باستالۋ سالتىنىڭ ناق مايدانى. سۋرەتتى انار بۇلت \ شينجياڭ گازەتىنىڭ ءتىلشىسى حۋاڭ شيڭ تۇسىرگەن
انار بۇلت لەزدىك حابارى. 8 - ايدىڭ 8 - كۇنى كەشتە، تيانشان الابىنان جينالعان دەنە تاربيە ساڭلاقتارى، جاتتىقتىرۋشىلار، تورەشىلەر جانە مەديا تىلشىلەرى كورلا قالاسى كونچى وزەنىنىڭ بويىنداعى بايىن دەنە تاربيە الاڭىندا باس قوستى، اۆتونوميالى رايوندىق 14 - كەزەكتى سپورت جارىسى وسى ارادا سالتاناتپەن باستالدى.
اۆتونوميالى رايوندىق 14 - كەزەكتى سپورت جارىسىن اۆتونوميالى رايوندىق حالىق ۇكىمەتى باس بولىپ وتكىزەدى، اۆتونوميالى رايوندىق دەنە تاربيە مەكەمەسى جانە بايىنعولين موڭعۇل اۆتونوميالى وبلىسى مىندەتكە الىپ وتكىزەدى، 8 - ايدىڭ 8 - كۇنىنەن 15 - كۇنىنە دەيىن كورلا قالاسى، يانجي حۇيزۋ اۆتونوميالى اۋدانى، باعراش اۋدانى، لوپنۇر اۋدانى قاتارلى 4 جارىس رايونىندا وتكىزىلەدى. وسى كەزەكتى سپورت جارىسى بۇرىن - سوڭدى وتكىزىلگەن سپورت جينالىستارىنىڭ ىشىندەگى گرۋپپالاردىڭ ۇيىمداستىرىلۋى ەڭ كەمەلدى، تۇرلەردىڭ ورنالاستىرىلۋى ەڭ تولىق، قاتىناسقان ادام سانى ەڭ كوپ بولعان ءبىر كەزەكتى سپورت جارىسى بولدى، تاعى تۇڭعىش رەت بۇقارالىق دەنە تاربيە جارىس قيمىلى دا ورنالاستىرىلىپ، جالپى حالىقتىڭ دەنە شىنىقتىرۋ ىنتاسىن جەبەيدى.
وسى كەزەكتى سپورت جارىسىندا باسەكەلىك دەنە تاربيە جارىسى جانە بۇقارالىق دەنە تاربيە جارىس قيمىلى ورنالاستىرىلدى، مۇنىڭ ىشىندە باسەكەلىك دەنە تاربيە جارىسى بويىنشا 20 ۇلكەن ءتۇر، بۇقارالىق دەنە تاربيە جارىس قيمىلى بويىنشا 38 ءتۇر ورنالاستىرىلدى، جالپى 14 ايماق، وبلىس، قالادان كەلگەن ۋاكىلدەر كومانداسى جارىسقا قاتىناسادى، سونداي - اق شىحىزى قالاسى شينجياڭ ءوندىرىس - قۇرىلىس بيڭتۋانى اتىنان قاتىناسۋعا ەرەكشە ۇسىنىس ەتىلدى، 9000عا جۋىق تۇتاس شينجياڭداعى جاستار مەن ورەندەردىڭ دەنە تاربيە ساڭلاقتارى جانە 1000نان اسا جاتتىقتىرۋشىلار باسەكەلىك دەنە تاربيە جارىسىنا قاتىناسادى. تۇتاس شينجياڭنىڭ كوپ جەرىندە وتكىزىلگەن بۇقارالىق دەنە تاربيە جارىس قيمىلى دا ون مىڭنان استام ادامدى قاتىناسۋعا باۋراپ وتىر.
وسى كەزەكتى سپورت جارىسىنىڭ باسەكەلىك دەنە تاربيە جارىسى بويىنشا جەڭىل اتلەتيكا، مالتاۋ، فۋتبول، باسكەتبول، ءۇش ادامدىق باسكەتبول، ۆالەيبول، قايراڭ ۆالەيبولى، نىسانا اتۋ، ساداق اتۋ، كۇرەس، دزيۋ - دو كۇرەسى، بوكس، زىلتەمىر كوتەرۋ، تايكۆوندو، تاق - تۇق دوپ، قاۋىرسىن دوپ، تور دوپ، قىلىشپازدىق، سايىسكەرلىك، ۇشاق ۇلگىسى سياقتى 20 ۇلكەن ءتۇر، 687 شاعىن ءتۇر ورنالاستىرىلدى. مۇنىڭ ىشىندە 8 - ايدىڭ 8 - كۇنىنەن بۇرىن 14 ۇلكەن ءتۇردىڭ جارىسى اياقتالدى؛ 8 - ايدىڭ 9 - كۇنىنەن باستاپ فۋتبول، باسكەتبول، ساداق اتۋ، جەڭىل اتلەتيكا، تاق - تۇق دوپ، تور دوپ 6 ءتۇردىڭ جارىسى وتەدى. (ءتىلشى حۋاڭ شيڭ)
