انار بۇلت \ شينجياڭ گازەتىنىڭ ءتىلشىسى جاڭ تيڭ، ەرىكتى ءتىلشى دۇڭ شىجۇي
6 - ايدىڭ 6 - كۇنى ءتىلشىنىڭ جۇڭگو وڭتۇستىك اۆياتسياسى شينجياڭ بولىمشە سەرىكتەستىگى (تومەندە قىسقارتىلىپ وڭتۇستىك اۆياتسيا دەلىنەدى) التاي تيجارات باسقارماسىنان ۇعىسۋىنشا، 6 - ايدىڭ 16 - كۇنى گۋاڭجوۋ − التاي اراسىندا تىكە قاتىنايتىن اۋە جەلىسى قالپىنا كەلتىرىلەدى ەكەن، ءار اپتانىڭ جۇما كۇنى ءبىر رەت بارىپ - قايتاتىن ۇشۋ مىندەتىن اتقارادى. اۋە جەلىسىنىڭ قالپىنا كەلتىرىلۋى التايدان ۇلكەن قالالارعا تىكە قاتىنايتىن اۆياتسيا تاسىمال تورىن اناعۇرلىم كەڭەيتىپ، ەكى اراعا قاتىنايتىن جولاۋشىلاردىڭ ءجۇرىس - تۇرىس قاجەتىن قاناعاتتاندىرادى.
التاي قار قالاسى اۋەجايىنىڭ قىزمەتكەرلەرى قاتىناۋدى قالپىنا كەلتىرۋدىڭ دايىندىق قىزمەتىن كۇش سالا ىستەۋدە. سۋرەتتى ۋي لاي تۇسىرگەن
ۇعىسۋعا قاراعاندا، وسى اۋە جەلىسىن وڭتۇستىك اۆياتسياسى ىسكە قوسىپ وتىر، اتقارۋشى ۇشاقتىڭ تۇرپاتى بوين 738 نەمەسە بوين 737. CZ3949 كەزەكشى ۇشاعى جوسپار بويىنشا بەيجيڭ ۋاقىتى 06:50دە گۋاڭجوۋ باييۇن حالىقارالىق اۋەجايىنان كوتەرىلىپ، جەرگىلىكتى ۋاقىت 13:00دە التاي قار قالاسى اۋەجايىنا جەتەدى؛ CZ3950 كەزەكشى ۇشاعى جوسپار بويىنشا بەيجيڭ ۋاقىتى 13:50دە التاي قار قالاسى اۋەجايىنان ۇشىپ، جەرگىلىكتى ۋاقىت 19:20دا گۋاڭجوۋ باييۇن حالىقارالىق اۋەجايىنا قونادى، تۇتاس بارىستا تىكە ۇشادى، ۇشۋ ۋاقىتى 5 ساعات 30 مينۋت.
التاي شينجياڭنىڭ سولتۇستىك شينجياڭىنداعى ماڭىزدى قالا رەتىندە رەسەي، قازاقستان، موڭعۇليا سياقتى 3 ەلمەن شەكارالاسادى، جىبەك جولى ەكونوميكالىق بەلدەۋىنىڭ سولتۇستىك ارناسى جانە شينجياڭنىڭ جۇڭگو − موڭعۇليا − رەسەي ەكونوميكالىق ءدالىزى قۇرىلىسىنا ات سالىسۋىنداعى ماڭىزدى تۇيىندەگى قالا.
جاقىنعى جىلداردان بەرى، گۋاڭدۇڭ ولكەسى شينجياڭ ساياحات نىساندارىنىڭ ماڭىزدى قاريدارلار قاينارى ورنىنا اينالدى، گۋاڭدۇڭدىق ساياحاتشىلاردىڭ سانى جىلدان - جىلعا ارتىپ كەلەدى، وسى رەت گۋاڭجوۋدان التايعا تىكە قاتىنايتىن كەزەكشى ۇشاق 6 - ايدىڭ ورتا شەنىندە قاتىناۋدى قالپىنا كەلتىرەدى، اۆياتسيا سەرىكتەستىگى جازدىق دەمالىس كەزىندەگى ساياحاتقا شىعۋدىڭ قاۋىرت كەزىن كوزدەپ وتىر، قاتىناۋ قالپىنا كەلتىرىلگەن سوڭ التاي ايماعىنىڭ جازعى ساياحات كاسىبىنىڭ دامۋىن توقتاۋسىز ىلگەرىلەتىپ، جولاۋشىلاردىڭ ءجۇرىس - تۇرىس قاجەتىن اناعۇرلىم قاناعاتتاندىرىپ، گۋاڭجوۋدان التايعا دەيىنگى تەز، ەبدەيلى كەڭىستىكتەگى كوپىردى ورناتاتىن بولادى.
الداعى ۋاقىتتا التاي تاعى بەيجيڭ سياقتى جەرلەرگە تىكە قاتىنايتىن اۋە جەلىسىن اشاتىن بولادى.
