تيانجوۋ 6 - ءنومىرلى جۇك تاسىمالى الەم كەمەسىن ۇشىرۋ مىندەتى تولىق تابىستى بولدى
كەڭىستىك بەكەتىن پايدالانۋ جانە دامىتۋ ساتىسىنداعى ۇشۋ مىندەتىنىڭ العاشقى شايقاسى جەڭىستى بولدى
شينحۋا اگەنتتىگىنىڭ 5 - ايدىڭ 10 - كۇنى حاينان ۋىنچاڭنان بەرگەن حابارى. 5 - ايدىڭ 10 - كۇنى ساعات 21دەن 22 مينۋت وتكەندە، تيانجوۋ 6 - ءنومىرلى جۇك تاسىمالى الەم كەمەسىن تيەگەن چاڭجىڭ 7 - ءنومىرلى الىستان مەڭگەرىلەتىن 7 - تاسىمال راكەتاسى ەلىمىزدىڭ ۋىنچاڭ عارىشقا ۇشىرۋ الاڭىندا وتالدىرىلىپ، ۇشىرىلدى، شامامەن 10 مينۋت وتكەن سوڭ، الەم كەمەسى راكەتادان ءساتتى اجىرادى ءارى بەلگىلەنگەن وربيتاعا كىردى، وسىدان كەيىن الەم كەمەسىنىڭ كۇن ەنەرگيا تاقتاسى ءساتتى جايىلىپ، جۇمىس باستاپ، ۇشىرۋ تولىق تابىستى بولدى. الدا تيانجوۋ 6 - ءنومىرلى جۇك تاسىمالى الەم كەمەسى وربيتادا جۇرگەن كەڭىستىك بەكەتىنىڭ قۇرامالى تۇلعاسىمەن تۇيىلىسەدى.
جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ تانىستىرۋىنا قاراعاندا، تيانجوۋ 6 - ءنومىرلى جۇك تاسىمالى الەم كەمەسىنە شىنجوۋ 16 - ءنومىرلى جانە شىنجوۋ 17 - ءنومىرلى الەم كەمەسىندەگى 6 عارىشكەردىڭ وربيتادا ايالداعانداعى تۇتىنۋ بۇيىمدارى، قوزعالتقىش زات، قولدانىلمالى تاجىريبە (سىناق) قۇرىلعىسى سياقتى زاتتار تيەلگەن. جۇك تاسىمال قابىلەتىن جوعارىلاتۋ ءۇشىن، بۇل رەتكى مىندەتتە تيانجوۋ 6 - ءنومىرلى تاسىمال الەم كەمەسىن ساپالىلاندىرىپ، جاڭالاپ، جۇك تاسىمالى الەم كەمەسىن ۇشىرۋ قاجەتىن ءبىر جىلدا 2 رەتتەن 2 جىلدا 3 رەتكە ساپالىلاندىرىپ، تاسىمالدىڭ وزىندىك قۇنىن ءونىمدى تۇردە تومەندەتكەن. مۇنان تىس، الەم كەمەسىنە تاعى داليان جاراتىلىستىق عىلىمدار داشۋەسىنىڭ تاجىريبە جاساندى سەرىگى سياقتى نىساندار دا تيەلگەن.
بۇل رەتكى مىندەت − ەلىمىزدىڭ عارىشقا ادام الىپ ۇشۋ ينجەنەرياسىنىڭ كەڭىستىك بەكەتىن پايدالانۋ جانە دامىتۋ ساتىسىنا قادام تاستاعانداعى العاش رەتكى ۇشۋ، ينجەنەريانىڭ جوسپارعا الىنىپ اتقارىلعاننان بەرگى 28 - رەتكى ۇشۋ مىندەتى، سونداي - اق چاڭجىڭ جەلىلەس تاسىمال راكەتاسىنىڭ 472 - رەتكى ۇشۋى.
(تىلشىلەر لي گولي، سۇن لۋميڭ، گو ميڭجى)
