− شىنجىن قالاسىنداعى شەتەل قارجىلاندىرعان كاسىپورىنداردىڭ ۋاكىلدەر ۇيىرمەسى شينجياڭعا كەلىپ تەكسەرۋ جۇرگىزدى
□ انار بۇلت \ شينجياڭ گازەتىنىڭ ءتىلشىسى تويا، ەرىكتى ءتىلشى چىن جاۋلين
4 - ايدىڭ 10 - كۇنىنەن 14 - كۇنىنە دەيىن شىنجىن قالاسىنداعى شەتەل قارجىلاندىرعان كاسىپورىنداردىڭ ۋاكىلدەر ۇيىرمەسى شينجياڭعا كەلىپ تەكسەرۋ جۇرگىزدى. ۋاكىلدەر ۇيىرمەسى گەرمانيا، انگليا، رەسەي، ارگەنتينا، سينگاپۋر سياقتى ەلدەردىڭ شەتەل قارجىلاندىرعان كاسىپورىندارىنىڭ ۋاكىلدەرىنەن ۇيىمداسقان، ۋاكىلدەر ۇيىرمەسى ىلگەرىندى - كەيىندى ءۇرىمجى قالاسى مەن قاشقار ايماعىنا كەلىپ، ءۇرىمجى حالىقارالىق قۇرلىقتىق پورت رايونى، قاشقار كەشەندى قورعامالى باجى اۋماعى، قاشقار بايىرعى قالاسى سياقتى جەرلەردى ەكسكۋرسيالاپ، تەكسەرىپ، شينجياڭنىڭ ەكونوميكالىق، قوعامدىق دامۋ جاعدايىن ۇستىندە ۇعىستى.
4 - ايدىڭ 11 - كۇنى ۋاكىلدەر ۇيىرمەسىندەگىلەر شينجياڭ لاي ۋو عىلىم - تەحنيكا جارنا شەكتى سەرىكتەستىگى، شينچيكاڭ ءدارى - دارمەك كاسىبى جارنا شەكتى سەرىكتەستىگى، جىڭۋي شينجياڭ جاڭا ماتەريالدار كاسىپ سالاسى باقشاسى، ءۇرىمجى ەكونوميكالىق - تەحنيكالىق اشۋ رايونى (توۋتۇنحى رايونى) سياقتى جەرلەرگە بارىپ تەكسەرۋ جۇرگىزدى، ۋاكىلدەر ۇيىرمەسىنىڭ مۇشەلەرى شينجياڭنىڭ جاڭا ماتەريالدار، ءدارى - دارمەك ونىمدەرى، جوعارى دەڭگەيلى مانەرلەۋ، جاساۋ كاسىبى سياقتىلارعا قىزۋ ىنتا تانىتتى.
جىڭدا كاڭدي ەگىن، مال شارۋاشىلىق توبى شەكتى سەرىكتەستىگىنىڭ ورىنباسار باس جوراسى جىڭ حىشىڭ بىلاي دەدى: وسى جولعى ساپاردا شينجياڭنىڭ جەرگىلىكتى قوعامدىق جاعدايىنىڭ تىنىشتىعىن، جاراسىمدىلىعىن، شينجياڭدىقتاردىڭ قىزۋ ىنتاسىن سەزىندىم، كاسىپورىن جونىنەن العاندا، بۇل ارا وتە تاماشا قارجى قوسۋ ورتاسىنا يە. جەرگىلىكتى ۇكىمەت تاراۋلارىنىڭ ەسىك اشۋى جانە ناقتى ءىس ىستەۋىنىڭ ارقاسىندا قالىپتاسقان تاماشا شارۋاشىلىق - ساۋدا ورتاسى شينجياڭداعى كاسىپورىنداردىڭ تەز قارقىنمەن دامۋىنا مۇمكىندىك اپەردى.
شينجياڭ شيكىزات، اۋىل شارۋاشىلىق قوسىمشا ونىمدەرى، ەڭبەككۇش سياقتى جاقتاردا اسا تاماشا بايلىق باسىمدىعىنا يە. جىڭ حىشىڭ مىنالاردى ءبىلدىردى: جەم - ءشوپ وندىرەتىن كاسىپورىن رەتىندە، بۇدان بىلاي وسى ارادا قارجى قوسىپ، شارۋاشىلىقتى گۇلدەندىرىپ، بازار اياسىن كەڭەيتۋدى ءۇمىت ەتەمىن.
رەين تەحنيكالىق باقىلاۋ (شىنجىن) شەكتى سەرىكتەستىگى گەرمانياداعى تەحنيكالىق قىزمەت وتەۋمەن قامدايتىن ساۋدا سەرىكتەستىگى، قازىر ولاردىڭ كاسىبى جۇڭگونىڭ كوپ جەرىن قامتىدى. اتالعان سەرىكتەستىكتىڭ باس تەحنيكا ءمانساپتىسى، باس ديرەكتورى وريف بىلاي دەدى: مەن بۇل اراداعى قالالاردان كوپتەگەن جاڭا قۇرىلىستى جانە جاڭا ينجەنەريالاردى كوردىم، بۇل قالانىڭ جەدەل دامىعاندىعىن تۇسىندىرەدى، ەكسكۋرسيالاي بارعان كوپتەگەن زاۆودتاعى ماشينا جابدىقتارى ەرەكشە وزىق ەكەن، ودان شينجياڭ كاسىپورىندارىنىڭ ومىرشەڭدىك كۇشى مەن ناقتى قۋاتىن سەزىندىم، بۇل وسى ارانىڭ تاماشا قارجى قوسۋ ورتاسىن ايگىلەيدى.
4 - ايدىڭ 12 - كۇنىنەن 13 - كۇنىنە دەيىن كاسىپورىنشىلار ىلگەرىندى - كەيىندى قاشقار كەشەندى قورعامالى باجى اۋماعى، نانداشين اۋىل شارۋاشىلىعى جارنا شەكتى سەرىكتەستىگى، قاشقار بايىرعى قالاسى سياقتىلاردى ەكسكۋرسيالاپ، قاشقار ايماعىنىڭ ەكونوميكالىق، قوعامدىق دامۋى، گۋمانيتارلىق تاريحى سياقتىلاردى ىشكەرىلەي ۇعىستى.
قاشقار بايىرعى قالاسىن ارالاعاندا، كاسىپورىنشىلار بايىرعى قالانى جاڭالاۋدىڭ الدى - ارتىنداعى وزگەرىستەردى كورىپ تاڭ - تاماشا بولدى. رەتتى دە تازا كوشەلەر، قاز - قاتار سالىنعان دۇكەندەر، قويۋ مادەنيەت ءتۇسىن العان قۇرىلىستار شوعىرى كاسىپورىنشىلاردى ءالسىن - ءالى ايالداپ، سۋرەتكە ءتۇسىپ ەستەلىك قالدىرۋعا باۋرادى.
شىنجىن قالاسى يوۋكى وقۋ - اعارتۋ، عىلىم - تەحنيكا شەكتى سەرىكتەستىگىنىڭ باسقارۋ سەرىكتەسى دي ميتا مىنالاردى ءبىلدىردى: قاشقاردىڭ تابيعي جانە گۋمانيتارلىق بايلىعى مول، توتەنشە زور ساۋدا كومەسكى كۇشىنە يە، ”جەرگىلىكتى ۇكىمەت ورتاعا قويعان تاماشا قارجى قوسۋ ورتاسى زور باۋراۋ قۋاتىنا يە، مەنشە، تەحنيكالىق سيپاتىنداعى، سونداي - اق وقۋ - اعارتۋ سيپاتىنداعى سەرىكتەستىكتەردىڭ دەرلىك قاشقاردا دامۋىنا ابدەن بولادى“.
شىنجىن جىشيە حالىقارالىق ساۋدا شەكتى سەرىكتەستىگى − وڭتۇستىك امەريكا ەلدەرىنە باعىتتالعان يمپورت - ەكسپورت ساۋداسىن جۇرگىزەتىن سەرىكتەستىك. سەرىكتەستىكتىڭ باس جوراسى ديەگو بىلاي دەدى: قاشقاردىڭ ابزال جاعراپيالىق ورنى ونىڭ سىرتقى ساۋدا جاعىندا كوپتەگەن قارجى قوسۋ ورايىنا يە بولۋىنا مۇمكىندىك جاسادى، قاشقاردىڭ بولاشاعىنان زور ءۇمىت كۇتەمىن.
كونەءشار اۋدانى جۇڭگو شينجياڭ ۇلتتىق مۋزيكا اسپاپتارى قىستاعىندا ۋاكىلدەر ۇيىرمەسى ءداستۇرلى ۇلتتىق مۋزيكا اسپاپتارىن جاساۋ بارىسىن ۇعىستى. شىنجىن شىكوۋ حالىقارالىق مەكتەپ القالار كەڭەسىنىڭ ءتوراعاسى گرەگو بىلاي دەدى: شينجياڭنىڭ جەرى كەڭ، بايلىعى مول، دامۋ كومەسكى كۇشى زور، ادامعا تەرەڭ اسەر قالدىرادى، قاشقاردىڭ جەرگىلىكتى كوپ نەگىزدى مادەنيەتىنىڭ تارتىمدىلىعى وزگەشە، ايرىقشا باۋراۋ قۋاتىنا يە.
بي ان حالىقارالىق عىلىم - تەحنيكا (شىنجىن) شەكتى سەرىكتەستىگىنىڭ باس ديرەكتورى اۋىن پاكيستاننان كەلگەن، تەكسەرۋ كەزىندە ول ءار كۇنى ۋيشين ارقىلى ساپار بارىسىنداعى ءاربىر ءىستى جولداپ وتىردى. ول مىنالاردى ءبىلدىردى: شينجياڭنان كورگەندەرىمنىڭ ءبارىن ءار ەلدەگى ساۋدا سەلبەستىك سەرىكتەرىمە ايتىپ وتىرۋىم كەرەك.
شينجياڭ − جىبەك جولى ەكونوميكالىق بەلدەۋىندەگى وزەكتى رايون. اۋىن بىلاي دەدى: ”مەن شينجياڭ ەكونوميكاسىنىڭ دامۋىنا باستان - اياق نازار اۋدارىپ كەلەمىن، شينجياڭدا قارجى قوسۋ، ساۋدا كومەسكى كۇشى ەرەكشە زور. بۇل جولعى ساپارىمدا، اسىرەسە، جاڭا ماتەريالدار، فوتوۆولت كاسىپ سالاسى، ءدارى - دارمەك كاسىپورىندارى ەرەكشە قىزىقتىردى، ىشكەرىلەي سەلبەستىك جاساۋدى ءۇمىت ەتەمىن.
تەكسەرۋ كەزىندە اۆتونوميالى رايوندىق ساۋدا ىستەرى مەڭگەرمەسى، شىنجىن قالالىق ساۋدا ىستەرى مەكەمەسى سياقتى تاراۋلار ءۇرىمجى قالاسىندا جانە قاشقاردا قارجى قوسۋ، اۋىس - كۇيىس جاساۋ اڭگىمە ءماجىلىسىن وتكىزدى، شينجياڭنىڭ قاتىستى سالالارىنان كەلگەن كاسىپورىنداردىڭ جاۋاپتىلارى ۋاكىلدەر ۇيىرمەسىندەگىلەرمەن حالىقارالىق ساۋدا، ەلەكتروندى ساۋدا، وقۋ - اعارتۋ سەلبەستىگى سياقتى سالالاردا اۋىس - كۇيىس جاسادى ءارى ءوز ارتىقشىلىقتارىن ساۋلەلەندىرىپ، ساۋدا، قارجى قوسۋ سەلبەستىگىن كۇشەيتۋدى ءۇمىت ەتتى.
اۆتونوميالى رايوندىق ساۋدا ىستەرى مەڭگەرمەسىنىڭ 2 - دارەجەلى شارلاۋشىسى جاڭ يۇيجۇڭ مىنالاردى ءبىلدىردى: بيىل ساۋدا ىستەرى مەڭگەرمەسى ”ۇسىنىسپەن شاقىرىپ اكەلۋ“ سەرپىنىن ۇزدىكسىز ارتتىرىپ، مەملەكەت دارەجەلى كورمە تۇعىرلارىنان پايدالانىپ، شينجياڭعا كومەكتەسەتىن ولكە، قالالاردىڭ مول شەتەل قارجىسى بايلىعىنان پايدالانىپ، اناعۇرلىم كوپ قارجى قوسۋشى ساۋداگەرلەردىڭ شينجياڭعا كەلىپ تەكسەرۋ جۇرگىزىپ، اۋىس - كۇيىس جاساۋىنا، قارجى قوسىپ، كاسىپتى گۇلدەندىرۋىنە مۇمكىندىك جاساپ، شينجياڭنىڭ جوعارى دەڭگەيلى سىرتقا ەسىك اشۋىن جانە ەكونوميكاسىنىڭ، قوعامىنىڭ جوعارى ساپالى دامۋىن جەبەيدى.
