جاز باسىندا، ىلە قازاق اۆتونوميالى وبلىسى تەكەس اۋدانىنىڭ ءارقايسى كورىنىس وڭىرلەرىندە الۋان گۇلدەر شەشەك اتىپ، ”گۇل تاماشالاۋ ساياحاتى“ ىركەس - تىركەس جولعا قويىلدى، گۇلدى دانەكەر ەتكەن ”گۇل ەكونوميكاسى“، گۇل ارقىلى ساياحاتتى جانداندىرعان ”گۇل كاسىپ كۇيى“ بۇكىل ءوڭىر ساياحاتىنداعى، اۋىل - قىستاقتى گۇلدەندىرۋدەگى جاڭا تۇيىنگە اينالدى.
6 - ايدىڭ 2 - كۇنى تەكەس اۋدانى قاراجون كورىنىس وڭىرىندەگى گۇل تەكشەدە، تاۋ - تاستى جاپقان جارىقگۇل كەڭ جايلاۋ ءتوسىن ايشىقتاپ، اسەم رەڭىمەن كوپتەگەن ساياحاتشى، فوتوسۋرەت اۋەسكەرلەرىن وسى اراعا كەلىپ سۋرەتكە تۇسىرۋگە، ات باسىن بۇرۋعا باۋرادى.
تاۋ - تاستى جاپقان جارىقگۇل جايلاۋ كوركىن اسىردى.
ۇرىمجىلىك ساياحاتشى لەي يۋە بىلاي دەدى: ”ءبىز گۇل تەكشەگە بۇگىن كەلدىك، بار الاپ ۇساق سارى گۇلدەرمەن كومكەرىلگەن ەكەن، وتە كوركەم، قارلى تاۋ، اق بۇلتتاردىڭ ءبارى جايلاۋ كوركىمەن جاراسىم تاپقان، وسىلاردى ءوز كوزىڭىزبەن كورگەندە تاڭداي قاقپاي تۇرا المايدى ەكەنسىز. بىرنەشە جىلدان سوڭ ءسوزسىز بالامدى الىپ كەلىپ، ۇلى تابيعاتتىڭ بىزگە سيلاعان اسەم كورىنىسىنەن ءلاززات الاتىن بولامىز“.
ساياحاتشىلار ۇساق سارى گۇلمەن كومكەرىلگەن جايلاۋدا كىشكەنتاي لاقتى قۇشاعىنا الىپ سۋرەتكە ءتۇستى.
جايقالا اشىلعان اسەم گۇلدەر ساياحاتشىلاردى وزىنە باۋراپ قانا قالماستان، جەرگىلىكتى ورىننىڭ بۇقاراسىن ”ساياحات اسىنان“ ءدام تاتقىزدى. جەرگىلىكتى ورىنداعى ءىشىنارا مالشىلار تۋىلعانىنا ۇزاق بولماعان لاقتارىن ساياحاتشىلاردىڭ سۋرەتكە ءتۇسىپ ەستەلىككە قالدىرۋى ءۇشىن جەتەكتەپ اكەلدى. ونەر اۋباكىر قاراجون قىستاعىنىڭ مالشىسى، ءار جىلى قاراجون كورىنىس وڭىرىندە گۇلدەر شەشەك اتقان مەزگىلدە، ول ءوز ءۇيىنىڭ لاقتارىن ساياحات وڭىرىنە جەتەكتەپ اكەلىپ، ساياحاتشىلاردىڭ سۋرەتكە تۇسۋىنە قىزمەت وتەيدى، بۇل دا وعان ءتاۋىر كىرىس كىرگىزدى.
گۋاڭدۇڭدىق ساياحاتشى جين زىشۋان بىلاي دەدى: ”بۇل رەت مەن شينجياڭعا ۇيىرمەمەن بىرگە كەلدىم، قاراجون كورىنىس ءوڭىرى ايىرىقشا كوركەم ەكەن، جاڭا تۋىلعان لاقتار دا وتە سۇيكىمدى، كورىنستەر ەرەكشە اسەم ەكەن، كەيىن تاعى كەلەتىن بولامىن“.
قاراجون جايلاۋى
تەكەس اۋدانى قارادالا قالاشىعى قاراجون قىستاعىنىڭ مالشىسى ونەر اۋباكىر بىلاي دەدى: ”ءبىز 5 - ايدىڭ 11 - كۇنىنەن باستاپ قوزى - لاقتاردى ساياحاتشىلاردىڭ سۋرەتكە ءتۇسىپ ەستەلىك قالدىرۋىنا اكەلدىك، ءبىر كۇندە 200-300 يۋان اينالاسىندا، ءبىر ايدا 6000-9000 اينالاسىندا كىرىس كىرگىزەمىز، ءبىزدىڭ 5 - ايدان 9 - ايعا دەيىنگى كىرىسىمىز وتە جاقسى بولادى“.
جۋىق جىلداردان بەرى، تەكەس اۋدانى ساياحات دەمالىسىنىڭ جاڭا ماركاسىن ۇزدىكسىز تۇلعالاپ، كورىنىس ءوڭىرىنىڭ جاڭا كاسىپ كۇيىن كۇش سالا جەتىلدىرىپ، بايلىقتى تياناق ەتىپ، بازار قاجەتىن قاناعاتتاندىراتىن ساياحات جاڭا ونىمدەرىن جاراتتى، كورىنىس ءوڭىرىن سەزىنۋىن كۇشەيتىپ، ساياحاتشىلاردىڭ رازىلىق دارەجەسىن ۇزدىكسىز جوعارىلاتتى. (تەكەس اۋداندىق توعىسپالى مەديا ورتالىعىنىڭ ءتىلشىسى جاڭ جىڭبين، دي ماۋ)
