جاڭ چۇنلين كەزدەسۋگە قاتىناستى
انار بۇلت \ شينجياڭ گازەتىنىڭ ءتىلشىسى ۋاڭ شيڭرۇي 6 - ايدىڭ 12 - كۇنى قاشقاردان حابارلايدى. اۆتونوميالى رايوندىق پارتكومنىڭ شۋجيى ما شيڭرۇي، اۆتونوميالى رايوننىڭ ءتوراعاسى ەركىن تۇنياز 6 - ايدىڭ 12 - كۇنى قاشقاردا شاڭحاي سەلبەستىك ۇيىمىنىڭ باس حاتشىسى جاڭ ميڭمەن جانە ونىڭ ساپارلاستارىمەن كەزدەستى.
اۆتونوميالى رايوندىق پارتكومنىڭ ورىنباسار شۋجيى جاڭ چۇنلين كەزدەسۋگە قاتىناستى.
ما شيڭرۇي اۆتونوميالى رايوندىق پارتكوم مەن ۇكىمەت اتىنان جاڭ ميڭدى جانە ونىڭ ساپارلاستارىن قارسى الاتىندىعىن ءبىلدىردى. ول بىلاي دەدى: ءتوراعا شي جينپيڭ سامارحاندا وتكىزىلگەن شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 22 - رەتكى ماجىلىسىنە قاتىناسقان كەزدە، قاتىستى مەملەكەتتەردىڭ باسشىلارىمەن ءبىر قىدىرۋ ەكى جاقتى، كوپ جاقتى كەزدەسۋ، ديدارلاسۋ وتكىزىپ، جۇڭگونىڭ قاتىستى ەلدەرمەن قارىم - قاتىناسىنىڭ تىڭ ساتىعا كوتەرىلۋىنە جەتەكشىلىك ەتتى. تاياۋدا وتكىزىلگەن جۇڭگو − ورتا ازيا باسشىلار ماجىلىسىندە ءتوراعا شي جينپيڭ ورتا ازياداعى 5 ەلدىڭ مەملەكەت باسشىلارىمەن بىرگە جۇڭگو مەن ورتا ازيا ەلدەرى قارىم - قاتىناسىنىڭ دامۋى جونىندە جاڭا جوبا كەسكىندەدى. شينجياڭنىڭ شاڭحاي سەلبەستىك ۇيىمىنداعى قاتىستى ەلدەرمەن، اسىرەسە، ورتا ازيا ەلدەرىمەن سەلبەسۋ تىلەگى كۇشتى، نەگىزى جاقسى، بولاشاعى نۇرلى. ءبىز باس شۋجي شي جينپيڭنىڭ، پارتيا ورتالىق كوميتەتىنىڭ شەشىمدەرىن، ورنالاستىرۋلارىن ىشكەرىلەي دايەكتىلەندىرىپ، جىبەك جولى ەكونوميكالىق بەلدەۋى وزەكتى رايونى قۇرىلىسىن جەدەلدەتىپ، ”ءبىر بەلدەۋ، ءبىر جول“ بويىنداعى ەلدەرمەن، اسىرەسە، ورتا ازياداعى بەس ەلمەن اۋىس - كۇيىستى، سەلبەستىكتى ۇزدىكسىز تەرەڭدەتىپ، ازيا − ەۆروپا التىن ارناسىن جانە باتىسقا ەسىك اشۋدىڭ الدىڭعى شەبىن قۇلشىنا قالىپتاستىرامىز. شاڭحاي سەلبەستىك ۇيىمى حاتشىلار باسقارماسىنىڭ شينجياڭنىڭ دامۋىنا ۇزدىكسىز قولداۋ كورسەتىپ، شينجياڭنىڭ قاتىستى ەلدەردەگى جەرگىلىكتى ورىندارمەن سەلبەستىكتى تەرەڭدەتۋدە، تەڭ يگىلىككە كەنەلىپ دامۋدا ءتىپتى دە ارشىندى قادام تاستاۋىنا دەم بەرۋىن ءۇمىت ەتەمىن. شينجياڭ ءتوراعا شي جينپيڭنىڭ قاتىستى مەملەكەت باسشىلارىمەن كەلىسكەن ماڭىزدى ورتاق تانىمىن بەلسەنە تياناقتاندىرىپ، شاڭحاي سەلبەستىك ۇيىمى تۇعىرىنان تولىق ويداعىداي پايدالانىپ، ”ءبىر بەلدەۋ، ءبىر جولدى“ بىرگە قۇرۋمەن تەرەڭ توعىسىپ، قاتىستى ەلدەردەگى جەرگىلىكتى ورىندارمەن بولعان سەلبەستىكتە اناعۇرلىم كوپ ناقتى جەتىستىككە قول جەتكىزۋدى ىلگەرىلەتىپ، ەكونوميكانىڭ، قوعامنىڭ جوعارى ساپالى دامۋىن جەدەلدەتىپ، جاڭا دامۋ ارناسىنا اناعۇرلىم ويداعىداي قىزمەت وتەيدى جانە توعىسادى.
جاڭ ميڭ مىنالاردى ءبىلدىردى: شاڭحاي سەلبەستىك ۇيىمىنا مۇشە ەلدەر جانە قاتىستى ەلدەر جۇڭگومەن قارىم - قاتىناستى دامىتۋعا، جۇڭگومەن ەكونوميكا - ساۋدا سياقتى سالالارداعى سەلبەستىكتى تەرەڭدەتۋگە ايرىقشا ءمان بەرەدى. شينجياڭ − جۇڭگونىڭ باتىسقا ەسىك اشۋداعى الدىڭعى شەبى، جىبەك جولى ەكونوميكالىق بەلدەۋى وزەكتى رايونى رەتىندە، وڭىرلىك ورىن باسىمدىعى ەرەكشە كورنەكتى، ەسىك اشۋ، دامۋ بولاشاعى جارقىن. قازىر شينجياڭنىڭ رەفورما، دامۋ، ورنىقتىلىق ىستەرى جەدەل ىلگەرىلەۋدە، اسىرەسە، سىرتقا ەسىك اشۋ جاعدايى كوڭىلدەگىدەي بولىپ، بولاشاعىنان زور ءۇمىت كۇتۋگە بولادى. شاڭحاي سەلبەستىك ۇيىمىنىڭ حاتشىلار باسقارماسى رولىن بەلسەنە ساۋلەلەندىرىپ، شينجياڭنىڭ شاڭحاي سەلبەستىك ۇيىمى جۇلگەسىندە ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ارقاۋ ەتىپ، باسىمدىقتاردىڭ كومەسكى كۇشىن ونان ارى اشىپ، قاتىستى ەلدەرمەن سىرتقى ساۋدا، اۋىل شارۋاشىلىعى، ساياحات سياقتى سالالارداعى سەلبەستىك دەڭگەيىن ۇزدىكسىز جوعارىلاتىپ، جوعارى دەڭگەيدە سىرتقا ەسىك اشۋدا تىڭ ناتيجەلەرگە قول جەتكىزۋدى ىلگەرىلەتىپ، سەلبەسە دامۋدى، ءوزارا پايدا جەتكىزىپ، تەڭ يگىلىككە كەنەلۋدى ۇزدىكسىز جۇزەگە اسىرۋىنا دەم بەرەدى.
چىن ۋيجۇن، سۇن حۇڭمەي، شاڭحاي سەلبەستىك ۇيىمى حاتشىلار باسقارماسىنداعى قاتىستى قىزمەتكەرلەر قاتارلىلار كەزدەسۋگە قاتىناستى.
