ليۋ لياڭچىڭنىڭ «بىنبا» اتتى رومانى وسى ەرەكشە داڭققا يە بولدى
انار بۇلت \ شينجياڭ گازەتىنىڭ ءتىلشىسى ليۋ مىڭمىڭ 8 - ايدىڭ 11 - كۇنى موريدان حابارلايدى. 8 - ايدىڭ 11 - كۇنى 11 - كەزەكتى ماۋدۇن ادەبيەت سيلىعى جاريالاندى، شينجياڭدىق جازۋشى ليۋ لياڭچىڭنىڭ «بىنبا» اتتى رومانى قاتارلى 5 تۋىندى سيلىققا يە بولدى. بۇل وسى سيلىق تاعايىندالعان 42 جىلدان بەرى شينجياڭ جازۋشىلارىنىڭ تۇڭعىش رەت سيلىق الۋى.
”بۇل مەنىڭ شينجياڭدا عانا قول جەتكىزە الاتىن تابىسىم“. سول كۇنى موري قازاق اۆتونوميالى اۋدانى يگەنبۇلاق اۋىلى سايزىگوۋ قىستاعىندا ەگىنشىلىك ىستەي ءجۇرىپ كىتاپ وقىپ، شىعارما جازىپ جاتقان ليۋ لياڭچىڭ انار بۇلت \ شينجياڭ گازەتى ءتىلشىسىنىڭ سۇحباتىن قابىلداعاندا بىلاي دەدى: ”ءادىلقازىلارعا العىس ايتامىن، شينجياڭنىڭ بايتاق جەرىنە العىس ايتامىن، مەن وسى ارادا 60 نەشە جىل تۇرمىس كەشىرىپ، شينجياڭنىڭ كوپ ۇلتتى مادەني تۇرمىسىنان تەرەڭ ءنار الدىم، «بىنبا» وسىنداي باي مازمۇندى، شۇعىلالى تۇرمىسقا قايتارعان قارىمجىم. ماعان اقىل - پاراسات جانە كۇش - قۋات بەرگەن موڭعۇل ۇلتىنىڭ باتىرلىق ەپوسى «جاڭگىرگە» العىس ايتامىن“.
ماۋدۇن ادەبيەت سيلىعىن جۇڭگو جازۋشىلار قوعامى ۇيىمداستىرادى، ءار 4 جىلدا ءبىر رەت باعالانادى، الدىڭعى 10 كەزەكتە جيىنى 48 سيلىق العان تۋىندى باعالانىپ، رومان جاسامپازدىعىن گۇلدەندىرۋ، قازىرگى زامان ادەبيەت كلاسسيك شىعارمالارىن جارىققا شىعارۋ، ءداۋىر ادەبيەت - كوركەمونەرىنىڭ بيىگىن ايگىلەۋ، ادەبيەت ىستەرىنىڭ دامۋىن ىلگەرىلەتۋ جاقتارىندا وراسان زور ۇلەس قوستى. ليۋ لياڭچىڭنىڭ سيلىققا يە بولۋى شينجياڭنىڭ وسى سيلىق جاعىنداعى اقتاڭداعىن تولتىردى. وسى كەزەكتى ماۋدۇن ادەبيەت سيلىعى بويىنشا جيىنى 238 تۋىندى باعالاۋعا قاتىناستى، بۇلاردىڭ ءبارى 2019 - جىلدان 2022 - جىلعا دەيىن باسپادان شىققان روماندار.
ليۋ لياڭچىڭ شينجياڭنىڭ ساۋان اۋدانىنان، جۇڭگونىڭ وسى زامانعى ايگىلى جازۋشىسى، جۇڭگو جازۋشىلار قوعامى شالقىما كوميتەتىنىڭ ورىنباسار مەڭگەرۋشىسى، شينجياڭ جازۋشىلار قوعامىنىڭ ءتوراعاسى. «حۋاڭشالياڭداعى كۇن شۇعىلاسىندا» اتتى ولەڭدەر جيناعى، «ءبىر ادامنىڭ قىستاعى»، «شينجياڭدا» اتتى شالقىما جيناقتارى، «بوس توپىراق»، «جول اشۋ»، «سالەم ايتۋ»، «بىنبا» اتتى روماندارى، «قاراپايىم ىستەردەن تۋعان ۇلكەن وي» اتتى سۇحبات، ەركىن جازبالار جيناعى، ت. ب بار.
«بىنبانىڭ» سيۋجەتى موڭعۇل ۇلتىنىڭ باتىرلىق ەپوسى «جاڭعىردى» ارتقى كورىنىس ەتىپ ورىلەدى، ”بىنبا“ اڭگىمەدەگى باس كەيىپكەر تۇراتىن جەردىڭ اتى، اسىل قۇمىرا دەگەن ماعىنانى بىلدىرەدى، ول ادام مەن بارلىق تىرشىلىكتىڭ انا قۇرساعىن كورسەتەدى، ءاربىر تىرشىلىكتىڭ مەكەنى. جازۋشى تاريحي ەپوستىڭ ەڭ سوڭىندا ۋاقىتتى قايتادان باستايدى، بۇرىنعىلاردىڭ وي - قيالى توقتاعان جەردە قايتادان تاۋ - وزەندەردى تۇلعالاپ، قيال مەن ويعا تولى ءارى تابيعي تۇردە پايدا بولعان، ءسوز - سويلەمدەرى رياسىز روماندى جازىپ شىعىپ، قارتايۋ بولمايتىن، ءولىم دە جوق، بارلىق ادام 25 جاستاعىداي ءومىر سۇرەتىن بىنبا دۇنيەسىن تۇلعالايدى. بۇل كىتاپ باسپادان شىققاننان بەرى ساتىلۋ مولشەرى ارتۋمەن بىرگە جاقسى باعاعا دا يە بولىپ، «تابىس» جىلدىق تىزىمدىگى مەن «جۇڭحۋا كىتاپ وقۋ گازەتى»، «جۇڭگو اقپارات - باسپا ءسوز، راديو - تەلەۆيزيا گازەتى» سياقتى كوپ ءتۇرلى كىتاپ تىزىمدىگىنە ەنگىزىلدى.
2013 - جىلى ليۋ لياڭچىڭ سايزىگوۋ قىستاعىندا موري كىتاپحاناسىن قۇرىپ، شەتكەرى، ءبىراق قاراپايىم دا تىنىش وسى قىستاققا ادەبيەت - كوركەمونەردىڭ ءنارىن قۇيىپ، ايگىلى اۋىل - قىستاق مادەنيەتى مەن ساياحاتتىڭ جەر بەلگىسىنە اينالدىردى. بۇگىنگى تاڭدا قىستاق تۇرعىندارىنىڭ قاراپايىم لاپاس ۇيلەرى ساياحاتتىق حالىقتىق تۇسەلحاناعا اينالدى، جەرگىلىكتى تاۋىق، تاس تيىرمەن ۇنى، زىعىر مايى سياقتى ەرەكشە اۋىل شارۋاشىلىق قوسىمشا ونىمدەرى ساياحاتشىلار، ءسوز جوق، ساتىپ الاتىن ”سالەمدەمەگە“ اينالدى. ”بۇرىن سىرتقا شىعىپ كەتكەن كوپتەگەن جاستار قىستاققا قايتا ورالىپ، تىنىش ءومىر، شات - شادىمان تىرشىلىك كەشىپ، اۋىل - قىستاقتى گۇلدەندىرۋگە ومىرشەڭدىك كۇش ۇستەدى“، - دەدى يگەنبۇلاق اۋىلدىق پارتكومنىڭ شۋجيى لۇي يانحۋا.
موري كىتاپحاناسىندا ليۋ لياڭچىڭ ءوزى ەڭ ماڭىزدى دەپ ساناعان «سالەم ايتۋ» جانە «بىنبا» اتتى ەكى روماندى جازدى، الدىڭعىسى 10 - كەزەكتى ماۋدۇن ادەبيەت سيلىعىندا اتى اتالعان. ”وسى جەردە، وسى توپىراقتا تۇرمىس كەشىرىپ جاتقان ءار ۇلت حالقىنىڭ ورتاق مادەني تۇرمىسىنا ارناپ كىتاپ جازعانىما قۋانامىن“، - دەدى ليۋ لياڭچىڭ.
