شينحۋا اگەنتتىگىنىڭ 4 - ايدىڭ 25 - كۇنى بەيجيڭنەن بەرگەن حابارى. 4 - ايدىڭ 25 - كۇنى مەملەكەت ءتوراعاسى شي جينپيڭ ازيا مادەنيەت مۇرالارىن قورعاۋ وداعى جينالىسىنا قۇتتىقتاۋ حاتىن جولدادى.
شي جينپيڭ بىلاي دەپ اتاپ كورسەتتى: ازيا − ادامزات وركەنيەتىنىڭ ماڭىزدى وشاعى، توتەنشە مول مادەنيەت مۇرالارىن جاراتقان جانە ساقتاعان، دۇنيە ءجۇزى وركەنيەتى دامۋ تاريحىنىڭ تارتىمدى دا ايشىقتى پاراعىن جازعان. 2019 - جىلى مەن ازيا وركەنيەتتەر تىلدەسۋى جينالىسىندا ازيا مادەنيەت مۇرالارىن قورعاۋ ارەكەتىن ورىستەتۋدى دارىپتەدىم. 4 جىلدان بەرى، ءار جاق بەلسەنە ءۇن قوسىپ، بىرگە قۇلشىنىپ، ەرتە زامانعى وركەنيەتتى زەرتتەۋ، بىرلەسىپ ارحەولوگيالىق زەرتتەۋ جۇرگىزۋ، ەجەلگى ەسكەرتكىشتەردى قالپىنا كەلتىرۋ، مۇراجاي اۋىس - كۇيىسى سياقتى جاقتاردا ناقتى سەلبەستىك ورىستەتىپ، ادامزات وركەنيەتىنىڭ جاۋھارىن قورعاۋعا ازيانىڭ جاڭا ۇلەسىن قوستى.
شي جينپيڭ مىنالاردى باسا دارىپتەدى: ازيا مادەنيەت مۇرالارىن قورعاۋ وداعىنىڭ قۇرىلۋى ازيا مادەنيەت مۇرالارىن قورعاۋدى كۇشەيتۋگە، ازيا وركەنيەتىنىڭ اۋىس - كۇيىسىن تەرەڭدەتۋگە، دۇنيە ءجۇزى وركەنيەت گۇلزار باقشاسىن كوركەيتۋگە، ادامزات وركەنيەتىنىڭ العا باسۋىنا ۇلەس قوسۋعا ءتيىمدى. جۇڭگو وداق جۇلگەسى ىشىندە ازياداعى ءار ەلمەن قول ۇستاسا وتىرىپ، مادەنيەت مۇرالارىن قورعاۋ تاجىريبەلەرىن اۋىستىرۋدى كۇشەيتىپ، مادەنيەت مۇرالارى سالاسىنداعى حالىقارالىق سەلبەستىكتى بەلسەنە ىلگەرىلەتىپ، الەمدىك وركەنيەتتەر تىلدەسۋى، سەلبەستىگى تورابىن قۇرىپ، ءار ەل حالقىنىڭ ءوزارا ءتۇسىنىسۋىن، ەتەنە بولۋىن جەبەپ، ادامزات وركەنيەتىنىڭ دامۋىن، العا باسۋىن بىرگە ىلگەرىلەتۋدى قالايدى.
ازيا مادەنيەت مۇرالارىن قورعاۋ وداعى جينالىسىن مادەنيەت جانە ساياحات مينيسترلىگى، مەملەكەتتىك مادەني مۇرالار مەكەمەسى، شانشي ولكەلىك حالىق ۇكىمەتى بىرلەسىپ وتكىزدى، 4 - ايدىڭ 25 - كۇنى شانشي ولكەسىنىڭ شي - ان قالاسىندا اشىلدى.
