− ازاتتىق ارميا جانە قارۋلى ساقشى اسكەري بولىمدەرى ءتوراعا شي جينپيڭنىڭ ماڭىزدى نۇسقاۋىن باتىل دايەكتىلەندىرىپ، تاسقىننان ساقتانۋ، اپاتتان قۇتقارۋدىڭ ءبىرىنشى شەبىندە ءۇرتىس ەرلىكپەن شايقاس جاسادى
□ شينحۋا اگەنتتىگىنىڭ تىلشىلەرى حۋاڭ ميڭ، ليۋ ي، حۋاڭ يچىن
”دوكسۇري“ اتتى تايفىڭ داۋىلىنىڭ ىقپالىنا ۇشىراعان حۋابەي، حۋاڭحۋاي، دۇڭبەي سياقتى جەرلەردە 7 - ايدىڭ سوڭىنان بەرى سۇراپىل نوسەر جاۋىپ، تاسقىن، گەولوگيالىق اپات اۋىر بولىپ، اۋىر ءولىم - ءجىتىم جانە مال - مۇلىك شىعىنى تۋىلدى.
ءتوراعا شي جينپيڭ تاسقىننان ساقتانۋ، اپاتتان قۇتقارۋ قىزمەتى جونىندە ماڭىزدى نۇسقاۋ بەردى. ازاتتىق ارميا جانە قارۋلى ساقشى اسكەري بولىمدەرىندەگى وفيتسەر - اسكەرلەر باس قولباسشىنىڭ بۇيرىعىنا باتىل قۇلاق اسىپ، بۇيرىقتى ەستي سالىسىمەن ارەكەتتەنىپ، الدا اتويلاپ، ماڭىزدى مىندەتتى باتىل ارقالاپ، تاسقىننان ساقتانۋ، اپاتتان قۇتقارۋدىڭ ءبىرىنشى شەبىندە ءۇرتىس ەرلىكپەن شايقاس جاساپ، حالىقتى بارىنەن جوعارى قويۋ بورىشى مەن جاۋاپكەرشىلىگىن ءىس جۇزىندىك ارەكەتتەرىمەن ءتۇسىندىردى.
كومەككە شۇعىل اتتانىپ، ارميانىڭ ەكپىندىلەر اترەتىندىك رولىن تولىق ساۋلەلەندىردى
باس قولباسشى حالىقتى كوكەيدە ساقتادى، اسكەري ءبولىم بۇيرىقتى قالت جىبەرمەي ورىندادى. اپات بولعان وڭىرلەرگە كومەككە شۇعىل اتتانۋ جۇمىسى كەزەك كۇتتىرمەيدى −
”7 - ايدىڭ سوڭى مەن 8 - ايدىڭ باسىنداعى“ تاسقىننان ساقتانۋ قاۋىرت مەزگىلىنىڭ شەشۋشى كەزەڭى كەلۋىمەن، بىرنەشە كۇنگە جالعاسقان نوسەردەن بەيجيڭ قالاسى فاڭشان رايونى ليۋليحى قالاشىعىنىڭ ماڭىنداعى وزەن ارنالارىندا سۋ دەڭگەيى ۇزدىكسىز كوتەرىلىپ، سۋ قاپتاۋ حاۋىپ - قاتەرى شۇعىل ارتتى. قارۋلى ساقشى بەيجيڭ باس اترەتىنىڭ بەلگىلى تارماق اترەتىندەگى 2000نان استام وفيتسەر - اسكەر تاباندا اتتانىپ، وزەن ارناسىنداعى ويپاڭ جەرلەرگە توسپا جاساپ، بۇكىل قالاشىق حالقىنىڭ ءومىرى مەن مال - مۇلكىنىڭ حاۋىپسىزدىگىن قورعادى.
وسىمەن بىرگە نەشە 10 كيلومەتر قاشىقتاعى حىبەي ولكەسىنىڭ گاۋبەيديان قالاسىنداعى بايگوۋ وزەنىنىڭ مىندەت اۋماعىنا سۋىت جەتكەن ورتا بولىك سوعىس رايونى قۇرلىق ارمياسى 82 - قۇراما ارمياسىنىڭ ”قۇرىش ارميا لۇيىندەگى“ وفيتسەر - اسكەرلەر قالىڭ جاڭبىرداعى بالشىقتا كۇرەكتەرىن سەرمەپ، كەنەپ داعارلاردى تولتىرىپ، جاعالىق بوگەتتەردى بەكەمدەدى.
حىبەي ولكەسى جاڭجياكوۋ قالاسى جولۋ اۋدانىنداعى كوپتەگەن قىستاق - قالاشىقتا بىرنەشە كۇننەن بەرگى نوسەر سەبەبىنەن سەل ءجۇردى. ورتا بولىك سوعىس رايونى قۇرلىق ارمياسى 81 - قۇراما ارمياسىنىڭ بەلگىلى لۇيىندەگى 200گە تاياۋ وفيتسەر - اسكەر 40 نەشە ينجەنەريالىق شۇعىل جوندەۋ جانە ماشينالانعان كوپىر جابدىقتارىن الا ءجۇرىپ، تۇراقتاپ جاتتىعۋ ورىندارىنان اپاتقا ۇشىراعان وڭىرلەرگە تۇندەلەتىپ اتتاندى...
اپات دەگەنىمىز بۇيرىق، ءومىر تايشان تاۋىنان دا قادىرلى. پارتيا ورتالىق كوميتەتىنىڭ، ورتالىق اسكەري ىستەر كوميتەتىنىڭ ءبىر تۇتاس قولباسشىلىعىندا، حالىق پەرزەنت اسكەرلەرىنىڭ اناعۇرلىم كوپ كۇشى تاسقىننان ساقتانۋدىڭ، اپاتتان قۇتقارۋدىڭ ءبىرىنشى شەبىنە قاراي توپتالدى، قولباسشىلىق ورتالىعىنان ءبىر قىدىرۋ بۇيرىق ءتۇسىرىلدى:
ورتا بولىك سوعىس رايونى بىرلەسكەن سوعىس جۇرگىزۋ قولباسشىلىق ورتالىعى 8 - ايدىڭ 1 - كۇنى الدىڭعى شەپتەگى قولباسشىلىق ورنىن ورنالاستىرىپ، 10 مىڭنان استام وفيتسەر - اسكەردى، حالىق جاساعىن ءبىر تۇتاس ورنالاستىرىپ، بەيجيڭ، تيانجين، حىبەي سياقتى جەرلەردە قۇتقارۋ - كومەكتەسۋ جۇمىسىن ءتارتىپتى ورىستەتتى.
سولتۇستىك بولىك سوعىس رايونى بىرلەسكەن سوعىس جۇرگىزۋ قولباسشىلىق ورتالىعى 5 رەت ارناۋلى نۇسقاۋ بەرىپ، حيلۇڭجياڭ، جيلين باعىتىندا العا ىلگەرىلەۋ قولباسشىلىق ورنىن دەر كەزىندە جىبەردى، سوعىس رايونى قۇرلىق ارمياسىنىڭ، اۋە ارمياسىنىڭ، تەڭىز ارمياسىنىڭ كوپتەگەن اسكەري ءبولىمى بۇيرىققا ساي اتتاندى.
قارۋلى ساقشى ءبولىمى سوعىس جۇرگىزۋ مىندەت قولباسشىلىق ورتالىعى 24 ساعات جۇمىس جۇرگىزىپ، ءار باعىتتاعى تاسقىن جاعدايى وزگەرىسىنە قاراي اسكەري كۇش جىبەرىپ، ءتۇرلى قامتاماسىزدىقتاردى يكەمدى سايكەستىردى.
...
قاتەر تونگەن ساتتە، پارتيا مەن حالىق تىلەكتەس بولدى؛ ءومىر مەن ءولىم ساتىندە، پەرزەنت اسكەرلەر مەن حالىق بىرگە بولدى!
”دوكسۇريدىڭ“ سولتۇستىككە ويىسۋىنا ىلەسە، تاسقىن حيلۇڭجياڭ ولكەسىنىڭ كوپتەگەن جەرىنە جاقىنداپ، قالا، قالاشىق، قىستاقتار تاسقىن باسۋ قاتەرىنە ءدوپ كەلدى. 8 - ايدىڭ 4 - كۇنى تاڭ سارىدە سولتۇستىك بولىك سوعىس رايونى قۇرلىق ارمياسى 78 - قۇراما ارمياسى بەلگىلى قۇراما لۇيىنىڭ، بەلگىلى ينجەنەر اسكەرلەر جانە حيميالىق قارۋلاردان ساقتانۋ اسكەرلەرى لۇيىنىڭ اسكەرلەرى ەكىگە ءبولىنىپ، ءىرى تۇرپاتتى ماشينا جابدىقتارىن الىپ اپاتتى وڭىرگە اتتاندى؛ قارۋلى ساقشى حيلۇڭجياڭ باس اترەتى حاربين تارماق اترەتىندەگى 200دەن استام وفيتسەر - اسكەر ما - ي وزەنىنىڭ شاڭجى بولىگىندە تۇندەلەتىپ 9 ساعات ەرلىكپەن شايقاس جۇرگىزدى.
قاي جەردە اپات بولسا، اسكەري بولىمدەر سول ارادان تابىلدى. اپاتتان قۇتقارۋ ءبىرىنشى شەبىنىڭ بار الابىنان نارت قىزىل پارتيا تۋىن جانە اسكەرلەردى كورەسىز −
نوسەر جول تاعانىن وپىرىپ كەتكەن فىڭتاي − شاچىڭ تەمىر جولىندا قارۋلى ساقشى بەيجيڭ باس اترەتى بەلگىلى تارماق اترەتىنىڭ سانموۋجاڭى ۋاڭ فىڭ 40تان استام وفيتسەر - اسكەردەن ۇيىمداسقان ەكپىندىلەر اترەتىن باستاپ، 12 كيلومەتر جول ءجۇرىپ، جولاۋشىلار پويەزى بوگەلىپ قالعان وڭىرگە باردى؛ حىبەي ولكەسى جوجوۋ قالاسىنىڭ جيڭيا مەكتەبىندەگى ورنالاستىرۋ تۇيىنىندە 1000نان استام قىستاق تۇرعىنى قامالىپ قالادى، چىڭدى اسكەري بولىمشە رايونىنىڭ قولباسشىسى ليۋ ۋيپيڭ ءوزى باستاپ اعىن جىلدامدىعى سەكۋندىنا 15 مەترگە جەتەتىن تاسقىن سۋىنا ءتۇسىپ، ۇستىندە بارلاۋ جۇرگىزىپ، تۇجىرىم جاسايدى؛ جيلين ولكەسى شۋلان قالالىق حالىقتىق قارۋلى ءبولىمىنىڭ جىڭۋيى جوۋ كۇنشۇن ءبىرىنشى شەپكە اتتانىپ بارا جاتقان جولىندا قاتەرگە جولىعىپ، كوپتىڭ مۇددەسى جولىندا قۇربان بولادى...
”ءبىز بۇقاراعا پارتيا مەن مەملەكەتتىڭ ءارقانداي ءبىر ادامدى استە تاستاپ كەتپەيتىندىگىن ءىس جۇزىندىك ارەكەتىمىزبەن كورسەتۋىمىز كەرەك“، - دەدى قارۋلى ساقشى حيلۇڭجياڭ باس اترەتىنىڭ جۇمىس باسى قولباسشىسى جيا حۇڭيۇن.
ماڭىزدى مىندەتتى باتىل ارقالاپ، حالىق بۇقاراسىنىڭ ءومىرى مەن مال - مۇلكىنىڭ حاۋىپسىزدىگىن بار كۇشپەن قورعادى
قالىڭ جاڭبىر باسىلعاننان كەيىن، بەيجيڭ قالاسى فاڭشان رايونى ياڭلينشۇي قىستاعىندا جول توسىلىپ، ەلەكتر توقتاپ، حابار - بايلانىس ءۇزىلىپ، سىرتپەن حابارلاسۋ توقتادى.
8 - ايدىڭ 3 - كۇنى تۇستەن بۇرىن ورتا بولىك سوعىس رايونى قۇرلىق ارمياسى 82 - قۇراما ارمياسىنىڭ بەلگىلى قۇراما لۇيى بۇيرىق بويىنشا بارلاۋ گرۋپپاسىن ياڭلينشۇي قىستاعىنا جىبەرەدى. تىك جالاماعا ورمەلەپ شىعىپ، سۋ اعىسى قاتتى تەرەڭ سايلاردان كەسىپ وتكەن وفيتسەر - اسكەرلەر ياڭلينشۇي قىستاعىنا جەتكەننەن كەيىن، 13 جاستاعى ءبىر قىز بالانىڭ تاسقىندا اۋىر جارالانعاندىعىن بايقايدى.
بارلاۋ يىڭىنىڭ ورىنباسار يىڭجاڭى جوۋ شين وفيتسەر - اسكەرلەردى دەرەۋ قىز بالانى سىرت جەرگە جەتكىزۋگە ۇيىمداستىرادى، 4 ساعاتتان استام جول جۇرگەن وفيتسەر - اسكەرلەر يىقتارىن ساتى، ارقالارىن كوپىر ەتىپ، قىز بالاعا ءومىر جولىن اشادى.
حابارسىز كەتكەندەردى، قامالىپ قالعانداردى بار كۇشپەن ىزدەستىرىپ، قۇتقارىپ، ءولىم - ءجىتىمدى ەڭ جوعارى شەكتە ازايتتى... قيىنشىلىق قىسپاعىندا حالىق پەرزەنت اسكەرلەرى ءتوراعا شي جينپيڭنىڭ ماڭىزدى نۇسقاۋىن ءىس جۇزىندىك ارەكەتتەرىمەن باتىل دايەكتىلەندىردى.
قايدا قيىنشىلىق بولسا، اسكەري بولىمدەر سول ارادا قامال الدى.
حۋابەيدىڭ كوپتەگەن جەرىندە قاتتى نوسەر جاۋدى. وفيتسەر - اسكەرلەر الدا اتوي سالىپ، ءۇرتىس ەرلىكپەن شايقاس جۇرگىزدى −
ورتا بولىك سوعىس رايونى اۋە ارمياسى تىك ۇشاق شىعارىپ، اپاتقا ۇشىراۋ جاعدايىن تەكسەرىپ، قالىڭ سۋدا قۇتقارۋ - كومەكتەسۋ جۇمىسىن جۇرگىزىپ جاتقان جەر بەتى كۇشتەرىن ماڭىزدى پايدالانۋ ماتەريالدارىمەن قامدادى؛ ورتا بولىك سوعىس رايونى قۇرلىق ارمياسى 81 - قۇراما ارمياسىنداعى، 82 - قۇراما ارمياسىنداعى كوپتەگەن كاسىپتىك قۇتقارۋ - كومەكتەسۋ كۇشتەرى جولدى جەدەل اشىپ، جاعالىق بوگەتتەردى بەكەمدەدى؛ قارۋلى ساقشى بەيجيڭ باس اترەتىندەگى، حىبەي باس اترەتىندەگى وفيتسەر - اسكەرلەر حابارسىز كەتكەندەردى، قامالىپ قالعانداردى ءۇرتىس ىزدەستىردى، قۇتقاردى؛ حىبەي ولكەلىك اسكەري رايونىنداعى حالىق جاساقتارى 6 جەرگە اتتانىپ، قاتەردەن اراشالادى، اپاتتان قۇتقاردى...
دۇڭبەيدىڭ تاسقىننان ساقتانۋ ءبىرىنشى شەبىندە قاتەرلى جاعدايلار ءۇرتىس تۋىلدى. وفيتسەر - اسكەرلەر ءوڭىر شەكاراسىنان ءوتۋ الدىندا تۇرعان تاسقىنمەن مينۋت - سەكۋندقا تالاستى −
8 - ايدىڭ 5 - كۇنى تاڭعى ساعات 4تە حيلۇڭجياڭ ولكەسىنىڭ مۋدانجياڭ قالاسىندا حالىق اۋە ارمياسىنىڭ ۇشۋ ورنىندا تۇراتىن سولتۇستىك بولىك سوعىس رايونى اۋە ارمياسىنىڭ اۋە اسكەرلەرى بەلگىلى لۇيى بۇيرىقتى تاپسىرىپ الىسىمەن شۇعىل جاعدايعا توتەپ بەرۋ، تاسقىننان ساقتانۋ، قاتەردەن اراشالاۋ بولىمشە اترەتىن دەرەۋ ۇيىمداستىرىپ قۇرىپ، 200 وفيتسەر - اسكەر جاڭبىردى ەلەڭ قۇرلى كورمەي اتتانىپ، بوگەت سالۋ، شارلاۋ - قورعانۋ مىندەتىن ءبىر - بىرلەپ اتقاردى.
8 - ايدىڭ 7 - كۇنى ساعات 8گە دەيىن حيلۇڭجياڭ ولكەسىندەگى كوپتەگەن وزەننىڭ سۋ دەڭگەيى جونىندە شۇعىل ساقتىق حابارى بەرىلدى، جيلين ولكەسىندەگى كوپتەگەن وزەن ارنالارىندا ءتۇيىن ورىنداردىڭ حاۋىپ - قاتەر دارەجەسى ارتتىرىلدى.
اعىن ساقتىق سۋ دەڭگەيىنەن اسىپ كەتتى! تاسقىن كوك ءتۇستى ساقتىق دابىلى قاعىلدى!
سولتۇستىك بولىك سوعىس رايونى قۇرلىق ارمياسى 78 - قۇراما ارمياسىنىڭ بەلگىلى لۇيىندەگى 350دەن استام وفيتسەر - اسكەر تاۋلىك بويى دامىل تاپپاي، ۇزىندىعى 1000 مەتردەن اساتىن قوسالقى بوگەت سالدى ءارى ونى توقتاۋسىز بيىكتەتىپ، ۇزارتىپ، تاسقىن ورلەۋىنە بار كۇشپەن توتەپ بەردى. بىرنەشە كۇننىڭ الدىندا وسى قۇراما ارمياسىنداعى وفيتسەر - اسكەرلەر شاڭجى قالاسىندا قامالىپ قالعان 30 نەشە بۇقارانى ءتۇن بويى قۇتقارىپ، كوشىردى ءارى چيچيحار قالاسى، مۋدانجياڭ قالاسى، حاربين قالاسى سياقتى كوپتەگەن جەرگە بولىنە بارىپ، توسپا سالۋ، بەكەمدەۋ مىندەتىن اتقاردى.
وسىمەن ءبىر ۋاقىتتا قارۋلى ساقشى جيلين باس اترەتىنىڭ چاڭچۇن تارماق اترەتىندەگى، سۇڭيۋان تارماق اترەتىندەگى وفيتسەر - اسكەرلەر تاسقىننان ساقتانۋداعى ءتۇيىندى ورىندارعا شۇعىل بارىپ شارلاپ تەكسەرىپ، جوندەپ، توسپا سالىپ - قورعاپ، حالىق بۇقاراسىنىڭ ءومىرى مەن مال - مۇلكىنىڭ حاۋىپسىزدىگىن بار كۇشپەن قامتاماسىز ەتتى...
قاتەردە پەرزەنت اسكەرلەر حالىقتىڭ مۇددەسىن ماڭگى ءبىرىنشى ورىنعا قويدى.
بار كۇشىن سالىپ، پارتيا مەن حالىق جۇكتەگەن مىندەتتى باتىل ورىندادى
8 - ايدىڭ 6 - كۇنى بەيجيڭدە قالىڭ جاڭبىر تولاستاي باستادى.
چاڭپيڭ رايونى ليۋسۇن قالاشىعى گاۋياكوۋ قىستاعىنىڭ قىستاق تۇرعىندار كوميتەتىنەن 5 مەترگە جەتپەيتىن جەردە تاسقىننىڭ ورۋىمەن كەڭدىگى نەشە ون مەتر كەلەتىن جاڭا ”وزەن ارناسى“ قالىپتاستى. بۇل اسىلىندە تاۋعا باراتىن بىردەن - ءبىر جول ەدى، تاسقىن نەشە مەتر بيىكتىكتەگى جول تاعانىن الدەقاشان ءبۇلدىرىپ كەتكەن ەدى.
كۇركىرەگەن زور داۋىستىڭ شىعۋىمەن ورتا بولىك سوعىس رايونى قۇرلىق ارمياسى 82 - قۇراما ارمياسىنىڭ بەلگىلى ينجەنەريا اسكەرلەرى لۇيىنىڭ ءىرى تۇرپاتتى بىرنەشە ينجەنەريا ماشيناسى وزەن ارناسىن تازالاپ، جول تاعانىن تولتىرىپ جاتتى.
قىستاق تۇرعىندار كوميتەتىنىڭ الدىندا ءبىر عانا كولىك جۇرە الاتىن قاتتىلانعان جول بەتى شۇعىل اشىلدى. ليۋسۇن قالاشىعىنداعى نەشە ءجۇز بۇقارا جونىنەن العاندا، بۇل قيىنشىلىق قىسپاعىنان قۇتىلدىراتىن تىرشىلىك جولى، ونان دا ماڭىزدىسى، مەكەندى قايتا قۇرۋدىڭ ءۇمىت جولى ەدى.
قازىر حالىق ارمياسىنىڭ ءالى دە كوپتەگەن ينجەنەريا اسكەرلەرى، قالقىمالى كوپىر، حابار - بايلانىس اسكەري بولىمدەرى كاسىپتىك جابدىقتارىن الا ءجۇرىپ، جەرگىلىكتى ورىنعا كومەك كورسەتىپ، قاتىناس، حابار - بايلانىس، ەلەكتر سياقتى بۇلىنگەن نەگىزدىك قۇرىلعىلاردى شۇعىل جوندەۋدە.
تاسقىن قايتقانىمەن، حىبەي ولكەسى جوجوۋ قالاسى دياۋۋو قالاشىعىنداعى دۋماندى ساۋدا كوشەسىنىڭ استاڭ - كەستەڭى شىعىپ جاتقان - دى.
”جوعارىنىڭ بۇيرىعىن تاپسىرىپ الدىق، ءبىزدىڭ مىندەتىمىز قاتەردى شارلاپ، توسپانى بەكەمدەۋدەن اپاتتان كەيىنگى قايتا قۇرۋعا ويىستى، قازىر، باستىسى، جولداردى اشۋ، لاي - باتپاقتى تازالاۋ، زارارسىزداندىرۋ سياقتى قاتىستى قىزمەتتەرگە جاۋاپتى بولىپ، بۇقارانىڭ ءوندىرىس، تۇرمىس ءتارتىبىن تەز ارادا قالپىنا كەلتىرۋىنە كومەكتەسەمىز“، - دەدى ورتا بولىك سوعىس رايونى قۇرلىق ارمياسى 82 - قۇراما ارمياسى بەلگىلى مىندەت لۇيىنىڭ ءبولىم باستىعى لۋ فىڭلياڭ.
اۋا قاپىرىق ىستىق، قوقىر - قوقسىق ءۇيىندىسىنىڭ بوگدە ءيىسى قولقانى قابادى. وفيتسەر - اسكەرلەر 3 ساعات ءۇرتىس ەرلىكپەن شايقاس جاساعاننان كەيىن، كوشەلەر قالپىنا كەلدى، ىركىلىسسىزدەندى.
تاسقىن قايتقاننان كەيىنگى حىبەي ولكەسى باۋديڭ قالاسى لايشۇي اۋدانىنىڭ تاۋلى وڭىرىندە جول اۋىر ءبۇلىندى، وزەندەردىڭ اعىسى ءالى قاتتى.
8 - ايدىڭ 5 - كۇنى ساعات 8دە لايشۇي اۋداندىق حالىقتىق قارۋلى ءبولىم بۇيرىققا ساي، 65 حالىق جاساعىن ۇيىمداستىرىپ، تاۋ قويناۋىنداعى اپاتقا ەڭ اۋىر ۇشىراعان جاۋگىجۋاڭ قالاشىعى تاڭجياجۋاڭ قىستاعىنا تۇرمىستىق زاتتىق ماتەريال جەتكىزدى. 8 - ايدىڭ 6 - كۇنى تاڭعى ساعات 3كە دەيىن ۇزدىكسىز 4 رەت تاسىعاننان كەيىن، حالىق جاساقتارى اترەتىنىڭ مۇشەلەرى بارلىق زاتتىق ماتەريالداردى تۇگەلدەي جەتكىزىپ بولدى.
اپات تۋىلعاننان كەيىن، لايشۇيدەگى حالىق جاساقتارى اترەتكە ءبولىنىپ، ىلگەرىندى - كەيىندى 20 نەشە رەت اتتانىپ، تاۋ قويناۋىنداعى اپاتقا ۇشىراعان قىستاقتارعا شاتىر، كورپە - جاستىق، ازىق - تۇلىك سياقتى تۇرمىسقا شۇعىل قاجەتتى زاتتىق ماتەريالداردى جەتكىزىپ، اپاتقا ۇشىراعان بۇقارانىڭ نەگىزگى تۇرمىس قاجەتىن شەشتى.
ورتا بولىك سوعىس رايونى اۋرۋدان ساقتانۋ جانە اۋرۋدى تىزگىندەۋ ورتالىعى زارارسىزداندىرۋ، ىندەتتەن ساقتانۋ زاتتىق ماتەريالدارىن شۇعىل دايىندادى، ۇيىمداستىرعان ىندەتتەن ساقتانۋ بولىمشە اترەتى مىندەت رايونىنا جەتىپ، ازىق - تۇلىك حاۋىپسىزدىگىنە، سۋدى، ۋلى زاتتاردى تەكسەرۋگە جانە جۇقپالى اۋرۋلاردان ساقتانۋعا جاۋاپتى بولدى؛ بىرلەسكەن ارتقى شەپ قامتاماسىزداندىرۋ ءبولىمىنىڭ 984 - شيپاحاناسى ەمدەۋ گرۋپپاسىن اپاتتى وڭىرلەردى ىشكەرىلەي ارالاپ، مىندەتتى ەمدەۋ، ارالاپ ەمدەۋ جۇرگىزۋگە، جارالانعانداردى قۇتقارۋ - ەمدەۋگە جىبەردى؛ اپاتتان كەيىنگى زارارسىزداندىرۋ، ىندەتتەن ساقتانۋ بىلىمدەرىن ۇگىتتەۋ ءۇشىن، قارۋلى ساقشى حىبەي باس اترەتى شيپاحاناسى شاعىن بولىمشە اترەت جىبەردى...
تاسقىن قايتپاسا، پەرزەنت اسكەرلەر استە شەگىنبەيدى.
وسى جازدا حالىق ارمياسى تاسقىن اپاتى الدىندا، حالىقتىڭ جۇرەگىندە ءبىر ءتۇرلى سەنىم بار ەكەندىگىن، ونىڭ ”حالىق پەرزەنت اسكەرلەرى“ دەپ اتالاتىندىعىن تاعى ءبىر رەت ارەكەتتەرىمەن دالەلدەدى.
(شينحۋا اگەنتتىگىنىڭ 8 - ايدىڭ 7 - كۇنى بەيجيڭنەن بەرگەن حابارى)
