لي چياڭ باس ءۋازىر حۇڭسىنعا قۇتتىقتاۋ تەلەگرامماسىن جولدادى
شينحۋا اگەنتتىگىنىڭ 7 - ايدىڭ 25 - كۇنى بەيجيڭنەن بەرگەن حابارى. 7 - ايدىڭ 25 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ كامبودجا حالىق پارتياسىنىڭ ءتوراعاسى حۇڭسىنعا قۇتتىقتاۋ تەلەگرامماسىن جولداپ، ونىڭ كامبودجا حالىق پارتياسىنا باسشىلىق ەتىپ 7 - كەزەكتى مەملەكەتتىك زور سايلاۋدا جەڭىسكە جەتكەندىگىن قۇتتىقتادى.
شي جينپيڭ بىلاي دەپ اتاپ كورسەتتى: ءبىز ءتوراعا حۇڭسىن باستاعان كامبودجا پاتشالىق ۇكىمەتىنىڭ دۇرىس باسشىلىعىندا، كامبودجانىڭ ساياسيىنىڭ ورنىقتى بولىپ، ەكونوميكاسىنىڭ دامىعانىن، حالىق تۇرمىسىنىڭ جاقسارىپ، حالىقارالىق جانە وڭىرلىك ورنىنىڭ ۇزدىكسىز جوعارىلاعاندىعىن قۋانىشپەن كورىپ وتىرمىز. جۇڭگو جاق كامبودجانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن اۋەلگىدەي قولدايدى، ءتوراعا حۇڭسىننىڭ پارمەندى باسشىلىعىندا، كامبودجا حالىق پارتياسىنىڭ مەملەكەتتىڭ گۇلدەنۋى مەن حالىقتىڭ باقىتى ءۇشىن، ءوڭىردىڭ بەيبىتشىلىگى، ورنىقتىلىعى مەن دامۋى، گۇلدەنۋى ءۇشىن تىڭ دا اناعۇرلىم زور ۇلەس قوساتىندىعىنا سەنەدى.
شي جينپيڭ بىلاي دەپ باسا دارىپتەدى: جۇڭگو مەن كامبودجا تاعدىرلاس ورتاق تۇلعا. جۇڭگو كوممۋنيستىك پارتياسى كامبودجا حالىق پارتياسىمەن دوستىق سەلبەستىككە ايرىقشا ءمان بەرەدى، مەن ءتوراعا حۇڭسىنمەن بىرگە ەكى جاقتى قارىم - قاتىناسقا ساياسي جەتەكشىلىكتى كۇشەيتىپ، پارتيالار ارا جانە باسقا سالالارداعى اۋىس - كۇيىستى، سەلبەستىكتى تەرەڭدەتىپ، جوعارى ساپالى، جوعارى دەڭگەيلى، جوعارى ولشەمدى جاڭا داۋىردەگى جۇڭگو − كامبودجا تاعدىرلاس ورتاق تۇلعاسىن قول ۇستاسا قۇرىپ، ەكى ەلدى جانە ەكى ەل حالقىن اناعۇرلىم ويداعىداي باقىتقا كەنەلتۋدى قالايمىن.
سول كۇنى مەملەكەتتىك كەڭەستىڭ زۇڭليى لي چياڭ حۇڭسىنعا قۇتتىقتاۋ تەلەگرامماسىن جولدادى.
