انار بۇلت \ شينجياڭ گازەتىنىڭ ءتىلشىسى گۋان مىڭيڭ 7 - ايدىڭ 23 - كۇنى ۇرىمجىدەن حابارلايدى. اۆتونوميالى رايوندىق پارتكومنىڭ ورىنباسار شۋجيى، ءۇرىمجى قالالىق پارتكومنىڭ شۋجيى حى جۇڭيوۋ 7 - ايدىڭ 23 - كۇنى تۇستەن كەيىن ۇرىمجىدە شينجياڭعا ساپارلاي كەلگەن ”بولاشاق كوپىرى“ جۇڭگو − ورتا ازيا جاس باسشىلار تالقى، اۋىس - كۇيىس لاگەرىندەگىلەرمەن كەزدەستى.
حى جۇڭيوۋ اۆتونوميالى رايوندىق پارتكوم جانە ۇكىمەت اتىنان ۋاكىلدەر ۇيىرمەسىنىڭ كەلگەندىگىن قارسى الاتىندىعىن ءبىلدىردى. ول بىلاي دەدى: پارتيا 18 - قۇرىلتايىنان بەرى شي جينپيڭ جولداستى ۇيتقى ەتكەن پارتيا ورتالىق كوميتەتى شينجياڭ قىزمەتىن ستراتەگيالىق جاقتان باعامداپ جانە جوسپارلاپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن ايقىنداپ، شينجياڭنىڭ رەفورما، دامۋ، ورنىقتىلىق قىزمەتىنە ايقىن ءتۇبىرلى بەتالىس كورسەتىپ بەردى. ءتوراعا شي جينپيڭنىڭ، جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، شينجياڭداعى ءار ۇلت كادر - بۇقاراسى تاپسىرمانى ەستە بەرىك ساقتاپ، العىس ايتا ەكپىندەي ىلگەرىلىپ، مەملەكەتتى قۇدىرەتتەندىرۋ قۇرىلىسىنداعى، ۇلتتى گۇلدەندىرۋدەگى ستراتەگيالىق ورنىن كوزدەپ، جاپپاي سوتسياليستىك وسىزاماندانعان مەملەكەت قۇرۋدىڭ شينجياڭ تاراۋىن قۇلشىنا جازۋدا. كەزەكتەگى شينجياڭ جىبەك جولى ەكونوميكالىق بەلدەۋى وزەكتى رايونى قۇرىلىسىن جەدەلدەتىپ، ”ءبىر بەلدەۋ، ءبىر جول“ بويىنداعى ەلدەرمەن، اسىرەسە، ورتا ازياداعى 5 ەلمەن اۋىس - كۇيىستى، سەلبەستىكتى ۇزدىكسىز تەرەڭدەتۋدە. كوپشىلىكتىڭ كوپ ارالاپ، كوپ كورىپ، شينجياڭدا ساپاردا بولعان كەزدەگى كورگەن - بىلگەندەرىن ءتىپتى دە كوپ اداممەن ورتاقتاسىپ، شىندىقتى ءىس جۇزىنەن ىزدەي وتىرىپ جۇڭگو شينجياڭىنىڭ حيكاياسىن ويداعىداي بايانداۋىن ءۇمىت ەتەمىن. سونىمەن بىرگە كوپشىلىكتىڭ جۇڭگو شينجياڭ جاستارىمەن اۋىس - كۇيىستى، سەلبەستىكتى كۇشەيتىپ، ءار ەل جاستارىنىڭ جىبەك جولى ەكونوميكالىق بەلدەۋى وزەكتى رايونى قۇرىلىسىنا بەلسەنە ات سالىسۋىن زور كۇشپەن ىلگەرىلەتىپ، دوستىقتىڭ ەلشىسى جانە سەلبەستىكتىڭ دانەكەرى بولۋىن قارسى الامىز.
ۋاكىلدەر ۇيىرمەسى مىنالاردى ءبىلدىردى: شينجياڭعا كەلگەننەن كەيىن، تىنىش تا بەرەكەلى، گۇلدەنىپ - كوركەيگەن شينجياڭدى كوردىك، شينجياڭنىڭ ەكونوميكاسى، قوعامى قارىشتاپ دامىپ، ءار ۇلت جاراسىمدى، تاتۋ - ءتاتتى ءوتىپ جاتىپتى، بولاشاقتاعى دامۋىنان ءۇمىت زور، كومەسكى كۇشى شەكسىز، ۋاكىلدەر ۇيىرمەمىز ءوز رولىن بەلسەنە ساۋلەلەندىرىپ، ويداعىداي كوپىر، دانەكەر بولىپ، ”ءبىر بەلدەۋ، ءبىر جولدى“ جوعارى ساپالى بىرگە قۇرۋدى ارقاۋ ەتىپ، ءار ەل جاستارىنىڭ اۋىس - كۇيىسىن، سەلبەستىگىن جەبەپ، شينجياڭنىڭ ەكونوميكاسىنىڭ، قوعامىنىڭ دامۋىنا دەم بەرىپ، ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرامىز.
