انار بۇلت \ شينجياڭ گازەتىنىڭ ءتىلشىسى چىن چياڭۋي 7 - ايدىڭ 23 - كۇنى ۇرىمجىدەن حابارلايدى. شينجياڭ ەلەكتر قۋاتى ساۋدا ورتالىعى شەكتى سەرىكتەستىگىنەن ۇعىسۋىمىزشا، 7 - ايدىڭ 17 - كۇنى شينجياڭ 8 - ايداعى جاسىل ەلەكتر ساۋداسىن ۇيىمداستىرىپ بولعان، بۇل رەتكى ساۋدالانعان ەلەكتر مولشەرى 56 ميلليون 307 مىڭ كيلوۆات ساعات بولعان. وسىلايشا شينجياڭنىڭ 2023 - جىلعى جاسىل ەلەكتر ساۋداسى بويىنشا جالپى ساۋدالانعان ەلەكتر مولشەرى 212 ميلليون كيلوۆات ساعاتقا جەتىپ، 200 ميلليون كيلوۆات ساعات جاسىل ەلەكتر ساۋداسى جىلدىق نىساناسى الدىن الا ورىندالعان.
200 ميلليون كيلوۆات ساعات جاسىل ەلەكتر180 مىڭ توننا كومىر قىشقىل گازىن، 566 توننا كۇكىرت قوس توتىعىن، 500 توننا ازوت - وتتەگى قوسىلىستارىن از ىعىستىرعانمەن بارابار.
بىلتىر 8 - ايدا مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى تۇڭعىش رەت ”كۋالىكپەن ەلەكتردى بىرىكتىرۋ“ ساۋدا ۇلگىسى ارقىلى شينجياڭ ىشىندە جاسىل ەلەكتر قۋاتى ساۋداسىن اي سايىن ۇيىمداستىرىپ، تازا ەنەرگيانىڭ قورشاعان ورتا قۇنىن جاسىل ەلەكتر بازارىمەن توعىستىردى. بيىل 3 - ايدا شينجياڭ تۇڭعىش رەت جىلدىق جاسىل ەلەكتر ساۋداسىن ۇيىمداستىرىپ، جاسىل ەلەكتر تۇتىنۋشى كاسىپورىنداردىڭ جاسىل ەلەكترمەن ۇزاق ۋاقىت ورنىقتى قامدالۋ بازار قاجەتىن قاناعاتتاندىردى.
جاسىل ەلەكتر ساۋداسىن ىلگەرىلەتۋ ءۇشىن، مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى جاڭا ەنەرگيا كاسىپورىندارىن جەلىگە قوسۋدى سىناۋ، ساۋدا ۇيىمداستىرۋ سياقتى قىزمەتتەردە جوعارى ءونىمدى قىزمەت وتەپ، جاسىل ەلەكتردىڭ ”ورتانى قورعاۋ ارتىق باعاسى“ ارقىلى جاڭا ەنەرگيا كاسىپورىندارىنىڭ پايداسىن جوعارىلاتىپ، جاڭا ەنەرگيانىڭ باياندى دامۋىن ساياساتتىق قامتاماسىز ەتۋدەن بىرتىندەپ بازار ارقىلى دەمەۋگە ءوتۋىن ىلگەرىلەتىپ، جاڭا ەنەرگيانى قابىلداۋعا جانە كاسىپ سالاسىنىڭ دامۋىنا جاڭا جۇزەگە اسىرۋ جولىن ازىرلەدى.
قازىرگە دەيىن شينجياڭ ەلەكتر قۋاتى ساۋدا ورتالىعى شەكتى سەرىكتەستىگى جالپى 13 توپ جاسىل ەلەكتر ساۋداسىن ۇيىمداستىرىپ، جيىنى 52 جاسىل ەلەكتر تۇتىنۋشى كاسىپورىن ءۇشىن جاسىل ۇقىق - مۇددە قۇنىن جاراتىپ، 29 قالىپتى باعاداعى جاڭا ەنەرگيا كاسىپورنىنا ەكونوميكالىق ونىمدىلىك ۇستەپ، شينجياڭنىڭ ەكونوميكالىق، قوعامدىق دامۋىنىڭ جاسىلعا قاراي تيپ وزگەرتۋىن قوس باعىتتا ىلگەرىلەتتى.
