۋاتىن جوعارىلاتۋ ارەكەتىن جانە ءبيدايدى، جۇگەرىنى ءتۇيىن ەتكەن استىقتىڭ بىرلىك ءونىمىن جوعارىلاتۋ ينجەنەرياسىن اتقارادى. تۇتاس جىلدا استىق ەگىلەتىن جەر اۋدانىن 4 ميلليون 800 مىڭ مۋ ارتتىرۋدى جوسپارلاپ، ءونىم مولشەرىن 20 ميلليون تونناعا جەتكىزۋگە كۇش سالادى. ءار دارەجەلى اۋىل شارۋاشىلىعى، اۋىل - قىستاق تاراۋلارى جەر جىرتىپ، تۇقىم سەبەتىن جەر اۋدانىن، قايتالاي ەگىلەتىن جەر اۋدانىن ارتتىرۋ، ەگىس قۇرىلىمىن رەتتەۋ سياقتى تاسىلدەر ارقىلى استىق ەگىلەتىن جەر اۋدانىن كەڭەيتىپ، ”استىق القاپتارىن قورعاپ، ەگىستىك جەر بايلىعىنان عىلمي، ۇيلەسىمدى پايدالانۋ“ ستراتەگياسىن اتقارۋ ارقىلى استىقتىڭ بىرلىك ءونىمىن جوعارىلاتىپ، استىقتىڭ ءوندىرىس قۋاتىن جوعارىلاتۋ كەڭىستىگىن ونان ارى كەڭەيتىپ، بۇكىل مەملەكەتتىڭ استىق حاۋىپسىزدىگى ءۇشىن بار كۇشپەن ۇلەس قوسادى.
ۇعىسۋعا قاراعاندا، اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى جاقىندا 4 قىزمەت گرۋپپاسىن قۇرىپ، بۇكىل شينجياڭنىڭ جەر - جەرىنە جىبەرىپ، كوكتەم ماۋسىمىنداعى اۋىل شارۋاشىلىعى وندىرىسىنە قىزمەت وتەۋ، جەتەكشىلىك ەتۋ قىزمەتىن ورىستەتىپ، جوعارى ولشەمدى ەگىنجاي قۇرىلىسىن كۇشەيتۋدى قۋزاپ جەتەكشىلىك ەتىپ، جەر - جەردىڭ كوكتەمگى ەگىس، ەگىس دايىندىعى، كوكتەمدە ەگىس اتىزىن باسقارۋ قىزمەتتەرىنە جەتەكشىلىك ەتىپ، كوكتەمگى اۋىل شارۋاشىلىق وندىرىسىنە ىقپال ەتەتىن نەگىزگى قيىنشىلىقتار مەن ماسەلەلەردى سايكەستىرە شەشىپ، تۇتاس جىلداعى اۋىل شارۋاشىلىعىندا تاعى دا مول ءونىم الۋعا نەگىز قالايدى ەكەن.
