«قىزىل - جاسىل جاقۇت» ويلاعانىمىزدان دا كوركەم ەكەن

□ انار بۇلت \ شينجياڭ گازەتىنىڭ ءتىلشىسى جاڭ حايفىڭ

　　يۇنناننىڭ قويۋ عۇرىپ - ادەتى، ادام ءومىرىنىڭ بۇرالاڭ جولعا تولى بەينەتى مەن زەينەتى. 7 - ايدىڭ 22 - كۇنى كەشتە جۇڭگو كومىر كەن ويىن - ساۋىق ۇيىرمەسىنىڭ ءتول تۋىندى ءبي تەاترى «قىزىل - جاسىل جاقۇت» شينجياڭ كوركەمونەر تەاترحاناسىنىڭ مۇقام كوركەمونەر ۇيىرمەسى تەاترحاناسىندا كورەرمەندەرمەن جۇزدەستى.

　　بۇل تەاتر حالىق اراسىندا كەڭىنەن تارالعان حيكىمەتتى جاسىل جاقۇت اڭگىمەسىن دانەكەر ەتىپ، ەر باس كەيىپكەر دۋان في مەن ايەل باس كەيىپكەر سۇن شياۋيۇيدىڭ ماحاببات كەشىرمەلەرىن، ولاردىڭ قاس تاسى ويماسىنا قىزعىندىلىعىن اڭگىمەلەپ، قاراپايىم ادام ءومىرىنىڭ ماشاقاتى مەن ءلاززاتىن القاعان.

　　«قىزىل - جاسىل جاقۇتتا» ەر باس كەيىپكەر دۋان في اۋلەتتەرى تاۋەكەل تاس ساۋداسى سالدارىنان تۇرالاعانى، اكە - شەشەسى عاشىعىنا قوسىلۋىنا قارسى شىققان تاقسىرەتتى باستان كەشىرگەننەن كەيىن، ونىڭ يۇننان ”جاقۇت قالاسىنان“ بيرمانىڭ ”جاقۇت تاۋىنا“ كەلىپ، جول بويى ءتۇرلى ازعىرۋلارعا توتەپ بەرىپ، جاپا - ماشاقاتتىڭ سىناعىنا ءتوزىپ، ماحابباتىنا ءباز - باياعىداي تاباندى بولعانى ايتىلادى. قاس تاسى ويماسى شەبەرى بولعان ەر - ايەل باس كەيىپكەر قاجىرلىلىقپەن قاجىماي - تالماي قۇلشىنىپ، اقىرى قاراپايىم جاقۇت تاسىنان ادەمى ”جاقۇت قۇسىن“ ويىپ شىعادى ءارى ادام ءومىرى باقىتىنىڭ ناعىز ءمانىن تابادى. تۇتاس وپەرا اياقتاعاندا قاراپايىم تاستان كوزدىڭ جاۋىن الار گۇلدەر اشىلادى.

　　وسى تەاتردىڭ باس سەناريسى جانە رەجيسسەرى نيان يۇنحۋا بىلاي دەدى: «قىزىل - جاسىل جاقۇتتا» تاس ادامعا بالامالانعان. قاراپايىم ءسىز بەن ءبىز قاراپايىم جاقۇت تاستارعا ۇقسايمىز، زەيىن قويا وڭدەپ، ىجداعاتتىلىقپەن ويعاندا عانا تاس گۇل اشىپ، كوركى كوز تارتاتىن بولادى.

　　جۇڭگو كومىر كەن ويىن - ساۋىق ۇيىرمەسى بار زەيىنىمەن دايىنداعان سارا ءبي تەاترى رەتىندە، «قىزىل - جاسىل جاقۇتتىڭ» جاسالۋ، دايىندالۋىنا 2 جىل ۋاقىت جۇمسالدى، بيىل 5 - ايدا بەيجيڭدە تۇڭعىش رەت قويىلىپ، كوپ وتپەي 14 - كەزەكتى مەملەكەتتىك ءبي كورمەلىك قويىلىمىنا قاتىناستى. يۇنناندى ارتقى كورىنىس ەتكەن وسى كولەمدى ءبي تەاترىندا يۇنناننىڭ سان الۋان ۇلتتىق عۇرىپ - ادەتى بەينەلەنىپ عانا قويماي، جۇڭحۋا مادەنيەتىنىڭ مايەكتى نەگىزى دە تولىق ايگىلەنگەن.

　　تاڭداۋلى ءبي جوباسى وسى تەاترداعى جارقىن تۇيىندەردىڭ ءبىرى. تەاتردا تارتىمدى ”بىلەزىك ءبيى“، رومانتيكالى دا مەيىرگە تولى ”گۇل ەگىپ، قوناقتاردى باۋراۋ ءبيى“ جانە قىزىقتى، ويناقى ”قاشىر ءبيى“ قاتارلى وزىندىك دارالىققا يە بيلەر كورەرمەندەرگە سونى لەپ اڭعارتىپ، تەاترحانانىڭ ءىشىن ءالسىن - ءالى قىزۋ قول شاپالاق ءۇنى كەرنەدى.

　　مەملەكەتتىك كوركەمونەر قورىنىڭ 2022 - جىلعى كولەمدى ساحنالىق ءنومىر جانە تۋىندى جاسامپازدىعىنا قارجىلاي كومەكتەسۋ نىسانى رەتىندە، «قىزىل - جاسىل جاقۇت» ەل ىشىندەگى ءبىر توپ تاڭداۋلى ءبي كوركەمونەر جاساۋشىلارىن جينادى. ءبىرىنشى دارەجەلى ارتيست جوۋ حان ەر باس كەيىپكەر دۋان فيدىڭ رولىن سومداۋمەن بىرگە، تاعى وسى تەاتردىڭ اتقارۋشى رەجيسسەرىنىڭ ءبىرى بولدى. ول بۇرىن تالاي رەت ”ۋىنحۋا سيلىعى“، ”تاۋلي ساۋىتى“ سياقتى ۇلكەن سيلىقتارعا داڭقپەن يە بولعان. ءبىرىنشى دارەجەلى ارتيست سۇڭ جيە جان دۇنيەسىن شەبەرلىكپەن بەينەلەۋ ارقىلى ايەل باس كەيىپكەر سۇن شياۋيۇيگە شىنايى كوركەمونەرلىك ءومىر باعىشتادى.

　　تۇتاس تەاتردا وسى زامانعى كوركەمونەر ءتىلى كىرىستىرىلىپ، توتەنشە ادەمى جۇڭحۋا باۋراعىشتىعى جاراتىلعان. مۇندا ىقشام دا تىنىستى ءبي كوركەمدىگى، قاراپايىم دا ۇنامدى ءارى تارتىمدىلىعىن جوعالتپاعان كيىم - كەشەكتەر وسى ساحنالىق قويىلىمعا ءار بەردى. وعان ەل ىشىندەگى بەرىلۋ ۇلگىسىندەگى وزىق دىبىس ۇلعايتقىش جۇيەسى قوسىلعاندا، كورەرمەندەرگە كوركەمونەردىڭ تاماشالاۋ، تىڭداۋ قوس بىردەي ءلاززاتىن سيلادى.

　　كورەرمەن يۇي شياۋحۇڭ بىلاي دەدى: «قىزىل - جاسىل جاقۇت» ويلاعانىمىزدان دا كوركەم ەكەن. ءارى كوركەمونەرلىك ءلاززات، ءارى كوڭىلدىڭ ۇندەستىگى بار. مەن بۇكىلدەي اڭگىمەنىڭ ىشىندە جۇرگەندەي بولىپ، سوڭىندا كوزىمە جاس الدىم.

　　تەاتر اياقتاعاندا 40 نەشە ارتيست ساحنا ورتاسىنا جينالىپ، وزگەشە تاسىلمەن قۇرمەت ءبىلدىردى. ارتيستەردىڭ بارلىعى قولدارىنا ءبىر شوق گۇل الىپ، وزگەشە ءبي قيمىلىمەن كورەرمەندەرگە العىسىن ءبىلدىرىپ، تۇتاس الاڭدى تاعى ءبىر رەت قىزۋ شاپالاق ءۇنى كەرنەدى.

　　7 - ايدىڭ 23 - كۇنى «قىزىل - جاسىل جاقۇت» 6 - كەزەكتى جۇڭگو شينجياڭ حالىقارالىق ۇلتتار ءبي فەستيۆالىندا كورەرمەندەرمەن تاعى دا جۇزدەسەدى.