”ەلەكتر قۋاتىنىڭ چومۋلاڭما شىڭى“ ءبىر ۋاقىتتا 400 ميلليون شامعا جارىق سيلادى
□ انار بۇلت \ شينجياڭ گازەتىنىڭ ءتىلشىسى گى يوۋجۇن
5 - ايدىڭ 7 - كۇنى ءتىلشى جۇندۇڭ ەكونوميكالىق - تەحنيكالىق اشۋ رايونىندا كەشكى شاپاق نۇرىنا بولەنگەن تارام - تارام ەلەكتر جەتكىزۋ جەلىلەرىنىڭ وسى ارادان الىسقا سوزىلىپ جاتقاندىعىن كوردى. وسى ارادا بوي كوتەرگەن سانجى توك اۋىستىرۋ پۋنكتى سانجى − گۋچۋان 1100± كيلوۆولتتىق ەرەكشە جوعارى كەرنەۋلى تۇراقتى توك جەتكىزۋ ينجەنەرياسىنىڭ (تومەندە قىسقارتىلىپ ”سانجى − گۋچۋان تۇراقتى توك ينجەنەرياسى“ دەلىنەدى) قاينارى.
الىستان كوز سالعاندا توك اۋىستىرۋ پۋنكتىنىڭ قاقپاسىنا جازىلعان ”ءىرى ەلدىڭ ماڭىزدى قارۋى، ەلەكتر قۋاتىنىڭ چومۋلاڭما شىڭى“ دەگەن سوزدەر ادام جۇرەگىن تەبىرەنتەدى.
سانجى − گۋچۋان تۇراقتى توك ينجەنەرياسى ”شينجياڭنىڭ ەلەكترىن سىرتقا جەتكىزۋ“ ستراتەگياسىنداعى ينجەنەريالاردىڭ ءبىرى، 2016 - جىلى 3 - ايدا قۇرىلىس باستاپ، 2019 - جىلى 9 - ايدىڭ 26 - كۇنى ىسكە قوسىلعان. مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى اسقىن جوعارى كەرنەۋلى بولىمشە سەرىكتەستىگىنىڭ سانجى توك اۋىستىرۋ پۋنكتى وسى ينجەنەريانىڭ ەلەكتر جەتكىزۋ پۋنكتى سانالادى. شينجياڭنىڭ ەلەكترىن سىرتقا جەتكىزەتىن وسى ۇلكەن كۇرە تامىر قۇربان تۇڭعىت قۇمدى ءشولىنىڭ قويناۋىنداعى جۇندۇڭ ەلەكترىن 3000 نەشە كيلومەتر شالعايداعى حۋادۇڭ وڭىرىنە دامىلسىز جەتكىزۋدە.
”سانجى − گۋچۋان تۇراقتى توك ينجەنەرياسىن سالا ىشىندەگىلەر ’ەلەكتر قۋاتىنىڭ چومۋلاڭما شىڭى‘ اتايدى، ويتكەنى ول دۇنيە جۇزىندەگى 4 ەڭدى جاراتقان: ەلەكتر كەرنەۋى دارەجەسى ەڭ جوعارى، ەلەكتر جەتكىزۋ سيىمدىلىعى ەڭ ۇلكەن، ەلەكتر جەتكىزۋ ارالىعى ەڭ ۇزاق، تەحنيكالىق دەڭگەيى ەڭ وزىق“، - دەدى سانجى توك اۋىستىرۋ پۋنكتىنىڭ باستىعى ۋاڭ حۇڭ.
سانجى − گۋچۋان تۇراقتى توك ينجەنەرياسى ەلەكتر كەرنەۋىنىڭ دارەجەسى 1100± كيلوۆولت. ينجەنەريادا بەلگىلەنگەن ەلەكتر قۋاتى 12 ميلليون كيلوۆات.
”بۇل 30 ۆاتتىق 400 ميلليون ەلەكتر شامىن ءبىر ۋاقىتتا جاققانمەن بىردەي“، - دەدى ۋاڭ حۇڭ.
سانجى − گۋچۋان تۇراقتى توك ينجەنەرياسى شينجياڭ، گانسۋ، نيڭشيا، شانشي، حىنان، انحۇي سىندى 6 ولكە، رايوندى باسىپ وتەدى، جالپى ۇزىندىعى 3293 كيلومەتر. دۇنيە جۇزىندەگى بىردەن - ءبىر 1100± كيلوۆولتتىق ەرەكشە جوعارى كەرنەۋلى تۇراقتى توك جەتكىزۋ جەلىسى بولعاندىقتان، سانجى − گۋچۋان تۇراقتى توك ينجەنەرياسىنىڭ كوپ ءتۇرلى تەحنيكاسى، جۇيەسى، جابدىعى دۇنيە جۇزىندە تۇگەلدەي قارا ءۇزىپ الدا كەلەدى. ۋاڭ حۇڭ بىلاي دەدى: ماسەلەن، بۇل ينجەنەريا دۇنيە جۇزىندە تۇڭعىش رەت 1100± كيلوۆولتتىق ءۇي ىشىندەگى تۇراقتى توك ءورىسى جوباسىن قولدانىپ، دۇنيە جۇزىندەگى ەلەكتر كەرنەۋى دارەجەسى ەڭ جوعارى، سيىمدىلىعى ەڭ ۇلكەن 1100± كيلوۆولتتىق توك اۋىستىرۋ ترانسفورماتورى قاتارلىلاردى ءساتتى تۇردە زەرتتەپ جاسادى.
سانجى − گۋچۋان تۇراقتى توك ينجەنەرياسىنىڭ جونەلتۋ تەرمينال پۋنكتى رەتىندە، سانجى توك اۋىستىرۋ پۋنكتى وسى ەلەكتر جەتكىزۋ جەلىسىنىڭ بويىنداعى مەڭگەرەتىن ۇلكەن مي ىسپەتتى. كاسىپ سالاسىندا ” شىڭ باسىنا“ شىققان بولسا دا، بۇل اراداعى سيفرلاندىرۋ تەحنيكاسىندا جاڭالىق اشۋ، وزگەرىس جاساۋ مۇلدە توقتاپ كورمەدى.
”سانجى توك اۋىستىرۋ پۋنكتىنىڭ ءار رەتكى تەحنيكادا جاڭالىق اشۋىنىڭ بارلىعى ’ەلەكتر قۋاتى چومۋلاڭماسى‘ بيىگىندە تۇرىپ، تاعى دا بيىك بەلەسكە كوتەرىلۋ سانالادى“، - دەدى سانجى توك اۋىستىرۋ پۋنكتى جۇمىس اينالىمىنداعى كەزەكشى بانجاڭ ۋاڭ شينيۇي. 2019 - جىلى سانجى توك اۋىستىرۋ پۋنكتى سالىنىپ بولىپ، ۋاڭ شينيۇي وسىندا كەلىپ قىزمەت ىستەيدى، ول ءبىر قاراپايىم كەزەكشىدەن بىرتىندەپ كەزەكشى بانجاڭ بولدى، وسى بارىستا وسى اراداعى ءار رەتكى تەحنيكالىق توڭكەرىسكە كۋا بولدى.
2019 - جىلى 8 - ايدا سانجى توك اۋىستىرۋ پۋنكتى 5G ينتەرنەت بازالىق ستانسياسىن قۇرىپ، شينجياڭداعى اسقىن ەرەكشە جوعارى كەرنەۋلى ەلەكتر تورىنىڭ تۇڭعىش 5G بازالىق ستانسياسىنا اينالدى.
2020 - جىلى5G ينتەرنەت جەلىسىنىڭ تىرەك بولۋىمەن 5G+ قىراعى تەلە كامەراسى، 5G+ كىناراتتى پارىقتاۋ، 5G+ ولشەپ پارىقتاۋ، 5G+ تەمپەراتۋرانى ينفرا قىزىل ساۋلەمەن ولشەۋ سياقتى وزىق تەرمينال جۇيەلەرى ىركەس - تىركەس سانجى توك اۋىستىرۋ پۋنكتىندە العاش رەت قولدانىلدى.
2021 - جىلى 5 - ايدا سانجى توك اۋىستىرۋ پۋنكتى ”بەيدوۋ“ ورنىن تۇراقتاندىرۋ جول نۇسقاۋ جۇيەسىنە سۇيەنىپ، بۇكىلدەي اۆتوماتتى شارلاپ تەكسەرۋ جۇيە قۇرىلىسىن تامامداپ، توك اۋىستىرۋ پۋنكتىندە تۇڭعىش رەت ”ادام كۇشىمەن شارلاپ تەكسەرۋ، قۇلتەمىرمەن شارلاپ تەكسەرۋ، كەڭىستىكتە ۇشقىشسىز اپپاراتپەن شارلاپ تەكسەرۋ“ سىندى شارلاپ تەكسەرۋ جاڭا ۇلگىسىن العاش قالىپتاستىرىپ، پۋنكتتىڭ قاراستىلىعىنداعى نەگىزگى، قوسالقى جابدىقتاردى تاۋلىك بويى دەربەس توقتاۋسىز شارلاپ تەكسەردى...
ۋاڭ حۇڭ بىلاي دەدى: 2021 - جىلى 12 - ايدا مەملەكەت ەلەكتر تورىنىڭ 2 - توپتاعى سيفرلاندىرۋ قۇرىلىسىنىڭ سىناق ءتۇيىنى پۋنكتى جانە شينجياڭ ەلەكتر تورى بويىنشا تۇڭعىش سيفرلانعان توك اۋىستىرۋ پۋنكتى ينجەنەرياسى رەتىندە، سانجى توك اۋىستىرۋ پۋنكتى سيفرلاندىرۋ تەحنيكالىق تاسىلىنە سۇيەنىپ، توك اۋىستىرۋ پۋنكتىنىڭ ”زەردەلى ۇلكەن ميىن“ تۇلعالاپ، تۇتاس الاپتى بەينە ەكرانمەن باقىلاۋ، جابدىقتاردىڭ جاعدايىنا تالداۋ جاساۋ، جابدىقتار كىناراتىنا تۇجىرىم جاساۋ، كاسىپتىك تەحنيكالىق باسقارۋ - مەڭگەرۋ سياقتى يقۋاتتاردى قولداندى.
”بۇرىن ادام كۇشىنە سۇيەنىپ ناق مايداندى شارلاپ تەكسەرەتىنبىز، وندا ەڭبەك كۇشەمەلىلىگى جوعارى، قىزمەت ونىمدىلىگى تومەن بولاتىن، قازىر ءبىز ءتىنتۋىردى باسىپ، سيفرلاندىرىلعان توك اۋىستىرۋ پۋنكتى تۇعىرىنىڭ ’زەردەلى ۇلكەن ميىنان‘ جابدىقتاردىڭ اينالىم جاعدايىن تەكسەرۋ احۋالىن تاۋلىك بويى قالت جىبەرمەي باقىلاپ وتىرۋىمىزعا بولاتىن بولدى“، - دەدى ۋاڭ شينيۇي.
”تۇراقتى توك جەتكىزەتىن جابدىقتاردى باسقارۋدىڭ سيفرلانۋعا قاراي تيپ جاڭالاۋىن جانە زەردەلىلەندىرۋ دارەجەسىن جوعارىلاتۋدى ىلگەرىلەتۋدەگى ماقسات − سانجى − گۋچۋان تۇراقتى توك ينجەنەرياسى سىندى وسى مەملەكەت ەنەرگياسىنىڭ كۇرە تامىرىن ويداعىداي جۇرگىزۋ، ويداعىداي قورعاۋ ءۇشىن“، - دەدى ۋاڭ حۇڭ.
ءىرى ەلدىڭ ماڭىزدى قارۋى مەملەكەتتىڭ جاۋاپكەرشىلىگىن ارقالاپ وتىر.
ۋاڭ حۇڭ تانىستىرىپ بىلاي دەدى: ەگەردە سانجى − گۋچۋان تۇراقتى توك ينجەنەرياسى 9 ميلليون كيلوۆاتتىق شاقتالعان قۋاتپەن جۇمىس جۇرگىزەدى دەسەك، وندا ءبىر كۇننىڭ 24 ساعاتىندا حۋادۇڭ وڭىرىنە 216 ميلليون كيلوۆات ساعات ەلەكتر جەتكىزىپ، 25 ميلليون جان سانى بار قالانى 7 كۇن تۇرمىستىق ەلەكترمەن قامداۋىنا بولادى.
بيىل 5 - ايدىڭ 7 - كۇنىنە دەيىن سانجى − گۋچۋان تۇراقتى توك ينجەنەرياسى سىرتقا جيىنى 207 ميلليارد كيلوۆات ساعات ەلەكتر جەتكىزدى. 2022 - جىلعى ەلىمىز تۇرعىندارىنىڭ جىلىنا ورتاشا ەسەپپەن پايدالاناتىن ەلەكترى 947 كيلوۆات ساعات بويىنشا ەسەپتەگەندە، 218 ميلليوننان استام تۇرعىننىڭ ءبىر جىل ىستەتەتىن ەلەكتر مولشەرىمەن قارايلاس بولادى.
سانجى توك اۋىستىرۋ پۋنكتىنىڭ قاسىندا كومىر قورى 390 ميلليارد توننا كەلەتىن جۇندۇڭ كومىر الابى بار، ول قازىر ەلىمىزدەگى ەڭ ۇلكەن تۇتاستاي كومىر الابى بولىپ، بارلانىپ انىقتالعان كومىر قورى 210 ميلليارد توننادان اسادى.
مول كومىر بايلىعىنان قالاي پايدالانۋ كەرەك؟
ەگەردە تەمىر جول، تاس جول ارقىلى ەنەرگيا قاجەتى ءبىرشاما جوعارى ورتا، شىعىس بولىك وڭىرلەرىنە تاسىمالداعاندا، تاسىمال ارالىعى ۇزاق، تاسىمال پەريودى ءبىرشاما ۇزىن بولۋمەن بىرگە، حۋادۇڭ ءوڭىرىنىڭ اتموسفەراسىنىڭ لاستانۋىن وڭاۋعا دا وتە ءتيىمسىز. ەگەردە سانجى توك اۋىستىرۋ پۋنكتى 9 ميلليون كيلوۆاتتىق شاقتالعان قۋاتپەن جۇمىس جۇرگىزسە، ءبىر كۇندە سىرتقا جەتكىزەتىن ەلەكتر مولشەرى كۇنىنە 72 مىڭ توننا كومىردى تاسىمالداعانمەن بارابار، بىلايشا ايتقاندا، بۇل ۇزىندىعى 15.5 مەتر، 60 توننا جۇك كوتەرەتىن 1200 جۇك اۆتوموبيلىمەن ءبىر كۇن كومىر تاسۋ دەگەن ءسوز.
سانجى − گۋچۋان تۇراقتى توك ينجەنەرياسىنىڭ سىرتقا جەتكىزگەن جالپى ەلەكتر مولشەرى 207 ميلليارد كيلوۆات ساعات بولىپ، 66 ميلليون 240 مىڭ توننا ولشەمدى كومىردىڭ ورنىن باسىپ، 179 ميلليون توننا كومىر قىشقىل گازى از شىعارىلدى.
”سانجى − گۋچۋان تۇراقتى توك ينجەنەرياسى شينجياڭنىڭ ەنەرگيا بازاسىن اشۋىن جانە ەنەرگيانى سىرتقا جەتكىزۋىن پارمەندى جەبەۋمەن بىرگە، حۋادۇڭ ءوڭىرىن ەلەكتر قۋاتىمەن حاۋىپسىز، سەنىمدى قامداۋعا كەپىلدىك ەتىپ، شىعىس، ورتا بولىك وڭىرلەردىڭ اتموسفەرانىڭ لاستانۋىنان ساقتانۋىن جانە ونى وڭاۋىن ىلگەرىلەتىپ، سەنىمدى ’شينجياڭ كۇشىمەن‘ ۇلەس قوستى“، - دەدى ۋاڭ حۇڭ.
