شي جينپيڭ جۇڭگونىڭ ءبىر شالعاي مۇحيت بالىقشىلىق كەمەسىنىڭ ءۇندى مۇحيتىنىڭ ورتا بولىگىندەگى تەڭىز ايدىنىندا اۋدارىلعاندىعىنا بايلانىستى ماڭىزدى نۇسقاۋ بەردى
شۇعىل جاعدايعا توتەپ بەرۋ مەحانيزمىن دەرەۋ ىسكە قوسىپ، قۇتقارۋ - كومەكتەسۋدى بار كۇشپەن ورىستەتىپ، شالعاي مۇحيتتا جۇمىس ىستەۋ حاۋىپسىزدىك كومەسكى كىناراتتارىن تۇگەل تەكسەرۋدى جانە حاۋىپ - قاتەردەن ساقتاندىرۋدى ونان ارى كۇشەيتىپ، حالىق بۇقاراسىنىڭ ءومىرى مەن مال - مۇلكىنىڭ حاۋىپسىزدىگىنە شىنايى كەپىلدىك ەتۋدى تالاپ ەتتى
شينحۋا اگەنتتىگىنىڭ 5 - ايدىڭ 17 - كۇنى بەيجيڭنەن بەرگەن حابارى. 5 - ايدىڭ 16 - كۇنى تاڭعى ساعات 3 مولشەرىندە پىڭلاي جيڭلۋ بالىقشىلىق شەكتى سەرىكتەستىگىنىڭ قاراستىلىعىنداعى جۇڭگونىڭ شالعاي مۇحيت بالىقشىلىق كەمەسى ”لۋپىڭ يۋانيۇي 028“ ءۇندى مۇحيتىنىڭ ورتا بولىگىندەگى تەڭىز ايدىنىندا اۋدارىلىپ، كەمەدەگى 39 ادام حابارسىز كەتكەن، مۇنىڭ ىشىندە جۇڭگولىق كەمەشى 17 ادام، يندونەزيالىق 17 ادام، فيليپپيندىق 5 ادام. قازىرگە دەيىن حابارسىز كەتكەندەردىڭ دەرەگى بايقالمادى، ىزدەۋ جانە قۇتقارۋ قىزمەتى جۇرگىزىلىپ جاتىر.
شىرعالاڭ تۋىلعاننان كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ مىناداي ماڭىزدى نۇسقاۋ بەردى: اۋىل شارۋاشىلىعى، اۋىل - قىستاق مينيسترلىگى، قاتىناس - تاسىمال مينيسترلىگى جانە شاندۇڭ ولكەسى شۇعىل جاعدايعا توتەپ بەرۋ بويىنشا اتتانىسقا كەلۋ مەحانيزمىن دەرەۋ ىسكە قوسىپ، جاعدايدى انىقتاپ، قۇتقارۋ - كومەكتەسۋ كۇشتەرىن كوبەيتىپ جىبەرىپ، حالىقارالىق تەڭىزدەگى ىزدەۋ - قۇتقارۋعا كومەكتەسۋگە سايكەسىپ، ىزدەۋ - قۇتقارۋ قىزمەتىن كۇش سالا ورىستەتۋى كەرەك. سىرتقى ىستەر مينيسترلىگى مەن ەلىمىزدىڭ قاتىستى شەتەلدە تۇراتىن ەلشىلىكتەرى جەرگىلىكتى ورىنداعى قاتىستى جاقتارمەن بايلانىس جاساۋدى كۇشەيتىپ، ىزدەۋ - قۇتقارۋ قىزمەتىن سايكەسىپ ويداعىداي ىستەۋى كەرەك. شالعاي مۇحيتتا جۇمىس ىستەۋ حاۋىپسىزدىك كومەسكى كىناراتتارىن تۇگەل تەكسەرۋدى جانە حاۋىپ - قاتەردەن ساقتاندىرۋدى ونان ارى كۇشەيتىپ، حالىق بۇقاراسىنىڭ ءومىرى مەن مال - مۇلكىنىڭ حاۋىپسىزدىگىنە شىنايى كەپىلدىك ەتۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ بەكىتۋ جاساپ، مىنالاردى تالاپ ەتتى: اۋىل شارۋاشىلىعى، اۋىل - قىستاق مينيسترلىگى، قاتىناس - تاسىمال مينيسترلىگى قاتىستى جاقتارداعى كۇشتەردى تىعىز سايكەستىرىپ، قاتەرگە جولىققان كەمەشىلەردى بار كۇشپەن ىزدەپ قۇتقارىپ، ءولىم - ءجىتىم جاعدايىن ەڭ زور قۇلشىنىسپەن ازايتۋى كەرەك. تەڭىزدەگى بالىقشىلىق كەمەسى سياقتىلاردى حاۋىپسىزدىك بويىنشا باسقارۋدى ونان ارى كۇشەيتىپ، ساقتانۋ شارالارىن تياناقتاندىرىپ، تەڭىز تاسىمالىنا جانە ءوندىرىس حاۋىپسىزدىگىنە شىنايى كەپىلدىك ەتۋ كەرەك.
شي جينپيڭنىڭ نۇسقاۋى مەن لي چياڭنىڭ تالابى بويىنشا، اۋىل شارۋاشىلىعى، اۋىل - قىستاق مينيسترلىگى، قاتىناس - تاسىمال مينيسترلىگى جانە شاندۇڭ ولكەسى شۇعىل جاعدايعا توتەپ بەرۋ بويىنشا اتتانىسقا كەلۋ مەحانيزمىن ىسكە قوسىپ، ”لۋپىڭ يۋانيۇي 018“ كەمەسى، جۇڭيۋان تەڭىز تاسىمالى ”يۋانفۋحاي“ كەمەسى سياقتىلاردى كەمە حابارسىز كەتكەن تەڭىز ايدىنىنا جەتىپ ىزدەۋ - قۇتقارۋ قىزمەتىن ورىستەتۋگە كۇش سالا ۇيىمداستىردى، مۇنان سىرت، قاتىستى ىزدەۋ - قۇتقارۋ كۇشتەرى كەمە حابارسىز كەتكەن تەڭىز ايدىنىنا بارا جاتىر. جۇڭگو تەڭىزدە ىزدەۋ - قۇتقارۋ ورتالىعى ينفورماتسيانى قاتىستى ەلدەرگە حابارلادى، اۆستراليا سياقتى ەلدەردىڭ تەڭىزدە ىزدەۋ - قۇتقارۋ كۇشتەرى سول جەردە ىزدەۋ - قۇتقارۋ جۇرگىزدى. سىرتقى ىستەر مينيسترلىگى كونسۋلدىق قورعاۋ بويىنشا شۇعىل جاعدايعا توتەپ بەرۋ مەحانيزمىن ىسكە قوسىپ، اۆستراليا، شريلانكا، مالديۆ، يندونەزيا، فيليپپين سياقتى ەلدەردەگى ەلشىلىك - كونسۋلحانالاردى تۇرعان ەلدەرىندەگى قاتىستى جاقتاردى بەلسەنە ىزدەۋ - قۇتقارۋعا سايكەستىرۋگە جەدەل ورنالاستىردى.
