5 - ايدىڭ 30 - كۇنى بەيجيڭ عارىشقا ۇشۋدى مەڭگەرۋ ورتالىعى سۋرەتكە تۇسىرگەن شىنجوۋ 15 - ءنومىرلى الەم كەمەسىنىڭ عارىشكەرلەر توبىنداعىلار مەن شىنجوۋ 16 - ءنومىرلى الەم كەمەسىنىڭ عارىشكەرلەر توبىنداعىلاردىڭ توپتىق سۋرەتى.
□ سۋرەتتى شينحۋا اگەنتتىگىنىڭ ءتىلشىسى لي جيە تۇسىرگەن
شينحۋا اگەنتتىگىنىڭ 5 - ايدىڭ 30 - كۇنى جيۋچۋاننان بەرگەن حابارى. 5 - ايدىڭ 30 - كۇنى ساعات 9دان 31 مينۋت وتكەندە، شىنجوۋ 16 - ءنومىرلى عارىشكەرلى الەم كەمەسى تيەلگەن ۇزاق جورىق 2 - ءنومىرلىF ياۋ 16 - ءنومىرلى تاسىمال راكەتاسى جيۋچۋان جاساندى سەرىك ۇشىرۋ ورتالىعىندا وتالدىرىلىپ، ۇشىرىلدى، شامامەن 10 مينۋتتان كەيىن شىنجوۋ 16 - ءنومىرلى عارىشكەرلى الەم كەمەسى راكەتادان ءساتتى اجىراپ، مەجەدەگى وربيتاعا ەندى، عارىشكەرلەر توبىنىڭ جاي - كۇيى جاقسى، ۇشىرۋ تولىق تابىستى بولدى.
جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ حابارىنا قاراعاندا، شىنجوۋ 16 - ءنومىرلى عارىشكەرلى الەم كەمەسى وربيتاعا ەنگەننەن كەيىن، 5 - ايدىڭ 30 - كۇنى ساعات 16دان 29 مينۋت وتكەندە، كەڭىستىك بەكەتىندەگى تيانحى وزەكتى بولمەسىنىڭ راديال اۋزىمەن ءساتتى تۇيىلىسكەن، جالپى ءتۇيىلىسۋ بارىسى شامامەن 5. 6 ساعاتتا ورىندالعان. 5 - ايدىڭ 30 - كۇنى ساعات 18دەن 22 مينۋت وتكەندە، اسىعا كۇتكەن شىنجوۋ 15 - ءنومىرلى عارىشكەرلى الەم كەمەسىنىڭ عارىشكەرلەر توبى ”ءۇي“ ەسىگىن ءساتتى اشىپ، الىستان كەلگەن شىنجوۋ 16 - ءنومىرلى عارىشكەرلى الەم كەمەسىنىڭ عارىشكەرلەر توبىن ”تيانگۇڭعا“ قارسى الىپ كىرگىزدى. سونان سوڭ ەكى عارىشكەرلەر توبى توپتىق سۋرەتكە ءتۇسىپ، وزدەرىنەن قام جەپ وتىرعان بۇكىل ەل حالقىنا اماندىقتارىن ءبىلدىردى.
جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ تانىستىرۋىنشا، الدا ەكى عارىشكەرلەر توبى كەڭىستىك بەكەتىندە وربيتادا كەزەك اۋىستىرادى ەكەن. وسى كەزدە 6 عارىشكەر كەڭىستىك بەكەتىندە 5 كۇندەي بىرگە قىزمەت ىستەپ، تۇرمىس كەشىرىپ، بەلگىلەنگەن قىزمەتتەردى ورىندايدى. كەڭىستىك بەكەتىندە قىزمەت ىستەپ، تۇرمىس كەشىرگەن كەزدە شىنجوۋ 16 - ءنومىرلى عارىشكەرلى الەم كەمەسىنىڭ عارىشكەرلەر توبى بولمەدەن شىعىپ قيمىل جۇرگىزىپ، كەڭىستىكتىك عىلمي تاجىريبە (سىناق) جاساپ، بولمە ءىشى - سىرتىنداعى جابدىقتاردى ورناتۋ، سىناقتان وتكىزۋ، كۇتىمدەۋ - جوندەۋ سياقتى مىندەتتەردى ورىندايدى.
بۇل رەتكى مىندەت − ەلىمىزدىڭ عارىشقا ادام الىپ ۇشۋ ينجەنەرياسى كەڭىستىك بەكەتىن پايدالانۋ جانە دامىتۋ ساتىسىنا قادام تاستاعانداعى تۇڭعىش رەتكى ادام الىپ ۇشۋ مىندەتى، ينجەنەريا جوسپارعا الىنعاننان بەرى اتقارىلعان 29 - رەتكى ۇشۋ مىندەتى، سونداي - اق ۇزاق جورىق جەلىلەس تاسىمال راكەتاسىنىڭ 475 - رەتكى ۇشۋى.
