100 مىڭ ادام (رەت) ينتەرنەت جەلىسىنەن تىس كورمەگە قاتىناسىپ، 650 ميلليون ادام (رەت) ينتەرنەت جەلىسىندە تاماشالادى
تۇڭعىش كەزەكتى شينجياڭ مادەنيەت - كوركەمونەر فەستيۆالى سالتاناتپەن اياقتادى
انار بۇلت \ شينجياڭ گازەتىنىڭ ءتىلشىسى ليۋ مىڭمىڭ 4 - ايدىڭ 15 - كۇنى ۇرىمجىدەن حابارلايدى. تۇڭعىش كەزەكتى شينجياڭ مادەنيەت - كوركەمونەر فەستيۆالى 4 - ايدىڭ 15 - كۇنى شينجياڭ اسەمونەر سارايىندا جابىلدى. بۇل رەتكى قيمىل ۋاقىتى جارتى ايعا جالعاسىپ، 22 ساحنالىق كوركەمونەر سارا تۋىندىسى، 29 بۇقارالىق ادەبيەت - كوركەمونەر ۇزدىك تۋىندىسى، 169 اسەمونەر تۋىندىسى فەستيۆالعا قاتىناستىرىلدى، بۇكىل شينجياڭنان 22 مادەنيەت - كوركەمونەر تەاترى، ۇيىرمەسى، 33 نەگىزگى ساتى بۇقارالىق مادەنيەت قوسىنىنان 2300دەن استام مادەنيەت - كوركەمونەر قىزمەتكەرى كوركەمونەر سالتاناتىندا باس قوسىپ، 100 مىڭعا جۋىق ادام (رەت) تەاترحاناعا، اسەمونەر سارايىنا اعىلىپ، الاڭعا، الەۋمەتتىك اۋماققا، باقشاعا جينالىپ، 650 ميلليوننان استام ادام (رەت) بۇلت تەرمينالىندا سالتاناتتى جينالىستى كوردى، تىڭدادى.
ويناقى مۋزيكاعا ىلەسە 60تان استام جاس تا كەلبەتتى شينجياڭدىق جىگىت پەن قىز شينجياڭ اسەمونەر سارايىنىڭ ەسىك الدىندا قاراجورعا، ساۋىردىڭ سياقتى ۇلتتىق بيلەردى بيلەپ، «قۇلجادا شاتتانا بيگە باسىپ، شىن ىقىلاس تانىتتى» اتىنداعى كولەمدى بۇقارالىق مادەنيەت باعدارلاماسىمەن جابىلۋ سالتىنىڭ شىمىلدىعى اشىلدى.
وسىدان سوڭ قيمىل ۇستىندە جاڭا داۋىردەگى ساحنالىق كوركەمونەردىڭ تاڭداۋلى ويىن ءنومىرى، تاڭداۋلى ۇيىمداستىرۋ سيلىعى تاراتىلىپ، جاڭا داۋىردەگى تەاتر، ءبي، ۆوكالدىق ءان، اسپاپتىق مۋزيكا قويىلىمىنداعى، جاڭا داۋىردەگى تاڭداۋلى بۇقارالىق مادەنيەت قيمىلى قويىلىمىنداعى، جاڭا داۋىردەگى تاڭداۋلى اسەمونەر تۋىندىلار كورمەسىندەگى بەينەسى كورنەكتى كوللەكتيۆتەر مەن جەكەلەر سيلاندى ءارى سيلانعان ءبىر ءبولىم تۋىندىلار قويىلدى.
شينجياڭ ءوندىرىس - قۇرىلىس بيڭتۋانى ءان - ءبي، تەاتر ۇيىرمەسى تاڭداپ جىبەرگەن ەكى ادامدىق «جاڭا جاستار» ءبيى جاڭا داۋىردەگى ءبي قويىلىمىنىڭ كاسىپتىك جارىسىندا 1 - دارەجەلى سيلىققا يە بولدى. ”جاستاردىڭ تاعدىرى ەجەلدەن داۋىرىمەن تىعىز بايلانىستى كەلەدى، ءبىز وسى ءبي ارقىلى جاڭا داۋىردەگى جاڭا جاستاردىڭ كەلبەتىن ايگىلەۋدى ءۇمىت ەتتىك“، - دەدى ارتيست سالام ابدوللا.
”سىزدەر قارعالداق سياقتىسىزدار، قارلى تاۋدا تۋىپ، كۇننىڭ شۇلەن شۇعىلاسىندا ەرجەتتىڭىزدەر، قانداي جاعدايدا دا جۇپار ءيىسىن قالدىرۋلارىڭىز كەرەك“... «شەكسىز سۇيىسپەنشىلىك» ءانى جالىندى اۋەنمەن ءار ۇلت بۇقاراسىنىڭ اعا - باۋىرداي ەتەنە بولىپ، ءبىر - بىرىنە قارايلاساتىن دوستىق سۇيىسپەنشىلىگىن جىرلاپ، كورەرمەندەردىڭ قىزۋ قارسى الۋىنا بولەندى. ”اندە ’ءداۋىر ونەگەسى‘ لاچين بايەكە سياقتى شينجياڭدا جارىققا شىققان ءبىر توپ قاھارمان ۇلگىلەر بەينەلەنگەن“، - دەدى ءانشى گاۋ اڭ.
تۇڭعىش كەزەكتى شينجياڭ مادەنيەت - كوركەمونەر فەستيۆالىن اۆتونوميالى رايوندىق پارتكوم ۇگىت ءبولىمى، اۆتونوميالى رايوندىق مادەنيەت جانە ساياحات مەڭگەرمەسى بىرگە ۇيىمداستىرىپ وتكىزدى، تۇڭعىش رەت وتكىزىلگەن اۆتونوميالى رايوننىڭ وسى امبەباپ مادەنيەت - كوركەمونەر قيمىلى جاڭا داۋىردەگى ساحنالىق كوركەمونەردىڭ تاڭداۋلى ويىن نومىرلەرى قويىلىمى، جاڭا داۋىردەگى تەاتر، ءبي، ۆوكالدىق ءان، اسپاپتىق مۋزيكا قويىلىمى، جاڭا داۋىردەگى تاڭداۋلى اسەمونەر تۋىندىلار كورمەسى جانە جاڭا داۋىردەگى تاڭداۋلى بۇقارالىق مادەنيەت قيمىلى قويىلىمى قاتارلىلاردان قۇرالعان. تۇڭعىش كەزەكتى شينجياڭ مادەنيەت - كوركەمونەر فەستيۆالى جابىلعاننان كەيىن، ءبىر ءبولىم سارا ساحنالىق كوركەمونەر ويىن نومىرلەرىن، سارا بۇقارالىق مادەنيەت قيمىلدارىن سايكەستىرىپ، ۇيىمداستىرىپ، ءارقايسى ايماق، وبلىس، قالالاردا قويادى، كورمەلەيدى.
