انار بۇلت \ شينجياڭ گازەتىنىڭ ءتىلشىسى ۋاڭ شيڭرۇي 4 - ايدىڭ 27 - كۇنى ۇرىمجىدەن حابارلايدى. اۆتونوميالى رايوندىق پارتكومنىڭ شۋجيى ما شيڭرۇي 4 - ايدىڭ 27 - كۇنى ۇرىمجىدە شينجياڭعا ەكسكۋرسيالاي، ساپارلاي كەلگەن ءىشىنارا ەلدەردىڭ جۇڭگودا تۇراتىن باس كونسۋلدارىمەن كەزدەستى.
ما شيڭرۇي اۆتونوميالى رايوندىق پارتكوم مەن ۇكىمەت اتىنان شينجياڭعا ەكسكۋرسيالاي، ساپارلاي كەلگەن باس كونسۋلداردى قارسى الدى. ول بىلاي دەدى: جۇڭگو كوممۋنيستىك پارتياسىنىڭ 18 - قۇرىلتايىنان بەرى شي جينپيڭ جولداستى ۇيتقى ەتكەن جۇڭگو كوممۋنيستىك پارتياسى ورتالىق كوميتەتى شينجياڭ قىزمەتىن ستراتەگيالىق جاقتان باعامداپ جانە جوسپارلاپ، قىرۋار زەيىن - زەردە مەن جۇرەك قانىن سارقا جۇمساپ، شينجياڭنىڭ ەكونوميكالىق، قوعامدىق بەت - بەينەسىندە وراسان زور وزگەرىستەر تۋىلۋىن ىلگەرىلەتتى. كەزەكتە شينجياڭنىڭ قوعامدىق كەلەلى جاعدايى ورنىقتى، ۇلتتار ىنتىماقتى، ءدىن جاراسىمدى، ەكونوميكالىق، قوعامدىق دامۋىنىڭ ومىرشەڭدىك كۇشى جالىندى، ارىنى كۇشتى، تەبىنى مىعىم بولىپ، ءار ۇلت حالقى ءتوراعا شي جينپيڭ كەسكىندەگەن تاماشا جوبانى بويلاپ، جوعارى ساپالى دامۋدى بار كۇشپەن ىلگەرىلەتىپ، جاڭا داۋىردەگى جاڭا جورىقتا مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ شينجياڭ تاراۋىن جازۋدا. ءبىر مەزگىلدەن بەرى امەريكا قاتارلى باتىس ەلدەرىندەگى ءىشىنارا جۇڭگوعا قارسى كۇشتەر شينجياڭعا ساياتىن قىرۋار جالعان ينفورماتسيالاردى ويدان قۇراستىرىپ، تاراتىپ، شينجياڭنىڭ ادامدىق ۇقىق ىستەرىنىڭ دامۋىنا پالە جاپتى، جۇڭگو وبرازىنا ورشەلەنە كۇيە جاقتى. باس كونسۋلدار وسى رەتكى ساپار ارقىلى جۇڭگونىڭ شينجياڭىنىڭ ەكونوميكالىق، قوعامدىق دامۋى، حالىقتىڭ تىنىش ءومىر، شات - شادىمان تىرشىلىك كەشۋى، ادامدىق ۇقىقتىڭ ءونىمدى قامتاماسىز ەتىلۋى سياقتى ناقتى جاعدايلاردى سول جەردىڭ وزىندە ۇعىسىپ، ونىڭ دۇرىس - بۇرىسىن ءبىر كورگەندە - اق انىق اڭعاردى. جۇڭگو مەن ءارقايسى باس كونسۋلدار ۋاكىل بولعان مەملەكەتتەردىڭ ادامدىق ۇقىق ماسەلەسىندەگى ۇستانىمى ۇقساس، كوپشىلىكتىڭ وبيەكتيۆ، ءادىل تۇرعىدان جازباي، ادىلەت ءۇنىن ۇزدىكسىز تاراتىپ، شىنايى، كوركەم جۇڭگونىڭ شينجياڭىن حالىقارالىق قوعامعا تانىستىرۋىن ءۇمىت ەتەمىن. كوپشىلىكتىڭ شينجياڭعا ۇنەمى كەلىپ ەكسكۋرسيا - ساپاردا، تەكسەرۋدە بولۋىن، اۋىس - كۇيىستى، سەلبەستىكتى جەبەۋىن شىن ىقىلاسپەن قارسى الامىن. شينجياڭنىڭ ەسىك اشۋ قادامى بارعان سايىن تەزدەيدى، ءبىز ”ءبىر بەلدەۋ، ءبىر جولدى“ بىرگە قۇرۋ باستاماسىن ارقاۋ ەتىپ، ءار ەلدىڭ جەرگىلىكتى ورىندارىمەن ءار سالاداعى اۋىس - كۇيىستى، سەلبەستىكتى ۇزدىكسىز تەرەڭدەتىپ، ءوزارا دوستىقتى اناعۇرلىم ويداعىداي كۇشەيتىپ، ەكونوميكانىڭ دامۋىن جەبەپ، ەكى جاق حالقىن باقىتقا كەنەلدىرەمىز.
برازيليانىڭ، نەپالدىڭ، ۆيەتنامنىڭ، كامبودجانىڭ، يندونەزيانىڭ، تۇركيانىڭ جۇڭگودا تۇراتىن باس كونسۋلدارى سوزدەرىندە جۇڭگونىڭ شينجياڭىنىڭ ەكونوميكالىق، قوعامدىق دامۋدا جانە حالىق تۇرمىسىن جاقسارتۋدا قول جەتكىزگەن تابىستارىن ايرىقشا القادى. ولار مىنالاردى ءبىلدىردى: وتكەن بىرنەشە كۇندە ءۇرىمجى، قاشقار، تۇرپان سياقتى جەرلەردە ەكسكۋرسيا - ساپاردا بولدىق، شينجياڭنىڭ كەدەيلىكتى ازايتۋ ىستەرىنىڭ تابىستارىنىڭ سۇبەلى، ەرەكشە كاسىپ سالالارىنىڭ ومىرشەڭدىك كۇشكە تولى، حالىق تۇرمىسىنىڭ تىنىش تا بەرەكەلى ەكەندىگىن، كوپ نەگىزدى مادەنيەتتىڭ توعىسا دامىعاندىعىن، باتىستاعى كەيبىر مەديالاردىڭ جۇڭگونىڭ شينجياڭى جونىندەگى حابارلارىمەن مۇلدە ۇقسامايتىندىعىن كورىپ، شينجياڭنىڭ ناقتى جاعدايى جونىندە ءتىپتى دە تەرەڭ تۇسىنىككە يە بولدىق. شينجياڭ ماسەلەسى بۇكىلدەي جۇڭگونىڭ ىشكى ءىسى، شينجياڭعا ساياتىن تاقىرىپتى ساياسيلاندىرۋعا قارسى تۇرامىز. شينجياڭ − جۇڭگونىڭ ازيا − ەۆروپامەن تۇتاساتىن ماڭىزدى ارناسى جانە جىبەك جولى ەكونوميكالىق بەلدەۋىنىڭ ماڭىزدى ءتۇيىنى، دامۋ كومەسكى كۇشى زور، ”ءبىر بەلدەۋ، ءبىر جول“ جۇلگەسىندە ءوز ەلدەرىمىزدىڭ جۇڭگونىڭ شينجياڭىمەن ءار سالاداعى اۋىس - كۇيىستى، سەلبەستىكتى تەرەڭدەتۋىن ۇزدىكسىز ىلگەرىلەتۋدى قالايمىز.
چىن ۋيجۇن، قادەن كابەن، يراننىڭ، سەنەگالدىڭ، ەكۆادوردىڭ، بيرمانىڭ، تايلاندتىڭ، ۋگاندانىڭ، پاكيستاننىڭ جۇڭگودا تۇراتىن باس كونسۋلدارى، سىرتقى ىستەر مينيسترلىگىنىڭ قاتىستى تاراۋلارىنداعى جاۋاپتى جولداستار، گۋاڭدۇڭ ولكەسىنىڭ، چۇڭچيڭ قالاسىنىڭ، سىچۋان ولكەسىنىڭ سىرتقى ىستەر كەڭسەسىندەگى جانە اۆتونوميالى رايوننىڭ قاتىستى تاراۋلارىنداعى جاۋاپتى جولداستار قاتارلىلار كەزدەسۋگە قاتىناستى.
