جۇڭگو عىلىم اكادەمياسى شينجياڭ فيزيكا - حيميا تەحنيكاسىن زەرتتەۋ ورنى:
ورتا ازيا ەلدەرىمەن ءبىلىم مەنشىك ۇقىعى سەلبەستىگىن تەرەڭدەتەمىز
انار بۇلت \ شينجياڭ گازەتىنىڭ ءتىلشىسى جىڭ جو 7 - ايدىڭ 22 - كۇنى ۇرىمجىدەن حابارلايدى. سوڭعى جىلدارى جۇڭگو عىلىم اكادەمياسى شينجياڭ فيزيكا - حيميا تەحنيكاسىن زەرتتەۋ ورنى وزبەكستاندى سەلبەستىك ورتالىعى ەتە وتىرىپ باسقا ەلدەرگە ىقپال جاساپ، عىلىم - تەحنيكا اۋىس - كۇيىسىن، سەلبەستىگىن ۇزدىكسىز ورىستەتتى. قازىرگە دەيىن جۇڭگو عىلىم اكادەمياسى شينجياڭ فيزيكا - حيميا تەحنيكاسىن زەرتتەۋ ورنى ىلگەرىندى - كەيىندى 12 ەلمەن، 20 نەشە شەكارا سىرتىنداعى عىلمي زەرتتەۋ قۇرىلىمىمەن، جوعارى مەكتەپپەن 36 سەلبەستىك ەسكەرتپە حاتىنا قول قويىسىپ، 10 حالىقارالىق پاتەنت بەرىپ، كوپتەگەن حالىقارالىق عىلىم - تەحنيكا سەلبەستىك ماڭىزدى تۇعىرىن قۇرۋدى ىلگەرىلەتىپ، ءبىرسىپىرا سۇبەلى سەلبەستىك جەتىستىكتەرىنە قول جەتكىزدى.
تانىستىرۋعا قاراعاندا، جۇڭگو عىلىم اكادەمياسى شينجياڭ فيزيكا - حيميا تەحنيكاسىن زەرتتەۋ ورنى ”ءبىر بەلدەۋ، ءبىر جول“ بويىنداعى ەلدەرمەن ءدارى - دارمەك سالاسىندا جاڭالىق اشۋ سىندى ءونىمدى حالىقارالىق عىلىم - تەحنيكا سەلبەستىگىن ورىستەتىپ، قازىر ايەلدەر اۋرۋىنىڭ جاڭا ءدارىسى انار قابىعى كوپ فەنولدى ۇيىعان كوللويدتىڭ، ەرلەر اۋرۋىنىڭ جاڭا ءدارىسى ايلا تابلەتكاسى، كوز اۋرۋىنىڭ جاڭا ءدارىسى شابيا تابلەتكاسىنىڭ وزبەكستانداعى تابىستارىن كادەگە جاراتىپ، كۇردەلى جۇڭي شيپاگەرلىك دارىلەرىنىڭ كوپ ءتۇرلى ءدارى ءپىشىنىن ورتا ازيا ەلدەرىندە زەرتتەپ جاساۋدىڭ جانە تىزىمگە الۋدىڭ تەحنيكالىق ۇلگىسىن قالىپتاستىردى. سونىمەن بىرگە، C تيپتى باۋىر قابىنۋى باكتەرياسىنا قارسى ءدارى ماتەريالى SOVONTA وزبەكستاندا ءوندىرۋ بەكىتپە حۇجاتىنا يە بولىپ، ورتا ازيا ەلدەرىندەگى 2 ميلليونعا جۋىق C تيپتى باۋىر قابىنۋى اۋرۋىنا شالدىققاندارعا قۋانىشتى حابار جەتكىزدى.
2022 - جىلى جۇڭگو عىلىم اكادەمياسى شينجياڭ فيزيكا - حيميا تەحنيكاسىن زەرتتەۋ ورنى ”عىلىم - تەحنيكادا جاڭالىق اشاتىن جۇڭگو“ جاڭالىق اشۋ بازاسى جانە ءۇرىمجى بيولوگيالىق ءدارى - دارمەك كاسىبى ءبىلىم مەنشىك ۇقىعى جۇمىس جۇرگىزۋ ورتالىعى بولىپ بەكىتىلدى، جۇڭگو عىلىم اكادەمياسى شينجياڭ فيزيكا - حيميا تەحنيكاسىن زەرتتەۋ ورنىنىڭ باستىعى پان شىليە بىلاي دەدى: جۇڭگو عىلىم اكادەمياسى شينجياڭ فيزيكا - حيميا تەحنيكاسىن زەرتتەۋ ورنى وسىنى وراي ەتىپ، جاڭالىق اشۋ، زەرتتەۋ سەرپىنىن اناعۇرلىم ارتتىرىپ، عىلىم - تەحنيكا جەتىستىكتەرىن كادەگە جاراتۋ سالىستىرماسىن جوعارىلاتىپ، جاڭالىق اشۋ ارقىلى دەم بەرۋدىڭ كاسىپ سالاسى تىزبەگىن ساباقتاستىرىپ دامىتۋدى جەبەپ، ءدارى - دارمەك كاسىبىنىڭ دامۋىن تەجەيتىن ءبىر توپ شەشۋشى تەحنيكالاردا سەرپىلىس جاساپ، ءبىر توپ جاڭا ءدارى كەلەلى جەتىستىكتەرىنىڭ ورتا ازيا ەلدەرىندە تياناقتانىپ كادەگە جاراۋىن جۇزەگە اسىرادى.
