جۇڭگو − ەۆروپا كەزەكشى پويەزىنىڭ تۇڭعىش جۇرگىزۋشىسى جياڭ تۇڭ:
چۇڭچيڭ − شينجياڭ − ەۆروپا كەزەكشى پويەزىنىڭ ءبىرىنشى تاياقشاسىن جاقسى جەتكىزەمىن
انار بۇلت \ شينجياڭ گازەتىنىڭ تىلشىلەرى لۋ فىڭباۋ، چىن چياڭۋي
8 - ايدىڭ 12 - كۇنى، كۇن كوزىنە انتەك بۇلت ءىلىنىپ ەدى، چۇڭچيڭ سالقىنداي قالدى.
چۇڭچيڭ شاپيڭبا رايونىنا ورنالاسقان شيڭلۇڭ الاڭىنىڭ توپتاستىرۋ بەكەتىندە پويەز جۇرگىزۋشىسى جياڭ تۇڭ كابينكەگە شىعىپ، پويەز جۇرگىزۋگە ويداعىداي قامدانا باستادى، تورموزدى بوساتىپ، العا ىلگەرىلەۋ تۇتقاسىن قوزعادى... ول الدىڭعى جاققا كوز تاستاپ، پويەزدى باياۋ جۇرگىزە باستادى.
جياڭ تۇڭ − جۇڭگو تەمىر جولى چىڭدۋ مەكەمەسى توبى شەكتى سەرىكتەستىگى چۇڭچيڭ ماشينا ىستەرى بولىمشەسىنىڭ ەلەكتر پاراۆوز جۇرگىزۋشىسى، ونىڭ جۇڭگو − ەۆروپا كەزەكشى پويەزىنىڭ تۇڭعىش جۇرگىزۋشىسى سىندى تاعى ءبىر ەرەكشە سالاۋاتى بار.
” ءوزىمنىڭ تۇڭعىش جۇڭگو − ەۆروپا كەزەكشى پويەزىن جۇرگىزگەنىمە قازىرگە دەيىن سەنەر ەمەسپىن“. 54 جاستاعى جياڭ تۇڭ كابينكەدە وتىرىپ، ءوزىنىڭ تۇڭعىش جۇڭگو − ەۆروپا كەزەكشى پويەزىن جۇرگىزگەن سول ءبىر كورىنىستى ەسكە الدى.
ۋاقىتتى 12 جىلدىڭ الدىنا شەگەرەلىك. جۇڭگو − ەۆروپا كەزەكشى پويەزىنىڭ تۇڭعىش جۇرگىزۋشىسى بولعان جياڭ تۇڭ داڭق، ماقتانىش سەزىنۋمەن بىرگە، جاۋاپكەرشىلىگىنىڭ دە اۋىر ەكەنىن تەرەڭ سەزىندى. جۇڭگو − ەۆروپا كەزەكشى پويەزىنىڭ حاۋىپسىز اينالىمىنا شىنايى كەپىلدىك ەتۋ ءۇشىن، ول ساباقحاناداعى ەلىكتەمەلى ايداۋ ارقىلى جۇمىس تەحنيكاسى شەبەرلىگىنە قايتا - قايتا جاتتىعىپ، تاجىريبە قورىتىندىلادى. ول تاعى پاراۆوزدىڭ قىزمەت قاعيداسى، قۇرىلىم قاريتاسى سياقتى قاتىستى كىتاپتاردى دەن قويا زەرتتەپ، ماتەريالداردى الىپ ماشينا اراسىنا جۇرەلەپ وتىرا قالىپ، ءتۇرلى بولشەكتەر مەن ونىڭ قىزمەت قاعيدالارىنا قانىقتى جانە ونى يگەردى.
جۇڭگو − ەۆروپا كەزەكشى پويەزىن تۇڭعىش جۇرگىزەتىن كۇن بارعان سايىن جاقىنداي ءتۇستى، پويەز جۇرگىزۋدەن ءبىر كۇن بۇرىن كەشتە جياڭ تۇڭ تەبىرەنگەنىنەن ۇيىقتاي المادى: ”مەن جۇرگىزۋگە جاتتىعۋ ارەكەتتەرىن وي ەلەگىمنەن قايتا - قايتا وتكىزە بەردىم“.
2011 - جىلى 3 - ايدىڭ 19 - كۇنى تاڭەرتەڭ ەرتە جياڭ تۇڭ فورمالى كيىمىن، باس كيىمىن ادەمىلەپ كيدى جانە گالستۋگىن تاقتى، ارنايى 2 رەت ارتىق تەكسەرىپ، جۇرگىزۋشىلەر بولمەسىنە 15 مينۋت بۇرىن جەتتى. پاراۆوزدىڭ سىرتىن تەكسەرگەننەن كەيىن، كابينكەگە شىعىپ، تاعى دا ءبىر - بىرلەپ قاداعالاي تەكسەرىپ، قاتەلىك جوق ەكەنىن تۇراقتاندىردى، سىناق سيگنالىن سىناپ كورگەننەن كەيىن، پويەز جۇرگىزۋ بۇيرىعىن كۇتتى.
”ول ارادا ادامدار قايشالىسىپ، قۇددى كوكتەم مەرەكەسىندەگىدەي دۋماندى بولدى“. 10 نەشە جىل وتسە دە، تۇڭعىش رەتكى جۇڭگو − ەۆروپا كەزەكشى پويەزىن (چۇڭچيڭ − شينجياڭ − ەۆروپا) جۇرگىزگەن كورىنىس جياڭ تۇڭنىڭ كوكەيىنە تەرەڭ ورناپ قالدى.
پويەز جۇرگىزۋ بۇيرىعىن تاپسىرىپ العاننان كەيىن، جياڭ تۇڭ گۋدوك شالىپ، تورموزدى بوساتىپ، العا ىلگەرىلەۋ تۇتقاسىن قوزعادى، ۇزدىك - سوزدىق گۋدوك ءۇنى ىشىندە تۇڭعىش كەزەكتى جۇڭگو − ەۆروپا كەزەكشى پويەزى (چۇڭچيڭ − شينجياڭ − ەۆروپا) ەلەكتروندىق ونىمدەردى تيەپ، چۇڭچيڭ تۋانجيە قىستاعىنان جولعا شىقتى. بۇل كەزەكشى پويەز داجوۋ، انكاڭ، شي - ان، لانجوۋ، ءۇرىمجى جانە الاتاۋ ساعاسى ارقىلى شەكارادان شىعىپ، نىسانالى جەر − گەرمانيانىڭ دۋيسبۋرگ قالاسىنا جەتتى، جالپى 11 مىڭ 179 كيلومەتر جول باسىپ، 16 كۇن ۋاقىت جۇمساپ، جۇڭگو − ەۆروپا كەزەكشى پويەزى قاتىناۋىنىڭ شىمىلدىعى اشىلدى.
كوپتەگەن ادام جۇڭگو − ەۆروپا كەزەكشى پويەزىن جياڭ تۇڭنىڭ جالپى بارىستا ءبىر ءوزى جۇرگىزۋ مىندەتىنىڭ جوقتىعىن بىلە بەرمەيدى. ءىس جۇزىندە، چۇڭچيڭنەن دۋيسبۋرگكە دەيىن، جول بويى نەشە ونداعان جۇرگىزۋشى اۋىسىپ وتىرادى، ونىڭ مىندەتى پويەزدى تۋانجيە قىستاعىنان 242 كيلومەتر شالعايداعى سىچۋاننىڭ داجوۋىنا جەتكىزۋ، ياعني جۇڭگو − ەۆروپا كەزەكشى پويەزىنىڭ (چۇڭچيڭ − شينجياڭ − ەۆروپا) ءبىرىنشى تاياقشاسىن جەتكىزۋ.
سول كۇنى 3 ساعاتتان كەيىن جۇڭگو − ەۆروپا كەزەكشى پويەزى سىچۋاننىڭ داجوۋىنا ءساتتى جەتىپ، جياڭ تۇڭ مىندەتىن ويداعىداي ورىندادى. وسىدان كەيىنگى جولدى جول بويىنداعى كوپتەگەن جۇرگىزۋشى بىرگە سەلبەسىپ ورىندايدى.
”پويەزدەن تۇسكەننەن كەيىن، ىشتەي نەشە كۇنگە دەيىن الاعىزىپ ءجۇردىم“. پويەز توپتاستىرۋ الاڭىندا ۇزىننان - ۇزاققا سوزىلعان پويەزدەر قايشالىسىپ جاتادى، بۇعان جياڭ تۇڭنىڭ بويى ۇيىرلەسىپ كەتكەن، الايدا جۇڭگو − ەۆروپا كەزەكشى پويەزى كوزىنە شالىنا قالسا بولعانى، ول ەرىكسىز قايتا - قايتا نازار سالادى.
ۋاقىت زىمىراپ وتە شىقتى، چۇڭچيڭنەن باستاۋ العان ەۆروپاعا باراتىن حالىقارالىق جۇك تاسىمال كەزەكشى پويەزى قاتىناعاننان كەيىن، ءۇرىمجى، شي - ان، چىڭدۋ، جىڭجوۋ، ي - ۋ سياقتى جەرلەردەن ورتا ازياعا، ەۆروپاعا باراتىن جۇك تاسىمالى كەزەكشى پويەزى، اسىرەسە، ”ءبىر بەلدەۋ، ءبىر جولدى“ بىرگە قۇرۋ باستاماسى العا قويىلعاننان كەيىن، بۇكىل ەلدىڭ جەر - جەرىندەگى جۇڭگو − ەۆروپا كەزەكشى پويەزدەرى جەدەل دامىدى.
جۇڭگو − ەۆروپا كەزەكشى پويەزى (چۇڭچيڭ − شينجياڭ − ەۆروپا) العاش قاتىناعان كەزدە اپتاسىنا 1 − 2 كەزەك قانا جۇرەتىن، ”ءبىر بەلدەۋ، ءبىر جولدى“ بىرگە قۇرۋ باستاماسى العا قويىلعاننان بەرى بارعان سايىن كوبەيگەن كەزەكشى پويەزدەر چۇڭچيڭنەن اتتانىپ، شينجياڭ ارقىلى ورتا ازيا جانە ەۆروپا بازارىنا جول الدى، ەڭ كوپ بولعاندا ءبىر اپتادا 7 − 8 كەزەك قاتىنادى، قازىرگە دەيىن جالپى 14 مىڭ كەزەك قاتىناپ، ورنىقتى اينالىم جەلىسى 50گە تاياپ، ەۆروپا − ازيا قۇرلىعىن تۇتاستىراتىن ناعىز حالىقارالىق ساۋدا كۇرە تامىرىنا اينالدى. تاسىلعان تاۋارلار دا ەڭ العاشقى ەلەكتروندىق ونىمدەر، تۇتاس اۆتوكولىك سياقتىلاردان قازىرگى زەردەلى تەرمينال، تۇتاس اۆتوكولىك جانە ۇساق بولشەكتەر، جەڭىل ونەركاسىپ ونىمدەرى سياقتى 10 مىڭنان استام زاتقا دەيىن كەڭەيدى.
كەيدە ەرەن بازاردان زات ساتىپ العاندا زات سورەسىندەگى شەتەل تاۋارلارىن كورگەندە، جياڭ تۇڭ ماقتانىشپەن: ”بۇل ءبىزدىڭ كەزەكشى پويەزىمىزبەن تاسىپ اكەلىنگەن بولۋى مۇمكىن“ دەپ ويلايتىن بولدى.
جياڭ تۇڭ كەلەر جىلى زەينەتكە شىعادى، الايدا قايراتىنان قايتا قويعانى جوق، تەك كەزەككە شىعۋ مىندەتىن تاپسىرىپ السا بولعانى، ول قورجىن - قولاڭىن رەتتەپ پاراۆوزعا شىعادى. ”چۇڭچيڭنەن شىعىپ شينجياڭدى باسىپ ءوتىپ، ەۆروپاعا بارادى، ەڭ سوڭعى كۇنگە دەيىن قىزمەت ىستەسەم دە، كەزەكشى پويەزدىڭ ءبىرىنشى ۇتىلامالى تاياقشاسىن جاقسى جەتكىزەمىن“، - دەدى ول.
”جۇڭگو − ەۆروپا كەزەكشى پويەزىن جۇرگىزىپ شينجياڭعا بارۋدى ويلاپ كوردىڭىز بە“؟ - دەپ سۇرادى ءتىلشى.
”ارينە ويلادىم، شينجياڭعا، ءتىپتى، ەۆروپاعا دەيىن ايداپ بارۋدى ارمانداعان ەدىم“. ءتىلشىنىڭ ءسوزى اياقتاماي جاتىپ جياڭ تۇڭ دەرەۋ جاۋاپ قايتاردى.
”قىزمەت سيپاتىنىڭ تالابى بويىنشا ءبىزدىڭ قاراستى رايوننان اتتاپ پويەز جۇرگىزۋىمىزگە بولمايدى“، - دەدى جياڭ تۇڭ وكىنىشپەن، - ”كەلەر جىلى زەينەتكە شىققاننان كەيىن مەن الاتاۋ ساعاسىنا بارىپ جۇڭگو − ەۆروپا كەزەكشى پويەزىنىڭ شەكارادان قالاي شىققانىن كورەمىن“.
