5 - ايدان 7 - ايعا دەيىن بيڭتۋان 2 - شى 34 - تۋانى بيىلعى العاشقى بۇعىنىڭ جاس مۇيىزىنەن مول ءونىم الدى. سۋرەتتى شى رۇيشيا تۇسىرگەن
جازعى توقىراۋدان بەرى تارىم ويپاتىنا جايعاسقان تاحى بۇعىلارى جاس ءمۇيىز الۋدىڭ قاۋىرت شاعىنا تۋرا كەلگەن ەدى. جۋىردا ءتىلشى شينجياڭ ءوندىرىس - قۇرىلىس بيڭتۋانى 2 - شى 34 - تۋانى تيەمىنگۋان قالاسى شيڭشۇنيۋان مال شارۋاشىلىق باعىمشىلىعى شارۋالار كاسىپتىك سەلبەستىك كووپەراتيۆىنە بارعاندا، جۇڭگو اۋىل شارۋاشىلىق اكادەمياسى ەرەكشە ءونىم زەرتتەۋ ورنىنىڭ دوكتورى ياڭ سۋكۇننىڭ كاسىپتەستەرىمەن بىرگە بۇعىنىڭ جاس ءمۇيىزىن ولشەپ، تارازىعا سالىپ، تىزىمگە الىپ جاتقانىن كورەدى.
وسى كووپەراتيۆتىڭ جاۋاپتىسى شۇي گۋاڭ مەن كووپەراتيۆ مۇشەلەرى بۇعىعا ناركوز سالىپ، تەكسەرىپ، ءمۇيىزىن ارالاپ، پەشەتتەپ قامباعا كىرگىزىپ دەگەندەي قاربالاستىقتان مۇرىندارىنا سۋ جەتپەي جاتىر ەكەن.
جەرگىلىكتى ورىن تۇتاس گەن گرۋپپاسىن بايلانىستىرا سارالاۋ جانە گەن گرۋپپاسىن تاڭداۋ ءادىسى ارقىلى جوعارى ءتۇسىمدى تاحى بۇعىسىن جەتىلدىرۋدى كوزدەپ وتىر ەكەن. سۋرەتتى شى رۇيشيا تۇسىرگەن
6 - ايدان بەرى، ياڭ سۋكۇن مەن كاسىپتەستەرى 34 - تۋاننىڭ ءارقايسى بۇعى باعىمشىلىعى الاڭىن ارالاپ، جاس ءمۇيىز جيناۋدىڭ ءارقايسى بۋىنىنا قاتىناسىپ، جوعارى ءتۇسىمدى بۇعى سورتىن جەتىلدىرۋ نىسانىنىڭ عىلمي زەرتتەۋ قىزمەتىن جۇرگىزدى. وسى نىسان 34 - تۋاننىڭ ”دارىندىلاردى، اقىل - پاراساتتى ەنگىزۋ“ بويىنشا مال شارۋاشىلىعىن دامىتۋ شارالارىنىڭ ءبىرى بولىپ، بۇعىنى ساپالى ءوسىرۋدى ءتىپتى دە كوپ عىلمي دايەكپەن قامدايدى.
ياڭ سۋكۇن تانىستىرىپ بىلاي دەدى: ”وسى رەتكى ماقساتىمىز − تاحى بۇعىسى جاس ءمۇيىزىنىڭ سالماعى مەن سالاسىنىڭ ۇزىندىعى ساندى مالىمەتىن، سونداي - اق دەنە سالماعى، تۇرقىنىڭ ۇزىندىعىن جيناۋ، ءارى قانىنان DNA ىن الۋ، سول نەگىزدە تۇتاس گەن گرۋپپاسىن بايلانىستىرا سارالاۋ جانە گەن گرۋپپاسىن تاڭداۋ ءادىسى ارقىلى جوعارى ءتۇسىمدى تاحى بۇعىسىن جەتىلدىرۋ“.
تيەمىنگۋان قالاسى شيڭشۇنيۋان مال شارۋاشىلىعى باعىمشىلىق شارۋالار كاسىپتىك سەلبەستىك كووپەراتيۆىنىڭ مۇشەلەرى بۇعىنىڭ جاس ءمۇيىزىن تىزىمدەۋدە. سۋرەتتى ۋاڭ جيڭ تۇسىرگەن
”العاشقى توپتا الىنعان بۇعىنىڭ جاس ءمۇيىزىنىڭ ورتاشا سالماعى 8 كيلوگرام، ءار باسىنان 6000 يۋان كىرىس كىرەدى دەپ مەجەلەپ وتىرمىز“. شۇي گۋاڭ تىلشىگە بىلاي دەدى: ”بۇعىنىڭ جاس ءمۇيىزىن جىنتىكتەي مانەرلەۋ تولىمدىلىعىن ءوتىنىش ەتىپ جاتىرمىز، بۇعىنىڭ جاس ءمۇيىزى ءونىمىن تۇتاس ەلىمىزگە تانىستىرساق دەيمىز، قازىر جيناۋدىڭ قاۋىرت كەزەڭى، كۇنىنە 300 - 500 كيلوگرام شاماسىندا جيناپ وتىرمىز“.
