شينحۋا اگەنتتىگىنىڭ 5 - ايدىڭ 20 - كۇنى بەيجيڭنەن بەرگەن حابارى. 5 - ايدىڭ 20 - كۇنى مەملەكەت ءتوراعاسى شي جينپيڭ ياكوۆ ميلاتوۆيچقا تەلەگرامما جولداپ، ونىڭ مونتەنەگرونىڭ زۇڭتۇڭى بولعاندىعىن قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو مەن مونتەنەگرو باستان - اياق ءوزارا قۇرمەت ەتىپ، ءوزارا سەنىم ارتىپ، تەڭ تۇرعىدا مامىلە جاساپ كەلەدى، ەكى ەل حالقى بۇعان ءوزارا سۇيىنەدى جانە ءبىر - بىرىنە قۇرمەت ەتىپ كەلەدى. مەن جۇڭگو مەن مونتەنەگرو قارىم - قاتىناسىنىڭ دامۋىنا ايرىقشا ءمان بەرەمىن، ميلاتوۆيچ زۇڭتۇڭمەن بىرگە قۇلشىنىپ، ەكى ەلدىڭ مىعىم دوستىعىن جالعاستىرىپ جانە ونى اسقاقتاتىپ، ەل باسقارۋ تاجىريبەلەرى جونىندە اۋىس - كۇيىس جاساۋدى كۇشەيتىپ، ەكى جاقتى قارىم - قاتىناستى ۇزدىكسىز دامىتۋعا بىرگە جەتەكشىلىك ەتىپ، ەكى ەل حالقىن ءتىپتى دە ويداعىداي باقىتقا كەنەلتۋدى قالايمىن.
