مۇقتار (وڭنان 1 -) وتباسى وزدەرى كوكسەپ جۇرگەن شۋە جينشاندى قارسى الدى (وڭنان 2 -). سۋرەتتى جىڭ جيا - ي تۇسىرگەن
انار بۇلت \ شينجياڭ گازەتىنىڭ ءتىلشىسى ياڭ شۋحان
”كەزىندە ول بولماسا مەن اياعىمنان ايىرىلىپ قالۋشى ەدىم، شۋە شيپاگەر مەنىڭ قۇتقارۋشىم، ونى ماڭگى ۇمىتا المايمىن...“ 8 - ايدىڭ 3 - كۇنى ترۋبكانىڭ ار جاعىنان مۇقتار امۇتتىڭ اسەرلەنگەن ءۇنى ەستىلدى.
اڭگىمەنى مىناداي ءبىر كەشىرمەدەن باستاۋعا تۋرا كەلەدى.
37 جىل ىلگەرى، نە ءبارى 21 جاستاعى مۇقتار قاشقار ايماعى قاعىلىق اۋدانىنداعى ءمالىم قۇرىلىس باسىندا جۇمىس ىستەپ جۇرگەن، اياعى سەمەنت ايلاندىرعىشقا ءتۇسىپ كەتىپ جارالانىپ قالعان سوڭ، جولداستارى تىزگىن ۇشىمەن جۇڭگو حالىق ازاتتىق ارمياسى قۇرلىق ارمياسى 950 - شيپاحاناسىنا قۇتقارۋ - ەمدەۋگە جەتكىزگەن.
ەمدەۋ قىزمەتكەرلەرى مۇقيات تۇردە جالپى بەتتىك تەكسەرۋ جۇرگىزەدى، ساراپتاۋ ارقىلى وڭ جاق تىرسەگىنىڭ تەرى تكاندارى كەمىپ قالعانىن، وڭ جىلىنشىگىنىڭ ارتەرياسى، بالتىر ارتەرياسى بۇلىنگەنىن انىقتايدى. مۇقتاردىڭ جاراقاتى اياقتىڭ اۋىر دارەجەدە زاقىمدالعان تۇرىنە كىرەتىندىكتەن ونىڭ ءوزىنىڭ دە ءۇنجىرعاسى ءتۇسىپ كەتكەن ەدى، اياعىم كەسىلىپ ەڭبەك قۋاتىمنان ايىرىلامىن با دەپ قاتتى الاڭداعان.
”اياقتى كەسۋ ءبىر جاس ازامات جونىنەن العاندا وتە ايانىشتى جايت ەدى، اقشادان ايىرىلساڭ تابۋعا بولادى، اياعىڭنان ايىرىلساڭ ورنىنان قايتا ءوسىپ شىقپايدى - عوي“. جاۋاپتى شيپاگەر شۋە جينشان ءوڭى جاداۋ تارتقان مۇقتارعا ءبىر جاعىنان اقىلىن ايتا ءجۇرىپ، ءبىر جاعىنان قايتالاي جالپى بەتتىك ساراپتاۋ جاسادى، سوڭىندا اياقتى امان الىپ قالۋعا بەكىندى. قالتاسىندا جارتى جارماعى جوق مۇقتار ەمدەۋ قاراجاتىن تاپسىرۋعا شاراسىز ەدى، وپەراتسيا اقىسىن شۋە جينشان تولەي تۇردى دا، ون نەشە ساعاتتىق شۇعىل قۇتقارۋ ارقىلى مۇقتاردىڭ اياعىن امان الىپ قالدى.
مۇقتار شيپاحانادان شىققان سوڭ شۋە جينشان دا كوپ ۇزاماي كاسىپ اۋىستىرىپ شانشي شي - انعا قايتتى. 37 جىلدان بەرى مۇقتار باس قۇراپ، بالالى بولىپ، نەمەرە ءسۇيىپ، باقىتتى تۇرمىس كەشىردى، الايدا ول كەزىندەگى جانىن الىپ قالعان اسكەري شيپاگەرىن ىزدەۋ ويىنان ءارقاشان قايتىپ كورمەدى. ارادا كوپ جىل وتە شىقتى، بيىل 4 - ايدا مۇقتار شۋە جينشاننىڭ اۋەلگى بولىمىندەگى كاسىپ اۋىستىرعان سەسترا ارقىلى شۋە جينشاننىڭ بايلانىس ءتاسىلىن تاۋىپ الدى.
تەلەفون جالعانعان ساتتە جاسى 60قا تاياعان مۇقتار تەبىرەنگەنىنەن اۋىزىنا ءسوز تۇسپەي قالدى، وتكەن جىلدارداعى سانسىز رەت سۇراستىرۋ جانە كۇنى - ءتۇنى كوكسەگەن ساتتەرى كينوداي كوز الدىنان ءوتىپ جاتتى. ”سەنى ارەڭ دەگەندە تاپتىم - عوي شۋە اعا، مەن مۇقتارمىن“،- وكسىگەن ۇنىمەن بىرگە كوز جاسى پارلاپ جاتتى. ”احۋالىڭ جاقسى ما، مەن سەنى ۇنەمى ەسكە الىپ تۇرامىن...“،- دەدى ترۋبكانىڭ ار جاعىنداعى شۋە جينشان.
شۋە جينشان قۇرلىق ارمياسى 950 - شيپاحاناسى سۇيەك اۋرۋلارى ءبولىمىنىڭ قۇرۋشىسى، ءار ءتۇرلى قيىندىعى جوعارى وپەراتسيالاردى جاساۋعا شەبەر، جەرگىلىكتى ورىندا تانىمال ەدى. بيىل 6 - ايدا شۋە جيىنشان ۇسىنىس بويىنشا ءبىلىم بەرۋ، كومەكتەسۋ، جەتەكشىلىك ەتۋ ءۇشىن شيپاحاناعا قايتادى، وسى ورايدا مۇقتار دا كوپتەن كۇتكەن جانىن الىپ قالعان قورمالىمەن كەزدەسىپ، ءوز اۋىزىمەن راقىمەتىن ايتۋعا قيىلا تىلەك بىلدىرەدى.
”ءسىز مەنىڭ قورمالىم، تۋىسىم، تۋعانىمسىز، ءسىزدى كورگەنىمە قاتتى قۋانىشتامىن..“. اۋەجايدا 77 جاسقا كەلگەندە شۋە جينشاندى تاني كەتكەندە مۇقتار جەلدىرتە كەلىپ ونى باس سالىپ قۇشاقتادى. مۇقتار وتباسى شۋە جينشانعا ءبىر بۋدا گۇل جانە دوپپا سيلادى، اۋەجايدا قاۋىشقان اسەرلى كورىنىستى ولار اپپاراتپەن ەستەلىككە الدى.
شۋە جينشاننىڭ ويىنا كىرىپ - شىقپاعانى − ونى قارسى الۋ ءۇشىن مۇقتاردىڭ وتباسىن ارەكەتكە كەلتىرىپ، جاڭا ءۇيىن اشەكەيلەپ، جاڭا كورپە دايىنداپ، ءۇي ءىشى جيھازدارىن قايتالاي رەتتەپ، 3 قويىن جەمدەپ دايىنداپ وتىرعانى ەدى.
وسىنداي اڭگىمە اينۇر مامەتتىڭ دە باسىنان وتكەن ەدى.
جامباس سۇيەك اۋرۋى كوپ جىل شىرماعان اينۋر شۋە جينشاننىڭ اتاعىن ەستىپ ونىڭ ەمدەۋ بولمەسىنە كىرگەن. مۇقيات دياگنوز قويۋ ارقىلى شۋە جينشان اينۇرعا وپەراتسيا جاساۋعا بەكىنەدى.
7 - ايدىڭ 11 - كۇنى شۋە جينشان جاۋاپتى بولىپ جاساعان ”سول جاق جامباس بۋىنىن تۇتاسىمەن جاساندى بۋىنعا الماستىرۋ وپەراتسياسى“ ءساتتى تۇردە اياقتادى. ءۇش كۇننەن سوڭ كۇتىمدەۋ توبىنىڭ دەن قويا كۇتىمدەۋىندە، سەسترانىڭ سۇيەمەلدەۋىمەن اينۇر بالنيتسانىڭ كوريدورىندا ساۋىقتىرۋ ماشىعىن جاساي باستادى.
”شۋە شيپاگەر شارۋالارعا وتە جاقسى مامىلە جاسايدى ەكەن، بىزگە ۇنەمى اقىلىن ايتىپ، كوڭىلىمىزدى ساباسىنا تۇسىرەدى، ەندىگارى بالداق تايانبايتىن بولدىم!“،- دەدى اينۇر قۋانىشىن باسا الماي.
”شيپاگەردىڭ مىندەتى اجالعا اراشاشى بولىپ، اۋرۋدى ەمدەۋ، ناۋقاستاردى اۋرۋ ازابىنان قۇتىلدىرۋ مەنىڭ ىستەۋگە ءتيىستى شارۋام“. مۇقتار جايلى ءسوز بولعاندا شۋە جينشان قولىمنان كەلگەن جاقسىلىعىمدى قىلدىم، سوعان بولا 37 جىل ەستەن شىعارماعان سۇيىسپەنشىلىگى قاتتى تەبىرەندىردى دەپ وتىر. ول بۇدان بىلاي شيپاگەرلىك جولىنا ۇزدىكسىز ادال بولىپ، ناۋقاستاردىڭ ىقىلاستى ءۇمىتى مەن سەنىمىنەن شىعاتىن بولادى.
