شينحۋا اگەنتتىگىنىڭ 5 - ايدىڭ 15 - كۇنى بەيجيڭنەن بەرگەن حابارى. تاياۋدا مەملەكەت ءتوراعاسى شي جينپيڭ جۇڭگو مۇناي داشۋەسىندە (بەيجيڭ) وقىپ جاتقان ورتا ازيالىق وقۋشىلارعا جاۋاپ حات قايتارىپ، ولاردى جۇڭگونىڭ ورتا ازيا ەلدەرىمەن قارىم - قاتىناسىنىڭ دامۋىن ىلگەرىلەتۋگە اناعۇرلىم زور ۇلەس قوسۋعا شابىتتاندىردى.
شي جينپيڭ بىلاي دەپ اتاپ كورسەتتى: جۇڭگو مەن ورتا ازيا ەلدەرى تاۋ - وزەنى تۇتاسقان، دوستىعى تەرەڭ، تاعدىرلاس. 2013 - جىلى مەن ورتا ازيا ەلدەرىندە ”جىبەك جولى ەكونوميكالىق بەلدەۋىن“ بىرگە قۇرۋ باستاماسىن العا قويعان ەدىم. 10 جىلدان بەرى جۇڭگو − ورتا ازيا قارىم - قاتىناسى ۇزدىكسىز تىڭ ساتىعا كوتەرىلىپ، ءارقايسى سالاداعى سەلبەستىك داڭعىل جولعا ءتۇسىپ، ەكى جاقتىڭ حالقىنا قۇت - ىرىس الا كەلدى.
شي جينپيڭ بىلاي دەپ باسا دارىپتەدى: جۇڭگو مەن ورتا ازيا ەلدەرىنىڭ دوستىق قارىم - قاتىناسى سان ۇرپاق تالانتتى، تالاپتى جاستاردىڭ جالعاستىرۋىن جانە ساۋلەلەندىرۋىن قاجەت ەتەدى. سىزدەر جۇڭگو − ورتا ازيا قارىم - قاتىناسىنىڭ كۋاگەرىسىزدەر، يگىلىگىن كورۋشىلەرسىزدەر، ونان دا ماڭىزدىسى، قۇرۋشىلارى جانە تاراتۋشىلارىسىزدار. سىزدەردىڭ جۇڭگونىڭ ورتا ازيا ەلدەرىمەن دوستىق ىستەرىنە بەلسەنە ات سالىسىپ، جىبەك جولى رۋحىن اسقاقتاتىپ، جۇڭگو حيكاياسىن، ورتا ازيا حيكاياسىن ويداعىداي بايانداپ، دوستىق ەلشىسى جانە سەلبەستىك كوپىرى بولىپ، اناعۇرلىم تىعىز جۇڭگو − ورتا ازيا تاعدىرلاس ورتاق تۇلعاسىن قۇرۋعا ءوز ۇلەستەرىڭىزدى قوسۋلارىڭىزدى ءۇمىت ەتەمىن.
تاياۋدا، جۇڭگو مۇناي داشۋەسىندە (بەيجيڭ) وقىپ جاتقان ورتا ازياداعى ەلدەردىڭ وقۋشىلارى شي جينپيڭگە حات جازىپ، جۇڭگودا وقۋ، تۇرمىس كەشىرۋ احۋالدارىن بايانداپ، قۇلشىنا ۇيرەنۋ، سەلبەستىكتى كۇشەيتۋ، جۇڭگو − ورتا ازيا تاعدىرلاس ورتاق تۇلعاسىن قۇرۋعا كۇش قوسۋ بەكىمدەرىن ءبىلدىردى.
