بويلىقتا:
مولدىرەگەن ءجۇزىم حالىقتى بايىتۋ كاسىپ سالاسىنا ارقاۋ بولدى
□ انار بۇلت \ شينجياڭ گازەتىنىڭ تىلشىلەرى جاڭ رۇيلين، ۋي يۇڭگۇي
كەشتە بويلىقتا سەرۋەندەۋ، كوز جاۋىن الاتىن شام سالتاناتى، ءان - ءبي، ءدامدى تاعام مەزگىلى، وزگەشە حالىقتىق تۇسەلحانا... تۇرپان قالاسىنىڭ بويلىعىنداعى ۇزدىكسىز بايىتىلعان ساياحات كاسىپ كۇيى ءار جىلى ميلليوننىڭ ۇستىندە ساياحاتشىنى باۋرايدى.
بيىل 1 - ايدان 6 - ايعا دەيىن بويلىق كورىنىس ءوڭىرى 699 مىڭ 400 ساياحاتشى (رەت) قابىلداپ، سايكەس مەزگىلدەگىدەن ％716 ارتتى؛ ساياحات كىرىسى 13 ميلليون 772 مىڭ يۋان بولىپ، سايكەس مەزگىلدەگىدەن ％524 ارتتى.
2022 - جىلى 7 - ايدىڭ 14 - كۇنى باس شۋجي شي جينپيڭ بويلىقتى كوزدەن كەشىرگەندە بىلاي دەپ اتاپ كورسەتتى: تۇرپان كورىكتى دە ىرىستى، قاۋىن - قاربىز، جەمىس - جيدەكتىڭ حوش ءيىسى اڭقىعان جەر، بۇل ۇلى تابيعاتتىڭ سيى. ەكونوميكالىق، قوعامدىق دامۋ مەن ەكولوگيالىق ورتانى قورعاۋدىڭ قاتىناسىن دۇرىس ءبىر جاقتى ەتىپ، مادەنيەت پەن ساياحاتتىڭ توعىسا دامۋىن ىلگەرىلەتىپ، حالىقتى بايىتاتىن كاسىپ سالالارىن قالىپتاستىرۋ كەرەك.
”باس شۋجي شي جينپيڭنىڭ قامقورلىعى ءبىز ءۇشىن زور شابىت“. بويلىق كورىنىس ءوڭىرىن باسقارۋ كوميتەتى پارتكومىنىڭ ورىنباسار شۋجيى، باسقارۋ كوميتەتىنىڭ مەڭگەرۋشىسى لۇي يان - ياڭ بىلاي دەدى: بويلىق مەملەكەتتىك 5A دارەجەلى ساياحات كورىنىس ءوڭىرى، كەنىشتى القاپتىڭ ىرىسى مول. قازىر بويلىقتاعى تۇرعىنداردىڭ جارتىسىنان استامى ساياحاتتىڭ يگىلىگىن كورىپ وتىر، سونىمەن بىرگە بويلىق ءجۇزىم سارا ماركانىڭ كۇشىنە سۇيەنىپ، ساياحات پەن مادەنيەتتى توعىستىرۋدىڭ ناقتى جاعدايىن يگەرىپ، ءجۇزىم ەگىمشىلىگىنىڭ، ءداستۇرلى ساياحات كاسىپ سالاسىنىڭ تيبىن وزگەرتىپ، دارەجەسىن جوعارىلاتۋىن ءونىمدى ىلگەرىلەتتى.
شىلىڭگىر جاز ايلارى كەلىسىمەن تۇرپان قالاسى شىجىپ كەتتى، ايتسەدە بويلىق كورىنىس وڭىرىندە ادامدار سالقىنداپ جانى جاي تاپتى. مۇندا ءتىلشى بويلىقتاعى مادەنيەت - ساياحات كاسىپ سالاسىنىڭ توعىسپالى دامۋىنىڭ تارتىمدىلىعىن ءوز كوزىمەن كورىپ شىنايى سەزىندى.
بەيزاتتىق مادەني مۇرالار بازارىندا ءبىر توپ حۋناندىق ساياحاتشىلار توقۋ، بوياۋ، گۇل باسۋ، قىش ىدىس جاساۋ جانە تۇت قاعازىن جاساۋ تەحنولوگيالارىن ىقىلاسپەن ۇيرەنىپ، وزدەرى ىستەپ كورىپ جاتتى. ”ۇيعۇر ۇلتىنىڭ گۇلدى كيىز، گۇلدى كەزدەمەنى توقۋ، بوياۋ تەحنولوگياسى وزگەشە ەكەن. بەيزاتتىق مادەني مۇراگەرىنىڭ جەتەكشىلىگىندە ءبىر شىت باسىپ كوردىم، ورنەگى مەن بوياۋى ەرەكشە ادەمى بولدى، ەستەلىك رەتىندە الىپ كەتپەكشىمىن“، - دەدى حۋناندىق ساياحاتشى حۋاڭ ليفاڭ.
لۇي يان - ياڭ بىلاي دەپ تانىستىردى: بەيزاتتىق مادەني مۇرالار بازارىندا 22 ءتۇرلى بەيزاتتىق مادەني مۇرا كورمەلىك قويىلىمى بار، مۇنىڭ ىشىندە 8 ءتۇرى مەملەكەت دارەجەلى بەيزاتتىق مادەنيەت مۇراسى، 14 ءتۇرى اۆتونوميالى رايون دارەجەلى بەيزاتتىق مادەنيەت مۇراسى. ءار جولعى مەرەكە - دەمالىس كەزىندە بەيزاتتىق مادەني مۇراگەرلەرى كورمە زالىنا كەلىپ، سول جەردە كورمەلىك قويىلىم كورسەتەدى، ساياحاتشىلار دا ءوز باسىنان سەزىنىپ كورە الادى.
بيىل بەيزاتتىق مادەني مۇرا بازارىنا تاعى ءبىر مۇشە قوسىلدى − دۇنحۋاڭ كوركەمونەر اكادەمياسىنىڭ باستىعى، مەملەكەتتىك 1 - دارەجەلى اسەمونەر شەبەرى پەي شۋەفىڭ بويلۇق كورىنىس ءوڭىرىنىڭ شاقىرۋىمەن تۋىندىسىن اكەلىپ، بەيزاتتىق مادەني مۇرا بازارىندا جەكەلىك كوركەمونەر سارايىن اشتى.
”مەن ءجۇزىم سىزعاندى قاتتى جاقسى كورەمىن، بويلىققا كەلىپ تامىرىمدى تاپقانداي بولدىم“. پەي شۋەفىڭ بىلاي دەدى: جەكەلىك كوركەمونەر سارايىم قۇرىلعاننان كەيىن، قالامىمدى تاستاعان جوقپىن، قۇلشىنىسىم ارقىلى بويلىقتى جاقسىراق ۇگىتتەسەم ءارى بويلىققا ءتىپتى كوپ مادەني لەپ قوسسام دەيمىن.
”مادەنيەت − ساياحاتتىڭ جانى. ءبىز تۇرپان مادەنيەتىن، ءجۇزىم مادەنيەتىن ىشكەرىلەي كادەگە جاراتۋ ارقىلى ءجۇزىم مۇراجايى، ءجۇزىم شارابى مادەنيەتى مۇراجايى، قىزىل گەن مۇراجايى، ۋاڭ لوبين مۋزيكا كوركەمونەر سارايى، بەيزاتتىق مادەني مۇرالار بازارى سياقتىلاردى تۇلعالادىق، وسى وزگەشە كورمە سارايلارى كورىنىس ءوڭىرىنىڭ ءاربىر جەرىنە ورنالاسىپ، ساياحاتشىلار ءسوزسىز ات باسىن بۇرار جەرگە اينالدى، سارايلاردىڭ ىشىندەگى مادەني جاسامپازدىق ونىمدەرىنىڭ ساتىلىمى دا جامان ەمەس“، - دەدى شينجياڭ مادەنيەت - ساياحات دامىتۋ جارنا شەكتى سەرىكتەستىگى تۇرپان ىستەرى ءبولىمىنىڭ ورىنباسار باس ديرەكتورى، بويلۇق كورىنىس ءوڭىرىنىڭ جاۋاپتىسى جاڭ ميڭميڭ.
مادەنيەت پەن ساياحاتتىڭ تەرەڭدەي توعىسۋى ساياحاتشىلاردى باۋراپ قانا قويماي، ءبىر توپ كاسىپ اشۋشىلاردى دا قىزىقتىردى.
جاڭ بو مەن جۇبايى شاڭحايدان كەلگەن. ولار تۇرپانعا ساياحاتتاي كەلگەندە، بويلۇقتى ۇناتىپ قالدى، ارالاپ كورگەننەن كەيىن وسى ارادا قارجى قوسىپ، كاسىپ كوركەيتۋگە بەل بۋدى. بيىل جاڭ بو مەن جۇبايى دارەجەسىن جوعارىلاتىپ تۇلعالاعان قوجاناسىر سالت - سانا باقشاسى رەسمي اشىلىپ ساياحاتشى قابىلداي باستادى. بايىرعى تۇت اعاشى، بايىرعى تۇرعىندار تۇراعى، كارىز، ءجۇزىم كەپتىرۋ ءۇيى جانە باعاسى لايىقتى قوناق ۇيلەر وسى سالت - سانا باقشاسىنىڭ اشىلا سالا ساۋداسى كۇسەت بولۋىنا مۇمكىندىك بەردى.
”حالىقتىق تۇسەلحانا قوناق ءۇي ەمەس، وندا، ءسوز جوق، مادەنيەت ەلەمەنتى بولۋ كەرەك. ءبىزدىڭ ۇناتقانىمىز شينجياڭنىڭ سالت - ءداستۇرى مەن مادەنيەتى، وسىلاي تۇراقتاندىرۋداعى ماقساتىمىز جوعارى دەڭگەيدەگى قونالقىلىق سەزىنۋ مەن وزگەشە سالت - سانانىڭ ءوزارا توعىسىپ ءومىر ءسۇرۋىنە مۇمكىندىك جاساۋ“، - دەدى جاڭ بو.
”باس شۋجي شي جينپيڭ بويلىقتى كوزدەن كەشىرگەندە، اسپاننان شەلپەك جاۋمايدى، ءبىراق ءجۇزىم جاۋاتىن كەز بولادى دەپ كۇلدىرە سويلەگەن ەدى“. لۇي يان - ياڭ بىلاي دەدى: وسى كورىنىستەر ءالى دە كوز الدىمىزدا. بويلىق كورىنىس ءوڭىرىن باسقارۋ كوميتەتى باس شۋجي شي جينپيڭنىڭ ماڭىزدى نۇسقاۋىنىڭ رۋحىن مۇقيات دايەكتىلەندىرىپ، تياناقتاندىرىپ، حالىقتى بايىتۋ كاسىپ سالاسىن تۇلعالاۋدا دامۋ جەتىستىكتەرىنەن بۇقارانى ورتاق يگىلىكتەندىرۋ، قىستاق تۇرعىندارىنىڭ جۇمىستانۋىن، شارۋاشىلىق قۇرۋىن جانە كىرىستەرىن ارتتىرۋىن ىلگەرىلەتۋ ماسەلەسىن ەڭ الدىمەن ەسكەردى. مۇقيات تەكسەرۋ - زەرتتەۋ جانە تالقىلاۋ ارقىلى كورىنىس ءوڭىرى جەر اۋدانى 1000 شارشى مەتردەن اساتىن ءىرى كولەمدى اۋىل شارۋاشىلىق قوسىمشا ونىمدەرىن ساتۋ دۇكەنىن سالىپ، سول جەردەگى 20 نەشە قىستاق تۇرعىنىن دۇكەن ىشىندە تۇرپاننىڭ وزگەشە اۋىل شارۋاشىلىق قوسىمشا ونىمدەرىن ساتۋعا باۋراپ، 100 نەشە ادامدى تىكەلەي جۇمىستانۋعا جەتەكتەدى.
”بيىل ساياحاتشى كوپ، ساۋدا وتە جاقسى“. تۇرپان قالاسى گاۋچاڭ رايونى بويلۇق ءمالىسى ءجۇزىم الەۋمەتتىك اۋماعىنىڭ تۇرعىنى ءشايدا ساتتار وسى ارادا قۇرعاق جەمىس ساتادى، ”بويلىق بارعان سايىن كورىكتەنىپ كەلەدى، كىرىسىمدى ارتتىرۋ ءۇشىن، ينتەرنەتتە قۇرعاق جەمىستى قالاي ساتۋدى ۇيرەنىپ ءجۇرمىن“.
لۇي يان - ياڭ بىلاي دەپ تانىستىردى: بيىل بويلىق كورىنىس ءوڭىرىن باسقارۋ كوميتەتى مادەنيەت - ساياحات جانە اۋىل شارۋاشىلىعى، ورمان شارۋاشىلىعى كاسىپتەرىنىڭ تەرەڭدەي توعىسا دامۋىن ۇزدىكسىز ىلگەرىلەتىپ، بويلىق كورىنىس ءوڭىرىنىڭ جالپى تۇلعالىق بەت - بەينەسى مەن سارا ماركا ىقپال قۋاتىن جوعارىلاتتى. بويلىقتىڭ شارۋالار شاتتىعى ساياجايى، حالىقتىق تۇسەلحاناسى، ساپالى اۋىل شارۋاشىلىق ونىمدەرى جانە جەرگىلىكتى ەرەكشە ونىمدەرىن ساتىپ الۋ بويىنشا سەزىنۋ دۇكەنى سياقتىلاردىڭ ساپاسى جوعارىلاتىلىپ، دەڭگەيى كوتەرىلىپ، ساياحاتشىلاردىڭ قاجەتىن قاناعاتتاندىرىپ قانا قويماي، جەرگىلىكتى قىستاق تۇرعىندارىنا دا جۇمىس ورنىن ازىرلەدى، ”تال - تال ءجۇزىم ارقاۋ بولعان اۋىل شارۋاشىلىعى، مادەنيەت - ساياحات كاسىپ سالاسى بويلىق كورىنىس وڭىرىندەگى حالىقتى بايىتۋدىڭ تىڭ كاسىپ سالاسىنا اينالدى“.
