شينحۋا اگەنتتىگىنىڭ 4 - ايدىڭ 26 - كۇنى بەيجيڭنەن بەرگەن حابارى. 4 - ايدىڭ 26 - كۇنى تۇستەن كەيىن مەملەكەت ءتوراعاسى شي جينپيڭ كەلىسۋ بويىنشا ۋكراينانىڭ زۇڭتۇڭى زەلەنسكيمەن تەلەفوندا سويلەستى. ەكى جاق جۇڭگو − ۋكراينا قارىم - قاتىناسى جانە ۋكراينا داعدارىسى جونىندە پىكىر اۋىستىردى.
شي جينپيڭ بىلاي دەپ اتاپ كورسەتتى: جۇڭگو − ۋكراينا قارىم - قاتىناسى 31 جىلدىق دامۋ بارىسىن باسىپ ءوتىپ، ستراتەگيالىق سەرىكتەستىك قارىم - قاتىناس دەڭگەيىنە جەتىپ، ەكى ەلدىڭ ءوز الدىنا دامۋىنا، گۇلدەنۋىنە دەم بەردى. مەن زەلەنسكي زۇڭتۇڭنىڭ جۇڭگو − ۋكراينا قارىم - قاتىناسىن دامىتۋعا جانە جۇڭگومەن سەلبەستىك ورىستەتۋگە باسا ءمان بەرەتىندىگىن تالاي رەت بىلدىرگەندىگىن القايمىن، ۋكراينا جاقتىڭ بىلتىر جۇڭگو ازاماتتارىنىڭ شەگىنۋىنە زور كومەك كورسەتكەندىگىنە العىس ايتامىن. يەلىك ۇقىعى مەن تەرريتوريا تۇتاستىعىنا ءوزارا قۇرمەت ەتۋ − جۇڭگو − ۋكراينا قارىم - قاتىناسىنىڭ ساياسي نەگىزى. ەكى جاق بولاشاققا كوز جىبەرىپ، ەكى ەلدىڭ قارىم - قاتىناسىنا ۇزاق بولاشاقتىق تۇرعىدان مامىلە جاساۋعا جانە ونى جوسپارلاۋعا تاباندى بولىپ، ەكى جاقتىڭ ءوزارا قۇرمەت ەتۋ، شىنايى سيلاسۋ ءداستۇرىن جالعاستىرىپ، جۇڭگو − ۋكراينا ستراتەگيالىق سەرىكتەستىك قارىم - قاتىناسىنىڭ العا قاراي دامۋىن ىلگەرىلەتۋى كەرەك. جۇڭگو جاقتىڭ جۇڭگو − ۋكراينا قارىم - قاتىناسىن دامىتۋ تىلەگى دايەكتى، ايقىن. حالىقارالىق جاعداي مەيلى قالاي قۇبىلسا دا، جۇڭگو جاق ۋكراينا جاقپەن بىرگە، ەكى ەلدىڭ ءبىر - بىرىنە تيىمدىلىك جەتكىزەتىن سەلبەستىگىن العا ىلگەرىلەتۋدى قالايدى.
شي جينپيڭ بىلاي دەپ اتاپ كورسەتتى: ۋكراينا داعدارىسىنىڭ كۇردەلى وزگەرىسى حالىقارالىق جاعدايعا اۋىر ىقپال جەتكىزدى. ۋكراينا داعدارىسى ماسەلەسىندە جۇڭگو جاق باستان - اياق بەيبىتشىلىك جاقتا تۇرادى، وزەكتى تۇرعىسى − راقايلاسۋعا ءناسيحاتتاپ كەلىسسوزدى جەبەۋ. مەن ىركەس - تىركەس ”ءتورت ءتيىس“، ”ءتورت ورتاق“ جانە ”ءۇش ءتۇيىندى تولعانىستى“ العا قويدىم. جۇڭگو جاق تاعى وسى نەگىزدە «ۋكراينا داعدارىسىن ساياسي جولمەن شەشۋ جونىندەگى جۇڭگو تۇرعىسى» حۇجاتىن جاريالادى. جۇڭگو ۋكراينا داعدارىسىن تۋدىرۋشى ەمەس، ىلىكتى جاعى دا ەمەس. بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە جاۋاپكەرشىلىك ارقالايتىن ءىرى ەل رەتىندە، ءبىز ءبىر جاقتا تۇرىپ قىزىق كورمەيمىز ءارى وتقا ماي دا قۇيمايمىز، ورايدان پايدالانىپ پايدا تۇسىرەتىن ءىستى تىپتەن ىستەمەيمىز. جۇڭگو جاقتىڭ ءىس - ارەكەتى جاريا دا ادىلەتتى. تىلدەسۋ، كەلىسسوز وتكىزۋ بىردەن - ءبىر ىسكە اساتىن شىعار جول. يادرو سوعىسىندا جەڭەتىن ەشكىم بولمايدى. يادرو ماسەلەسىنە مامىلە جاساۋدا قاتىستى جاقتار سابىرلىلىقتى، ۇستامدىلىقتى ساقتاۋعا ءتيىس، ءوزىنىڭ جانە بۇكىل ادامزاتتىڭ بولاشاعى مەن تاعدىرىن شىنايى كوزدەپ، داعدارىستى بىرگە ويداعىداي باسقارۋ - تىزگىندەۋى كەرەك. قازىر ءار جاقتىڭ ۇستامدى ويلارى مەن ۇندەرى كوبەيۋدە، ورايدى مىقتى يگەرىپ، داعدارىستى ساياسي جولمەن شەشۋگە ءتيىمدى شارت - جاعداي توپتاۋ كەرەك. ءار جاقتىڭ ۋكراينا داعدارىسى جونىندە تەرەڭ تولعانىپ، تىلدەسۋ ارقىلى ەۆروپانىڭ باياندى تىنىشتىق جولىن بىرگە قاراستىرۋىن ءۇمىت ەتەمىن. جۇڭگو جاق راقايلاسۋعا ءناسيحاتتاپ كەلىسسوزدى جەبەۋگە تاباندى بولىپ، تەزىرەك ۇرىستى توقتاتىپ، سوعىستى اياقتاتىپ، بەيبىتشىلىكتى قالپىنا كەلتىرۋگە ءوز تۇرعىسىنان قۇلشىنىس جاسايدى. جۇڭگو جاق جۇڭگو ۇكىمەتىنىڭ ەۆروپا − ازيا ىستەرى ەرەكشە ۋاكىلىن ۋكراينا سياقتى ەلدەرگە ساپارلاي بارۋعا جىبەرىپ، ۋكراينا داعدارىسىن ساياسي جولمەن شەشۋ جونىندە ءارقايسى جاقتارمەن ىشكەرىلەي بايلانىس جاسايدى. جۇڭگو جاق ۋكراينا جاققا كوپ رەت ادامگەرشىلىك كومەك كورسەتتى، قولىنان كەلگەنىنشە ۇزدىكسىز كومەكتەسۋدى قالايدى.
زەلەنسكي ءتوراعا شي جينپيڭنىڭ تاعى دا سايلانعاندىعىن قۇتتىقتادى، جۇڭگونىڭ كەرەمەت تابىستارعا قول جەتكىزگەندىگىن القاپ بىلاي دەدى: ءتوراعا شي جينپيڭنىڭ باسشىلىعىندا جۇڭگونىڭ ءتۇرلى سايىستارعا ءساتتى توتەپ بەرىپ، ۇزدىكسىز العا داميتىندىعىنا سەنەمىن. جۇڭگو جاق حالىقارالىق ىستەردە بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىن ۇستانىپ، حالىقارالىق ساحنادا وراسان زور ىقپال كۇشىن ساۋلەلەندىرۋدە. ۋكراينا جاق ءبىر جۇڭگو ساياساتىنان جازبايدى، جۇڭگو جاقپەن بىرگە جاپپاي سەلبەستىك ورىستەتىپ، ۋكراينا − جۇڭگو قارىم - قاتىناسىنىڭ جاڭا تاراۋىن اشىپ، دۇنيە ءجۇزىنىڭ بەيبىتشىلىگى مەن ورنىقتىلىعىن قورعاۋعا بىرگە كۇش سالۋدى ءۇمىت ەتەدى. زەلەنسكي كەزەكتەگى ۋكراينا داعدارىسى جونىندەگى كوزقاراسىن تانىستىرىپ، جۇڭگو جاقتىڭ ۋكرايناعا ادامگەرشىلىك كومەك كورسەتكەندىگىنە العىس ايتتى، جۇڭگو جاقتىڭ بەيبىتشىلىكتى قالپىنا كەلتىرۋدە، ديپلوماتيالىق ءتاسىل ارقىلى داعدارىستى شەشۋدە ماڭىزدى رول اتقارۋىن قارسى الاتىندىعىن ءبىلدىردى.
